Мишел Барние – Kurir.mk

Барние: Договор со Велика Британија е можен во петок

Тале Кристо — Thu, 17 Dec 2020 14:33:50 +0000

Преговарачот на ЕУ за трговските односи по Брегзит меѓу Брисел и Лондон, Мишел Барние изјави дека долгоочекуваниот договор е можен во петок. Според извори на кои се повикуваат некои светски агенции, Барние пред европратениците изјавил дека ќе биде „тешко, но можно“ до петок да се постигне трговски договор по Брегзит со Велика Британија. Политичките групи во Европскиот парламент денеска предупредија дека ако не го добијат текстот на договорот до недела, нема да можат да го ратификуваат пред Велика Британија да го напушти единствениот пазар на ЕУ на 31 декември.

Барние: Следните неколку дена се важни за договорот со Лондон

Тале Кристо — Mon, 14 Dec 2020 11:28:56 +0000

Главниот преговарач на ЕУ, Мишел Барние изјави дека следните неколку дена ќе бидат важни доколку се сака договорот со Велика Британија да стапи во сила на 1 јануари 2021 година. – Наша одговорност е на овие разговори да им ја дадеме секоја можна шанса за успех. Никогаш порано не се преговарало за таков сеопфатен договор на толку транспарентен начин и за толку кратко време, напиша Барние на Твитер. Откако претседателката на Европската комисија Урсула фон дер Лајен и британскиот премиер Борис Џонсон вчера се согласија да продолжат преговорите и напорите за постигнување решение за идните односи со Велика Британија и после претходно утврдениот „краен рок“ за договор, Барние утрово ги информираше претставниците на земјите-членки на ЕУ за моменталната состојба во преговорите. Разговорите меѓу главните преговарачи на Брисел и Лондон, Мишел Барние и Дејвид Фрост, продолжуваат денеска во Брисел.

Барние: Карантинот заврши, продолжуваат преговорите со Лондон

Ивона Петрова — Fri, 27 Nov 2020 10:41:25 +0000

Главниот преговарач на ЕУ, Мишел Барние за вечерва најави продолжување на разговорите со Велика Британија за Брегзит. Преговорите ЕУ-Велика Британија за идните односи беа прекинати минатата недела поради позитивниот тест на Ковид-19 кај член на делегација на ЕУ. – Според белгиските правила, јас и мојот тим веќе не сме во карантин. Физичките состаноци можат да продолжат. Вечерва патувам за Лондон за да продолжам со разговорите со британскиот преговарач Дејвид Фрост и неговиот тим, напиша Барние на Твитер. Мишел Барние денеска ги информираше земјите членки на ЕУ и Европскиот парламент за состојбата во преговорите со Велика Британија, велејќи дека „истите значајни разлики сè уште постојат“. Преодниот период, пред конечниот излез на Велика Британија од ЕУ, завршува на 31 декември. Брисел предупредува дека е доцна навреме да се постигне и ратификува договорот што треба да ги дефинира идните односи меѓу ЕУ и Велика Британија, особено оние што се однесуваат на трговијата.

Џонсон: Се очекуваат добри трговски решенија со ЕУ

Тале Кристо — Fri, 03 Jul 2020 10:52:15 +0000

Се очекуваат добри постбрегзит трговски решенија со ЕУ, но и доколку не бидат постигнати тогаш постојат други одлични солуции, изјави денеска британскиот премиер Борис Џонсон. Тој истакна дека на постигнувањето договор со ЕУ гледа со поголем оптимизам за разлика од Мишел Барние, европскиот преговарач за постбрегзит договори и усогласувања.

Барние со остри предупредувања кон Лондон за Брегзит

Предраг Кукиќ — Thu, 24 Jan 2019 08:50:38 +0000

Шефот на европскиот преговарачки тим за Брегзит, Мишел Барние, го предупреди Лондон дека во случај на Брегзит без договор, одговорноста ќе падне врз Британците. Во говор пред европскиот економски и социјален комитет, европскиот преговарач потсети дека ЕУ ќе остане солидарна со Ирска во секое сценарио, вклучувајќи го и Брегзитот без договор. -Во тој случај, Обединетото Кралство ќе ја има тешката одговорност да изнајде решение за прашањето на ирската граница, рече Барние. Договорот за повлекување од ЕУ беше отфрлено од страна на британскиот парламент токму поради решението за ирската граница кое предвидува привремен заштитен механизам наречен “бекстоп“. Тврдите поддржувачи на Брегзит сметаат дека ова решение претставува де факто останува во европскиот заеднички пазар и царинска унија. ЕУ на тоа одговори дека овој механизам е неопходен додека не се испреговара идното трговското партнерство помеѓу двете страни. Барние напомена дека ЕУ е подготвена да преговара повторно за идното партнерство меѓу Лондон и Брисел, но дека не доаѓа предвид бекстопот да биде предмет на нови преговори. Европскиот главен преговарач истакна дека сѐ уште верува дека британската премиерка, Тереза Меј и британскиот парламент ќе успеат да постигнат договор пред 29 март, датумот кога Лондон треба да се повлече од ЕУ.

Барние: ЕУ е отворена за „поамбициозен“ договор за Брегзит

Ивона Петрова — Fri, 18 Jan 2019 06:57:56 +0000

Европската унија е отворена за можноста за постигнување договор со Велика Британија за нејзино истапување од ЕУ, кој би бил „поамбициозен“ од сегашниот, што во вторникот го отфрли британскиот Парламент, изјави главниот европски преговарач за Брегзит, Мишел Барние. – Ако Британците велат дека сакаат поамбицизен договор, ние сме отворени за разговор, изјави синоќа Барние во Лисабон по средбата со португалскиот премиер Антонио Коста. Коста, пак, од своја страна изјави дека сега, по одбивањето на договорот од страна на Парламентот во Лондон, „следниот чекор не зависи од ЕУ или од Барние, туку од Велика Британија“. Барние, претходно на средба со членови на португалскиот Парламент, изјави дека е ЕУ ќе усвои план за „непредвидливи ситуации“, со цел да може да се справи со евентуалниот Брегзит без договор. – Доколку не постигнеме договор, ќе спроведеме мерки за непредвидливи ситуации. Но, тоа ќе биде многу тешко и ќе биде спроведено во клима на недоворба. Најдобро решение е постигнување на договор, додаде Барние. Отфрлањето на договорот за Брегзит што лани во ноември го постигнаа Владата во Лондон и Брисел, од страна на британскиот Парламент, ги зголеми стравувањата од истапување на Велика Британија од ЕУ на 29 март без договор, што ги натера двете страни да бараат нови алтернативни решенија за „разводот“. МИА

ЕУ ја предупреди Велика Британија дека има 13 седмици за успешно завршување на преговорите

Даниел Василев — Fri, 20 Jul 2018 14:26:52 +0000

Главниот преговарач на ЕУ за Брегзит Мишел Барние го предупреди денеска Лондон дека располага со 13 седмици за постигнување договор. Според него, 80 отсто од текстовите дискутирани во нацрт-договорот се одобрени од страна на ЕУ и Велика Британија. Тој истакна дека на денешниот состанок на Советот на ЕУ, било повторно потврдено единството на земјите-членки на Унијата, јави БТА. Европската комисија претстави процена за неопходните активности во случај да не се постигне договор. - Дебатата во Велика Британија не е завршена, како што може да се види, рече Барние. Ние сме отворени за какви било предлози кои ќе можат вистински да бидат имплементирани. Ние мора да бидеме подготвени за секаков развој на ситуацијата, предупреди тој. Барние истакна дека најконтроверзно прашање останува решението за пограничниот режим меѓу Ирска и Северна Ирска. Предвидено е во октомври Европскиот совет да го оцени текот на разговорите и ако тие се успешни, да дозволи продолжување на разговорите за идните односи на Велика Британија со ЕУ, како и воведување на преоден рок пред суштинската разделба. На барање на Лондон и со консензус, државите од ЕУ можат да го продолжат рокот за преговори, кој истекува наесен. МИА