МЗТ Скопје – Kurir.mk

МЗТ Скопје Аеродром го совлада Пелистер во македонската пресметка во АБА 2

Тале Кристо — Fri, 13 Oct 2023 18:03:45 +0000

МЗТ Скопје Аеродром го совлада попладнево Пелистер со 91-78 (45-40) во македонската пресметка во регионалната кошаркарска АБА 2 лига. Војдан Стојановски со 20 поени беше најефикасен во редовите на МЗТ Скопје, додека неговиот брат Дамјан, како и српскиот интернационалец Душан Танасковиќ придонесоа во триумфот со по 16 кошеви. Актуелниот македонски шампион ја забележа првата победа на воведниот „балон“ чиј домаќин е Суботица, откако во првото коло загуби од Цедевита јуниор со 79-92. Кошаркарите на Пелистер, пак, го претрпеа првиот пораз во новата сезона по стартната победа над Шенчур од 78-72 по продолжение. МЗТ Скопје, Пелистер, како и третиот македонски претставник ТФТ Мцарт натпреварите во АБА 2 лига ги продолжуваат во ноември.

МЗТ Скопје на една победа до десетта шампионска титула

Ивона Петрова — Wed, 31 May 2023 19:12:56 +0000

Една победа го дели МЗТ Скопје Аеродром до јубилејната 10. шампионска титула во македонското кошаркарско првенство. Тимот од Аеродром вечерва на домашен терен по втор пат го победи Пелистер во финалето на плејофот. Овој пат резултатот беше 75:67. Војдан Стојановски со 23 поени ги предводеше „сино-белите“ до триумфот. Кај битолчани се истакна Андреј Маслинко со 16 поени. Финалната серија се сели во Битола. Доколку во третиот натпревар победи МЗТ Скопје ќе ја одбрани шампионската титула, а битолчани само со успех ќе се надеваат на продолжување на шансите за освојување на тронот.

Бадел и Баскет Кам на чекор од ново финале женскиот кошаркарски шампионат

Бошко Тасиќ — Mon, 24 Apr 2023 07:50:55 +0000

Финалистите од претходните две сезони Бадел и Баскет Кам максимално ја искористија предноста на домашниот терен и се на една победа од нова битка за шампионскиот трофеј во домашното првенство. Двете екипи славеа против своите ривали и во вторите натпревари и водат со 2-0 пред првите гостувања од своите серии. Баскет Кам го совлада МЗТ Скопје со 88-62, а Бадел беше подобар од Струга со 51-44. МЗТ Скопје три четвртини се одржуваше во живот на гостувањето во Македонска Каменица за да колабира во последните десет минути кои домашниот тим ги доби со 38-20. Димова и Тасевска постигнаа по 20 поени, а Милованова додаде 15. Кај МЗТ, убедливо најефикасна беше Симонс која постигна речиси половина од поените на својот тим – 30. Далеку понеефикасно беше во Кисела Вода каде двете екипи реализираа едвај 95 поени. Клучната предност Бадел ја направи во втората четвртина која ја доби со 15-4 и на голем одмор замина со 28-17 за во продолжение само да ја одржува разликата. Матје го предводеше Бадел со 18 поени и 11 скока, додека на спротивната страна блескаше Ли со 23 поени и 11 скока. Третите натпревари од серии се играат на 26 април на терените на МЗТ Скопје и Струга и тогаш би можеле да ги добиеме и учесниците во големото финале.

Општина Аеродром до сите љубители на спортот: Влезот е бесплатен, дојдете заедно да ги бодриме кошаркарите на МЗТ

Тале Кристо — Fri, 14 Apr 2023 09:35:49 +0000

Денеска, со почеток од 18 часот, клубот кој е гордоста на Аеродром и македонската кошарка - МЗТ Скопје, го игра најважниот натпревар во оваа сезона, од кој зависи иднината и опстанокот во елитното јадранско натпреварување. Натпревар во кој МЗТ Скопје не се бори само за опстанок во најпрестижната АБА 1 лига, туку и за промоција на македонската кошарка пред најмоќните и најголемите клубови на Балканот. Влезот за натпреварот е бесплатен, а можноста за победа е голема. На кошаркарите на МЗТ Скопје им треба нашата поддршката повеќе од кога било. Ги покануваме сите љубители на спортот, фанови и поддржувачи на МЗТ, како и сите оние кои ја сакаат кошарката, да присуствуваат на денешниот натпревар и си тоа да дадеме поддршка за останување на МЗТ во АБА лигата.

Тренерот на МЗТ Скопје не отпатува на дуелот во Сплит поради коронавирус

Тале Кристо — Thu, 06 Apr 2023 17:18:39 +0000

Српскиот стратег Драган Николиќ нема да може да го предводи МЗТ Скопје Аеродром на утрешното гостување во Сплит поради коронавирус, а на клупата на македонскиот кошаркарски првак во дуелот во кој само со победа ќе ги задржи шансите за опстанок во АБА лигата ќе седи неговиот прв помошник Васко Атанасов. „Повтореното тестирање пред заминувањето за Хрватска покажа дека Николиќ сè уште е позитивен, поради што беше донесена одлука да не тргнува на пат со цел да не се ризикува пренесување на коронавирусот и на другите кошаркари и членови на стручниот штаб. Поради иста причина во Сплит не замина ниту Андреј Андоноски, кој исто така беше тестиран позитивен на коронавирусот и кој нема да биде во тимот на утрешната средба“, соопшти попладнево МЗТ Скопје Аеродром. Натпреварот во сплитската сака „Грипе“ се игра утре со почеток во 18 часот. На две кола до крајот на регуларниот дел од сезоната МЗТ Скопје е последнопласиран на табелата со пет победи, една помалку од Борац на 13. место кое обезбедува разигрување за опстанок во АБА лигата.

МЗТ Скопје Аеродром го совлада ФМП во АБА лигата

Тале Кристо — Fri, 03 Mar 2023 19:36:07 +0000

Важна победа во битката за опстанок извојуваа вечера кошаркарите на МЗТ Скопје Аеродром совладувајќи го на домашен терен ФМП со 87:82 во рамки на 20 коло во АБА лигата. Гостите од Србија заминаа на полувреме со предност од 38:35, а МЗТ клучната предност ја оствари во третата четвртина која ја реши во своја корист со 30:18. До четвртата победа сезонава во регионалното натпреварување македонскиот шампион го предводеше Американецот Мајкл Кефи со 26 поени. МЗТ Скопје Аеродром сега се израмни со бројот на победи со Борац на последните две места на табелата и ги задржа шансите за опстанок во лигата. Во преостанатите шест кола до крајот на сезоната МЗТ го очекуваат три натпревари на домашен терен против Игокеа, Задар и Цибона, како и гостувања кај Мега, Борац и Сплит.

МЗТ Скопје по победата над ТФТ се пласира во финалето на Купот на Македонија

Бошко Тасиќ — Fri, 17 Feb 2023 18:29:26 +0000

МЗТ Скопје буквално го прегази тимот на ТФТ победувајќи го со 41 поен разлика, тимот од аеродром славеше со 102-61 и се пласираше во финалето од Купот на Македонија. Кошаркарите на МЗТ Скопје утре ќе се борат за 11. трофеј во Купот на Македонија со што би се одлепиле од главниот ривал Работнички со кој засега имаат по 10 трофеи во ова натпреварување. Неизвесно беше само во првите минути од мечот, потоа МЗТ Скопје се одлепи и уште во првиот период направи двоцифрена разлика која до крајот на мечот само ја зголемуваше за на крајот да победи со дури 41 поен разлика, 102-61. Кошаркарите на МЗТ Скопје имаа шутерско шоу, постигнаа дури 18 тројки. Најдобар стрелец беше Дамјан Стојановски со 18 поени, Робев постигна 16. Во составот на ТФТ, Бишоп постигна 15 поени.

МЗТ Скопје катастрофално поразен од Партизан во Белград

Ивана Ефремовски — Mon, 16 Jan 2023 19:13:51 +0000

Кошаркарите на МЗТ Скопје вечерва загубија на гостувањето во Белград од фаворитот Партизан со 120-67 (54-34) во рамки на 15. коло во регионалното АБА натпреварување. Најефикасен на натпреварот беше кошаркарот на Партизан, Смаилагиќ со 24 поени, додека најистакнат во редовите на МЗТ Скопје беше Војдан Стојановски со 16 поени. МЗТ Скопје со овој пораз остана на последното место на табелата со ефект од две победи и 13 порази и ќе има тешка задача да избори опстанок во сезоната во која по подолга пауза се врати во регионалното друштво. Во следното коло македонскиот првак на 21 овој месец во Скопје го пречекува подгорички Будуќност. (МИА)

МЗТ Скопје подобар од Пелистер во дербито на 11. коло од кошаркарскиот шампионат

Тале Кристо — Tue, 27 Dec 2022 18:47:34 +0000

Кошаркарите на македонскиот шампион МЗТ Скопје Аеродром вечерва во Битола го совладаа Пелистер со во дербито на 11. коло со 83:79. Најзаслужни за победата на гостите беа Бојан Крстевски и Победникот беше решен по неизвесен финиш и Мајкл Кефи со по 22 поена, Александар Бурсаќ додаде 19. Кај битолчани, Сеад Хаџифејзовиќ и Донтај Карутерс беа најефикасни со по 20 поени. МЗТ Скопје со 10 победи и само еден пораз е лидер на табелата. Пелистер е на втората позиција со осум победи и три порази колку што има и третопласираниот Гостивар.

МЗТ Скопје лесно и убедливо го преслуша некогаш големиот ривал за трофеи!

Бошко Тасиќ — Tue, 06 Dec 2022 21:51:12 +0000

Кошаркарите на МЗТ Скопје вечерва, на домашен терен, лесно и убедливо го совладаа Еуро Никел (77-51) со што дојдоа до шестиот триумф во низа во Првата лига и одново се искачија на лидерската позиција на табелата. Дамјан Робев беше најефикасен во победничкиот тим со 17 поени додека Самит Јигитогли имаше дабл-дабл ефект со 16 поени и 13 скока. Јуре Планиниќ со 15 поени беше убедливо најдобар кај Еуро Никел. Ова беше последен меч од осмото коло во Првата лига, по кое МЗТ Скопје е прв со скор 7-1 и тоа поради подобрата кош-разлика во однос на Гостивар и Пелистер, кои го имаат истиот учинок.