Нафтали Бенет – Kurir.mk

Израелскиот премиер Нафтали Бенет се повлекува од политиката

Ивона Петрова — Thu, 30 Jun 2022 05:55:26 +0000

Израелскиот премиер, Нафтали Бенет, синоќа соопшти дека нема да се кандидира на претстојните парламентарни избори и дека ќе се повлече од политичкиот живот. Како што најави премиерот во заминување, тој ќе остане на вицепремиерската позиција до изборите што треба да се одржат наесен, а во своето обраќање до нацијата изјави дека е горд на постигнувањата на израелската Влада, пренесоа агенциите. -Нема да се кандидирам на претстојните избори, но ќе останам верен војник на оваа земја во која служев како војник, офицер, министер и премиер. Службата на оваа земја е мојата судбина, рече Бенет, додавајќи дека зад себе ќе остави силна држава.

Владејачката коалиција во Израел на „стаклени нозе“ по оставка на пратеник

Ивона Петрова — Tue, 14 Jun 2022 05:56:12 +0000

Владејачката коалиција во Израел можно е да се распадне, откако во текот на вчерашниот ден имаше информации дека, еден од пратениците од десничарската партија на премиерот Нафтали Бенет, изјавил оти „веќе не е дел“ од Владата. Идеолошки разновидната коалиција на Бенет, што вклучува екстремно десничарски, либерални и арапски партии, изминатиот период беше сè поблизу до колапс, година дена откако му дојде крајот на рекордното 12-годишно владеење на Бенјамин Нетанјаху. Пратеникот Нир Орбах, од екстремно десничарската партија Јамина, во изјава пренесена од неколку тамошни медиуми, тврди дека излегува од коалицијата. – Го известив премиерот дека поради моменталната ситуација, веќе не сум дел од коалицијата, појасни Орбах. Потоа следуваше негов коментар дека „екстремистичките и антиционистичките“ пратеници во Парламентот ја одвеле коалицијата „во проблематични насоки“. Според неговите зборови, тој сака да избегне нови избори и нема да гласа за распуштање на Парламентот. Со неговото заминување, коалицијата на Бенет остана без можност да добие мнозинство, сега има 59 места во Парламент со 120 членови. Нетанјаху, сега како лидер на опозицијата кој ветува враќање, иако му се суди за наводна корупција, изјави дека Владата го одржува „еден од најдолгите погреби во историјата“.

Путин му се извини на Израел

Ристе Здравков — Fri, 06 May 2022 10:49:41 +0000

Рускиот претседател Владимир Путин му се извини на израелскиот премиер Нафтали Бенет за неодамнешната скандалозна изјава на шефот на руската дипломатија Сергеј Лавров, пренесува Ројтерс. Рускиот министер за надворешни работи во интервју за италијанска телевизија во неделата изјави дека нацистичкиот диктатор Адолф Хитлер има еврејски корени, додавајќи дека „најжестоките антисемитисти обично се Евреи”. Следуваше бесна реакција на Израел. Шефот на израелската дипломатија изјавата на Лавров ја нарече „непростлива и скандалозна”, а на разговор беше поканет и рускиот амбасадор во Израел. Израел притоа побара извинување од Русија. Според израелскиот новинар Барак Равид, повикувајќи се на соопштение од кабинетот на израелскиот премиер, Владимир Путин денеска му се извини на израелскиот премиер Нафтали Бенет за изјавите на Сергеј Лавров. Фото ЕПА

Зеленски и Нафтали Бенет разговарале за „скандалозните и неприфатливи“ изјави на Лавров за антисемитизмот

Катерина Бојаџиева — Thu, 05 May 2022 07:55:52 +0000

Украинскиот претседател Володимир Зеленски изјави дека разговарал со премиерот на Израел Нафтали Бенет за „скандалозните“ изјави на рускиот министер за надворешни работи Сергеј Лавров, кој рече дека нацистичкиот лидер Адолф Хитлер имал еврејска крв. Зеленски на Твитер напиша дека на Бенет му го честитал Денот на независноста на Израел, го информирал за текот на борбата против Русија, како и за критичната ситуација во Мариупол. Подоцна, во вечерното обраќање, тој наведе дека со Бенет разговарале и за „скандалозните и целосно неприфатливи изјави“ на Лавров. Русија постојано повторува дека со „специјалната воена операција“, како што ја нарекува инвазијата на Украина, сака „денацификација“ на Украина, почнувајќи од нејзиното раководство. Но, честопати е потенцирано дека Зеленски и самиот е Евреин. Запрашан за ова претходно, рускиот министер за надворешни работи рече: Па, кога ќе речат: „Како може да постои нацификација ако сме Евреи?“ Според мене, Хитлер исто така имал еврејско потекло, така што тоа не значи апсолутно ништо. Веќе некое време слушаме од еврејскиот народ дека најголемите антисемити биле Евреи“. Западните лидери ја осудија изјавата како невистинита и апсурдна. Изјавите на Сергеј Лавров предизвикаа жестока реакција од Израел. Шефот на дипломатијата на земјата ги нарече „непростливи и скандалозни“, додавајќи дека „Евреите не се убивале сами себе во Холокаустот“.

Израелскиот парламент забрани реизбор на критичар на премиерот Бенет

Тале Кристо — Tue, 26 Apr 2022 09:54:48 +0000

Израелскиот парламент (Кнесет) му забрани на пратеникот Амихаи Шикли, кој ја напушти десничарската партија на премиерот Нафтали Бенет, да биде реизбран за член на која било партија. Како што пренесуваат локалните медиуми, ваквата забрана се смета за мала политичка победа на премиерот во време кога се обидува да стабилизира кревка влада, а истовремено е и предупредување за секој друг пратеник во случај да се побуни. Собраниската комисија со седум гласа за и ниту еден против гласаше против пратеникот Шикли и го прогласи за отстапник. Шикли ја напушти партијата Јамина на Бенет речиси веднаш по формирањето на владејачката коалиција и се сметаше за можен иден кандидат на опозициската конзервативна партија Ликуд. Израелските медиуми јавуваат дека Шикли би можел да основа нова партија. Шикли претходно изјави дека на Израел му е потребна ционистичка влада, а не „некоординирана крпеница“ која зависи од гласовите на арапските пратеници, алудирајќи на фактот дека коалицијата на десничарски, левичарски и центарски партии вклучува и една мала арапска партија за прв пат во еврејската историја.

Израелскиот премиер позитивен на Ковид-19

Ивона Петрова — Mon, 28 Mar 2022 06:06:31 +0000

Израелскиот премиер Нафтали Бенет е позитивен на Ковид-19, но се чувствува добро и ќе продолжи да работи од дома, се додека е во самоизолација, соопштија денеска од неговиот кабинет, пренесуваат британските медиуми. Заменик портпаролката на Белата куќа, Карин Жан-Пјер, која отпатува во Европа со американскиот претседател Џозеф Бајден, исто така, денеска изјави дека е позитивна на коронавирусот, но дека не се смета за близок контакт со американскиот лидер. Британските медиуми набројуваат дека мината недела и портпаролката на Белата куќа, Џен Псаки, пријави дека е позитивна на коронавирусот.

Зеленски разговарал со премиерот на Израел

Магдалена Андонова — Tue, 08 Mar 2022 16:30:43 +0000

Украинскиот претседател Володомир Зеленски денеска на Твитер објави дека разговарал со премиерот на Израел Нафтали Бенет, кој прави напори за посредување меѓу Киев и Москва. - Разговарав со Нафтали Бенет. Му се заблагодарив за напорите за посредување на Израел. Разговаравме за начини за ставање крај на војната и насилствата, напиша Зеленски на Твитер. Зеленски не објави кога се случил разговорот, додека од кабинетот на Бенет засега нема информации, пренесуваат израелските медиуми, наведувајќи дека имало најмалку пет разговори меѓи двајцата лидери од почетокот на руската инвазија на 24 февруари. Бенет, го прифати повикот на Зеленски да ги искористи односите со Киев и Москва за да посредува, и замина во Москва минатата сабота, каде имаше средба со претседателот на Русија Владимир Путин. По средбата, Бенет, исто така, оствари разговор и со Зеленски, но тие не вродија со плод. (МИА)

Бенет: Ќе помагам иако шансите за успех не се големи

Ивана Ефремовски — Sun, 06 Mar 2022 11:28:46 +0000

Израелскиот премиер Нафтали Бенет денеска изјави дека ќе продолжи да се обидува да помогне во решавањето на кризата во Украина, иако, според него, шансите за успех не се големи, пренесуваат британските медиуми. Бенет денеска повторно разговарал со украинскиот претседател Володимир Зеленски, трет пат во последните два дена, потврди портпаролот на израелскиот премиер, без да даде дополнителни информации за разговорите. Од кабинетот на Бенет вчера соопштија дека израелскиот премиер заминал во ненајавена посета на Москва за да разговара за украинската криза со рускиот претседател Владимир Путин. Бенет, на барање на Украина, се понуди Израел да посредува во решавањето на руско-украинската криза. (МИА)

По разговорот со Путин, израелскиот премиер замина за Берлин

Ристе Здравков — Sat, 05 Mar 2022 21:45:47 +0000

Израелскиот премиер Нафтали Бенет денеска во Москва се сретна со рускиот претседател Владимир Путин за да разговараат за Украина, која беше нападната од руската армија. Израел, кој е дом на голем број руски имигранти, понуди посредување во конфликтот меѓу Русија и Украина, иако властите во моментов веруваат дека тешко ќе успеат. Бенет „штотуку го заврши состанокот во Кремљ со рускиот претседател“, рече неговиот портпарол. Иако Израел, близок сојузник на САД, ја осуди руската инвазија, изрази солидарност со Киев и испрати хуманитарна помош за Украина, тој нагласи дека ќе остави отворени канали за комуникација со Москва со надеж дека ќе помогне во решавањето на кризата. Посетата на Бенет на Москва е прва посета на странски лидер по руската инвазија на Украина на 24 февруари. Денес израелскиот премиер ја прекршил саботата, која еврејската религија ја дозволува кога станува збор за спасување човечки животи, за време на летот за Москва, додаде портпаролот. По средбата во Кремљ, Бенет телефонски разговарал и со украинскиот претседател Володимир Зеленски, изјави портпаролот на Бенет. Бенет ја третира кризата заедно со САД, Франција и Германија, изјави израелски официјален претставник. По средбата со Путин, Бенет се упати во Берлин за да разговара со германскиот канцелар Олаф Шолц, изјави неговиот портпарол. Францускиот претседател Емануел Макрон разговарал со Бенет пред тој да отпатува за Москва за да го информира за неговите претходни разговори со Путин, соопштија од Париз. „Тој ќе остане во контакт со целта да се постигне примирје, во координација со германскиот канцелар Олаф Шолц“, рече францускиот претставник.

Путин и Бенет разговараа за ситуацијата во Украина

Тале Кристо — Thu, 03 Mar 2022 10:10:48 +0000

Рускиот претседател Владимир Путин телефонски разговарал со премиерот на Израел Нафтали Бенет и го појаснил официјалниот став на Москва за ситуацијата во Украина, соопшти прес-службата на Кремљ, наведувајќи дека разговорот бил на барање на израелски премиер. –Претседателот на Руската Федерација, Владимир Путин, ја претстави принципиелната позиција на Русија за решавање на конфликтот, нагласувајќи ја потребата од почитување на безбедносните интереси на Русија. Тој ја истакна потребата од демилитаризација и денацификација на украинската држава, обезбедување на нејзиниот неутрален и ненуклеарен статус, признавање на суверенитетот на Русија над Крим и независноста на Народните републики Доњецк и Луганск, се вели во соопштението на Кремљ. Израелскиот премиер Нафтали Бенет споделил дел од неговите ставови за ова прашање, формирани по неодамнешните контакти со лидерите на голем број земји. Путин и Бенет се договориле да продолжат да одржуваат контакти.