набавки – Kurir.mk

Град Скопје направил набавки вредни 1.6 милиони евра за информатички услуги на системот за зонско паркирање

Ивана Ефремовски — Thu, 04 Mar 2021 19:18:59 +0000

Јавното претпијатие Градски паркинг - Скопје за три претходни години, тековната 2021 година и дополнително за следната 2022 година направил набавки за фрапантни 99.120.000 милиони денари или 1.622.414 милиони евра за информатички услуги за одржување на зонскиот паркинг во градот. Имено, ЈП Градски паркинг Скопје направило набавка за одржување на системот за зонско паркирање, во постапка со преговарање без претходно објавување на оглас за фантастични 42.480.000 милиони денари или 689.336 илјади евра само за 24 месеци, говорат јавно достапните податоци од системот за јавни набавки. Цената според договорите за набавка на овои тендери за споредба во 2018 година истиот тендер за одржување на системот за зонско паркирање за територија на град Скопје чинел 15.340.000 денари, во 2019 година истата услуга се зголемила за над 5 милиони денари, па чинела 20.060.000 милиони денари, а во 2020 година се зголемила за уште еден милион денари, па набавката чини 21.240.000 денари. Според податоците и склучените договори сумарно за три претходни години, тековната 2021 и за следната година градоначалникот Петре Шилегов и директорот на ЈП Градски паркинг Скопје Борче Јакимовски, ќе потроши фрапантни 99.120.000 милиони денари или 1.622.414 милиони евра за информатички услуги за одржување на зонскиот паркинг во градот. Во споредба за истиот тендер за поголемите градови како Струмица, Битола или Куманово одржување на системот за зонско паркирање се врши по цена на договорите која е и до дваесет пати пониска од цената на чинење на набавката од Град Скопје - ЈП Градски паркинг коешто може да се увиди во прегледот на набавки од Електронскиот систем за јавни набавки.

Набавки во време на КОВИД-19: Нетранспарентни тендери и фаворизирање на фирми!

Љупчо Цветаноски — Wed, 22 Apr 2020 11:47:18 +0000

Склучени се 71 договор во вкупна вредност од 1,5 милиони евра. Станува збор за итни јавни набавки поврзани со заштита и превенција од ширењето на заразата од корона вирусот, односно број на договори кои се склучени во периодот од почетокот на март до 20 април. Најголема набавка има направено министерството за здравство, а тоа е набавката за респиратори. Во 44 % од случаите се преговарало само со една фирма. Значаен дел од институциите продолжуваат со практиката, пред склучувањето на итните договори, да преговараат само со една наместо со повеќе фирми. Ова се информации од Извештајот од мониторингот на јавни набавки поврзани со корона вирусот подготвен од Центарот за граѓански комуникации. Во Извештајот има забелешки за недостиг на информации во однос на набавка на маски, за нетранспарентна набавка на медицински ракавици и слично. Според Извештајот дел од институциите и натаму не ги објавуваат известувањата за склучен договор и самите договори. Најголема поединечна набавка е за респираторните машини, за што се потрошени 909 илјади евра. Досега најголема набавка поврзана со кризата е онаа на министерството за здравство, кое со посебна Уредба на Владата набави 31 респираторна машина за 909.561 евро, или по просечна цена од 29.340 евра по машина. Специфичноста на оваа набавка е што се објави јавен оглас во којшто се бараа понуди во рок од три дена, со однапред утврдена максимална цена од 25.000 евра по машина (без давачки) и максимален рок на испораката од 30 дена. Добиени се девет понуди, од кои седум се отфрлени поради неисполнување на рокот на испораката, цената или други услови од повикот. -Во 44 % од случаите се преговарало само со една фирма. Значаен дел од институциите продолжуваат со практиката, пред склучувањето на итните договори, да преговараат само со една наместо со повеќе фирми, се вели во Извештајот. Најчесто се купува заштитна опрема, и тоа маски, ракавици и скафандери, со шареноликост во цените. Државните институции набавуваат повеќе видови маски, од двослојни или трослојни заштитни хируршки маски по цени од 30 до 45 денари, преку заштитна маска N95 со цени од 200 до 340 денари, респираторни маски FFP3 со цена од 177 денари и респираторни маски N95 кои чинат од 66 до 97 денари, па сè до платнени маски по цена од 35 денари и хируршки маски со визир по цена од 53 денари. Шареноликост постои и во однос на скафандерите, па некои купуваат од оние за еднократна употреба, за кои плаќаат од 177 до 485 денари, а други купуваат скафандери за повеќекратна употреба, по цени од 1.180 денари. Кога станува збор за ракавици за еднократна употреба, забележана е значајна разлика во цените: од 1,76 денари до 4,70 денари. Малопродажната цена за овие ракавици е главно 3,5 денари и произлегува дека одредени институции ги купуваат по цени што се повисоки и од малопродажните. Со набавката на респираторните машини и пет други набавки, министерството за здравство досега склучило највредни договори за јавни набавки поврзани со коронавирусот. Следат Градската болница во Скопје, но и Градот Скопје, како и владината Служба за општи и заеднички работи. Прилепската болница е единствена локална болница на овој список, а како локални институции се јавуваат и скопското Јавно претпријатие за паркови и зеленило и Општината Бутел. Од министерствата, покрај Министерството за здравство, единствено друго со поголеми набавки е Министерството за одбрана, а од клиниките станува збор за Клиниката за гинекологија и акушерство. Кај фирмите, најголеми се договорите за респираторните машини, по што следат трите фармацевтски компании – Алкалоид, Д-р Пановски и Еуро-фарм. Најголема поединечна вредност на еден договор и, воедно, фирма со највреден договор е Соникс Анастасија ДООЕЛ од Скопје, за 26-те од набавените 31 респираторна машина. Следна е втората фирма, која обезбеди 5 респираторни машини, Винора ДООЕЛ Скопје. Следи Алкалоид АД Скопје со склучени осум договори. Според Извештајот „недостигаат информации во однос на најавена набавка на 2.000 маски од страна на Владата“. Или јавниот повик за интервентната набавка на маски е објавен на веб-страницата на Владата на 23 март 2020, додека Уредбата за интервентана набавка на заштитни маски е донесена на владина седница на 1 април. Оттука нејасно е дали претходно објавениот повик е поништен и доколку е така, каде и кога е објавен новиот повик за оваа интервентна набавка. Информации за овој повик, како и за текот и епилогот на оваа интервентна набавка не се објавени ниту на веб-страницата на Владата, ниту на Електронскиот систем за јавни набавки. Во Извештајот се наведува дека „нетранспарентно се одвива и набавката предвидена со Уредбата за интервентна набавка на медицински ракавици“. -Во согласност со оваа уредба донесена на 1 април сите фирми кои увезуваат медицински ракавици за еднократна употреба се должни 30% од увезените количини да ги понудат на Генералниот секретаријат на Владата по цена зголемена до 10% од вредноста на производот со сите давачки. Прво, ваквото постапување може да се протолкува како дискриминаторско, бидејќи не се однесува на сите туку само на дел од производите кои се наметнуваат како неопхoдни во периодот на справување со пандемијата Ковид-19. Второ, неопходно е Владата да најде начин целиот овој процес да го води транспарентно и навреме да ги информира граѓаните за сите релевантни информации, се посочува во Извештајот нa Центарот за граѓански комуникации.

Регулаторни тела во САД со истрага за набавки во пет големи технолошки компании

Тале Кристо — Tue, 11 Feb 2020 18:30:49 +0000

Американски сојузни регулаторни тела засилија истрага за пазарна доминација на пет големи технолошки компании и бараат детални информации за нивните аквизиции од 2010 година. Федералната комисија за трговија (ФТЦ) објави денеска дека тоа ќе се стори и издаде наредби до „Фејсбук“, „Амазон“, „Епл“, „Мајкрософт“ и „Алфабет Инк“. ФТЦ, Министерството за правда и одбор на Претставничкиот дом на американскиот Конгрес го испитуваат однесувањето на големите технолошки компании и дали тие имаат агресивно купени потенцијални ривалски фирми за да ја задушат конкуренцијата и да им наштетат на клиентите.

„Лидер“ објавува прв скандал во 2019: Неформалниот сопруг на министерката Царовска добивал набавки во четири очи

Ивона Петрова — Wed, 02 Jan 2019 11:04:21 +0000

Три јавни набавки со вкупна вредност од 1.5 милиони денари добила компанијата „ФЛАЈ КЕМ“ ДООЕЛ Скопје, која е во сопственост на неформалниот сопруг на министерката за труд и социјална политика Мила Царовска. Во исто време, во анкетните листови за состојбата на нејзиниот имот, Царовска не го пријавила богатството – открива Економски Лидер во својот прв скандал за годинава. Горан Георгиев веќе подолго време живее во заедница со министерката Царовска. Имаат и детенце кое е продукт на нивната љубов, имаат автомобил и стан. Навидум, Горан и Мила се класично македонско семејство, со една разлика што тие немаат формално стапено во брак, пишува Лидер. Според македонските закони, иако партнерите не се стапени во формална брачна заедница, тие целосно ги уживаат истите права и обврски со оние кои го ставиле својот потпис пред матичарот. Но, доколку се погледне анкетниот лист на министерката Царовска поднесен до ДКСК (Државна Комисија за Спречување на Корупција), таму не може да се пронајде ништо од богатството на нејзиниот неформален сопруг. Во анкетниот лист може да се пронајде нејзиниот личен имот, имот на нејзините родители и нејзинот брат, но не и имотот на нејзиниот животен сопатник.

Анкетен лист на министерката Мила Царовска, Државна Комисија за Спречување на Корупција

Според законските норми, предмет на толкување е дали функционерите треба да поднесуваат извештај за имотот на нивните неформални партнери. Но, со оглед на тоа што се работи за лица кои живеат заедно, имаат деца и практично единствено потписот пред матичар ги дели од брак, според толкувањата на правниците ова може да претставува мудар начин за прикривање на корупција.

Мила е министерка, Горан лета дронови на државна сметка!

Вкрстената проверка на Лидер во Управата за јавни приходи и Централниот регистар, покажува дека Горан Георгиевски е единствен сопственик на компанијата „ФЛАЈ КЕМ ДООЕЛ“ – Скопје. Компанијата е основана во 2015 година а од тогаш па наваму во три набрати добила пари од државата. Последниот договор, Георгиевски го склучил со АД МЕПСО на 10.04.2018. Според него, „ФЛАЈ КЕМ“ за потребите на МЕПСО обезбедила некакви „Специјални летечки уреди (дронови) за извршување вонреден преглед на ДВ“, вкупната вредност на договорот 779.980 денари. Целиот текст и објавените документи може да ги погледнете на ЛИДЕР

Договор во 4 очи со државата: Клиниката за радиотерапија и онкологија склучила договор со Д-р Пановски во вредност од 50 илјади евра

Предраг Кукиќ — Fri, 21 Sep 2018 08:54:44 +0000

Клиниката за радиотерапија и онкологија на 17-ти септември склучила договор во 4 очи за набавка на лекови со веледрогеријата Д-р Пановски. На системот за Јавни набавки има објавено договор во кој како договорен орган стои Универзитетската клиника за радиотерапија и онкологија и во овој како предмет на договорот на јавна набавка стои набавка на лекови преку постапка со преговарање без претходно објавување на оглас со вкупна вредност на договорот од 3.024.000 денари односно околу 50 илјади евра. Упатените коментираат дека со укинувањето на советот за јавни набавки кое се случи непосредно по доаѓањето на власт на СДСМ институциите изгубија контрола врз постапките за јавни набавки кои се почесто се склучуваат во 4 очи. На овој начин се отвораат нови можности околу злоупотреби на целиот процес и се отвора можност за корупција.

МВР за репрезентативен материјал ќе потроши 40 илјади евра

Предраг Кукиќ — Tue, 18 Sep 2018 10:46:06 +0000

Министерството за внатрешни работи преку електронскиот систем за јавни набавки склучи договор за набавка на репрезентативен материјал, а проценетата вредност на „зделката“ изнесува 2.427.024 денари или околу 40 илјади евра. Предмет на јавната набавка се роковници, пенкала, папки и брендирани рекламни траки. Имено според договорот склучен на 29 август годинава МВР набавува хемиски пенкала по цена од 57 денари без ДДВ. Со ДДВ цената достигнува 67 денари за пенкало.