мултипла склероза – Kurir.mk

Заболуваат и мали деца: Се намалува возраста на пациенти со мултипла склероза во Македонија

Ивана Ефремовски — Thu, 19 Oct 2023 13:26:06 +0000

Се намалува возраста на пациенти со мултипла склероза во државата, заболуваат и лица под 10 години. За среќа, изминатите години е подигната свеста за оваа болест со бројни активности, меѓу другото и за да се намали стигмата кон заболените. - На Клиниката се регистрирани околу 1.300 пациенти со оваа болест. Проекцијата е дека кај нас ги има околу 2 000 пациенти. Во последно време, возраста се намалува на пациентите, има и на под десетгодишна возраст. Најчесто се, меѓу 20 и 50 години, вели во изјава за МИА доцент доктор Игор Кумановски од Клиниката за неврологија во Скопје. Кузмановски нагласува дека многу е важно рано да се препознае болеста и навремено да се третира. Во последните 20 години, вели тој, има високо активна терапија, што во огромна мерка ја намалува прогресијата на инвалидитетот. Во амфитеатарот на Деканатот на Медицинскиот факултет, по повод Националните денови на мултипла склероза, денеска се одржа едукативен настан со цел да се подигне свеста и интересот на идните доктори за оваа болест, како и да се приближат до искуствата што ги имаат заболените. Настанот беше во организација на Националното здружение за мултипла склероза во соработка со Македонската медицинска студентска асоцијација. Според Ана Карајанова - Димитрушева, претседателка на Здружението, сегашниот стручен кадар со текот на времето ќе го оствари правото на пензија, а на пациентите секогаш ќе им бидат потребни врвни доктори во оваа област. Мултипла склероза е една од најчестите невролошки нарушувања и причини за инвалидитет кај младите возрасни лица. - Тоа е хронична, прогресивна, имунолошки посредувана, воспалителна и дегенеративна болест на централниот нервен систем. Настанува кога имуниот систем ја напаѓа обвивката на нервните клетки - миелин, во мозокот, рбетниот мозок и оптичките нерви, предизвикувајќи воспаление и последователна дегенерација, што води до прекин на невротрансмисијата на сигналот од една нервна клетка до друга, појаснува Карајанова-Димитрушева. Беше кажано и дека повеќето лица со оваа болест се дијагностицираат на возраст од 20 до 40 години и околу два-три пати почесто се дијагностицираат жени, наспроти мажи. (МИА)

Едукативен интерактивен настан за мултипла склероза на Медицински факултет во Скопје

Ивона Петрова — Thu, 19 Oct 2023 05:43:31 +0000

Националното здружение за мултипла склероза (МС) во соработка со Македонската медицинска студентска асоцијација (ММСА), денеска организира едукативен интерактивен настан во амфитеатар на деканатот на Медицински факултет, со почеток од 12:45 часот, а по повод Националните денови на МС. Целта на настанот е да се подигне свеста и интересот на идните доктори за оваа болест и приближување до искуствата што ги преживуваат пациентите со МС од друг агол. - Доц. д-р Игор Кузмановски од ЈЗУ Универзитетска клиника за неврологија-Скопје, ќе зборува за историјатот и карактеристиките на болеста, а потоа приказ на случај со присутен пациент со мултипла склероза што ќе му даде сосема нова димензија на самиот настан. Студентите ќе имаат можност теоретски да се запознаат со симптомите, процесот на дијагноза, изборот на третман и практично да го видат и да го осознаат презентираниот пациент, велат организаторите. Настанот е организиран за студенти, специјализанти, доктори и пациенти со МС.

Одбележан светскиот ден на мултипла склероза

Катерина Бојаџиева — Tue, 30 May 2023 12:05:47 +0000

Имаме 1.500 лица со мултипла склероза и сакам да истакнам дека не се сами. Нивните приказни нè инспирираат да поттикнеме поинклузивно општество, изјави денеска министерот за здравство Фатмир Меџити, на настанот организиран од Националното здружение за помош и поддршка на лица со мултипла склероза, а по повод одбележувањето на Светскиот ден на мултипла склероза. - Со Националниот сојуз на лица со телесен инвалидитет - Мобилност Македонија имаме воспоставено успешна соработка, како и со Универзитетската клиника за неврологија, од која и јас како лекар, невролог, доаѓам и која обезбедува третман на лицата со мултипла склероза. Воедно, континуирано сме во комуникација и координација и со Фондот за здравствено осигурување и Министерството за труд и социјална политика, со цел да излеземе во пресрет на потребите на овие пациенти. Со задоволство може да кажеме дека во Северна Македонија покриеноста со лекови за мултипла склероза е меѓу највисоките од земјите на Балканот. Министерството за здравство е отворено за комуникација и соработка, со цел заеднички да се заложиме за унапредување на третманот и здравствената заштита на овие лица, нагласи министерот. Пред присутните се обрати и заменик министерот за труд и социјална политика Енвер Хусејин. - Министерството за труд и социјална политика е одговорно за креирање и спроведување на социјалната и трудовата политика и во таа насока, секогаш сме водени од премисата на подобрување на секојдневниот живот на лицата кои се соочуваат со свои предизвици, како што се и лицата со мултипла склероза, нагласи Хусејин. Тој најави неколку новитети во рамки на политиките со кои раководи Министерството за труд и социјална политика. - Тоа е реформата во трудовото законодавство. Имено, Министерството за труд и социјална политика во следниот период ќе организира серија на јавни презентации за новиот модел на проценка на попреченоста, а кон обезбедување на право на вработување. Развојот на инклузивната и отворена трудова политика, особено во делот за вработување, се клучен елемент за унапредување на квалитетот на живот на секој од нас, а директно влијаат на намалување на сиромаштијата, појасни заменик министерот. Новиот модел на проценка, додаде тој, покрај обезбедувањето можност за поддршка на вработувањето на отворениот пазар на труд, исто така ќе го надополни и системот на упатување и обезбедување на рехабилитацијата, во насока на квалитетен и сигурен независен живот. - Со оваа реформа, како што напоменав, ќе се воведе систем на професионална рехабилитација и работно оспособување на лицата на кои им е потребно тоа, а пред сѐ на лицата со попреченост, кои треба да станат конкуренти на пазарот и со тоа да се вработат, но и да го задржат своето вработување. Сакам да честитам на сите лица кои се соочуваат со оваа состојба, за храброста и за истрајноста. Отвореноста за гласно и храбро да се говори за личната здравствена состојба е голема доблест и знам дека таквите лични приказни преставуваат инспирација за сите останати, нагласи Хусеин. Обраќање имаше и сопругата на претседателот, Елизабета Ѓоргиевска. Таа рече дека и кај нас, како и низ целиот свет, со разновидни настани се одбележува денот посветен на оваа тешка и непредвидлива болест, од која во светот боледуваат над три милиони лица. Ѓоргиевска додаде дека Република Северна Македонија со околу 1.500 лица кои боледуваат од мултипла склероза, спаѓа помеѓу земјите од висок ризик. Нешто што е специфично и што беше истакнато и минатата година, потсети таа, е, податокот, дека болеста е за трипати повеќе раширена кај женската популација. Секако, рече таа, она што ја прави оваа болест особено опасна е фактот дека иако дијагностицирана пред 150 години, лек за оваа болест сѐ уште нема, ниту пак е откриен причинителот на мултипла склероза. Сево ова, додаде, несомнено ги става сите заболени во особено тешка состојба и нивниот живот е исполнет со постојана борба и неизвесност. Ѓоргиевска подвлече дека охрабрува постоењето на терапија која ја подобрува нивната состојба. Оваа терапија постојано се усовршува и на таков начин пациентите функционираат. Сепак, имајќи предвид дека болеста е тешка и непредвидлива и бара постојана борба и терапии, суштествена е психолошката поддршка на пациентите, но и на нивните семејства. Таа нагласи дека сите пациенти со оваа болест се навистина големи херои. И покрај тешката болест, тие се посветени и ревносни како во извршувањето на професионалните обврски, така и претставуваат столбови на своите семејства. А, токму во семејствата ја имаат својата најголема поддршка. Впрочем, истакна таа, не помали херои се и членовите на нивните семејства. - Затоа би сакала да ја искористам оваа можност и на сите заболени од мултипла склероза, но и на нивните блиски, како и на моите колеги, лекари, кои учествуваат во дијагностицирањето и лечењето, да им честитам на храброста и упорноста. Вие сте пример за сите нас, пример за целото општество. Оттука севкупната заедница, сите ние заедно мора да направиме сѐ за да ја подобриме оваа состојба. Тука сме да ве поддржиме, да ви олесниме, да ви помогнеме. Да ви подадеме рака во вашата секојдневна исцрпувачка борба со лошата болест. Солидарноста и заедничката надеж што ја споделуваме на светскиот ден на мултипла склероза нека трае сите 365 дена во годината, подвлече Ѓоргиевска. Таа додаде дека денешното одбележување е секако можност за споделување на искуства, информации и практики. - Комплименти до здружението, кое има благородна мисија на помагање и грижа за лицата со мултипла склероза и нивните најблиски, за сето постигнато и сработено во изминативе неколку години постоење. Членовите на здружението, со оглед дека и самите се лица со мултипла склероза, знаат со какви искушенија се соочува секој што живее со оваа болест. Уште еднаш јавно ви изразувам благодарност и ви посакувам и понатаму ревносно, посветено и полни со оптимизам да ги реализирате вашите програми и проекти, рече Ѓоргиевска. Верувам, додаде, „дека нема да останете сами во активностите за подобрување на секојдневието на лицата кои боледуваат од мултипла склероза и дека ја имате поддршката од целата заедница“. - На крајот, би сакала уште еднаш да ги поздравам сите пациенти со мултипла склероза и нивните семејства и да им ја изразам мојата безрезервна поддршка. Најискрено ви посакувам да ја совладате болеста, да ги надминете сите непријатни состојби и да се радувате и бидете среќни и исполнети во секој ден од животот, рече Ѓоргиевска. Висар Мифтари, директор на Универзитетска клиника за неврологија, рече дека од оваа болест страдаат над три милиони луѓе ширум светот. ЈЗУ Универзитетска клиника за неврологија, нагласи тој, несебично се вложува во третирањето на пациентите со мултипла склероза и тоа ќе продолжи и во иднина. На одбележувањето на светскиот ден на мултипла склероза, меѓународниот ден на глобална солидарност и надеж за иднината, претседателката на Националното здружение за мултипла склероза, Ана Карајанова Димитрушева, потсети дека овој ден е посветен на сите лица со мултипла склероза ширум светот, со цел споделување искуства, подигнување на јавната свест и кампања за сите тие, кои секојдневно се соочуваат со предизвиците на оваа изнемоштувачка, хронична болест. - Ги поздравувам заложбите на здравствените власти во соработка со тимот од Универзитетска клиника за неврологија, за зголемување на бројот на лица со мултипла склероза кои примаат ефикасна терапија во изминатиот период, но и покрај тоа соочени сме со недостапност на оваа терапија за голем број пациенти со мултипла склероза, кои веќе се поставени на терапија. Во слична ситуација се и оние кои чекаат со месеци, да добијат современ третман, истакна таа, нагласувајќи дека причината е во недоволниот буџет, додавајќи дека бројот на нови случаи расте, секоја година се дијагностицираат нови 90 - 120 пациенти. Таа соопшти дека повеќе од 50 пациенти се на листата на чекање за терапија, нагласи дека е неопходен поголем буџет и ажурирање на позитивната листа на лекови и дека смета оти настанот ќе ја продлабочи соработката и ќе придонесе за разрешување на проблемите, верувајќи и во понатамошна поддршка за овие лица.

Македонија го одбележува Светскиот ден на мултипла склероза

Ивана Ефремовски — Tue, 30 May 2023 06:32:34 +0000

По повод Светскиот ден на мултипла скелроза - 30 мај, Националниот сојуз на лица со телесен инвалидитет на Македонија организира марш за подигнување на јавната свест за проблемите со кои се соочуваат лицата со мултипла склероза и нивните специфични потреби за поквалитетен живот и социјална инклузија. Како што информираат од сојузот, настанот ќе започне пред Порта Македонија во 11 часот и ќе продолжи со марш по десната коловозна лента на улицата „11Октомври“ во правец на Собранието до Домот „Даре Џамбаз“, а на него ќе се приклучат и лицата со параплегија и дистрофија. Национално здружение за помош и поддршка на лица со мултипла склероза, исто така, во хотел Панорамика со почеток од 11 часот ќе одржи конференција на која обраќање ќе имаат претседателката на Националното здружение за МС Ана Карајанова Димитрушева, сопругата на претседателот на Република Северна Македонија Елизабета Ѓорѓиевска, министерот за здравство Фатмир Меџити и заменик министерот за труд и социјална политика Енвер Хусејин.

Мултипла склероза е болест на младата популација, потребен е правилен пристапат во третман

Тале Кристо — Thu, 20 Oct 2022 11:30:36 +0000

Идните доктори и специјалисти по неврологија потребно е проблемот со Мултипла склероза (МС) сериозно да го сфатат, да размислуваат за болеста, да знаат дека е болест на младата популација, како и една од главните причини за инвадилитет кај младата популација после траумите, вели д-р Иван Кузмановски од ЈЗУ Универзитетска клиника за неврологија – Скопје. На денешниот настан за едукација на идните доктори за Мултипла склероза во организација од Македонската Медицинска Студентска Асоцијација (ММСА) во соработка со Националното Здружение за Мултипла Склероза што се одржа на Медицинскиот факултет, д-р Кузмановски посочи дека во последно време болеста има значително подобар третман и се подобрува квалитетот на животот кај пациентите со МС. Во однос на бројката на лица кои имаат МС во земјава, д-р Кузмановски вели дека на Клиниката за неврологија има околу 1450 регистрирани пациенти. – Клиниката за неврологија, како центар за третирање на МС на ниво на цела држава регистрира 1450 пациенти, а бројката е нешто поголема. Статистиката покажува дека таа треба да биде барем двојно поголема. Само што се стави во употреба новиот регистар за пациенти со МС, во наредните година до две очекуваме да ги регистрира сите пациенти со МС, додаде тој. Голем напредок се забележува и во третманот на Мултипла склероза во последните десет години. – Третманот на таа активна агресивна потешка форма на мултипла склероза е значително подобрен со поефикасни лекови и со тоа да овие пациенти живеат релативно нормален живот, изјави д-р Кузмановски. Ана Карајанова-Димитрушева, претседателка на Националното Здружение за Мултипла Склероза вели дека постојано се трудат да го подобрат на секој начин квалитетот на животот на лицата со МС. – Не само околу лековите, туку и околу другите третмани како физикална терапија, исхрана, едукација. Овој настан е организиран во рамки на националните денови на МС и е насочен е кон студентите и специјализанти од причина што нашите сегашни доктори и врвни специјалисти ќе одат во пензија. Меѓутоа болеста не се пензионира и од таа причина гледаме да вложиме напори и да се едуцираат и самите млади доктори во иднина да знаат што е МС, вели Карајанова-Димитрушева. Додаде дека од големо значење е и едукацијата на матичните лекари, бидејќи со рана детекција на МС се придонесува кон рано дијагностицирање и терапија, а со тоа се спречува прогресијата на болеста. Од таа причина, таа вели дека е потребно матичните лекари да знаат како да ги детектираат почетните симптоми. Мултипла склероза (МС) е една од најчестите невролошки нарушувања и причини за инвалидитет кај младите возрасни лица. Таа е хронична, прогресивна, имунолошки посредувана, воспалителна и дегенеративна болест на централниот нервен систем (ЦНС). Настанува кога имуниот систем ја напаѓа обвивката на нервните клетки (миелин) во мозокот, ’рбетниот мозок и оптичките нерви, предизвикувајќи воспаление и последователна дегенерација.

Одбележан Денот на мултипла склероза: Градот Скопје со поддршка во активностите за интеграција и подигнување на свеста

Ивана Ефремовски — Mon, 30 May 2022 11:50:18 +0000

По повод одбележувањето на Денот на мултипла склероза, параплегија и дистрофија, денеска во Скопје во организација на Националниот сојуз на лица со телесен инвалидитет на Македонија - Мобилност Македонија, се одржа јавен настан под мотото „МС Поврзувања" за подигање на свеста за потребите и правата на лицата со мултипла склероза, параплегија и дистрофија. На настанот учествуваше Градоначалничката на Град Скопје, Данела Арсовска и истакна дека Градот Скопје е поддржувач на многубројните активности на здруженијата. -Градот Скопје е силна поддршка во активностите за интеграција и подигнување на свеста во општеството за лицата со попреченост. Поддршката на здруженијата на лица со телесен инвалидитет во насока на унапредување и подобрување на нивното секојдневно функционирање е еден од нашите приоритети. Во контекст на денешното одбележување на Денот на мултиплекс склероза, параплегија и дистрофија, нашите заложби се за обезбедување подобра интеграција, подобрени јавни услуги за овие лица и нивно поврзување во заедницата преку отстранување на социјалните бариери, истакна Арсовска. На почетокот на настанот пред Порта Македонија, организаторите од Мобилност се обратија пред присутните и ги наведоа заложбите и активности за подобрување на правата, како и подобрување на квалитетот на живот на лицата со мултипла склероза, параплегија и дистрофија. Во рамките на одбележувањето се одржа и марш-дефиле по булеварот „11 Октомври“ од пред Собранието до ДХО „Даре Џамбаз, каде што учесниците продолжија со интерактивно дружење.

Лицата со мултипла склероза се со висок ризик, а на Клиниката каде што примаат терапија ќе се сместуваат заразени со коронавирус!

Ивана Ефремовски — Fri, 30 Oct 2020 13:02:14 +0000

Националното здружение за помош и поддршка на лица со мултипла склероза се противи на одлуката да се пренамени Клиниката за неврологија во ковид-центар во кој ќе се примаат и сместуваат новозаболените пациенти со ковид-19. Здружението за мултипла склероза испрати допис до Министерството за здравство и до Комисијата за заразни болести, кој ви го пренесуваме во продолжение: Најостро реагираме на ваквото решение од следните причини: -пациентите со мултипла склероза, како невролошо заболување, спаѓаат во пациенти со висок ризик; -пациентите со високоактивна МС својата имуносупресивна терапија ја примаат токму во просториите каде би биле сместени пациентите со Ковид 19; -До неодамна пациентите со МС беа опфатени со мерките донесени од страна на Владата и ослободени од работни обврски како високоризични лица, за со вакво решение да се доведат во директна опасност и да се хоспитализираат во истите простории со лицата заболени од Ковид 19. Бараме да се преиспите ваквата одлука и да се донесете поприфатливо решение со цел оваа група на високоризични пациенти да не биде доведувана во опасност, со оглед на тоа дека се работи за лица со хронично заболување од кои повеќето се приматели на имуносупресивна терапија. Ви благодариме на вниманието и се надеваме дека ќе излезете во пресрет на нашето барање, порачуваат тие.

Одбележување на Светскиот ден на мултипла склероза

Ивана Ефремовски — Thu, 30 May 2019 05:49:35 +0000

Националното здружение за помош и поддршка на лица со мултипла склероза и Националниот сојуз на лица со телесен инвалидитет на Македонија – Мобилност Македонија денеска ќе се вклучат во одбележување на Светскиот ден на мултиплата склероза. Мотото на годинашното одбележување на Светскиот ден е „Мојата невидлива МС“. Целта, како што наведуваат од Здружението за поддршка на лицата со мултипла склероза, е да ја подигнат свеста за невидливите симптоми на МС и нивното негативно влијание врз квалитетот на живот на лицата кои се соочуваат со оваа болест. -Кампањата ќе ги поттикне сите погодени од МС да ги споделат нивните невидливи МС симптоми и да пренесат што би сакале другите да знаат и разберат за „болеста со 1000 лица“, сé со цел да ги предизвикаат општите заблуди и да им помогнат на луѓето да размислат како да им понудат соодветна поддршка. На тој начин општата јавност ќе се запознае со големиот број на исцрпувачки симптоми со кои секојдневно се соочуваат лицата со МС, а општата јавност не ги гледа, соопштуваат од Здружението. На настанот, што ќе се одржи во ЕУ инфо центарот ќе се обратат министерот за здравство Венко Филипче, претседателката на Националното здружение за МС, Ана Карајанова Димитрушева, директорот на Фондот за здравствено осигурување Ден Дончев и Иван Барбов – директор на ЈЗУ Универзитетска клиника за неврологија – Скопје. Од Здружението информираат дека во чест на одбележувањето на Светскиот ден, во вечерните часови во портокалова боја ќе бидат осветлени и објектите на Владата на Републикаа Македонија и Археолошкиот музеј во Скопје. Здружението Мобилност Македонија, Светскиот ден на лицата заболени од мултипла склероза ќе го одбележи на плоштадот „Македонија“ каде членовите на Здружението ќе промовираат кампања за подигање на јавната свест за мултипла склероза, за невидливите симптоми на оваа болест, кои имаат големо влијание во секојдневниот живот на лицата заболени од мултипла склероза. (МИА)

Одбележување Светски ден на лица заболени од мултипла склероза

Ивона Петрова — Wed, 30 May 2018 06:15:20 +0000

Националниот сојуз на лица со телесен инвалидитет на Македонија – Мобилност Македонија, денеска во Скопје ќе го одбележи Светскиот ден на лицата заболени од мултипла склероза. Оваа година Светскиот ден на МС се одбележува под мотото „bringinguscloser“, со цел да се поздрави иновацијата во откривање на нови иновативни лекови за лекување од МС. Членовите на Мобилност Македонија ќе промовираат кампања за подигнување на јавната свест за проблемите со кои се соочуваат лицата со мултипла склероза. Целта е да се подигне свеста на општата популација за МС, да се унапредат дијагностичките процедури и да се овозможи неограничен пристап до нови иновативни лекови. МИА