најбогати луѓе – Kurir.mk

Најбогатите акумулираа 45,6 отсто од богатството во 2021 година

Дарко Андоновски — Wed, 21 Sep 2022 09:17:30 +0000

Вкупното светско богатство порасна за 9,8 отсто и во 2021 година достигна 463,6 милијарди долари. За тоа најзаслужни се САД со учество поголемо од половината од вкупното зголемување на богатството. Кина придонесува со четвртина. Во меѓувреме, Африка, Европа, Индија, Латинска Америка заедно сочинуваат само 11,1 отсто од растот на глобалното богатство во 2021 година, се наведува во извештајот објавен од банката „Креди Свис“. Најбогатиот еден отсто од планетата продолжува да акумулира 45,6 отсто од богатството во 2021 година, пишува „Ел Паис“. Извештајот на „Креди Свис“ предвидува малата група да продолжи да расте. Бројот на милионери, со богатство поголемо од милион долари, ќе достигне 87 милиони, а бројот на ултрабогати, со нето богатство поголемо од 50 милиони долари, ќе достигне 385.000 во наредните пет години. Во основата на пирамидата се оние кои во 2021 година имале капитал помал од 10.000 долари и кои претставуваат 53 отсто од светската популација. Во поглед на зголемувањето, двете најуспешни економии се САД и Кина, двете со стапка на раст од околу 15 проценти. На дното е Европа, која расте само 1,5 отсто во 2021 година, но ја акумулира втората најголема маса на богатство зад САД и пред Кина. За наредните пет години, извештајот предвидува земјите со среден приход да бидат главен мотор на светската економија, со 42 отсто од глобалниот раст. Што се однесува до распределбата на богатството, според извештајот, овој век глобалната нееднаквост се намалила, поттикната од забрзаниот раст на пазарите во развој. Претпоставката е поткрепена со тоа што сегментот на оние со богатство меѓу 10.000 и 100.000 долари најмногу пораснал од почетокот на векот, од 504 милиони на 1.800 милиони поединци. Во извештајот на „Креди Свис“, 2021 се смета за добра година за финансии.

Дали знате што се во хороскоп најбогатите луѓе во светот?

Дарко Андоновски — Sat, 09 Jul 2022 14:24:53 +0000

Дали можевте да претпоставите дека многу од светските милијардери го делат истиот хороскопски знак, а астролозите веруваат дека тој им дава флексибилност и перфекционизам којшто им носи богатство. Најуспешните луѓе на планетата без сомнеж се многу образовани и напорно работат за да го стекнат своето богатство, но понекогаш, и на нив им е неопходна доза на среќа. Пресудна улога игра хороскопот, според астролозите, односно положбата на планетите во момент на нивното раѓање, а интересно е тоа што во случајот на милијардерите од листата на „Forbes“, еден хороскопски знак често се повторува. 3. Рак Третото место им припадна на Раковите чиј најбогат претставник официјално е Илон Маск. 2. Риби Второто место го заземаат Рибите, чиј најбогат претставник во светот на милијардерите е Руперт Мердок. 1. Вага Како што пренесуваат странските медиуми, станува збор за Вагата – знакот во кој се родени најголем број од светските милијардери – дури 27 од нив. Тоа има смисла доколку се земе предвид тоа што се многу флексибилни, способни за приспособување, перфекционисти и некои кои држат рамнотежа во сите полиња од животот. Листа на најпознатите милијардери и хороскопски знаци: 1. Илон Маск – 219 милијарди долари – Рак 2. Џеф Безос – 171 милијарди долари – Јарец 3. Бернар Арно – 158 милијарди долари – Риби 4. Бил Гејтс – 129 милијарди долари – Шкорпија 5. Ворен Бафет – 118 милијарди долари – Девица 6. Лари Пејџ – 111 милијарди долари – Овен 7. Сергеј Брин – 107 милијарди долари – Лав 8. Лари Елисон – 106 милијарди долари – Лав 9. Стив Болмер – 91,4 милијарди долари – Овен 10. Мукеш Амбани – 90,7 милијарди долари – Овен Како што можевте да приметите најпознати милијардери во хороскопскиот знак Вага нема ниту еден, додека најдоминантер е Овенот.

Безос, Гејтс, Маск и Цукерберг осиромашени за 50 милијарди долари

Ивона Петрова — Mon, 31 Jan 2022 12:02:49 +0000

Најбогатите луѓе во светот Џеф Безос, Марк Цукерберг, Бил Гејтс и Илон Маск, поради колапсот на берзата, одеднаш „осиромашија“ за над 50 милијарди долари. Продажбата на берзите доведе до пад на цените на американските технолошки гиганти. Минатата недела, технолошката берза Насдаг во Њујорк го забележа својот најголем пад од пандемијата. Од неговиот историски врв во средината на ноември 2021 година, сега падна за 14,3 отсто. Американските технолошки милијардери Џеф Безос (Амазон), Марк Цукерберг (Фејсбук), Илон Маск (Тесла), Бил Гејтс (Мајкрософт) и ко-основачот на Гугл, Лери Пејџ, изгубија вкупно 67 милијарди долари за неколку дена поради големиот пад на цените на акциите на нивните компании. Маск загубил најмногу – 25,1 милијарда долари, но и покрај тоа, со 243 милијарди долари Маск и натаму е најбогатиот човек во светот, иако еден период располагал со 300 милијарди долари. Од почетокот на годината Безос изгубил 24 милијарди, а со своите 168 милијарди е на второ место по богатство. Бил Гејтс, пак, од почетокот на годината осиромашил за 9,5 милијарди долари, а Лери Пејџ за речиси 12 милијарди долари. За Марк Цукерберг загубата за неколку недели во 2022 година изнесува 12 милијарди долари.

Десетте најбогати луѓе во светот во 2021 година заработиле вртоглави 402 милијарди долари

Тале Кристо — Sun, 02 Jan 2022 10:59:05 +0000

Десетте најбогати луѓе во светот стекнале уште 402 милијарди долари во 2021 година, покажуваат податоците на Блумберг. Најмногу заработил Илон Маск. Годината ја започна со 156 и ја заврши со 277 милијарди долари на сметката, според индексот на милијардери на Блумберг. Основачот на Tesla и SpaceX неодамна соопшти дека ќе плати повеќе од 11 милијарди долари данок. Зад него е Џеф Безос, сопственикот на Амазон, кој во 2022 година влезе со 190 милијарди долари. Тоа е „само“ 4,5 милијарди повеќе од минатата година. Сопственикот на Фејсбук, Марк Закерберг минатата година заработи 25 милијарди долари, а сега има 128 милијарди долари. Основачот на Мајкрософт, Бил Гејтс, минатата година ја започна со 139, а ја заврши со 132 милијарди долари. Неговата поранешна сопруга Мелинда Френч Гејтс, со која во август стави крај на 27-годишниот брак, наводно има 11,4 милијарди долари. Ко-основачот на Гугл, Лери Пејџ во 2021 година влезе во клубот на луѓето кои имаат 12-цифрено богатство, додавајќи 47 милијарди долари на своите 83 милијарди долари. На таа листа се впиша и неговиот колега Сергеј Брин, кој заработи уште 45 милијарди долари, со што неговото богатство достигна 125 милијарди долари. Во збогатувањето на американските милијардери се приклучи и Французинот Бернар Арно, сопственик на најголемата компанија во светот која тргува со луксузни производи. Заработил дополнителни 61 милијарда долари, а сега поседува вкупно 176 милијарди долари. Арно е единствениот надвор од САД кој влезе на листата на милијардери на Блумберг за 2021 година. Сите десет на таа листа поседуваат повеќе од 100 милијарди долари. Единаесетта на листата, исто така Французинка, е Франсоаз Бетенкур Мејерс, наследничка на империјата Лореал која има 94 милијарди долари и е најбогатата жена на светот.

Најбогатите луѓе во светот можат да ги купат сите вакцини за сите жители на планетата

Тале Кристо — Tue, 26 Jan 2021 07:23:17 +0000

Десетте најбогати луѓе на светот би можеле да купат вакцини за сите жители на планетата, покажуваат податоците од извештајот на меѓународната хуманитарна организација Оксфам. Нивното вкупно богатство се зголеми за 540 милијарди долари за време на пандемијата на коронавирусот и сега изнесува 11,95 билиони долари, се наведува во извештајот на организацијата под името „Вирус на нееднаквост“. Тие пари се доволно за да се спречи пад во сиромаштија на речиси секој поединец за време на пандемијата и да им се обезбеди вакцина против коронавирусот, пресметаа истражувачите на Оксфам. Количината на богатство што ја имаат овие 10 лица е еднаква на вкупното трошење на членовите на Г20 за опоравување од пандемијата. Оксфам ги повикува владите да размислат за оданочување на супер богатите. Некои од нив дадоа значителен придонес за справување со пандемијата. Меѓу 10-те најбогати луѓе се наоѓаат лидерот на „Амазон“, Џеф Безос, сопственикот на „Тесла“, Илон Маск и основачот на Фејсбук, Марк Закерберг.

Илон Мaск првпaт меѓу петте најбогати луѓе во светот

Ивона Петрова — Tue, 21 Jul 2020 08:37:39 +0000

Американскиот претприемач и основач на „Тесла“ и „Спејс-Икс“, Илон Маск по првпат се најде во листата на „Форбс“ од пет најбогати луѓе во светот. Според списанието, богатството на Маск изнесува 74,2 милијарди долари. Во средината на март, тој беше 31-виот по ред, на списокот најимотни. Оттогаш, како што велат податоците состојбата му се подобрила скоро трипати, а акциите на „Тесла“ се повредни за речиси 300 отсто од почетокот на оваа 2020 година. Првите три места, според списокот на „Форбс“, ги заземаат директорот на „Амазон“ Џеф Безос со богатство од 189 милијарди долари, раководителот на „Луј Витон Моет хенеси“ Бернар Арно со 113,8 милијарди долари и, на трето место е основачот на „Мајкрософт“ Бил Гејтс со 113,4 милијарди долари. Маск е зад основачот на Фејсбук – Марк Закерберг, чијшто севкупен имот се проценува на 90,3 милијарди долари. Шести е поранешниот раководител на „Мајкрософт“ Стив Балмер со 72,2 милијарди долари