населба лисиче – Kurir.mk

Oбјавена втора верзија на Деталниот урбанистички план за дел од Лисиче, усогласена со потребите на граѓаните

Дарко Андоновски — Thu, 29 Jun 2023 10:12:30 +0000

Низ отворена и транспарентна постапка и првенствено водејќи се од интересот на граѓаните, Општина Аеродром во изминатиот период го финализираше изготвувањето на втората верзија од Деталниот урбанистички план за дел од населбата Лисиче. Постапката вклучуваше разгледување на забелешките добиени во рамки на првата анкета, во насока на тоа финалната верзија на планот да биде усогласена со потребите на граѓаните на овој дел од Аеродром. Изминатиот период на веб-страницата и социјалните мрежи на Општина Аеродром беше објавен повик за спроведување втора јавна анкета и презентација за коригираниот предлог-ДУП за населба Лисиче. Во периодот од 3-ти јули до 10-ти јули, општината ќе спроведе втора јавна анкета која се однесува на коригираниот предлог за овој ДУП. Јавната презентација ќе се одржи на 05-ти јули во просториите на ООУ ,,Димитар Македонски”, а коригираниот предлог-план ќе може да се види секој ден за времетраењето на анкетата. Во дел од медиумите веќе вчера беше објавено дека втората верзија за деталниот урбанистички план за УРБАН БЛОК ЈИ 09.01 ДЕЛ ОД ГРАДСКА ЧЕТВРТ ЈИ опфаќа значително помал број станбени објекти во споредба со првата верзија, намалување на катноста на станбените објекти кои остануваат, намалување на бројот на ново проектирани улици, зеленило во форма на парковска површина од 2000 квадратни метри и легализација на повеќе од 100 објекти за индивидуално домување. Изработката и носењето на деталниот урбанистички план за овој дел од Општина Аеродром, првенствено има за цел решавање на инфраструктурните и комунални проблеми на граѓаните, а потоа подобрување на квалитетот на живеење во Аеродром. Целиот процес на изработка деталниот урбанистички план се одвива низ транспарентна постапка и во целиот тек на таа постапка на посреден и непосреден начин беа вклучени граѓаните и останатите заинтересирани постапки. „Апелираме до политичките партии и останатите поединци кои го ставаат личниот и политичкиот интерес, пред интересот на граѓаните, да се воздржат од неконструктивни и нестручни критики и забелешки со кои само создаваат непотребна конфузија во јавноста. Сите информации поврзани со деталниот урбанистички план за населбата Лисиче Општина Аеродром на дневна основа ги споделува со јавноста, а општинската администрација, вклучително и градоначалникот и неговиот кабинет остануваат отворена за комуникација со граѓаните, со цел финалната верзија на деталниот урбанистички план да биде прифатлив за сите“, стои во соопштението од општината.

Дел од населба Лисиче утре ќе остане без вода

Ивана Ефремовски — Mon, 22 May 2023 16:54:57 +0000

Регионалниот центар за управување со кризи на Град Скопје, по добиеното известување од ЈП Водовод и канализација - Скопје, ги известува граѓаните дека, на ден 23.05.2023 година (вторник): Поради изведување на водоводен приклучок на водоводна мрежа на ул. Мите Богоевски, од 09:00 часот до завршување со работните активности, прекинато водоснабдување ќе имаат корисниците од дел од улиците: Мите Богоевски и Жорж Бизе. Овие улици се во населба Лисиче, општина Аеродром.

Се обновуваат спортските игралишта во Аеродром, населба Лисиче доби модерен спортски терен

Ивана Ефремовски — Sat, 19 Nov 2022 14:00:00 +0000

Општина Аеродром реализираше инвестиција за обнова на спортското игралиште во населбата Лисиче. Станува збор за проект кој опфаќа поставување на нова тартан подлога, трибини, огради, голови и кошеви, како и хортикултурно уредување на околниот простор. „Со изградба на модерни објекти го развиваме натпреварувачкиот дух кај младите и ги поттикнуваме повеќе време тие да поминуваат во своето маало, практикувајќи здрав начин на живот. Општина Аеродром и понатаму продолжува да инвестира во спортски објекти на кои младите ќе ги учат и усовршуваат своите спортски вештини. Станува збор за инвестиција за која средствата се целосно обезбедени од буџетот на Општината“, истакна градоначалникот Тимчо Муцунски. Реконструкцијата на ова спортско игралиште е дел од есенската градежна офанзива која се реализира во Аеродром и која опфаќа инвестиции во нови улици, сообраќајници, спортски игралишта и детски катчиња. Во следниот период овој дел од Аеродром, ќе добие уште едно мултифункционално игралиште на улицата „Тодор Чангов“ и нов спортски комплекс на местото на поранешниот „Пирин“. Ставајќи ги во фокус младите и спортот и во следната година Општина Аеродром ќе продолжи да инвестира во реконструкција на постоечки и изградба на нови спортски објекти.

Улица во населба Лисиче обезбедена и обележана со полициска лента, еве што се случило

Ивана Ефремовски — Mon, 14 Mar 2022 12:27:22 +0000

Граѓани од населба Лисиче ја контактираа редакцијата на КУРИР барајќи информација зошто една од улиците во населбата е обележана со полициски ленти. Се сомневаа дека станува збор за некоја голема несреќа, но од МВР објаснија што се случило. „Утрово во 09:45 часот во СВР Скопје било пријавено дека на ул.„Митре Влаот“ товарно моторно возило со скопски регистарски ознаки удрило во бандера. Нема повредени лица. Причинета била материјална штета и поради оштетување на бандерата, a заради безбедност на граѓаните, местото било обезбедено и обележано со полициска лента“ - велат од МВР во изјава за КУРИР.

Голема акција за чистење на населба Лисиче, најлоша состојбата во трговскиот центар – граѓаните да бидат совесни!

Ивана Ефремовски — Thu, 24 Feb 2022 11:58:25 +0000

Комуналните служби на Општина Аеродром деновиве спроведуваат голема акција за темелно чистење на Трговскиот центар во Лисиче и неколку други локации низ населбата. -Се чистат сите делови на трговскиот, а најмногу се загадени премините меѓу дуќаните, каде што со години се трупало ѓубре, кое покрај грдата слика, со неговото распаѓање создаваше и непријатна миризба. Општина Аеродром истовремено упатува апел до граѓаните да се однесуваат совесно кон јавните површини, да не се нанесува штета на околината и со тоа да се зачува просторот кој е секојдневие за многу граѓани и деца, велат од општината. Од општината порачуваат: „Јавната чистота и хигиена ни се на прво место, се грижиме подеднакво за сите и ниту еден дел од Аеродром нема да биде запоставен“.

Децата во населба Лисиче добија ново училиште

Тале Кристо — Tue, 01 Feb 2022 17:34:13 +0000

Учениците од ООУ „Димитар Македонски“ во населба Лисиче првиот ден од второто полугодие на учебната година го почнаа во новоизградениот објект на училиштето. -Тука конечно заврши долгогодишниот проблем со лошите услови и нашата општина доби училиште по сите европски стандарди. Од денеска учениците ќе можат да учат и да ги поминуваат своите училишни денови во топла атмосфера, изјави градоначалникот Тимчо Муцунски, посакувајќи им успешно второ полугодие на сите ученици од Општина Аеродром и остварување на целите што ги имаат поставено. Оваа календарска година се планираат повеќе инвестиции во образованието. Освен „Димитар Македонски“, во текот на оваа година ќе се реконструираат и другите основни училишта, ќе има смарт-табли, дигитализација, набавка на нови таблети за прво и четврто одделение. Образованието е наш приоритет, велат од општина Аеродром.

Населба Лисиче остана без вода, ова е причината

Ивана Ефремовски — Fri, 03 Dec 2021 10:50:39 +0000

Прекинато водоснабдување ќе имаат корисниците од населба Лисиче поради дефект Ф-100мм од странка/фирма на ул.„Блажо Орландиќ“ во населбата, соопшти ЈП „Водовод и канализација“. Водоснабдувањето е прекинато од 11:10 часот и ќе трае до санирање на дефектот.

Вандализирано ОУ „Димитар Македонски“ во населба Лисиче (ФОТО)

Магдалена Андонова — Mon, 08 Nov 2021 15:23:03 +0000

На Фејсбук профилот „Населба Лисиче“ денеска беа споделни фотографии од извршен вандализам низ целото основното училиште „Димитар Македонски“ кое се наоѓа во самата населба Лисиче. - Нацртани сатанистички звезди, ишрктано со боја по ѕидовите, подот и вратите и уште разни други вулгарности. Најостро го осудуваме ова срамно, безобразно и нецивилизирано однесување, пишува во Фејсбук објавата.

Неправда за првачињата од населба Лисиче: Надлежните со години не успеаја да им го изградат училиштето, па децата останаа дома!

Ивана Ефремовски — Wed, 01 Sep 2021 13:38:25 +0000

Во сите скопски населби денес првачињата со насмевки на лицата пристигнаа во своите училишта. Денес само запознавање, а од утре настава во училниците, дружење со другарчињата. Првачињата од населба Лисиче можат само да гледаат фотографии и да слушаат искуства од своите врсници. Тие се единствените првачиња во Скопје, кои немаат среќа да уживаат во првите училишни денови. Како во минатиот век, тие немаат училиште. -Со среќа првачиња, но првачињата во населба Лисиче ја немаат таа среќа да започнат со настава поради неспособноста на надлежните кои што не успеаа да го изградат ООУ„Димитар Македонски“-Скопје после цели четири години, пишуваат родители од оваа населба на социјалните мрежи.

СРАМОТА: Лажните ветувања и негрижата излегоа на виделина, децата од населба Лисиче немаат училиште, сите ќе учат онлајн

Ивана Ефремовски — Mon, 30 Aug 2021 17:55:46 +0000

На први септември како што потврди МОН учебната година започнува со физичко присуство, но во ООУ„Димитар Македонски“ во населба Лисиче, сите, дури и првачињата почнуваат со онлајн настава. Група на родители, жители на оваа скопска населба, ја контактираа редакцијата на КУРИР. Велат со години добивале лажни ветувања дека училиштето ќе биде завршено, додека нивните деца учеле во мизерни услови. За целиот овој период на пандемија, кога децата година ипол учеа од дома, општина Аеродром, МОН и Владата не најдоа време и интерес да обезбедат услови децата од Лисиче да имаат училиште. -Навистина е огромен ДЕБАКАЛ на општината и училиштето што после цели ЧЕТИРИ години не успеаа да го завршат училиштето, неспособноста на општината и училиштето ги чини учениците ПРЕМНОГУ, наместо да се дружат, социјализираат и да имаат квалитетна настава мора да имаат онлајн часови и сосема да се изолираат. Да оставиме настрана неспособноста што не можеа да изградат училиште цели четири години, нивна дамка ќе остане вечно со тоа што уништија цели генерации со нивната АПСОЛУТНА НЕСПОСОБНОСТ. Одговорност за ова фијаско мора да се сноси и ќе се сноси, порачуваат родителите од населбата Лисиче. Тие добиле и известување од училиштето. КУРИР веќе пишуваше за овој проблем, но надлежните продолжуваа да ветуваат дека се ќе биде готово. Родителите и учениците чекаат со години, за на крај да бидат излажани, дискриминирани и изманипулирани. https://kurir.mk/makedonija/vesti/decata-od-lisiche-uchat-vo-mizerni-uslovi-roditelite-revoltirani-ochajnata-sostojba-vo-ou-dimitar-makedonski-e-vrv-na-negrizata-na-vlastite/