најтопла година – Kurir.mk

НАСА: Минатата година беше петта најтопла година во светската историја

Катерина Бојаџиева — Thu, 12 Jan 2023 20:09:49 +0000

Минатата година беше петта најтопла година досега, а изминатите девет години беа деветте најтопли од прединдустриското време, што ја доведе во опасност целта на Парискиот договор од 2015 година, да е ограничи глобалното затоплување на 1,5 Целзиусови степени, изјавија денеска американските научници. Минатата година е изедначена со 2015 година, како петта најтопла година од водењето евиденција кое почна во 1880 година, соопшти НАСА. Таков резултат е забележан и покрај присуството на Ла Ниња во Тихиот Океан, која генерално благо ги намалува глобалните температури. Просечната глобална температура сега е за 1,1 до 1,2 степени Целзиусови повисока отколку во прединдустриското време. Националната администрација за океани и атмосфера на САД соопшти дека 2022 година е рангирана како шеста најтопла година од 1880 година. Научниците од Европската унија оваа недела посочија дека според нивните податоци, 2022 година е петта најтопла година.

Во Шпанија 2022 била најтоплата година досега

Тале Кристо — Mon, 02 Jan 2023 17:42:27 +0000

Во Шпанија, 2022 година беше најтоплата од 1916 година, од кога се достапни првите податоци, објави денеска националната метеоролошка агенција (АЕМЕТ). – Минатата година беше најтопла во Шпанија, барем од 1916 година, објави агенцијата преку Твитер, посочувајќи дека за прв пат просечната годишна температура надмина 15 степени Целзиусови и беше речиси 15,5 степени. Како што се наведува, до 2011 година просечната температура никогаш не надминала 14,5 степени, а оттогаш тоа се случило пет пати. Пред 2022 година, двете најтопли години беа 2017 и 2020 година. Агенцијата прецизира дека во ретроспектива ја утврдила просечната годишна температура помеѓу 1916 и 1961 година врз основа на изолирани мерења и статистички модели. Како и другите делови на Европа, во 2022 година Шпанија беше погодена од неколку топлотни бранови во текот на летото, што исто така го одбележаа пожари, зголемена смртност и зголемено ниво на суша. – За првпат, две последователни сезони во иста година (лето и есен) беа најтопли по ред, соопшти шпанската метеоролошка агенција на 21 декември во привремениот биланс на состојба. Смртта на речиси 4.744 луѓе во Шпанија може да се припише на горештините во летото 2022 година, според проценките за зголемена смртност од Институтот за јавно здравје. Во Шпанија, пожарите изгореа и повеќе од 300.000 хектари во 2022 година, што е најлош биланс од почетокот на мерењата во 2000 година, според Европскиот информативен систем за шумски пожари (EFFIS). – Имајќи ги предвид врнежите регистрирани до 15 декември, ова е трета последователна најсушна година, се вели во привремениот биланс на шпанската метеоролошка агенција.

2020 година убедливо најтоплата европска година во историјата

Магдалена Андонова — Fri, 27 Aug 2021 17:03:28 +0000

Најтопла година во Европа беше 2020 година - покажа извештајот на Американското метеоролошко друштво. Извештајот исто така покажа дека 2020 година е една од трите најтопли години на глобално ниво. Британскиот метеоролошки институт (Мет), кој исто така придонесе за овој извештај, објави дека рекордот е „убедливо“ урнат. Просечните температури во Европа минатата година беа 1,9 степени Целзиусови над просекот во споредба со периодот 1981-2010 година, што е периодот што се користи како мерка за следење на температурните промени, пишува Си-Ен-Ен. Овие наоди се претставени во 31 -от извештај на Американското метеоролошко друштво за состојбата на климатските промени, во кој се наведува дека 17 европски земји пријавиле рекордно високи годишни температури, вклучувајќи ги Франција, Шпанија, Швајцарија, Белгија, Норвешка и Шведска. На Арктикот, просечната температура на воздухот во 2020 година беше рекордна, 2,1 степени над просекот забележана во периодот 1981-2010 година. Антарктикот, исто така, доживеа екстремен топлотен бран, каде што станицата Есперанца забележа 6,3 степени на 6 февруари 2020 година, што е највисоката температура регистрирана на континентот и значително повисока од претходниот рекорд од 17,2 степени, што беше регистриран во 2015 година. Други делови на светот, исто така, доживеаја рекордно високи температури, вклучувајќи ги Јапонија, Мексико и Сејшелите. Делови од северозападна Европа беа релативно студени во 2020 година, се вели во извештајот, но Велика Британија, исто така, според Мет Канцеларијата, ја достигна својата трета највисока годишна просечна температура, која беше надмината само во 2014 и 2006 година. Додека пандемијата „Ковид-19“ ја забави економската активност низ целиот свет и доведе до намалување на емисиите на јаглерод диоксид за 6 до 7 проценти, извештајот откри дека глобалната концентрација на стакленички гасови се зголеми на нов максимум во 2020 година. - Овој извештај, заедно со сите други докази, покажува дека климатските промени предизвикани од човекот влијаат на сите делови на светот, но не сите региони доживуваат промени со исто темпо, рече Роберт Дан, оперативен метеоролог во канцеларијата на Мет и главен и одговорен уредник кој се занимава со глобалната клима.

Откази секојдневно се нижат: Од „8 Септември“ заминува главниот инфектолог, отказ дала и докторка од Инфективна

Тале Кристо — Sat, 10 Oct 2020 11:49:52 +0000

Една докторка – инфектолог дала отказ од Клиниката за инфективни болести и планира да замине да работи во приватна болница, а исто така и докторката која го раководеше Инфективното одделение во Градската болница „8 Септември“ најавила дека ќе замине во приватна болница, соопшти на прес-конференција министерот за здравство Венко Филипче. -Не знам дали е формализирано сето тоа, јас разговарав со неа, но таа е решена за тоа. Таму има други двајца инфектолози. Размислуваме и веќе разговаравме за начинот на којшто ќе се засили тоа одделение. Засега, заедно со интернистите, имајќи го овој број на пациенти кои се хоспитализирани и нашиот план да не се зголемува тој број, овие доктори се сосема доволно, рече Филипче. За медицинските сестри од Инфективната клиника рече дека тие на иницијалниот состанок, иако тврделе дека нема да заминат во приватна институција, тоа го направиле. -Искомунициравме уште еднаш за потоа да кажат дека планираат да ја напуштат клиниката и согласно тоа, Инфективната клиника одлучила да ја преземат нивната функција, рече Филипче. На прашањето зошто си заминува кадарот од државните клиники, министерот одговори дека тоа е тешко да се каже. Дел рекле се преморени, а дел имале други причини, но според Филипче, сепак, тешко е да се каже зошто даваат откази. Доколку се зголеми бројот на заболени од Ковид-19, министерот за здравство Филипче на денешната прес-конференција рече дека доаѓа во предвид затворање на училиштата и градинките или во некои општини и региони согласно епидемиолошката слика, или ако се случи да имаме сериозен притисок и во целата држава. -Засега нема сериозен проблем во градинките, во училиштата има спорадични случаи. Нема внатрешна трансмисија. Обично од надвор дојде вирусот, но и тие прекратко работат за да може да носиме одлука, рече Филипче.

2020 дефинитивно не е година како што сите очекуваа- еве што уште научниците открија дека ќе се случи за само некој месец

Дарко Андоновски — Mon, 20 Apr 2020 13:45:43 +0000

Научниците од американската Национална управа за океаните и атмосферата објавија дека има 75 проценти можност 2020 да биде најтопла година во историјата од кога се вршат мерења. Тие наведуваат дека првите три месеци од годинава биле потопли само во 2016 година, кога е забележано силно влијание на Ел Нињо, кој го загрева Пацификот и влијае на просечните температури на воздухот во светот. Според научниците овогодинешното загревање е невообичаено, а најверојатно е последица на долгогодишните емисии на гасови што предизвикуваат ефект на стаклена градина по согорување на фосилните горива. Научниците истакнуваат дека дури и да не биде најтопла година, тогаш сигурно ќе биде помеѓу петте најтопли досега.

2019 година една од трите најтопли од средината на 19 век

Ивона Петрова — Tue, 03 Dec 2019 09:13:37 +0000

Годината 2019 година ќе биде една од трите најтопли години регистрирани од 1850 година, се вели во соопштението објавено денеска од страна на ОН на конференцијата за клима (COP25) во Мадрид. Тековната година ќе заокружи една деценија „исклучително жештина“ погодена од шумски пожари, суши и топлотни бранови. Помеѓу јануари и октомври, светската просечна температура е околу 1,1 степени Целзиусови повисока отколку во периодот 1850-1900 година, според Светската метеоролошка организација. Така, во 2019 година се наоѓа на второто или третото место, по најжешката во 2016 година, чии високи температури тогаш придонесоа за природниот феномен на Ел Нињо. Декадата 2010-2019 година „сосема сигурно“ ќе биде најжешката досега регистрирана, оценува Светската метеоролошка организација.