мито – Kurir.mk

Приведен грчки државјанин поради нудење поткуп

Ристе Здравков — Mon, 11 Sep 2023 06:08:04 +0000

Денеска (10.09.2023) во 20.10 часот на наплатна рампа Демир Капија полициски службеници од Полициска станица зa граничен надзор Михајлово при РЦ за ГР Југ го лишија од слобода Г.К.(35) од Грција поради сторено кривично дело нудење поткуп. Имено, Г.К. кој управувал товарно возило "сканија" со полуприколка, и двете со бугарска национална ознака, при контрола на документите кои ги дал на увид понудил банкнота од пет евра како поткуп на полицискиот службеник кои веднаш му биле вратени назад. За случајот е известен јавен обвинител од ОЈО Кавадарци, од кој се добиени насоки лицето да биде приведено и задржано во полициска станица, а против возачот ќе биде поднесена кривична пријава по брза постапка пред надлежен суд во Неготино.

БАРАЛЕ ПОТКУП И СЕКСУАЛНИ УСЛУГИ: Вкупно осум години затвор за двајца универзитетски професори од Економскиот факултет

Тале Кристо — Thu, 07 Sep 2023 13:08:32 +0000

Основниот Кривичен суд Скопје денеска ги прогласи за виновни за примање и давање поткуп тројцата професори од Економскиот факултет при Универзитетот „Св.Кирил и Методиј“ во Скопје, во врска со предметот „Еразмус“. На Бобек Шуклев и Славе Ристевски судот им изрече вкупно осум години казна затвор, додека Драган Денковски доби условна казна затвор.

На професорот Бобек Шуклев за примање поткуп му беше изречена казна затвор од четири години и шест месеци, професорот Славе Ристевски за две кривични дела примање поткуп доби казна затвор од по две години и шест месеци, односно единствена казна затвор во траење од четири години. Професорот Драган Денковски, за три кривични дела давање поткуп Судот го осуди со алтернативна мерка условна осуда, за секое кривично дело во траење од по 10 месеци, или единствена казна затвор во траење од две години, која нема да се изврши доколку не стори ново кривично дело.

Нивната професија како професори судот ја земал предвид како отежителна околност, додека како олеснителни биле возраста, семејство и тоа што досега се неосудувани.

На професорот Бобек Шуклев како отежителна околност беше земено и тоа што навлегол во интимната сфера на една од оштетените.

Професорите добија и забрана за вршење професија во траење од пет години, а времето поминато во затвор се смета во времето во кое трае забраната.

При објавата на пресудата судијката Јанчулева Михаиловска посочи дека изнесените докази имаат доволен доказен капацитет за донесување на осудителна осуда.

Првичната пресуда за овој случај беше изречена во 2020 година, за во 2021 апелација да го врати предметот на повторно судење.

Во случајот беше товарен и професорот Стојан Дебарлиев, за кого, Кривичниот суд во 2020 година пресуди дека не е виновен за „злоупотреба на службената положба и овластување“.

Предметот беше отворен во јуни 2016 година. Процесор го водеше судијката Фанка Јанчулева Михаиловска.

БУГАРИН ПОМИНАЛ НА ЦРВЕНО И СТАВИЛ ПАРИ ВО СООБРАЌАЈНАТА – полицајците кога виделе што има на ум следувало вистински пекол за него!

Дарко Андоновски — Fri, 11 Aug 2023 07:08:08 +0000

На 10.08.2023 околу 14 часот во Скопје полициски службеници од ПС Кисела Вода го привеле Б.Е.Г. (60) од Петрич, Република Бугарија поради сторено кривично дело „давање поткуп“ по чл.358 од КЗ. Имено, Б.Е.Г. бил сопрен од полициските службеници откако сторил сообраќаен прекршок односно со товарно моторно возило „ивеко“ поминал на црвено светло на семафор, а откако полициските службеници му ја побарале сообраќајната дозвола и му укажале дека ќе му биде изречена глоба, Б.Е.Г. во сообраќајната дозвола ставил пари (евра) и рекол дека тоа го направил за да се почестат, односно да не му изречат глоба. Полициските службеници веднаш го лишиле од слобода Б.Е.Г. за сторено кривично дело „давање поткуп“ по чл.358 од КЗ. Известен е јавен обвинител и по документирање на случајот против Б.Е.Г. до ОЈО Скопје ќе биде поднесена кривична пријава по брза постапка.

Кривична за командир во тетовската касарна, поттикнал војник да побара 3.000 евра мито за избор на офицер

Ивона Петрова — Sat, 24 Jun 2023 10:46:19 +0000

МВР поднесе кривична пријава, а Основното јавно обвинителство Скопје донесе Наредба за спроведување истражна постапка против 45-годишен жител на Тетово, вработен во Министерство за одбрана како командир во тетовска касарна, бидејќи постои основано сомнение дека поттикнувал кривично дело – Примање поткуп од член 357 став 1 во врска со член 23 од Кривичниот законик. -Осомничениот, на 18 и 19 мај во Скопје, со умисла поттикнал една осомничена -професионален војник во Армијата на РСМ, директно да побара и да прими парични средства во износ од 3.000 – 4.000 евра, од еден оштетен за да изврши службено дејствие што не би смеело да се изврши. За таа осомничена обвинителството веќе поведе постапка, а во текот на истрагата обезбеди докази кои даваат основано сомнение за поттикнувачот. Таа, сакајќи да му помогне на нејзин колега – кандидат на конкурс за прием на офицери, го контактирала сега осомничениот, а тој и кажал дека ако сака оштетениот да биде избран, тој ќе треба да плати 3.000-4.000 евра. Се договориле паричните средства оштетениот да и ги предаде на осомничената, а таа да му ги предаде на командирот од Тетово. При примопредавање на средствата, осомничената беше затекната и лишена од слобода, информираат од Обвинителството. Надлежниот јавен обвинител до Основниот кривичен суд Скопје достави предлог за определување мерка притвор и за осомничениот за кого денеска беше отворена истрага.

Републиканска партија: Имаме докази дека Бајден примил мито како потпретседател на САД

Тале Кристо — Tue, 20 Jun 2023 12:16:42 +0000

Американската републиканска партија тврди оти има докази, аудио снимки, кои сведочат дека Џо Бајден, додека бил потпретседател на САД, примал мито. Случајот е наречен „Брајб гејт“ (Brib-gate), што се поврзува со скандалот „Вотергејт“ (Watergate) и зборот „брајб“ што значи „поткуп“. Бајден, како што се тврди, во 2016 година, кога беше потпретседател на САД, исплатата на финансиската помош за Украина ја условил со оставка на украинскиот државен обвинител Виктор Шокин. Во тоа време, Шокин ја водеше истрагата против украинската енергетска компанија Бурисма, во чиј надзорен одбор беше и Хантер Бајден, синот на претседателот. - Државјанин на странска земја, за кого има сомнежи дека го подмитил Бајден, очигледно тајно снимил 17 аудио снимки, изјави републиканскиот сенатор Чак Гресли од американската сојузна држава Ајова во Парламентот. Во исто време, Гресли се повикува на основачот на компанијата Бурисма, Микола Злочевски, наведувајќи дека изворот за овие тврдења е од ФБИ. Гресли изјавил дека со помош на тие записи Злочевски сакал да се осигура во случај да биде откриена работата. За време на сослушувањето во Конгресот, сенаторот Тед Круз го праша заменик-директорот на ФБИ Пол Абате дали тие навистина ги имаат снимките, на што му беше одговорено дека не може да се зборува за истрага која е во тек. Републиканскиот конгресмен Џејмс Комер од Кентаки, кој ја води истрагата во Претставничкиот дом на американскиот Конгрес, изјави дека на две аудио снимки се слуша Џо Бајден, а на другите, тогашниот менаџер на компанијата Бурисима, Хантер Бајден. Комер тврди оти сите разговори биле за условите за исплата на мито, како и дека Бајденови добиле по пет милиони долари. Поранешниот американски претседател Доналд Трамп, кој во моментов е под голем притисок поради обвинението поврзано со доверливи документи, минатата недела најави дека „по неговиот реизбор за претседател ќе назначи специјален истражител“. Трамп рече дека специјалниот истражител треба да се занимава со истрагата против, како што наведе, „најкорумпираниот американски претседател на сите времиња“, односно целото „криминално семејство Бајден“. Републиканската партија најавува дека ќе ги објави доказите за наводната милионска корупција на семејството Бајден, односно аудио снимките, кои треба да го поткрепат ова, да бидат објавени како дел од работата на Истражниот комитет на Конгресот.

Кривична за двајца полицајци, побарале 50 евра за да не пишат казна

Ивона Петрова — Mon, 19 Jun 2023 13:26:49 +0000

Одделот за внатрешна контрола, криминалистички истраги и професионални стандарди до надлежното обвинителство поднесе кривична против полициските службеници С.Д. и Х.С., вработени во СВР Велес, поради постоење основи на сомнение за сторено кривично дело "примање поткуп" по член 357 од КЗ. -Имено, полициските службеници на 16.06.2023 за да не санкционираат сообраќаен прекршок побарале и примиле поткуп од едно лице во износ од 3.000 денари, информира МВР. Против полициските службеници ќе биде покрената и постапка за утврдување на дисциплинска одговорност, а истите ќе бидат суспендирани од работните места до завршување на дисциплинската постапка.

Германската амбасадорка: Не ставајте пари во мантилот на лекарот

Ивона Петрова — Mon, 05 Dec 2022 19:31:56 +0000

Германската амбасадорка Анке Холштајн денеска порача дека борбата против корупцијата се учи и се применува од најмали нозе до највозрасни жители. – Има многу работи кои треба да се направат, а тоа е случајот со Северна Македнија и тоа го кажа и мојот претседател за време на неговата посета. Во завност од тоа колку брзо Северна Македонија ќе прави напредок на својот пат кон ЕУ зависи од тоа колку брзо ќе се спроведат реформите. И сите ние сме сложни дека тоа е особено тешка задача која претстои и тоа не се однесува само на политичарите, туку и на сите луѓе кои треба да сфатат дека кога ќе заминат на лекар дека не треба да остават некоја банкнота во неговиот мантил, или пак наставничката треба да знае дека не треба да добие подарок од ученикот за 8 Март за да има подобра оценка и сите треба да научат и најмалите и најголемите како се води борбата против корупцијата – порача амбасадорката. Германската амбасадорка по денешното предавање на новата донација за полицијата нагласи дека битката против корупцијата е најважна за граѓаните и за европскиот напредок на државата. На новинарско прашање одговори дека Германија ќе продолжи да помага, но мора да се смени и свеста на функционерите и на граѓаните. – Борбата против корупцијата е тешка задача и тука се неопходни волја и време за кои Германија е подготвена да помогне – рече амбасадорката. Свесно сме целосно за потребата од борба пеотив корупцијата, вели македонскиот премиер.

„Директорот на ДБКИ Стојан Славески под истрага за земање мито?“

Тале Кристо — Thu, 01 Sep 2022 18:03:39 +0000

Пратеникот и член на ИК на ВМРО ДПМНЕ, Драган Ковачки во свој статус го прозива директорот на Дирекцијата за безбедност на калсифицирани информации (ДБКИ) да одговори дали против него се води истрага за земање пари (мито) за испраќање на луѓе на дипломатска мисија во Брисел, како и за земање на пари (мито) за издавање на безбедносни сертификати. Во своето обраќање, Ковачки јавно го повикува Славески да одговори дали против него е покренато обвинение и да се изјасни дали имало злоупотреби и при издавањето на безбедносните сертификати? Инаку, Славески е познат во јавноста по низа скандали кои го обележаа неговото директорување во ДБКИ, како на пример луксузирањето со купување службени џипови и нивно користење за приватни потреби, за вработување на лица во ДБКИ без безбедносни сертификати, издавање сертификати за еден ден на новинари блиски до власта, како и низа безбедносни пропусти во неговата работа.

Бил фатен со роба за која немал дозвола па му понудил пари на полицаецот да го почести: Уапсен косовски државјанин на Долно Блаце

Магдалена Андонова — Tue, 07 Jun 2022 15:39:47 +0000

Денеска (07.06.2022) на Граничен премин Долно Блаце, на излез од државата кон Косово, полициски службеници го лишија од слобода косовскиот државјанин С.Ј.(56). Тој управувал патничко возило комби „фолксваген“, со косовски национални ознаки, а при проверка на возилото, во него била пронајдена поголема количина на роба која ја превезувал, а за која не поседувал никаква документација. Притоа, тој му понудил на полицискиот службеник да го почести, ставајќи му пари во својата косовска патна исправа. По ова С.Ј. бил приведен, а по документирање на случајот од страна на Одделението за прекуграничен криминал и миграции при Регионален центар за гранични работи Север против него ќе биде поднесена соодветна пријава.

Внатрешната контрола во МВР работи на случајот на полицајците од Блаце кои земаа поткуп

Ивона Петрова — Tue, 07 Jun 2022 12:08:41 +0000

Министерот за внатрешни работи Оливер Спасовски денеска одговарајќи на новинарско прашање дали се суспендирани од работа полициските службеници од ГП „Блаце“, за кои се поднесени кривични пријави за поткуп, информира дека на тој случај работи внатрешната контрола и кога ќе се затвори целиот случај, ќе се донесат одлуки во делот на водењето на дисциплинската постапка. – За полициски службеници кои направија кривично дело во однос на поткупот се поднесени соодветни кривични пријави. За сите полициски службеници, работи внатрешната контрола во однос на уништувањето на средствата за работа. За тоа постојат правилници, постојат упатства како и на кој начин ќе се користи опремата и секако дека покрај дисциплинската ќе има и материјална одговорност во овој дел. Ние известуваме и надлежно обвинителство кое што работи, а тоа е Одделението во ЈО за организиран криминал. Доколку се утврди дека има елементи на сторено кривично дело ќе одговараат и кривично тие полициски службеници коишто го сториле тоа кривично дело. Меѓутоа, мора да се знае точно да се утврди и оние коишто направиле и материјална штета на МВР да си ја покријат таа материјална штета, истакна министерот Спасовски по работната посета на СВР Охрид.