национална опера и балет – Kurir.mk

Музичко-сценски спектакл „Фолклорно-класична симбиоза“ на НОБ и „Танец“

Ивона Петрова — Wed, 27 Sep 2023 06:39:02 +0000

На сцената на Националната опера и балет вечер ќе се одржи „Фолклорно-класична симбиоза“, музичко-сценски спектакл на НУ Национална опера и балет и НУ „Танец“. За прв пат во македонската понова историја, Националната опера и балет и „Танец“ ќе прозвучат заедно, со повеќе од 130 учесници на сцена, во заедничка изведба на симфонизираните антологиски кореографии „Осоговка“, „Малешевка“, „Жетварка“, „Пиринско пролетно цвеќе“, „Водарки“, како и многу други македонски орски и вокални мелодии од богатиот репертоар на „Танец“. Концертот ќе се одвива под диригентската палка на маестра Бисера Чадловска, концерт-мајстор е Верица Ламбевска, а хор-мајстор Ѓурѓица Дашиќ. Настапува оркестарот, хорот и играорниот кор на НУ Танец, како и оркестарот и хорот на НУ Национална опера и балет. -Фолклорно-класична симбиоза е замислен како музичка фузија на две различни традиции - класиката и фолклорот, вешто преточена во новите аранжмански партитури на Дарко Илиевски (истакнат инструменталист, автор и раководител на оркестарот на „Танец“). Македонската јавност и македонската музичка култура во целост ќе добијат уште едно комплексно дело со врвен уметнички израз, кое на достоинствен начин го чува и унапредува македонското музичко творештво, се наведува во соопштението од Национална опера и бале

„Шехерезада“ и „Валпургиска ноќ“ во Националната опера и балет

Ивона Петрова — Fri, 07 Oct 2022 05:38:42 +0000

Во Националната опера и балет вечер ќе бидат изведени балетските едночинки „Шехерезада“ од Н. Р. Корсаков и „Валпургиска ноќ“ од Шарл Гуно. Ќе настапат првенци, истакнати солисти, солисти, балетските ансамбли на Националната опера и балет и Државната опера од Варна, Бугарија. Приказните од „Илјада и една ноќ“ преточени во балетот „Шехерезада“ од Н. Р. Корсаков ќе се изведе под диригентската палка на гостинот од Бугарија, Григор Паликаров, кореографијата ја пренесе познатиот балет-мајстор од Москва, Михаил Крапивин, со првична постановка на Михаил Фокин. Сценографијата е на Марија Ветероска, а костимите на Маја Бурсаќ од Србија. Балетската приказна ќе ж ја раскажат Ивана Коцевска во улогата на Забеида, Балаж Лашеи (Унгарија) во улогата на Златен роб. Во вториот дел публикате ќе има можност да ја проследи едночинката „Валпургиска ноќ“ (балетскиот дел од операта „Фауст“ од Шарл Гуно.) Диригент е Григор Паликаров (Бугарија), кореографијата е на Леонид Лавровски, редакцијата на кореографијата и режијата е на Светлана Тоншева (Бугарија), а костимограф: Изабела Поњавиќ. Настапуваат Марија Кичевска Шокаровска, Павел Кирчев (Бугарија) и Марко ди Салво (Бугарија). Настапуваат првенци, истакнати солисти, солисти, балетскиот ансамбл на Националната опера и балет и Државната опера Варна, Бугарија, во придружба на оркестарот на Националната опера и балет. Во Фоајето на Националната опера и балет од вечерва ќе биде поставена изложба на дел од костимографијата од оперските и балетските премиери изведени во последните три сезони во НОБ.

„Турандот“ во Националната опера и балет

Ивона Петрова — Wed, 09 Feb 2022 06:53:04 +0000

Операта „Турандот“ од Џакомо Пучини вечер ќе биде изведена во Националната опера и балет. Диригент е Бисера Чадловска, а режијата, сценографијата и костимографијата се на Џанкарло дел Монако. Кореографијата е на Саша Евтимова, а концерт мајстор – Јане Бакевски. Настапува врвна домашна солистичка екипа: Весна Ѓиновска Илкова, Ѓорѓи Цуцковски, Злата Тошевска, Владимир Саздовски, Јане Дунимаглоски, Дејан Стоев, Диме Петров, Мирослав Антовски, хорот, оркестарот и балетскиот ансмбл на Националната опера и балет. „Турандот“ е опера во три чина од Џакомо Пучини. Напишана е по либретото на Џузепе Адами и Ренато Симони, а базирана на адаптацијата на Фридрих Шилер на драмата „Турандот“ од Карло Гоци. Пучини умира недовршувајќи ја операта, која што подоцна е завршена од Франко Алфано. Одликувајќи се со „невообичаен“ музички материјал, во кој предничи иновативната употреба на хорот и оркестарот, стилот на Пучини во ова оперско дело е особено препознатлив во широките, експресивни мелодии. „Турандот“ изобилува со моменти на восхитувачка мелодиска убавина, која особено доаѓа до израз во незаборавната тенорска арија, една од најубавите во оперската литература, „Никој не спие“(Nessun dorma).

„Жизел“ од Адолф Адам во Националната опера и балет

Ивона Петрова — Wed, 03 Nov 2021 06:57:50 +0000

Во Националната опера и балет вечерва ќе се изведе новата балетска продукција на романтичниот балет во два чина „Жизел“ од Адолф Адам. -Магичната и безвременска приказна за несреќната љубов, преточена во музиката на францускиот композитор Адолф Адам, а во кореографија на Жан Корали, Жил Перо, Мариус Петипа, Леонид Лавровски. Адаптацијата на кореографијата е на Ирена Пасариќ од Хрватска, Пасариќ е хрватска примабалерина со богата домашна и меѓународна кариера, како и поранешен директор на Балетот на Хрватско народно казалиште (ХНК) во Загреб, велат од Националната опера и балет. Диригент на претставата е Иван Еминовиќ, костимографијата е на Александар Ношпал, сценографијата на Александар Ношпал и Михајло Стојановски, светло дизајн: Милчо Александров. Во насловната улога ќе настапи првенката Мими Поп Алексова Атанасовска , Алберт: Бобан Ковачевски, Хиларион: Игор Веланоски, Мирта: Ивана Коцевска, Па де де: Христина Наќевска, Ендру Кук (Англија). Настапува оркестарот и балетскиот ансамбл на Националната опера и балет.

Операта „Кармен“ вечер од 19 часот во Националната опера и балет

Ивона Петрова — Fri, 12 Mar 2021 06:13:41 +0000

Операта „Кармен“, ремек делото на Жорж Бизе, ќе биде изведена вечер со почеток во 19 часот во Националната опера и балет. Диригент е Бисера Чадловска. Во главните улоги настапуваат солистите Зоран Сотиров, Ристе Велков, Злата Тошевска, Катерина Стојановска, Марика Поповиќ, Драган Ампов, Дејан Стоев и Ернест Ибраимовски, а во улогата на Кармен, премиерно ќе настапи Николина Јаневска. Од Националната опера и балет информираат дека настанот ќе се одржи според протоколите за заштита од Ковид – 19. Влезот за публиката ќе биде отворен еден час пред почетокот на претставата.

Четири изведби на балетот „Оревокршачка“

Ивона Петрова — Wed, 25 Dec 2019 07:04:59 +0000

Во пресрет на новогодишните празници, Националната опера и балет четири пати ќе ја изведе балетската претстава „Оревокршачка“ поради голем интерес. Се работи за едно од најпопуларните и најизведувани дела на музика на Петар Илич Чајковски кое публиката ќе има можност да го види денеска и на 28, 29 и 30 декември. Денешната и изведбата в недела се наменети за најмладите и ќе почнуваат во 12 часот, а претставите на 28 и 30 декември се со почеток во 20 часот. Ќе настапи оркестарот под диригентство на Бисера Чадловска, балетски првенци, ансамблот на Балетот, како и ученици од ДМБУЦ „Илија Николовски Луј“. – Волшебна балетска авантура за сите возрасти. Новогодишно-божиќна бајка која мириса на снег, карамела и на цимет. Обоена е со црвено, златно и со бело. Веројатно затоа на публиката никогаш не и е доста од балетот „Оревокршачка“, соопшти НОБ.

Јапонски грант за Националната опера и балет

Ивона Петрова — Wed, 11 Dec 2019 06:55:18 +0000

Грант од околу 663.000 евра ќе ѝ додели Владата на Јапонија на Националната опера и балет за проектот за подобрување на музичките инструменти и опремата за озвучување и осветлување во институцијата. Во присуство на јапонската амбасадорка Кеико Ханеда, вицепремиерот за европски прашања Бујар Османи и министерот за култура Хусни Исмаили, договорот за грантот денеска во НОБ ќе го потпишат Џиро Такеичи, извршен директор на Јапонската агенција за меѓународна соработка „ЏАЈКА Балкан“ и Васо Ристов, директор на Националната опера и балет.

„Дамата со камелии“ идната недела во Опера и балет

Ивона Петрова — Wed, 16 Oct 2019 09:14:35 +0000

Раскошната балетската претстава „Дамата со камелии“, на музика од Џузепе Верди ќе биде изведена идната недела, на 22 октомври во 20 часот, во Националната опера и балет. „Дамата со камелии“ е балетска продукција која наиде на одличен одзив кај публиката и беше оценета со позитивна критика, својата премиера ја имаше на 31.10.2014 г. Работена по музиката на Џузепе Верди, а драматуршката подлошка е земена од неговата популарна „Травијата“. Кореографијата е на еден од водечките руски кореографи Василиј Медведев, кој работи со големите театри „Бољшој“ од Москва и „Марински“ од Санкт Петербург. Прекрасните костими и убавата сценографија се дело на Павол Јураш, гостин од Словачка. Во главните улоги ќе настапат првенците Марија Кичевска-Шокаровска и Бобан Ковачевски. Настапуваат солисти, балетскиот ансамбл и оркестарот на Националната опера и балет. Диригент е Иван Еминовиќ.