наплата – Kurir.mk

Почнува летната наплата на паркинг местата во Штип

Ивона Петрова — Mon, 27 Mar 2023 13:43:26 +0000

Со почетокот на летното сметање на времето започнува и промената во наплата на паркинг услугата во Штип. Во писменото соопштение од ЈП „Стипион“-Штип се вели дека од денеска паркинг услугата ќе се наплаќа во периодот до 7 до 21 часот. -Ве известуваме дека од денес 27-03-2023 година со започнување на летното сметање на времето,наплатата за користење на јавниот простор за паркирање во Општина Штип ќе се врши од 7.00 до 21:00 часот од понеделник до петок , се вели во соопштението на ЈП „Стипион“. Посочуваат дека за сабота, периодот во кој се наплатува за користењето на јавниот простор за паркирање останува ист од 7:00 до 15:00 часот. Во Општина Штип паркинг услугата може да се наплати на три начини, преку билети, со смс порака и со билети за месечно или годишно плаќање. Проблемот со паркинг улугата пак и недоволните паркинг места ќе се решава со изградба на катни гаражи и изградба на конзоли на реката Отиња, со што ќе се прошири коловозот.

Фејсбук, Инстаграм и Твитер почнуваат да наплаќаат за услуги кои претходно беа бесплатни

Ристе Здравков — Tue, 07 Mar 2023 11:58:36 +0000

Некои популарни мрежи се одлучија за потези кои многумина нема да ги дочекаат со ентузијазам. Имено, се чини дека големите социјални мрежи би можеле бесплатно да почнат да ги наплаќаат услугите кои нивните корисници до сега ги користеле. Сајтот Komando идентификуваше што може да се наплаќа и на кои мрежи. Твитер По преземањето на компанијата од страна на Илон Маск, Твитер објави дека ќе го промени својот план за претплата на сините значки. Синиот знак за проверка што означува дека сметката е потврдена е фијаско бидејќи луѓето имитираат познати брендови и познати личности, вклучувајќи го и самиот Маск. Ако сега аплицирате за сина значка, нема да можете веднаш да ја добиете. Вашиот профил прво ќе треба да исполни одредени барања. Значи, што друго доаѓа со претплата на Твитер? Корисниците ќе можат да уредуваат твитови, односно ќе имаат 30 минути да ги уредуваат објавените твитови. Корисниците ќе имаат и приспособени икони и може да ја менуваат темата за нивната апликација со избирање од списокот на достапни теми. Има некои други придобивки како што е можноста за објавување подолги видеа, подолги твитови, поништување твитови итн. Што е со цената? Корисниците на апликации ќе плаќаат повеќе во споредба со оние што ја користат веб-верзијата. Сината значка на Твитер за iOS и Android чини 11 долари месечно или 114,99 долари годишно и 8 долари месечно или 84 долари годишно за веб.

Мета Марк Цукерберг, сопственикот на Мета (Фејсбук, Инстаграм) минатиот месец објави дека ќе почнат да наплаќаат за сината значка за корисниците на овие социјални мрежи. Корисниците ќе имаат некои други бенефиции, како што се специјални налепници и ѕвезди кои ќе можат да ги испратат до нивните омилени креатори на содржина на платформата. Видливоста исто така ќе биде зголемена, што значи дека повеќе луѓе ќе ги гледаат нивните објави и коментари. Мета ветува дека проактивното следење на сметката ќе го заштити корисникот од имитирање. Една од најголемите предности е што претплатниците ќе имаат директна поддршка бидејќи во спротивно е доста тешко да стапите во контакт со Мета (на пример кога вашиот профил е хакиран). Колку ќе чини? Т.н Meta Verified ќе се наплаќа 11,99 долари месечно за веб верзијата (само за Facebook) и 14,99 долари месечно за апликацијата на iOS и Android, пренесува N1.

Од патарини наплатени 12 милиони евра во вториот квартал годинава

Ивона Петрова — Fri, 18 Nov 2022 11:40:37 +0000

Јавното претпријатие за државни патишта (ЈПДП) во вториот квартал годинава наплати патарини во износ од 745.037.340 денари (12 милиони евра). Наплатените средства се 20,99 проценти од вкупно планираниот приход по тој основ за годинава. Во споредба со истиот период од минатата година, приходот од патарини е поголем за 13,6 проценти, односно за 89.166.912 денари. ЈПДП во рамки на иницијативата Отворен Балкан е една од институциите што треба да го спроведат заедничкиот проект за воспоставување еден уред за наплата на патарини во државава, во Србија и во Албанија. Стартот на проектот беше најавен за крајот на септември годинава, но се уште е во подготовка. -Проектот се уште е во фаза на прилагодување на системите, изработка на веб апликација и законски усогласувања, изјавија од ЈПДП за МИА. Со проектот треба да се обезбеди побрз проток на возила кои со електронската наплата на патарина, односно со користење на микробрановите транспондери (ТАГ), без запирање ќе поминуваат на наплатните станици на земјите членки на Отворен Балкан. Користењето еден уред за плаќање на патарина во сите земји членки покрај побрз проток на сообраќај, ќе значи и помало загадување, помала потрошувачка на гориво, намалување на улогата на човечкиот фактор итн. Со процесот на модернизација на наплатните станици на Коридор 8, што го почна ЈПДП, пак, сите наплатни станица треба да имаат ист електронски ситем на наплата на патарина, како што е воспоставен и на Коридорот 10. На сите постоечки наплатни станици на Коридор 8 ќе се изврши реконструкција за поставување на системот на електронска наплата, на кабините, на островот каде што се кабините и на сообраќајните ленти за поминување. Во моментов, као што велат од ЈПДП, течат подготовките за почнување на проектот за модернизација. Според извештајот за финансиското работење на ЈПДП за вториот квартал годинава, покрај од патарина, ЈПДП има приходи и од патна такса што се плаќа при регистрација на возилата, во износ од 461.682.144 денари, или за 3,48 проценти повеќе споредено со приходот по тој основ во истиот период лани. Приходот на ЈПДП од акциза на нафтени деривати, пак, во вториот квартал годинава изнесува 1.079.735.226 денари. И по овој основ претпријатието има зголемени приходи, за 2,21 процент или за 23.358.983 денари.

Шалтерите за наплата на ЈП „Водовод и канализација“ нема да работат од петок до понеделник

Ивона Петрова — Thu, 29 Apr 2021 10:56:52 +0000

Шалтерите за наплата, во Дирекцијата на ЈП Водовод и канализација – Скопје, во пресрет на велигденските празници нема да работат од петок (30.04.2021) до понеделник (03.05.2021). Со редовни работни активности ќе се продолжи во вторник (04.05.2021), информираат од ЈП Водовод и канализација – Скопје. Оттаму ги повикуваат граѓаните да ја искористат можноста дадена преку електронските сервиси на ЈП Водовод и канализација – Скопје. – Електронските сервиси на ЈП Водовод и канализација – Скопје се достапни на e.vodovod-skopje.com.mk. Полесен и побрз пристап до услугите на ЈП Водовод и канализација – Скопје е овозможен со мобилната апликација на претпријатието. Информациите поврзани со сметките и нивната наплата се достапни и преку апаратите за наплата – СУПЕР ТИНЕКС 1 – ГОДЕЛ, Дирекција на ЈП Водовод и канализација – Скопје, Одделение за грижа на корисниците во ЈП Комунална Хигиена – Скопје и во ГТЦ на приземје, се додава во соопштението од Шалтерите за наплата, во Дирекцијата на ЈП Водовод и канализација – Скопје, во пресрет на велигденските празници нема да работат од петок (30.04.2021) до понеделник (03.05.2021). Со редовни работни активности ќе се продолжи во вторник (04.05.2021), информираат од ЈП Водовод и канализација – Скопје.

ЈП „Водовод и канализација“ со нова акција за исплата на долгови без камата за задоцнето плаќање

Ивона Петрова — Fri, 30 Oct 2020 07:46:16 +0000

ЈП Водовод и канализација – Скопје, со цел исполнување на потребите на своите корисници и по успешно спроведената акција во јули, донесе одлука за спроведување на уште една акција за исплата на заостанатите долгови без камата за задоцнето плаќање. Од претпријатието соопштуваат дека акцијата за наплата на долговите без камата за физички и правни лица е со определен временски рок, од 02.11.2020 до 15.12.2020. По истекот на овој период одлуката престанува да важи. -ЈП Водовод и канализација- Скопје имајќи ја предвид социјално-економската состојба како резултат на пандемијата, повторно излегува во пресрет на потребите на граѓаните. Имено, секој работен ден од 8 до 14 часот, граѓаните можат да се обратат во Секторот за наплата, за исплата на долговите до 24 месечни рати во зависност од висината на долгот. Процесот за наплата во ЈП Водовод и канализација – Скопје ќе се одвива непречено со почитуваање на сите протоколи, со цел заштита од ширењето на корона вирусот. Сите корисници кои доаѓаат во просториите на претпријатието треба да го одржуваат редот на чекање за влез, притоа почитувајќи го определеното растојание. При влез, задолжително е носење на заштитна маска, а пред влез на секој клиент ќе му се мери телесната температура. При влегување и излегување од просториите на претпријатието задолжителна е и дезинфекција на рацете. Бројот на корисници кои влегуваат во просториите на претпријатието е ограничен, согласно одредените протоколи за заштита, се наведува во соопштението.

Уште еден проблем на граѓаните на Ѓорче Петров: На државно земјиште подигната ограда и се наплаќа за паркинг на автобуси!

Тале Кристо — Tue, 25 Aug 2020 10:23:48 +0000

На државно земјиште, каде што е предвиден парк, некој си крева ограда си става објект и почнува да наплаќа за паркинг на автобуси, се вели во објавата на Фејсбук страницата Ѓорче Петров. Во продолжение интегрално ви ја пренесуваме целата објава: Уште еден проблем на граѓаните на Ѓорче Петров пристигнат во инбокс. Мило ни е што се повеќе граѓани ја препознаваат суштината на оваа страница - се што објавено тука за два - три дена се решава. Ова е кај комплексот згради спроти стадионот на ФК Македонија Ѓорче Петров. Таму живеат стотици семејства и густо концентрирано население со многу мали дечиња. На овој простор согласно деталниот урбанистички план предвидено е паркче кое предизборно и беше ветувано. Земјиштето е државно. Од нигде никаде после изборите се става мобилна трафика и се крева ограда и почнува да функционира паркиралиште за автобуси кое внимавајте се НАПЛАЌА. Значи на државно земјиште, каде што е предвиден парк, некој си крева ограда си става објект и почнува да наплаќа за паркинг на автобуси !!! Автобусите доаѓаат и одат, дечињата тука најчесто играат, а впрочем и самата парцела и состојбата на тој комплекс не дозволуваат концентрација на вакви возила и заради безбедноста на жители но и поради аерозагадувањето. Да беше некоја гаражичка или натстрешница досега инспекторите ќе беа излезени, ама сега ги нема никаде. КОЈ ГО ДОЗВОЛИЛ ОВА !? ДАЛИ Е ВИСТИНА ДЕКА НЕКОЈ ЗЕМА ПАРИ ЗА КИРИЈА НА РАКА !? Доколку најитно не е реши овој проблем, ние граѓаните од овој комплекс ќе излеземе на протест, бидејќи сме излажани и се чувствуваме небезбедни.