наместени натпревари – Kurir.mk

СЕ ПОЈАВИ СПИСОКОТ: УЕФА пријавила дури шест натпревари под сомнеж за местење во Србија

Ивона Петрова — Mon, 12 Apr 2021 06:57:02 +0000

Голема бура го погоди српскиот фудбал откако УЕФА го извести Фудбалскиот сојуз на Србија дека има сомнежи за наместени два натпревари во март. Весникот „Денес“ објавува дека во последните пет кола, имало шест наместени натпревари според пријавата од Европската куќа на фудбалот. Во текстот на весникот се наведува дека местењето е направено поради заработка од уплатите во обложувалниците, како и поради вообичаеното поклопување на бодовите по системот „три на три“. Весникот ги објавува натпреварите за кои имаат информации дека УЕФА се сомнева на нив. Младост - Златибор 0:2 (3. март, 25. коло) Мачва- Пролетер 3:1 (7. март, 26. коло) Рад– Радник Сурдулица 2:0 (21. март, 28. коло) Нови Пазар – Пролетер 5:0 (21. март, 28. коло) Младост– Раднички Ниш 4:1 (2. април, 29. коло) Рад– Војводина 2:0 (7. април, 30. коло) Сепак, во целиот случај треба да се напомене дека доколку УЕФА пријави сомнеж за некој натпревар, тоа автоматски не значи дека истиот е наместен. Истрагата која во моментов е во рацете на ФСС треба да покаже дали навистина натпреварите за кои постои сомнеж биле наместени.

СКАНДАЛ: УЕФА пријавила наместени натпревари во Србија, под истрага фудбалери и уплати

Ивона Петрова — Sun, 11 Apr 2021 10:17:52 +0000

УЕФА добиле податоци за можни наместени два натпревари во српскиот фудбал. Фудбалскиот сојуз на Србија од УЕФА добил податоци за можни наместени натпревари во домашното натпреварување. Истрагата тргнала од следење на уплата во обложувалници во Европа и Азија, каде се идентификувани сомнителни работи. Обемна документација пристигнала во ФСС, а се однесува на два натпревари одиграни неодамна, односно во март годинава. Еден од натпреварите бил одигран на почеток од месецот, еден на крајот. Според информации, не се следени само уплатите и исплатите, туку по лупа на истражните органи се и влоговите на некои играчи, а и начините на кои се постигнати головите. Наводно се сомничат неколку фудбалери кои УЕФА ги именувала, а кои и од претходно имаат историја за сомнителни натпревари.

Белгија: Нови докази во скандалот со наместените фудбалски натпревари

Предраг Кукиќ — Wed, 31 Oct 2018 08:50:02 +0000

Белгиските весници ДХ и ХЛН откриваат нови елементи од истрагата за наместените фудбалски натпревари во Белгија, во кои се вмешани српски и македонски граѓани. Новинарите откриваат детали од прислушкувани телефонски разговори на агентот Дејан Вељковиќ со двајца судии, Барт Вертентен и Себастиен Делфериер. Од разговорите излегува дека Вељковиќ ги корумпирал судиите, пишуваат весниците утринава. Неколку дена пред да суди натпревар помеѓу Антверп и Еупен, Вељковиќ телефонски му порачува на Вертентен дека „најважното е Антверпен да победи“. Според новинарите на тој натпреват судијата свирнал „непостоечки“ пенал, по што, според прислушкуваните разговори, Вељковиќ им се пофалил телефонски за овој потег на Тјери Стеманс и играчот Матс Ритс. За време на друг натпревар, против Шарлероа, повторно Вељковиќ на телефон со Стеманс вели дека „Вертентен добро разбра што треба да прави“. Од разговорите не може да се дознае колкав надомест добил судијата, пишуваат весниците, но „јасно е дека двајцата се многу блиски“. Во разговор во февруари годинава, Вељковиќ исто така му се пофалил на тренерот на Бриж, Иван Леко, дека „Вертентен е под контрола“. Што се однесува до другиот судија, Делфериер, разговорите откриваат дека тој му ветил на Вељковиќ дека нема да суспендира еден од неговите играчи, Софиан Хани иако тој требал да биде санкциониран поради напад во натпревар против Стандард. Префрлени се десет илјади евра на сметката на судијата, но Вељковиќ тврди дека станува збор за заем. Сепак, разговорите откриваат дека тоа всушност било „подарок“ за фудбалската школа на Делфериер. (МИА)

Во Белгија уапсен фудбалскиот агент Драган Сиљаноски, како дел од скандалот со наместените натпревари

Предраг Кукиќ — Fri, 12 Oct 2018 08:24:53 +0000

Драган Сиљаноски, агент на хрватскиот тренер Иван Леко од белгискиот клуб Бриж, е уапсен за перење пари и корупција во скандалот со наместените фудбалски натпревари. Иван Леко, пред два дена, исто така, беше однесен на распит, но против него не беше издаден налог за апсење. Информацијата за апсењето на Сиљаноски утринава беше потврдена од белгиското федерално обвинителство. Сиљаноски (44) е поранешен македонски фудбалер, кој во текот на кариерата играл за белгискиот клуб Антверп. Во оваа полициско-обвинителска операција, исто така, се уапсени и Моги Бајат и Дејан Вељковиќ. Вељковиќ по потекло е од Србија и според белгиските медиуми е поврзан со повеќе белгиски клубови од Првата „Жупилер“ лига, каде сместил голем број фудбалери и тренери. Првиот дел од оваа огромна судска истрага за корупција во фудбалот е фокусирана токму на Вељковиќ, кој е осомничен за трансфери на играчи од кои задржувал значајни провизии за себе и за играчите кои ги застапувал. Фондовите транзитирале преку судски ентитети во Србија, Црна Гора и Кипар, објаснија обвинителите. Од друг дел на истрагата излегува дека Вељковиќ во договор со четири членови на административниот одбор на клубот „Малин“ влијаел врз резултатите на два натпревари, што веројатно вклучува договор со судијата Барт Вертентен. Покрај тоа, има индиции дека бил воспоставен контакт со двајца новинари за да се влијае врз медиумската покриеност на перформансите на судијата Вертентен. Овој скандал ја тресе белгиската јавност веќе втор ден. Во средата беше обелоденото дека широка европска истрага утврдила корупција, перење пари и обид за местење натпревари во 1А лигата во Белгија. Истрагата вклучува повеќе европски земји вклучително и Македонија. (МИА)