Муџахедини – Kurir.mk

Рама за „Шпигел“: Ако муџахедините сакаат војна, мора да ја напуштат Албанија

Тале Кристо — Fri, 30 Jun 2023 18:46:39 +0000

Албанскиот премиер Еди Рама во интервју за Шпигел изјави дека муџахедините не можат да ја користат Албанија за да се борат против иранскиот режим. - Припадниците на МЕК во нашата земја се сместени повеќе години. Добредојдени се, но под услов да не ја користат Албанија како платформа за нивните политички операции. Нашите ирански гости постојано го прекршуваа овој договор. Поради тоа беше и полициската контрола во кампот кај Драч, изјавил Рама. Според него „Албанија нема намера да војува со иранскиот режим и не прифаќаме никого што го злоупотребил нашето гостопримство". На прашањето зошто се согласиле на барањето на американскиот претседател Барак Обама да прифатат илјадници муџахедини Рама вели дека тоа била операција за спасување животи. - Ги отворивме вратите затоа што групата, која тогаш дејствуваше од Ирак, беше систематски следена. И ако некој пријател како САД ни побара нешто, ние се чувствуваме почестени, додал тој. Одговара и на прашањето доколку сте на местото на МЕК, дали би сакале да заминете? - Го разбираме гневот против режимот во нивната земја. Но, нашата држава да се користи како логор во војна која не е наша, не функционира. Се разбира, тие имаат целосно право да се борат за својата слобода, но за да го направат тоа мора да ја напуштат Албанија, одговорил Рама. Во кампот "Ашраф 3" кај Драч пред девет години беа сместени над три илјади а моментно се околу 2.500 муџахедини. На 20 месецов полицијата изврши претрес како дел од борбата против сајбер нападите и тероризмот а следуваа по истрагите што започнаа за кибер нападите со кои се соочи Албанија пред една година. Тие се сомничат дека се резултат на напади кои претходно биле извршени врз Иран од албанска територија. Полициските службеници наидоа на отпор од дел на муџахедините а беа запленети компјутери, УСБ, и други материјали кои муџахедините се обиделе да ги запалат.

Албанија: Претрес во кампот на муџахедините во Драч

Тале Кристо — Tue, 20 Jun 2023 10:54:04 +0000

Албанската државна полиција денеска соопшти дека започнала оперативна контрола во кампот на муџахедините „Ашраф“ во Манез, кај Драч, каде се сместени над три илјади лица. Според соопштението на Државната полиција, контролата доаѓа во рамките на одлуката на Специјалниот суд за борба против корупција и организиран криминал. -Во спроведување на одлуката на Специјалниот суд против корупција и организиран криминал и налогот за извршување на Обвинителството при овој суд, за контрола на сите простории и канцеларии во кои живеат лицата од хуманитарни цели, државната полиција во рамки на оперативен план, започна контрола на сите простории и канцеларии во кампот на МЕК, во Манез, Драч, соопшти полицијата. Додава дека во спроведување на контролните наредби издадени од Судот, Државната полиција презела мерки за нивно спроведување, со контролен план на просториите на територијата на кампот МЕК „строго применувајќи ја етиката и комуникацијата и почитувајќи ги основните права и слободи на сите граѓаните и заедницата што живее во овој камп“. Детални информации околу акцијата полицијата најавува по завршува на истата. Во меѓувреме медиумите, јавуваат дека дошло до судири меѓу полицајците и луѓето таму, кои се противеле и не дозволувале полицијата да врши контрола. Пренесувајќи изјави на припадници на муџахедините, тие тврдат дека полицијата употребила солзавец и оти едно лице е убиено, но полициски извори демантираат дека има жртви при контролата во кампот.

Одложен Светскиот самит на муџахедините во Албанија, по предупредувањата за сериозни закани

Тале Кристо — Fri, 22 Jul 2022 16:59:17 +0000

Одложен е Светскиот самит на Слободен Иран, што требаше да се одржи следните два дена во Албанија, во кампот на муџахедините во близина на Драч. Самитот е одложен по предупредувањата на Амбасадата на САД дека постојат сознанија за потенцијална закана насочена кон настанот и учесниците. – Самитот се одлага до следно известување во согласност со препораките на албанската Влада, поради безбедносни причини и поради терористички закани, се наведува во соопштението од кампот „Ашраф3“ во местото Матзе кај Драч. Претходно Американската амбасада предупреди дека владата на САД има сознанија за потенцијална закана насочена кон Светскиот самит на Слободен Иран. Исто така ги повика своите граѓани да го избегнуваат овој настан, да ги следат локалните медиуми и да бидат свесни за нивната околина. Во кампот на иранските муџахедини, припадници на МЕК, во Манза, кај Драч, на околу 30 километри од Тирана, сместени се најмалку 3.000 муџахедини. Муџахедините се сметаат за терористичка група од страна на Исламската Република Иран и со децении се во отворен конфликт со тамошниот режим.

„Осамениот муџахедин“ обвинет за поттикнување напад врз принцот Џорџ

Дарко Андоновски — Wed, 23 May 2018 14:29:46 +0000

Хусаин Рашид, за кој се претпоставува дека е припадник на групата Исламска држава (ИГД), е обвинет во Велика Британија дека направил интернет „алатка за тероризам“ преку која поттикнувал на напади, меѓу другите и врз четиригодишниот принц Џорџ. Рашид (32) го водеше он-лајн каналот „Осамениот муџахедин“, преку кој, според обвинителката Анабел Дерло, охрабрувал напади врз различни цели, вклучувајќи и вбризгување отров во сладоледи во супермаркети и напад врз принцот Џорџ во неговото училиште. Обвнителите велат дека на една објава на Рашид на социјалните мрежи се наоѓа фотографија на принцот, адресата на неговото училиште, силуета на џихадист и порака „дури ни кралското семејство нема да биде оставено на мир“. Рашид негира дека подготвувал терористички напади, дека поттикнувал тероризам и ширел терористички публикации. Се очекува судењето да трае шест недели.