Мун Џае-ин – Kurir.mk

Шефот на дипломатијата на Кина во прва посета на Сеул од 2015 година

Ивона Петрова — Wed, 04 Dec 2019 07:58:17 +0000

Шефот на кинеската дипломатија е во посета на Сеул за првпат по четири години бидејќи двете држави настојуваат да ги поправат односите нарушени по распоредувањето американски противракетни системи во Јужна Кореја. Кинескиот министер за надворешни работи Ванг Ји ќе има средба со јужнокорејскиот колега Канг Кјунг-ваом и претседателот Мун Џае-ин за време на дводневната посета. Ји последен пат го посети главниот град на Јужна Кореја во 2015 година, кога присуствуваше на трилатералниот состанок на кој присуствуваше и Јапонија. Една година подоцна, односите се влошија поради планираното распоредување на американски ракетен одбранбен систем ТААД, во Јужна Кореја, дизајниран за пресретнување балистички ракети. Пекинг соопшти дека со тоа се нарушува регионалната мрежа за безбедност, велејќи дека моќниот радар на системот може да достигне територија на Кина. Јужна Кореја и САД продолжија со планот и го поставија ракетен одбранбен систем во 2017 година, изјавувајќи дека тоа е оправдано со провокациите на Северна Кореја. Северна Кореја испука десетици проектили откако Мун Џае-ин стана претседател на Јужна Кореја во 2017 година.

Средба на американскиот и јужнокорејскиот претседател на 11-ти април во Вашингтон

Ивана Ефремовски — Fri, 29 Mar 2019 11:02:58 +0000

Претседателот на Јужна Кореја Мун Џае-Ин на 11 април во Вашингтон ќе се сретне со американскиот претседател Доналд Трамп за да разговараат за Северна Кореја и други прашања што се однесуваат на нивниот воен договор, соопшти денеска Белата куќа. Високи јужнокорејски функционери, вклучувајќи го и претседателот Мун, на овој начин ќе почнат серија состаноци со своите колеги од САД во обид повторно да го актуелизираат прекинот во преговорите за денуклеаризација на Северна Кореја. – Сојузот меѓу САД и Јужна Кореја останува клучен за мирот и безбедноста на Корејскиот полуостров и во регионот, стои во соопштението на Белата куќа. Неуспехот на Трамп да склучи договор на вториот состанок со севернокорејскиот лидер Ким Џонг-ун во Ханој во февруари, беше удар за Мун, кој изрази уверување дека Ким е подготвен да се откаже од својот нуклеарен арсенал, коментираат светските агенции. Вашингтон и Сеул исто така имаа несогласувања околу трошоците на американските трупи во Јужна Кореја, со оглед на тоа што Трамп бараше Сеул да вложи повеќе пари за одржување на 28.500 американски војници.

Нов меѓукорејски состанок на врвот ќе се одржи од 18 до 20 септември

Ивона Петрова — Thu, 06 Sep 2018 06:12:26 +0000

Севернокорејскиот лидер Ким Џонг-ун ќе се сретне со претседателот на Јужна Кореја Мун Џае-ин во Пјонгјанг од 18 до 20 септември. Двајцата лидери ќе разговараат за нуклеарно разоружување. Тоа ќе биде трет самит меѓу нив. Тие ќе разговараат за практичните мерки за денуклеаризација на Корејскиот Полуостров, рече претставникот на Јужна Кореја Чун Ју-Јон. Тој ја предводи делегацијата, која е во посета на Пјонгјанг и му предаде писмо од јужнокорејскиот претседател на лидерот на Северна Кореја. Ким Џонг-ун денеска ја потврди својата заложба за поддршка на денуклеаризацијата на полуостровот. МИА

Мун и Трамп разговарале за Северна Кореја

Матеја Петровски — Sun, 20 May 2018 12:14:22 +0000

Јужнокорејскиот претседател Мун Џае Ин телефонски разговарал со американскиот претседател Доналд Трамп, со цел одржување на самитот САД-Северна Кореја, откако Пјонгјанг се закани дека ќе се откаже. Мун и Трамп размениле ставови за најновите реакции на Северна Кореја, и се договориле дека тесно ќе соработуваат со цел успешно одржување на самитот на Северна Кореја и САД кој е закажан за 12 јуни, как и за претстојниот самит Јужна Кореја-САД. Трамп и Мун треба во вторник да се сретнат во Вашингтон, пред средбата на севернокорејскиот лидер Ким Џонг Ун со американскиот претседател на 12 јуни во Сингапур. (Миа)

Мун: ОН да помогне за проверки на Северна Кореја

Ивона Петрова — Tue, 01 May 2018 08:15:10 +0000

Јужнокорејскиот претседател Мун Џае-ин побара денеска од ОН да помогнат во проверките за планираното затворање на севернокорејскиот полигон за нуклеарни тестови. Мун барањето го упатил во разговор со генералниот серкетар на ОН, Антонио Гутереш, јави Јонхап. Пјонгјанг вети затворање на полигонот за нуклеарни проби во Пунгје за да гарантира транспарентно своја посветеност за прекин на сите нуклеарни и ракетни проби

Ким и Мун: „Садиме мир и просперитет“

Матеја Петровски — Fri, 27 Apr 2018 09:12:25 +0000

Севернокорејскиот лидер Ким Џонг-ун и претседателот на Јужна Кореја, Мун Џае-ин пред вториот круг разговори посадија бор на границата помеѓу двете земји. Тие открија спомен плоча на која е напишано „Садиме мир и просперитет“. По завршувањето на првиот круг разговори портпаролот на јужнокорејскиот претседател Јун Јунг-џан изјави дека Мун и Кин имаа „сериозни, искрени“ разговори за денуклеаризација на Корејскиот Полуостров и постигнување на траен мир. - Двете страни пишуваат заедничко соопштение и двајцата лидери ќе го објават кога ќе биде завршено, наведе Јун. Севернокорејскиот лидер денеска првпат ја помина границата и пристигна во пограничното село Панмунџом, каде беше пречекан од Мун, кој го пофали поради „многу храбрата одлука “ да пристигне во Јужна Кореја на историска средба. Ким пристигна во придружба на неговата помлада сестра Ким Јо Џонг, поранершниот шеф на разузнавачката служба Ким Јонг-чол, кој е задолжен за односите со Сеул. Ким по преминувањето на јужнокорејската граница изјави дека срцето „цело време му чука како лудо“, а потоа и Мун ја помина границата иако тоа не беше предвидено со протоколот. Јун коментирајќи го преминувањето на Мун на севернокорејска територија истакна дека тоа било спонтано. - Откако Ким Џонг-ун премина на јужнокорејска територија, претседателот Мун праша кога тој ќе може да стапне на севернокорејско тло. Ким Џонг-ун веднаш одговори - може и сега и го фати претседателот за рака и го однесе зад демаркационата линија, наведе Јун. Јужнокорејскиот претседател пред средбата изјави дека има големи очекувања и оти ќе успеат да постигнат договор, кој ќе биде „голем подарок за целиот корејски народ и секој мирољубив човек на светот“. Поради средбата на Мун и Ким протестираа стотина јужнокорејски конзервативни активисти. Тие запалија и две хартиени севернокорејски знамиња, на кои имаше слики од Ким, неговиот татко и дедо. - Поднеси оставка Мун Џае-ин, извикуваа демонстрантите. Во првиот круг разговори Мун и Ким разговараа за денуклеаризација и за постигнување на траен мир на Корејскиот Полуостров. - Двајцата лидери имаа искрен и едноставен дијалог за денуклеаризацијата и воспоставување на траен мир на Корејскиот Полуостров и развивање на билатералните односи, посочи портпаролот на Мун, Јун Јунг-џан. Тој наведе и дека сестрата на севернокорејскиот лидер, Ким Јо Џонг, која е дел од делегацијата на Северна Кореја, предложила да се забрза обединувањето на двете Кореи, додека Мун предложил двете земји да се поврзат со железничка линија. - Претседателот Мун истакна дека тоа (железничката линија) ќе придонесе за економската соработка меѓу двете земји, наведе Јун. (Миа)

Мун и Ким разговараа за денуклеаризација на Корејскиот Полуостров

Ивана Ефремовски — Fri, 27 Apr 2018 06:54:39 +0000

Јужнокорејскиот претседател и севернокорејскиот лидер, Мун Џае-ин и Ким Џонг-ун разговараа за денуклеаризација и мир на Корејскиот Полуостров, изјави Јун Јунг-џан, портпаролот на Мун. - Двајцата лидери имаа искрен и едноставен дијалог за денуклеаризацијата и воспоставување на траен мир на Корејскиот Полуостров и развивање на билатералните односи, посочи Јун. Тој наведе и дека сестрата на севернокорејскиот лидер, Ким Јо Џонг, која е дел од делегацијата на Северна Кореја, предложила да се забрза обединувањето на двете Кореи, додека Мун предложил двете земји да се поврзат со железничка линија. - Претседателот Мун истакна дека тоа (железничката линија) ќе придонесе за економската соработка меѓу двете земји, наведе Јун. Проектот за железничко поврзување на двете земји е разгледуван и претходно, при што е предвидено корејската железница да биде поврзани и со Транссибирската линија. Јун коментирајќи го прескокнувањето на границата и преминувањето на Мун на севернокорејска територија било спонтано. - Откако Ким Џонг-ун премина на јужнокорејска територија, претседателот Мун праша кога тој ќе може да стапне на севернокорејско тло. Ким Џонг-ун веднаш одговори - може и сега и го фати претседателот за рака и го однесе зад демаркационата линија, наведе Јун. (МИА)

Заврши првиот круг од преговорите меѓу Мун и Ким

Ивана Ефремовски — Fri, 27 Apr 2018 05:54:27 +0000

Лидерите на Јужна и Северна Кореја го завршија првиот круг од преговори во пограничното село Панмунџон во демилитаризираната зона. Претседателот на Јужна Кореја Мун Џае-ин и севернокроејскиот лидер Ким Џонг-ун час и половина разговараа. По првиот круг разговори Ким се врати во севернокорејскиот дел на Панмунџон со црн автомобил. Лидерите подоцна ќе учествуваат на церемонија на засадување бор што е симболизира мир на Корејскиот Полуостров. Мун и Ким ќе ги продолжат разговорите во четири очи, пред да се вратат на масата за преговори. (МИА)