музеј на македонската борба – Kurir.mk

Слободен влез во Музејот на македонската борба по повод Меѓународниот ден на музеите

Ивона Петрова — Wed, 18 May 2022 05:46:54 +0000

Националната установа Музеј на македонската борба за самостојност го одбележува Меѓународниот ден на музеите со слободен влез за сите посетители денеска во редовното работно време од 10 до 18 часот. Како дел од постојаната музејска поставка посетителите, меѓу другото, ќе можат да ги погледнат и ексклузивните амбиентални претстави на етно куќа и берберницата на Гемиџиите, музејските раритети со исклучителни париња оружје и покуќнина, специјалната тактилна изложба ФОКУС, уметнички портрети на истакнати македонски историски ликови и останати презентации на македонското историско и културно наследство. Дел од програмата на музејот е и ретроспективната изложба „Хартии“ на познатиот македонски уметник Сергеј Андреевски која е поставена во холот на Музејот на македонската борба. Годинешната тема на Меѓународниот ден на музеите е „Моќта на музеите“. Меѓународниот ден на музеите, 18 Мај, е востановен од Меѓународниот совет на музеите (ИКОМ) во 1977, со цел да се насочи вниманието на јавноста за важноста на улогата на музеите во современите општества.

Концертна серија „Musica Viva во чест на 55 години ФМУ“ во Музеј на македонската борба

Ивана Ефремовски — Sat, 27 Nov 2021 13:57:46 +0000

Концертната серија „Musica Viva во чест на 55 години ФМУ“ како дел од одбележувањето на 55 години од основањето на ФМУ – Скопје, започнува вечерва и ќе трае до 29 ноември. Како што информираат од Факултетот за музичка уметност, на програмата од концертната серија која се одржува во Музејот на македонската борба се дела од светската музичка литература во изведба на студенти. Денеска со почеток од 20 часот ќе настапат студентите од класите по гудачки интрументи, гитара, дувачки инструменти и камерна музика. На репертоарот утре, во исто време, се студентите од класите по соло пеење и корепетиција, а во понеделник од 20 часот студентите од класите по пијано. Во рамки на одбележувањето на 55 години од своето основање Факултетот за музичка уметност започнува и со циклус предавања „Научни среди“. Предавањето ќе го отвори професор д-р Снежана Филиповска со тема „Балетската уметност како составен дел од културните збиднувања во Македонија“ на 1 декември на платформата zoom со почеток во 19 часот. Влезот е слободен, а заради ограничениот број на седишта потребна е резервација на [email protected]. (МИА)

Поставена изложбата „Градење на македонската државност“ во Музеј на македонската борба

Ивона Петрова — Fri, 07 May 2021 07:33:25 +0000

Во холот на НУ Музеј на македонската борба за самостојност поставена е изложбата „Градење на македонската државност“ посветена на столбовите на македонската држава – трите заседанија на АСНОМ. По повод осум децении од Априлската војна (6-17.4.1941 г.), годишнината од Третото заседание на АСНОМ (14-16.4.1945г.), а во пресрет на 9 Мај, Денот на победата над фашизмот, изложбата претставува историско-документарно сведоштво за еден релативно краток историски период, кој е од есенцијално значење за современата македонска историја. Три тематски целини посветени на Првото, Второто и Третото заседание на Антифашистичко собрание на народното ослободување на Македонија (АСНОМ) го портретираат патот кон слободата, поставувањето на темелите на македонската државност и сведочат за слободарските идеи, демократијата и човековите права. Изложбата е дел од програмските активности на Музејот на македонската борба, поддржани од годишната програма на Министерството за култура, а може да се посети секој ден освен понеделник од 10 до 18 часот, почитувајќи ги сите мерки и работни протоколи во услови на ковид.

Изложба „Панаѓурите во градските и руралните средини во XIX и XX век во Османлиска Македонија“

Ивона Петрова — Thu, 21 Jan 2021 08:22:24 +0000

Изложбата Панаѓурите во градските и руралните средини во XIX и XX век во Османлиска Македонија е поставена во НУ Музеј на македонската борба за самостојност. -Врз основа на литературата, сите достапни извори и теренските истражувања, изложбата дава визуелен приказ на историските аспекти на панаѓурите во градските и руралните средини во 19 и 20 век, дефинирајќи ја временската рамка на нивниот постанок, развој и функционирање, информираат од Музејот. Автори на изложбата се Дарко Трпески и Владо Кузмановски, музејски водичи во НУ Музеј на македонската борба, а надворешни соработници се етнокореологот Тијана Јаневска и Ансамбл Македонија. Изложбата е отворена за посетители од 20 јануари до 1 март, секој ден освен понеделник, од 10 до 18 часот, почитувајќи ги протоколите и мерките за заштита од Kовид. Изложбата Панаѓурите во градските и руралните средини во XIX и XX век во Османлиска Македонија е поддржана во рамки на Годишната програма на Министерството за култура.

Изложба „15 години“ во Музејот на македонската борба

Ивона Петрова — Fri, 04 Oct 2019 07:04:06 +0000

Во НУ Музеј на македонската борба за самостојност, утре со почеток во 19 часот свечено ќе биде отворена изложбата „15 години“ на Историскиот музеј на Босна и Херцеговина. Во наредните триесетина дена, македонската публика ќе има можност да ги види фотографиите на Џим Маршал чиј фокус е Сараево во временскиот период 1996/2011. Изложбата се реализира како дел од Годишната програма на Министерството за култура, а на отворањето ќе се обратат директорките на двете институции – Даниела Николова и Елма Хашимбеговиќ, како и вршителот на работите во Амбасадата на Босна и Херцеговина, Јасмин Гагула. Отворањето на изложбата е дел од манифестацијата „Бела ноќ“, на кое специјален музички настап ќе има Дуња Иванова со нејзината програма „Слушаме во црно-бело“.

Отворање на изложбата „Спомени од Првата светска војна“

Ивона Петрова — Mon, 24 Dec 2018 06:29:16 +0000

Во Музејот на македонската борба денеска напладне ќе биде отворена изложба „Спомени од Првата светска војна“ со која музејот се придружува во одбележувањето на 100-те години од крајот на еден од најкрвавите и најдраматичните настани од светската историја. -Тематската мултимедијална изложба ги опфаќа најзначајните настани, процеси и сведоштва од Големата војна во Македонија. Преку различни видови и форми меморија – документарни материјали, фотографии, лични сведоштва, поткрепени со богат музејски фонд, изложбата ги презентира војничкиот живот, но и животот во време на војна од наша, автентична, перспектива, соопшти Музејот на македонската борба.

Изложба „На маргините на Скопскиот регион“ во Музеј на македонската борба

Ивона Петрова — Mon, 26 Nov 2018 08:39:38 +0000

Во холот на НУ Музеј на македонската борба денес во 12 часот ќе биде поставена изложбата „На маргините на Скопскиот регион, сакрални објекти и рурална архитектура“ од Дарко Николовски. Изложбата во организација на Центарот за културно и духовно наследство е фото сторија на Дарко Николовски и го опфаќа богатото културно наследство кое и покрај видно нарушената состојба сведочи за автентичноста и континуитетот на македонската градителска и зографска традиција. Направен е избор од големиот број споменични добра во скопскиот регион, но пред сè на ониекои се оставени на маргините од каде полека, но сигурно, одат возаборав од луѓето и времето. Изложбата се реализира со поддршка на Град Скопје и ќе биде отворена до 3 декември.