„Нахрани 10.000“ – Kurir.mk

Хуманитарна акција „Нахрани 10 000“ во девет градови

Ивона Петрова — Sat, 23 Oct 2021 06:36:54 +0000

Голем број граѓански организации од целата држава на иницијатива на „Ајде Македонија“ денеска од 10 до 18 часот ќе спроведат национална хуманитарна акција „Нахрани 10 000“ за собирање храна. Станува збор за национална акција за донирање храна на одбрани локации и нејзино дистрибуирање до социјално загрозени граѓани. Како што информираат организаторите, целта е на граѓаните да им се даде можност редовно да донираат храна која ќе заврши во рацете на 10 000 социјално загрозени граѓани. Хуманитарниот чин ќе се одвива во девет градови низ државава: Скопје, Битола, Виница, Струмица, Неготино, Охрид , Струга , Прилеп и Берово. – Хуманитарниот чин ќе се случи на 23 октомври кој ќе започне во 10 часот и ќе трае се до 18 часот. Учество во настанот ќе земат организациите: Свети Спас , Кризен ’’Центар Надеж“, ХОПС , Здружение на пензионери Ѓорле Петров, , Здружение на пензионери Чаир, Здружение на пензионери Кисела Вода, Здружение на пензионери Гази Баба , Здружение на пензионери Битола , Организација на Жени – Скопје , Доверба , Умиление, Вера , Утешител и Порака Неготино, се наведува во соопштението. Во апелот од организаторите се препорачува сите хумани граѓани да донираат храна, која не е лесно расиплива како: ориз, грав, сол, шеќер, брашно, тестенини, масло за готвење, грашок, конзервирана риба, супа кокошкина, бисквити, кечап, леќа, конзервирано овошје и зеленчук.

Четврта хуманитарна акција „Нахрани 10.000“

Ивона Петрова — Fri, 25 Oct 2019 06:13:56 +0000

Во организација на Асоцијацијата „Сите Сити“ утре ќе се одржи четвртата хуманитарна Национална акција „Нахрани 10.000“. На 19 локации во шест градови – Скопје, Битола, Штип, Велес, Кочани и Гевгелија ќе може да се донира храна, која потоа ќе биде дистрибуирана до социјално загрозените граѓани. Целта на акцијата е на граѓаните да им се даде можност да донираат храна која ќе заврши во рацете на 10.000 лица на кои им е потребна. Асоцијацијата „Сите Сити“ денеска ќе одржи прес-конференција на која ќе бидат презентирани детали за акцијата, но и ќе се говори за тоа колку е важно граѓаните да се вклучат и да помогнат на социјално загрозените граѓани ширум земјата и како може тоа да го направат за време на „Нахрани 10.000“. Според податоците на Државниот завод за статистика во Македонија, на кои се повикуваат од „Сите сити“ проблем да обезбедат храна имаат 445,099 луѓе и во просек ги немаат сите оброци дневно. сст/ „Нахрани 10.000“ е во организација на Асоцијацијата „Сите сити“, на која се приклучуваат и организациите Х.О. Св.Спас-Драчево, Организација на жени- Скопје, Кризен Центар Надеж, Асоцијација Ластовица, ХОПС- Опции за здрав живот, Организација на жени- Битола, Х.О. Утешител- Битола, Млади Хуманисти- Битола, Авена- Кочани, Импакт Нет Фондација, Велес, Ротари Клуб- Штип, Асоцијација за човекови права на Ромите- Штип.

Собрани 6.000 килограми храна во акцијата „Нахрани 10.000“

Дарко Андоновски — Wed, 15 May 2019 07:37:05 +0000

Десетте градови низ државата што се вклучија во акцијата „Нахрани 10.000“ ја надминаа планираната храна која што сакаа да ја соберат, обезбедувајќи шест тони храна наменета за социјално загрозени категории лица и семејства. Илјадниците граѓани и десеттината компании кои се вклучија во акцијата донираа ориз, грав, сол, шеќер, брашно, тестенини, масло за готвење, грашок, конзервирана риба, супа кокошкина, бисквити, кечап, леќа, конзервирано овошје и зеленчук. Како што велат од акцијата, при собирањето на храната помогнале над 200 волонтери од дваесеттина организации, кои изминатиот период ја пакувале храната во пакети и започнале да ја делат храната на социјално загрозените граѓани од нивните општини. – Акцијата покажа дека хуманоста е силна страна на нашите сограѓани, па затоа се надеваме дека ќе се зголеми нивниот интерес со посебен фокус на компаниите, велат од акцијата „Нахрани 10.000“.

„Нахрани 10.000“ и училишни градини за Светскиот ден на храната

Ивона Петрова — Tue, 16 Oct 2018 05:51:23 +0000

Со промоција на новата училишна градина во ООУ „Аврам Писевски” во скопското село Бардовци, денеска ќе биде одбележан Светскиот ден на храната. Настанот го организираат Канцеларијата на ФАО и Министерството за земјоделство, шумарство и водостопанство, заедно со граѓанските организации Слоу Фуд Водно и „Ајде Македонија”. Целта е да се поддржи отворањето градини во школите за практична едукација на учениците како се произведува храна, но и да се подигне јавната свест за здравата исхрана преку заштита на животната средина и грижа за заедницата. Во фокусот на Светскиот ден на храната годинава се младите, а мотото е „Нашите дејствија се наша иднина. Свет Без Глад до 2020 година е возможен”. - Децата и младите се дел од генерацијата која може да го искорени гладот од Планетата. Тие можат да научат како со менување на едноставни секојдневни навики, можат да се хранат поздраво, да го намалат отпадот, паметно да ги користат природните ресурси и да водат поодржлив животен стил, велат од ФАО. На настанот се најавени обраќања на министрите за земјоделство и за обраование и наука, Љупчо Николовски и Арбер Адеми, на градоначалникот на Општина Карпош Стефан Богоев, на постојаната координаторка на ОН Лујза Винтон, како и на директорката „Аврам Писевски” Матилда Бајкова. „Ајде Македонија“ денеска, освен што ќе учествува во промоцијата на училишната градина во Бардовци, ќе спроведе и донаторската акција „Нахрани 10.000“ во Скопје, Битола, Куманово, Прилеп, Струмица, Радовиш, Кочани и Виница. На одбрани локации од 10 до 19 часот ќе може да се донира храна која потоа ќе се дистрибуира до социјално загрозените граѓани. - Целта е на граѓаните да им се даде можност редовно да донираат храна до нашите сограѓани преку собирање еднаш месечно 10 тони храна која ќе заврши во рацете на 10.000 граѓани, велат од „Ајде Македонија“. МИА