Москва – Kurir.mk

Жителите на Москва положуваат цвеќе за жртвите од Харков

Тале Кристо — Sat, 07 Oct 2023 12:31:32 +0000

Жителите на Москва од вчера положуваат цвеќе за жртвите од руските ракетни напади врз североисточниот украински регион Харков, по дводневните жестоки напади во кои беа повредени и убиени десетици цивили. Речиси сите жолти и сини цветови се распродадени, објави вчера независниот интернет портал „Астра“. Цветни аранжмани се положуваат на статуата на украинската поетеса Лесија Украинка. Општинските власти наводно да ги отстрануваат цвеќињата од споменикот. Во четвртокот и петокот десетици цивили беа повредени и убиени во жестоки руски напади. Десетгодишно момче и неговата баба беа убиени вчера во Харков кога проектил погоди станбена зграда. Повредени се 30 лица, од кои 12 се хоспитализирани. Властите во Харков синоќа ги прекинаа операциите за пребарување и спасување. Еден ден претходно, според официјалните податоци, во руски ракетен напад врз кафуле во село во областа Харков, загинаа 52 лица. Русите повеќе пати изразуваа сочувство за жртвите од претходните руски напади врз цивилни цели во Украина. Руските власти редовно преземаат мерки против ваквите солидарни акции. Официјално, Москва негира дека гранатира цивилни цели во Украина.

Русија: Спречен напад со дрон во близина на Москва

Тале Кристо — Sat, 07 Oct 2023 08:56:21 +0000

Руската воздушна одбрана денеска соопшти дека соборила украинско беспилотно летало во близина на Москва. Според руското Министерство за одбрана нападот бил одбиен во областа Истар северозападно од главниот град на Русија. Градоначалникот на Москва, Сергеј Собјанин на Телеграм објави дека прелиминарните извештаи покажуваат дека нема жртви или штети, но дека итни служби се на терен.

Сергеј Собјанин води на изборите за градоначалник на Москва со повеќе од два милиони гласови пред опонентите

Тале Кристо — Mon, 11 Sep 2023 06:20:08 +0000

Актуелниот градоначалник Сергеј Собјанин води на изборите за градоначалник на Москва со повеќе од два милиони гласови врз основа на резултатите од електронското гласање, покажуваат податоците на Московската градска изборна комисија (МГЕК). - Сергеј Семенович освои 2 милиони 53 илјади 954 гласови, изјави Артјом Костирко, шеф на одделот за унапредување на територијалното управување и развој на паметни проекти на владата на Москва. Втор е кандидатот на Комунистичката партија на Руската Федерација Леонид Зјуганов со 212.153 гласови, а на трето место е претставникот на Либерално-демократската партија на Русија (ЛДПР), Борис Чернишов со 159.413 гласови.

Москва: Руската ПВО уништи непријателски дронови над Калушка и Московската област

Ивана Ефремовски — Tue, 05 Sep 2023 05:26:35 +0000

Руската противвоздушна одбрана (ПВО) уништи две беспилотни летала над регионите Калушка и Твер, кои граничат со московскиот регион, како и едно близу главниот град, над областа Истра во Московската област, соопшти руското Министерство за одбрана. - Руската противвоздушна одбрана уништи вкупно три беспилотни летала кои се обидоа да ја нападнат Москва рано утринава, а нема повредени, изјави градоначалникот Сергеј Собјанин. Тој рече дека силите за противвоздушна одбрана го уништиле дронот во регионот Твер во областа Завидово, кој летал во правец на Москва, при што нема жртви или материјална штета. Градоначалникот напомена и дека на местото на настанот веднаш излегле итните служби. Според руски медиуми, официјалната резиденцијална палатата на рускиот претседател Владимир Путин - „Рус“ се наоѓа во Завидово. Руските новински агенции јавија дека речиси 50 летови биле откажани или одложени рано утринава од четири големи аеродроми во близина на Москва. (МИА)

Осум тела се извлечени по несреќа при обиколка на канализациски систем во Москва

Ивана Ефремовски — Tue, 22 Aug 2023 14:52:37 +0000

Руските спасувачи ги извлекоа телата на сите осум лица кои исчезнаа по силниот дожд што ги зароби за време на обиколката на канализациониот систем во Москва, чии делови датираат од 19 век, јавија денеска руските државни медиуми. Силниот дожд што во неделата падна над Москва предизвика нагло зголемување на нивото на водата во понорницата Неглинки, оневозможувајќи им на луѓето да се извлечат од канализацијата. „Пронајдени се телата на сите членови на водената тура по московскиот канализациски систем. Сите се мртви. Операцијата за пребарување е при крај“, изјави спасувач. Руската Државна истражна комисија објави дека турнејата била нелегална, поради што е отворена истрага. Именувани се тројца осомничени, од кои едниот претходно е уапсен и обвинет, додека другиот вчера ја напушти земјата. Инспекторите го започнаа процесот на идентификација на телата. Меѓу смртно настраданите, како што објавија медиумите, се вработен во компанијата, неговата петнаесетгодишна ќерка и седумнаесетгодишниот внук. Градоначалникот на Москва, Сергеј Собјанин инцидентот го нарече „ужасна трагедија“ и упати сочувство до семејствата на жртвите. Бројни московски водичи нудат обиколки низ градскиот канализациски систем, чии делови датираат од 19 век. (МИА)

Суд во Москва го казни Гугл затоа што не отстранил „лажни информации“ за војната во Украина

Ивана Ефремовски — Thu, 17 Aug 2023 19:23:15 +0000

Суд во Москва денеска го казни Гугл со три милиони руски рубљи (32.330 долари) затоа што не отстранил „лажни информации“ за руската „специјална воена операција“ во Украина, јави државната новинска агенција ТАСС. Судија на Московскиот прекршочен суд рече дека судот го прогласил американскиот технолошки гигант за виновен за „извршување административен прекршок според алинеа 2 од член 13.41 од Кодексот за административни прекршоци на Руската Федерација“. На Гугл му е испратено известување за потребата да се отстранат видеата на Јутјуб кои, меѓу другото, содржеле „лажни информации“ за војната што започна во февруари минатата година. Гугл престана да продава онлајн рекламирање во Русија во март 2022 година по почетокот на војната, но задржа некои бесплатни услуги. Во јуни, рускиот суд го казни Гугл со четири милијарди рубљи (43 милиони долари) затоа што не платил претходна казна за наводна злоупотреба на неговата доминантна позиција на пазарот на видео хостинг. (МИА)

Експлозија во фабрика за пиротехника кај Москва, 45 повредени

Ивана Ефремовски — Wed, 09 Aug 2023 12:16:42 +0000

Бројот на повредени во експлозијата во магацин со пиротехничка опрема, во фабриката Загорск во градот Сергиев Посад во близина на Москва, се искачи на 45, соопштија денеска локалните власти. Вкупно 23 лица се хоспитализирани, од кои шест се на интензивна нега. Руски медиуми објавија дека несреќата не е предизвикана од напад со дрон, туку дека е одговорен „човечкиот фактор“. Во експлозијата е уништен хангар со површина од 1.600 метри квадратни, кој бил закупен од приватна компанија на земјиштето на фабриката, а од силината на експлозијата пукнало стаклото на неколку куќи во близина на фабриката. Оптичко-механичката фабрика Загорск е водечки производител на оптички и електронски уреди што ги користат полицијата и здравствените работници. (МИА)

Русија собори два борбени беспилотни летала што се движеа кон Москва

Ивана Ефремовски — Wed, 09 Aug 2023 07:00:41 +0000

Руската ПВО собори две борбени беспилотни летала кои се движеле кон Москва, изјави денеска градоначалникот на рускиот главен град Сергеј Собјанин. -Потврден е обид на две борбени беспилотни летала да се пробијат во градот. Двете беа соборени од воздушна одбрана. Едниот во близина на Домодедово (на југ на Москва), другиот во близина на автопатот за Минск, на запад од Москва, напиша Собјанин на Телеграм, без да прецизира кој е одговорен за нападот. Тој додаде дека засега немаат инфомација за можни жртви и нагласи дека спасувачките служби се на местото на настанот. Напади со украински беспилотни летала се случуваат на руска територија изминативе недели, а целта често е Москва и анектираниот полуостров Крим. Властите велат дека Москва била цел на повеќекратни напади со беспилотни летала минатата недела, од кои еден оштетил зграда во главниот деловен кварт. (МИА)

Москва продолжува да бара Украина да ги прифати нејзините услови за мир

Ивана Ефремовски — Mon, 07 Aug 2023 12:57:51 +0000

Само безусловното прифаќање на руските услови од Киев ќе стави крај на руската инвазија на Украина, соопшти денеска Москва, два дена по состанокот за Украина во Саудиска Арабија. „Убедени сме дека едно навистина сеопфатно, трајно и праведно решение е можно само доколку режимот во Киев стави крај на непријателствата и терористичките напади“, рече портпаролката на руското Министерство за надворешни работи, Марија Захарова. „Новите територијални реалности (во источна и јужна Украина) треба да бидат признати, демилитаризацијата и денацификацијата на Украина... треба да се обезбедат“, рече портпаролката, додавајќи дека „треба да бидат потврдени почетните основи на суверенитетот на Украина: нејзиниот неутрален, неврзан и ненуклеарен статус“. Тие барања, кои веќе ги постави Москва кога ја започна својата инвазија на Украина во февруари 2022 година, беа отфрлени од Киев. (МИА)

Руските противвоздушни сили собориле шест украински дрона во близина на Москва

Ивана Ефремовски — Thu, 03 Aug 2023 07:21:15 +0000

Руските сили соборија шест украински беспилотни летала во регионот Калуга, на околу 180 километри југозападно од Москва, соопшти Министерството за одбрана, додавајќи дека во нападот нема жртви. „Во текот на ноќта, руските сили спречија обид на режимот во Киев да изврши терористички напад со беспилотни летала над регионот Калушка“, се наведува во соопштението. Противвоздушната одбрана собори шест беспилотни летала. Како што се додава, во нападот нема жртви и не е причинета материјална штета. (МИА)