мтв – Kurir.mk

ЗНМ: Срамна постапка на навивачите на Е. Пелистер кон новинарите и неприфатливо отсуство на реакција од страна на клубот

Тале Кристо — Sun, 22 Oct 2023 20:19:48 +0000

На иницијатива на Секцијата на спортски новинари која е дел од Здружението на новинарите на Македонија, ЗНМ остро реагира на вулгарното однесување на дел од навивачите на РК Еурофарм Пелистер кои со крајно навредлива парола се обидоа да го понижат и да се „пресметаат“ со колега коментатор од Македонската Телевизија, реагираат од здружението на новинари. Имено во текот на целиот меч во Битола меѓу Еурофарм Пелистер и Вардар на една од трибините група неодговорни навивачи имаше истакнато безобразен транспарент кој се однесува на колегата Југослав Костовски. Секцијата на спортските новинари при ЗНМ искажува револт кон навивачите, но и кон домаќинот на големото ракометно дерби РК Еурофарм Пелистер бидејќи раководството и луѓето задолжени за организација на мечот имаа вовед, две полувремиња, пауза и цели два часа да реагираат и да го отстранат транспарентот или тие што го промовираа на видно место, а тоа не го сторија. Валканите пресметки на навивачите со новинарите и непостапувањето кон истите не се непознати во нашиот спорт, но сигурно не се начин на кој се градат големите европски спортски колективи. Со самиот факт што Еурофарм Пелистер е наш машки ракометен првак и учесник во групната фаза од Лигата на шампионите тоа ги става битолчани во ситуација да имаат обврска тоа да биде нивна траекторијата на развој што, пак, дефинитивно значи и коректен однос кон известувачите од натпреварите и на домашната и на меѓународна сцена, стои во реакцијата на ЗНМ.

Ковачевски: Ќе побараме одговор од МНР зошто нашата национална телевизија не се емитува во Бугарија

Тале Кристо — Thu, 23 Mar 2023 10:26:33 +0000

Премиерот Димитар Ковачевски денеска изјави дека ќе побара информација од Министерството за надворешни работи зошто програмата на македонската национална телевизија не се емитува во Бугарија, како што се емитува Бугарската национална телевизија (БНТ) кај нас. - Веднаш ќе ги контактираме Министерството за надворешни работи и нормално македонската телевизија, која што треба да зрачи и штом ќе достават официјален одговор, како и одговор од бугарските официјални институции тогаш ќе го споделиме со вас, изјави Ковачевски одговарајќи на новинарско прашање дека според Договорот за пријателство со Бугарија националните телевизиски канали треба да емитуваат програма како во Северна Македонија, така и во Бугарија. Тоа засега не е случај, бидејќи нашата национална телевзија не се емитува во Бугарија.

Хит: Цела Македонија го слушна коментаторот на МТВ како ја испеа химната (ВИДЕО)

Ристе Здравков — Mon, 18 Apr 2022 16:59:49 +0000

Македонија вечерва се бори за пласман на Светското првенство во Шведска и Полска во јануари идната година, потребна ни е победа за шести Мундијал во низа, а осми во историјата и пред стартот на мечот, се разбуди вулканот во СЦ „Борис Трајковски“ при интонирањето на химната на Македонија. Но, цела Македонија која го гледа мечот на јавниот сервис освен од салата го слушна и коментаторот на МТВ, Југослав Костовски како ја испеа химната, што беше вистински хит. Капа долу Југо, мајсторе!

94-те Оскари в недела ексклузивно на Македонската телевизија

Ивона Петрова — Fri, 25 Mar 2022 11:09:41 +0000

Македонската Телевизија ексклузивно ќе го емитува 94-то доделување на Оскарите в недела, 27-ми март. Академијата за филмски уметности и науки ќе ги награди најдобрите остварувања во 2021 година. Вестернот „Моќта на кучето“ има 12 номинации, научно фантастичниот спектакл „Дина“ 10, а по седум номинации добија „Белфаст“ и „Приказна од западната страна“. На Оскаровската церемонија ќе се појават најзначајните имиња од филмската индустрија, од номинираните до презентерите на наградите. Најавени се Ентони Хопкинс, Хали Бери, Кевин Костнер, Џон Траволта, Џејсон Момоа, Џејми Ли Кертис, Лејди Гага, Џејк Џиленхол, Шон Мендез и многу други. Бијонсе, Били Ајлиш, Риба Мекинтаер и Себастијан Јатра ќе ги изведат номинираните оригинални филмски песни. Ќе има сегмент посветен на 60 години од првиот Бонд филм и 50 години од снимањето на филмот „Кум“. Реџина Хол, Ејми Шумер и Ванда Сајкс првпат ќе бидат водителки на Оскаровската церемонија. -Годинава идејата на Оскаровското шоу е да се обединат љубителите на филмот. Затоа и поканивме три од најдинамичните, забавни жени со многу различни стилови во комедијата, изјави продуцентот на шоуто Вил Пакер. Доделувањето на најпрестижните филмски награди во светот, кое ќе се одржи во театарот Долби во Холивуд и Хајланд, Холивуд, ќе го пренесуваат преку 200 територии во светот. Преносот на МТВ ќе започне 30 минути по полноќ, во ноќта недела кон понеделник со Црвената патека. 94-та Оскаровска церемонија ќе започне во 2 часот по полноќ. Скратена снимка од Оскаровското шоу во траење од 2 часа ќе се емитува во вторник во 20:45 на МТВ.

НЕ СЕ ОБИДУВАЈТЕ ДА СИ ГИ ЗЕМЕТЕ ПАСОШОТ И ЛИЧНАТА КАРТА – во просториите на МТВ се чека секојдневно со часови, не се носат ниту маски

Дарко Андоновски — Tue, 03 Aug 2021 17:08:00 +0000

Вистински хаос трае речиси со денови и недели во делот на МТВ каде се подигнуваат готовите лични карти и пасоши. Како и секојдневно така и денеска во било кој период од денот сликата е иста. Наш читател кој во моментов е на лице место вели дека денеска три пати се обидел да отиде во текот на денот, но гужвата била иста во текот на целиот ден. Полицајците буквално се рашетуваат наместо да спроведат ред. -Вработените додека креваат раменици, граѓаните меѓусебно се расправаат за редот и држењето на дистанцата. Ова не е држава, веќе е докажано во неколку наврати..., ни раскажува нашиот читател. Тој вели и дека за пасош чека веќе еден час, а дали ќе успее да го земе до крајот на работното време на втората смена во 20 часот не знае ниту самиот. -Не се почитува ниту носењето на маските, а полицајците за спроведување на редот и мирот не мрднуваат со прст, дури и преку ред пуштаат нивни познаници.

Мицкоски од 17:00 часот гостин во вестите на МТВ

Тале Кристо — Thu, 29 Apr 2021 13:23:06 +0000

Претседателот на ВМРО-ДПМНЕ, Христијан Мицкоски попладнево од 17:00 часот ќе биде гостин во вестите на МТВ. -Во 17 часот гостувам во вестите на МТВ. Следете ме, објави Мицкоски на својата Фејсбук страница.

МТВ ги купи правата за Европското првенство

Ивана Ефремовски — Thu, 12 Nov 2020 21:50:23 +0000

Македонската телевизија ги купи ТВ правата за Европското првенство следната година. МТВ ги откупи правата од Спорт Клуб за пренос на натпреварите на македонската фудбалска селекција од првото свое историско учество на Европско првенство.

Лејди Гага издоминира на МТВ, за нејзините маски сите зборуваат (ФОТО)

Магдалена Андонова — Mon, 31 Aug 2020 09:11:50 +0000

Вчера се одржа MТВ доделување на наградата „Video Music Awards“, а една пеачка покрај тоа што однела дома неколку награди, успеала да ги воодушеви сите со перфомансата која што ја извела во склоп со противпандемските мерки. Лејди Гага освоила награди за уметник на годината, песна на годината, најдобра соработка и најдобра кинематографија. Воедно, таа ја освоила и TZV. Наградата за трикон, кои што фановите шпекулираат дека МТV ја измислиле само за нејзе, која што се однесува на уметници кои што се успешни на различни полиња, вклучувајќи ја и модата и активизмот. И да е така, таа со синоќешните настапи ја заслужи таа награда. Лејди Гага и нејзините танчери имале десетминутен енергичен настап и тоа со заштитни маски. Маската на пеачката била посебно интересна бидејќи била ЛЕД маска која правела илузија дека Лејди Гага „отвара уста“. На бината во еден момент накратко и се придружила и колешката Аријана Гранде, со која го отпеала нивниот дует „Rain on me“. Лејди Гага во текот на целата вечер носела маски кои ги вклопила со својата облека, а претходно соопштила дека на доделувањето награди ќе се придржува до сите пропишани мерки. Што се однесува до останатите наградени, се истакнаа и BTS (награда за најдобар поп, најдобар К-поп, најдобра група и кореографија). Тејлор Свифт (најдобра режија), Дожа Кет (најдобар нов уметник), Меган Ди Стелион (најдобар хип-хоп) и Блекпинк (песна на летото). МТV оваа година воведоа и две „карантински награди“ кои завршија кај Аријана Гранде и Џастин Бибер (најдобри видеа снимени од дома за песната „Stuck with u“) и латино бендот CNCO за најдобар перфоманс од карантин.

Камерман од МТВ почина од коронавирус

Дарко Андоновски — Tue, 30 Jun 2020 22:51:27 +0000

Шенол Ахмети (51), камерман во МТВ, ноќеска ја загуби битката со коронавирусот, објавува Телма. Тој бил хоспитализиран минатата недела, а состојбата рапидно се влошила последните неколку дена поради што бил приклучен на респиратор. Ахмети е долгогодишен снимател и камерман во МТВ и во јавниот сервис го минува целиот работен век. Ахмети е вториот медиумски работник кој е жртва на коронавирусот во Македонија. На 1 јуни почина новинарот Беким Бајрамоски од струшко Лабуништа која работеше за локалната телевизија „Спектра“.

Анкета на МРТ: Во ек на пандемија кај 32.9% од граѓаните им се намалиле приходите

Дарко Андоновски — Fri, 19 Jun 2020 11:44:32 +0000

Во вчерашната емисија на телевизија МРТ се презентираше анкета која е направена на македонските граѓани во врска со економската криза предизвикана од Ковид-19. Последниот податок од Агенцијата за вработување вели дека секој четврти кој изгубил работа за време на пандемијата во земјава е помлад од 29 години. Сепак истражувањето на институтот за политички истражувања кое што го спроведе за „Објектив“, на прашањето дали вие или некој ваш близок останал без работа за време на кризата 59.60% велат дека се уште се на своето работно место. 29.90% за жал се нашле на списокот на невработени, а 10.50% одбиле да одговорат на ова прашање. Во однос на приходите кај 52.8% тие останале исти. Кај 32.9% приходите се намалиле. Но кај 2.8% приходите се зголемени. 11.5% не одговориле на прашањето. Сепак она што е интересно граѓаните не се оптимисти дека економската криза до крајот на годината ќе се намали, дури 28.42% сметаат ќе се продлабочи, а 18.21% дека ќе остане иста. 34.03% сметаат дека таа ќе се намали, а 19.31% одбиле да одговорат.