Мирослав Ќиро Блажевиќ – Kurir.mk

ФОТО: Посебна почит за Ќиро, во неговото кафуле поставена омилената нарачка

Ивона Петрова — Wed, 08 Feb 2023 11:09:50 +0000

Кафулето „Чарли“ во Загреб во кое легендарниот фудбалски тренер Мирослав Ќиро Блажевиќ, секојдневно ги пиел своето кафе, на свој начин се прости од омилениот гостин. На шанкот ја поставиле неговата секојдневна нарачка, мало макијато и цедевита од лимон. Поставена била и фотографија од Блажевиќ заедно со дрес на Динамо, пишува Индекс.хр. Подоцна, нарачката ја преместиле на посебна маса поставена покрај прозорецот на кафулето. Ќиро Блажевиќ почина денеска, ден пред неговиот 88-ми роденден.

Почина легендарниот Ќиро Блажевиќ

Ивона Петрова — Wed, 08 Feb 2023 07:13:18 +0000

По долго и тешко боледување почина Мирослав Ќиро Блажевиќ, фудбалскиот тренер над сите тренери. Ќиро почина на 87 годишна возраст, еден ден пред неговиот роденден, во болница откако синоќа му се влошила здравствената состојба. Повеќе години се бореше со карцином на простата, а во последната негова изјава дадена пред само неколку дена, истакна дека целиот организам му е зафатен од болеста. Зад себе ја остави сопругата Зденка со која има три деца, ќерките Барбара и Катарина и синот Мирослав. Ќе остане запаметен како фудбалска легенда, тренер над сите тренери. Прогласен е за „Тренер на векот“ на Динамо, како експерт кој по 24 години на клубот му ја донесе титулата првак. Тој ја промени и крвната слика на целиот клуб, кој потоа доживеа невидена популарност. Хрватската фудбалска репрезентација ја предводеше на 73 натпревари, а ја донесе и до светска бронза во Франција во 1998 година. Блажевиќ му беше ментор и на актуелниот селектор на „коцкестите“, Златко Далиќ кој неодамна му ја посвети бронзата од Мундијалот во Катар. Својата блескава тренерска кариера Блажевиќ ја започна во Швајцарија, во нисколигашот Вевеј, потоа го презеде Сион со кој го освои првиот тренерски трофеј, Купот на Швајцарија во 1974 година. Ги предводеше и Лозана Спорт а во 1976 година ја водеше швајцарската фудбалска репрезентација на два меча. По враќањето во Југославија работеше во Риека, Динамо. Покрај Швајцарија, беше селектор и на Југославија и Хрватска, а на клупско поле раководеше со клубови во уште шест земји: Франција (Нант, 1988-1990), Грција (ПАОК, 1991/1992), Словенија (Мура 2003) и Кина (Шангај Шенхуа, 2010).

Легендарниот фудбалски тренер Ќиро Блажевиќ не верува дека ќе ја победи болеста: И лекарите кренаа раце од мене

Ивона Петрова — Mon, 31 Oct 2022 12:50:58 +0000

Легендарниот фудбалски тренер Мирослав Ќиро Блажевиќ повторно отворено проговори за битката со ракот на простата. -Мојот син доаѓа и вели: „Тато, го кажа истото дека ќе умреш пред пет години, па жив си“. Тој сака да ја ублажи вистината, но и лекарите се откажаа од мене, изјави тој за Стори.хр. Тој верува дека овој пат нема да може да ја победи болеста. -Време е за мене, имам 88 години, многу оставив зад себе. Што да се прави. Ја кажувам вистината, а тоа е дека имам рак со пет метастази. Тогаш е фатално. Во секој случај, не сакам било кој да ме жали, направив премногу за да не бидам мирен. Премногу добро. Колку и да се трудам, не можам да најдам кому сум му нанел зло..., рече тој. Повторно потсети дека не жали за ништо. -Кога ќе ги погледнам моите колеги, скоро сите починаа: Бариќ, Ивиќ, Зебец. И моето време дојде. Човек треба да се помири со тоа, без да кука и да жали. Затоа би ги замолил луѓето: не жалете за мене затоа што мирно си одам и тоа е многу убаво. Не знам како треба да умрат сите лоши луѓе кои направиле толку лоши работи? Кога треба да умреш, почнуваш да веруваш, но еве ме... Јас и ти пиеме кафе..., заклучи тој.