Наоми Осака – Kurir.mk

Осака се враќа на професионалниот тенис

Ивона Петрова — Thu, 07 Sep 2023 10:18:50 +0000

Четирикатната грен – слем шампионка Наоми Осака, која не се натпреварува од септември лани, објави денеска оти се надева на враќање на тениските терени на следното издание на Австралија Опен 2024. Во интервју за американската телевизија ЕСПН, 25-годишната Јапонка Осака, одговори потврдно на прашањето за можен настап на грен – слем турнирот во Мелбурн во јануари. Осака рече дека 16-месечната пауза во неа „повторно го разгорела огнот“, додавајќи оти планира да биде активна во тенисот во текот на целата 2024 година. Осака привремено се повлече од тенисот, бидејќи во јануари минатата година роди девојче. Јапонската тенисерка на маргините на УС Опен кој влегува во самата завршница на терените во Њујорк учествуваше на форум за ментално здравје на спортистите, заедно со американскиот пливач Мајкл Фелпс.

Наоми Осака посакува да се врати на тениските терени

Бошко Тасиќ — Fri, 04 Aug 2023 04:16:50 +0000

Јапонската тенисерка Наоми Осака објави дека е решена да се врати на тениските терени по раѓањето на својата ќерка. – Никогаш не мислев дека ќе се вратам на турнеја ако имам бебе. Но, чувствувам дека тоа беше магичен момент за мене. Навистина сакам да работам напорно. Играм тенис од мојата тригодишна возраст и сакам да уживам во времето што ми е одвоено за овој спорт, изјаво Осака за „Mountaintop Conversations“. Таа е двократна победничка на Австралија Опен во 2019 и 2021 година и на УС Опен во 2018 и 2020 година.

Се породи Наоми Осака

Ивона Петрова — Wed, 12 Jul 2023 16:19:59 +0000

Поранешниот светски рекет број еден во женска конкуренција Наоми Осака роди женско дете, објави синоќа американскиот магазин „Пипл“. Истиот извор прецизираше дека јапонската тенисерка се породила во болница во Лос Анџелес и дека Осака и нејзиното бебе се во добра здравствена состојба. Осака, која во кариерата освои четири грен – слем титули, објави во јануари дека е бремена, а на почетокот на јули обзнани дека очекува девојче со раперот Кордае, со кого е во врска од 2019 година. Јапонската тенисерка својот последен грен – слем трофеј го освои во 2021 година на Австралија опен, а подоцна истата година објави дека боледува од депресија.

ФОТО: Наоми Осака објави дека е бремена

Ивона Петрова — Thu, 12 Jan 2023 08:26:06 +0000

Јапонската тенисерка Наоми Осака на својот Твитер профил објави дека е бремена и нема да се врати на теренот пред 2024 година. -Навистина сакам една работа, а тоа е моето дете да гледа еден од моите натпревари, а потоа некому да каже: „Тоа е мојата мајка“, напиша Осака на Твитер заедно со фотографијата од ултразвукот. Поранешната тенисерка број еден во светот, а сега 47-ма на ВТА-листата, во кариерата освои седум титули, од кои четири на Грен слем турнирите: Австралија Опен во 2019, 2021 година и УС Опен во 2018 и 2020 година.

Осака се повлече од Австралија Опен

Бошко Тасиќ — Sun, 08 Jan 2023 08:35:02 +0000

Двократната шампионка на АО, Наоми Осака потврди дека нема да игра на Австралија опен, продолжувајќи ја долгата пауза од тенисот. Јапонката, која победи во Мелбурн во 2019 и 2021 година, падна на 47. место на ВТА листата откако нема играно од септември, кога се повлече од второто коло на домашниот турнир во Токио. Минатата недела таа на социјалните мрежи објави фотографии од своето патување во Европа заедно со своето момче, американскиот рапер Кордеј и нејзиното повлекување беше очекувано. Австралија опен, кој стартува на 16 јануари веќе загуби поголем број на ѕвезди, вклучувајќи го светскиот рекет број 1 Карлос Алкараз поради повреда, како и Симона Халеп и Венус Вилијамс.

Осака за повлекувањето од турнирот во Токио: Би сакала да одам на теренот, но телото не ми дозволува

Дарко Андоновски — Thu, 22 Sep 2022 07:20:38 +0000

Јапонската тенисерка Наоми Осака изрази жалење поради повлекувањето од турнирот во Токио. – Многу ми е жал што не можам да учествувам на денешниот натпревар. За мене голем чест е тоа што имав можност да го играм овој турнир пред неверојатните навивачи овде во Јапонија. Овој турнир беше и секогаш ќе биде посебен за мене и би сакала да бидам на теренот, но телото не ми дозволува. Ви благодариме за сета поддршка и се гледаме следната година, вели Осака во изјавата за официјалната веб-страница на ВТА. Дваесет и четиригодишната Јапонка поради болест го предаде денешниот меч од второто коло против Беатрис Хадад-Маја . Така 26-годишниот Бразилка се пласираше во следната фаза. Во четвртфиналето Хадад-Маја ќе се сретне со победничката од мечот Вероника Кудерметова (Русија) – Фернанда Контрерас Гомез (Мексико).

Осака за прв пат во кариерата ќе се бори за титула во Мајами

Магдалена Андонова — Fri, 01 Apr 2022 07:25:57 +0000

Јапонската тенисерка Наоми Осака за прв пат во кариерата ќе се бори за титулата на Мајами Опен, откако во полуфиналето ја совлада Швајцарката Белинда Бенчиќ со 4-6, 6-3, 6-4. Јапонката ја забележа првата победа во четвртиот меѓусебен натпревар, со пресврт и отсервирани 14 од своите 18 асови во вториот и третиот сет. За четирикатната грен-слем победничка ова е 11 финале во кариерата, а прво по пауза од една година. Противничка на Осака, која е 77 рангирана на ВТА листата, ќе биде победничката од второто полуфинале меѓу Ига Свјонтек од Полска и Американката Џесика Пегула. (МИА)

Осака почна да работи со психолог по инцидентот на турнирот во Индијан Велс

Ивона Петрова — Thu, 24 Mar 2022 11:35:58 +0000

Јапонската тенисерка Наоми Осака откри дека ангажирала психолог по инцидент на турнир во Индијан Велс. Осака во второто коло од Мастерсот загуби од Русинката Вероника Кудерметова (6:0, 6:4). Навивачите за време на натпреварот извикуваа непријатни коментари на поранешниот светски рекет број еден. – Не знам дали можам да зборувам за тоа или не, но по турнирот во Индијан Велс, почнав да работам со терапевт. Разбирам колку ова помага. Мило ми е што до мене имаше луѓе кои ме советуваа да почнам да работам со специјалист. Се сетив што ми кажа терапевтот, како да дишам длабоко, да се смирам, да се рестартирам, истакна Осака. На прашањето од новинарите зошто реши да посети психолог, Осака одговори: „Да бидам искрена, бидејќи сестра ми беше многу загрижена за мене. Тоа ми го препорача и тренерот Вим Фисет. Тој рече дека ангажира тренер за тенис, фитнес, но му требаше и професионалец психолог во близина, истакна Осака за „Straits Times“. Осака е четирикратен Грен слем шампион. Дваесет и четиригодишната тенисерка два пати ги освои Австралија опен и УС опен.

ВИДЕО: Осака се расплака откако навивач ја навредуваше од трибините

Ивона Петрова — Sun, 13 Mar 2022 15:51:09 +0000

Наоми Осака го заврши својот настап на Индијан Велс откако во второто коло загуби од Вероника Кудерметова со 2:0, по сетови 6:0 и 6:4. Мечот го одбележи почетокот на мечот, кога еден навивач од трибините ја навредуваше Jапонката, која ја загуби концентрацијата и почна да плаче. По ова таа побара со помош на микрофонот на судијата да им се обрати на фановите но не и беше дозволено тоа да го направи.

Here's what disturbed Naomi Osaka. Naomi was in tears #IndianWells pic.twitter.com/LW16f9pZv4
— NoFirstName claycourtdal (@SMSTNS) March 13, 2022

Naomi Osaka asking chair umpire if she can borrow umpires mic to talk to the woman in the crowd. And her convo with supervisor. Naomi was crying #IndianWells pic.twitter.com/lehS7qi8EZ
— NoFirstName claycourtdal (@SMSTNS) March 13, 2022

Барти и Осака во јануари се враќаат на тениските терени

Дарко Андоновски — Fri, 10 Dec 2021 17:36:39 +0000

Австралијката Ешли Барти и Јапонката Наоми Осака по подолга пауза ќе се вратат на тениските турнири кои во јануари ќе се играат во Австралија, објавија организаторите во Аделаида и Мелбурн. Најдобрата светска тенисерка Барти паузира од елиминацијата во третото коло на Ју Ес Опен во септември, но иако предвреме ја заврши годината, Австралијката освои пет турнири, меѓу кои и Вимблдон, а го задржа и лидерското место на ВТА листата. Организаторите во Аделаида го потврдија нејзиното учество на турнирот од 2 до 9 јануари. Јапонката Осака, која минатата сезона падна на 13 место на ВТА листата по низа психолошки проблеми, ќе учествува на турнирот во Мелбурн од 3 до 9 јануари, кој е подготовка за Австралија Опен (17 јануари). Покрај Осака, која е бранителка на титулата во Австралија Опен, во Мелбурн ќе настапат и победничката на Ју Ес Опен, Ема Радукану и Симона Халеп.