Минск – Kurir.mk

Лукашенко: Западот со санкции нема да ги фрли на колена Минск и Москва

Ивана Ефремовски — Fri, 29 Apr 2022 10:53:54 +0000

Западот со санкции нема да успее да ги фрли на колена Минск и Москва, изјави денеска белорускиот претседател Александар Лукашенко. Низ разговор со граѓаните во регионот на Гомељ, Лукашенко истакна дека Белорусија и Русија имаат доволно ресурси, техонологија и интелигенција. Тој повтори дека притисокот со санкции, принудува на барање нови можности. -Пазарот е отворен, мора да се движите, а не да плачете, додаде белорускиот претседател. (МИА)

Во Минск уапсен портпаролот на „А1“

Тале Кристо — Sat, 11 Dec 2021 15:00:11 +0000

Портпаролот на телекомуникацискиот оператор „А1“ во Белорусија, Никлај Бределев е уапсен, поради што Телеком Австрија и Министерството за надворешни работи во Виена реагираа со голема загриженост. Според Телеком Австрија, кој е сопственик на „А1“ во Белорусија, нивниот тамошен портпарол е уапсен под обвинение за ширење незгодни информации за компанијата. – Покрај тоа, објавено е и понижувачко видео со лични податоци за неговиот приватен живот, соопшти концернот во Виена. Групацијата А1 Телеком Австрија жестоко го осуди мешањето во приватната сфера на своите вработени. – А1 Белорусија има строги правила и процедури за спречување на нелегални прекршувања на безбедноста на податоците и ги истражува сите сомнежи. Ќе ги искористиме сите расположливи средства преку правни и дипломатски средства за да ги поддржиме нашите вработени во таа земја и да ги заштитиме, се наведува во соопштението. Австриското Министерство за надворешни работи изрази длабока загриженост поради апсењето на портпаролот на „А1“ во Белорусија. – Ги осудуваме понижувачките постапки на белоруските власти. Основните права и правото на слобода на сите луѓе мора секогаш да бидат гарантирани, се вели во соопштението.

Советот на НАТО бара итна и независна истрага за инцидентот со авионот во Минск

Тале Кристо — Wed, 26 May 2021 14:30:12 +0000

Северноатлантскиот совет остро го осуди присилното слетување на авионот на Рајанер во Минск, се вели во соопштението на НАТО издадено по состанокот на постојаните претставници на членките на Алијансата.

Советот го осуди и апсењето на познатиот белоруски новинар Роман Протасевич, кој беше во авионот и Софија Сапега, се вели во соопштението.

Во документот се нагласува дека притворот на Протасевич е „навреда за принципите на политичко несогласување и слобода на медиумите“.

– Белорусија мора веднаш и безусловно да ги ослободи господин Протасевич и госпоѓа Сапега. Сојузниците на НАТО ја повикуваат Белорусија да ги почитува основните човекови права и слободи и да ги почитува правилата на меѓународниот поредок, се вели во соопштението.

Северноатлантскиот совет поддржува итна независна истрага за инцидентот со авионот на Рајанер во Минск.

– Ние ги поддржуваме повиците за брза и независна истрага, вклучително и од Меѓународната организација за цивилно воздухопловство“, се вели во соопштението.

Советот на НАТО исто така ги поддржува мерките преземени од сојузниците во врска со овој инцидент.

Илјадници Белоруси протестираат на улиците на Минск поради смртта на антивладин активист

Тале Кристо — Fri, 13 Nov 2020 11:43:45 +0000

Илјадници Белоруси, со свеќи и цвеќиња, синоќа излегоа на улиците на Минск да изразат жал и сочувство за смртта на 31-годишниот демонстрант, Роман Бондаренко, за кого се наведува дека бил претепан од безбедносните сили, по што починал во болница. Британските медиуми, цитирајќи активисти на социјалните мрежи, пренесуват дека и денеска многу Белоруси се на улиците на Минск поради смртта на Бондаренко. Сведоци наведуваат дека Бондаренко бил приведен откако бил туркан од луѓе во цивилна облека, кои дошле на игралиштето за да ги отстранат црвено-белите ленти што го претставуваат протестното движење против долгогодишниот претседател Александар Лукашенко. Белоруското Министерство за внатрешни работи ја негира одговорноста за смртта на активистот и соопшти дека тој бил убиен за време на судири со цивили. Смртта на Бондаренко претставува кулминација на повеќемесечните протести против Лукашенко, кои почнаа по спорните претседателски избори во август. „Шокирани сме од смртта на Роман Бондаренко. Неверојатен е цинизмот и суровоста на режимот, како и отвореното непочитување на желбата на луѓето за промени”, напиша на Твитер министерот за надворешни работи на Литванија, Линас Линкевичиус. Светлана Тихановскаја, која му се спротивстави на Лукашенко на претседателските избори, по што побегна во егзил, Бондаренко го нарече „белоруски херој“. „За жал, и покрај сите напори на лекарите, пациентот почина“, се наведува во соопштението на Министерството за здравство на Белорусија.

Предупредувачки истрели на полицијата во Минск поради нови протести против Лукашенко

Тале Кристо — Sun, 01 Nov 2020 16:15:01 +0000

Белоруската полиција испука предупредувачки истрели во воздух и почна со апсење на илјадници демонстранти кои маршираа низ главниот град, барајќи оставка од долгогодишниот лидер Александар Лукашенко. Големи протести се одржуваат во главниот град Минск веќе 12 викенди по ред, со притисок врз Лукашенко, кој рече дека не планира да се повлече и покрај кризата. Лукашенко делумно ги затвори границите на Белорусија со Западот, го смени министерот за внатрешни работи и нагласи дека сите демонстранти кои допреле полицајци кои ги надгледуваат протестите треба „барем да загубат рака“. Најмалку две колони демонстранти беа формирани во Минск, а околу 20.000 луѓе беа во една, објави весникот „Наша нива“. Мобилниот интернет не беше достапен во главниот град, а неколку метро-станици беа затворени.

Во Минск судири помеѓу полицијата и демонстрантите, приведени и новинари

Тале Кристо — Sun, 11 Oct 2020 14:15:36 +0000

Полицијата и демонстрантите денеска се судрија во Минск откако припадниците на белоруските безбедносни сили се обидоа да го растурат протестот и почнаа да приведуваат. Демонстрантите возвратија фрлајќи предмети врз полицајците. Руската новинска агенција ТАС С јави дека приведени се тројца нејзини дописници, кои имале добиено акредитации од белоруското Министерство за надворешни работи. Белоруската полиција привела уште еден новинар на ТАС С, заедно со тројца дописници на новинската агенција БелаПАН и еден фоторепортер на белорускиот весник „Нови час“. По спорните претседателски избори одржани на 9 август, граѓаните протестираат тврдејќи дека изборните резултати се фалсификувани и бараат оставка од претседателот Александар Лукашенко.

Рама подготвен да замине во Минск за да посредува во надминување на политичката криза

Магдалена Андонова — Wed, 19 Aug 2020 18:20:42 +0000

Албанскиот премиер Еди Рама, во својство на претседавач на Организацијата за безбедност и соработка во Европа (ОБСЕ) изрази подготвеност да го посети Минск и да разговора со сите страни, вклучени во конфликтот, јави телевизијата Топ чанел. Според теливизијата, Рама би отпатувал за Минск заедно со министерката за надворешни работи на Шведска, Ан Линде, земја која следната година го презема претседавањето со ОБСЕ. И главните актери на европската политика се движат во иста насока, наведува телевизијата и додава дека пред денешниот вонреден самит на ЕУ за Белорусија, Европскиот совет, Шарл Мишел телефонски разговарал со Рама. Извори блиски до премиерот Рама за Топ чанел изјавија дека тој во изминатите неколку дена имал интензивни контакти поради кризата во Белорусија и вклученоста на ОБСЕ во неа. (МИА)

Германија поддржува проширување на санкции кон Минск

Тале Кристо — Mon, 17 Aug 2020 10:35:13 +0000

Германија соопшти дека е подготвена да поддржи проширување на санкциите на Европската унија против водечките фигури во Белорусија поради нивните крвави акции врз демонстрантите. Откако министрите на ЕУ во петокот се согласија да изготват список на цели во Белорусија за нова рунда санкции, портпаролот на германската влада Штефен Зајберт рече дека треба да се разгледаат дури и посилни мерки. – Секако, ја разгледуваме можноста за проширување на санкциите кон другите водечки фигури, изјави тој. Германија е на чело на ротирачкото претседателство на ЕУ. Зајберт ги нарече масовните демонстрации против спорните претседателски избори во текот на овој месец – „импресивни“ и побара итно прекинување на насилните репресии и ослободување на „политички затвореници“. – Овие луѓе треба да знаат дека Европа стои крај нив, рече тој. Зајберт побара „национален дијалог“ меѓу владата и опозицијата „да се надмине кризата“, додавајќи дека Организацијата за безбедност и соработка во Европа (ОБСЕ) може да игра улога со „преглед на изборите“. ОБСЕ испраќа набудувачи во Белорусија од 2001 година, но за овие избори наведоа дека не биле поканети да ги следат претседателските избори.

ВИДЕО: Масовни антивладини демонстрации во Минск

Тале Кристо — Sun, 16 Aug 2020 15:29:47 +0000

Десетици илјади Белоруси се собраа во Минск за да учествуваат на „Маршот за слобода“ по контроверзните претседателски избори кога победи Александар Лукашенко. Учесниците на антивладините демонстрации извикуваа „Заминувај“ и „Да живее Белорусија“. Тие се движеа по Булеварот за независност, откако опозицијата повика на најголеми демонстрации од гласањето пред една недела. На маршот учествуваа и група ветерани во воени униформи. „Ние сме против насилство“ и „Лукашенко мора да одговара за тортура и смртни случаи“ се само некои од транспарентите на демонстрациите. Демонстрантите носеа и 100-метарско црвено-бело знаме. Провладина демонстрација се случи претходно. Претседателот Лукашенко се појави и одржа говор. Тој повика на спасување на земјата од уништување. Според западни медиуми, Лукашенко имал втор телефонски разговор со рускиот лидер Владимир Путин. Тие разговарале за ситуацијата во Белорусија. За денеска е организирана најголемата демонстрација против владеењето на Лукашенко во државата. Во петокот, белоруската Влада се извини и почна да ги ослободува демонстрантите. Протестите избија во Белорусија откако долгогодишниот лидер Александар Лукашенко победи на изборите во неделата. На власт е од 1994 година, и сега го освои шестиот мандат со поддршка од 80 отсто гласови.

Илјадници луѓе на протест во Минск оддават почит на починатиот демонстрант

Тале Кристо — Sat, 15 Aug 2020 13:42:32 +0000

Неколку илјади луѓе се собраа повторно во Минск во знак на протест против реизборот на претседателот Александар Лукашенко. Демонстрантите се собраа околу метро станицата во западен Минск за да му оддадат почит на демонстрантот кој неодамна таму почина. Сопругата на починатиот белоруски демонстрант изјави дека не верува во официјалниот извештај дека Александар Тарајковски загинал кога му експлодирала бомба во раката, која тој имал намера да ја фрли кон полицијата, туку тврди дека тој бил убиен од полицијата. Елена Герман денеска изјави, неколку часа пред погребот на нејзиниот 34-годишен партнер, дека е сигурна дека тој бил убиен од страна на полицијата. Тарајковски загина во понеделникот, во протестите во центарот на Минск кои избувнаа поради несогласувањата со официјалните резултати од претседателските избори, според кои, авторитарниот претседател Александар Лукашенко, кој е на власт од 1994 година, го освои шестиот мандат. На Герман и било дозволено да ја посети мртовечницата дури во петокот и да го види телото на нејзиниот сопруг, кој почина четири дена порано. Таа рече дека не верува дека тој држел експлозив во рака. – Постои шав во пределот на градниот кош, но исто така, и црна модринка која е мала, но ние ја забележавме. Неговите раце и нозе се целосно непроменети, нема дури ни модринки, рече таа. – Очигледно е дека станува збор за куршум во градите, рече таа. Белоруското Министерство за внатрешни работи одби повторно да ја коментира ситуацијата, по првичното тврдење дека еден демонстрант починал од рачна граната. Герман рече дека ќе бара целосна истрага, ја повика белоруската организација за човекови права да и помогне, и рече дека сака меѓународни експерти да учествуваат во истрагата. – Се чувствувам бесно и лута сум. Затоа сакам правда, рече таа.