Насер Ал-Келаифи – Kurir.mk

Претседателот на ПСЖ му одговори на Меси

Бошко Тасиќ — Mon, 25 Sep 2023 04:02:42 +0000

Претседателот на Пари Сент Жермен, Насер Ал-Келаифи му одговори на Лионел Меси на тврдењето дека не добил респект како освојувач на Мундијалот. Меси нагласи дека бил единствениот светски шампион на Аргентина кој не добил призание од својот клуб, а на тоа веднаш одговори претседателот на ПСЖ. „Како што сите можеа да видат, бидејќи клубот дури објави видео, прославивме со Меси на тренинг, а потоа прославивме и со него приватно. Но, со целосен респект кон него, ние сме француски клуб. Секако беше незгодно да се прослви на стадионот. Мораме да ја почитуваме нацијата која ја порази, неговите соиграчи од француската репрезентација, и секако, нашите навивачи“, изјави Ал-Келаифи.

Ал Келаифи реизбран за претседател на европските клубови

Ивона Петрова — Fri, 08 Sep 2023 10:20:38 +0000

Претседателот на францускиот фудбалски првак ПСЖ, Насер Ал Келаифи, повторно е избран за претседател на Здружението на европски клубови (ЕЦА). Еден од највлијателните луѓе во европскиот фудбал, 49-годишниот Катарец, воедно и шеф на групацијата „beIN Media“, се наоѓа на чело на ЕЦА од април 2021 кога тогашниот претседател на Јувентус, Андреа Ањели, поднесе оставка. Ал Келаифи доби едногласна поддршка за втор четиригодишен мандат на вчерашното Собрание на ЕЦА во Берлин. ЕЦА во своето членство има повеќе од 300 клубови од сите 55 земји – членки на УЕФА.

Ал-Келаифи го нарече Мбапе предавник

Ивана Ефремовски — Mon, 07 Aug 2023 07:12:37 +0000

Претседателот на Пари Сен Жермен, Насер Ал-Келаифи е категорично против парискиот напаѓач Килијан Мбапе да се врати во првиот тим, објави „Le Parisien“. Претходно, новинарот Марио Кортегана изјави дека 24-годишниот Французин нема да биде вклучен во составот за натпреварот од 1. коло на францускиот шампионат. „Марка“ објави дека 24-годишниот Французин ќе тренира одвоено. Се забележува дека газдата на парижаните го смета Мбапе за предавник поради неговото одбивање да потпише нов договор со клубот. Мбапе е во ПСЖ од август 2017 година. Во сезоната 2022/23, тој постигна 41 гол и направи 10 асистенции на 43 натпревари за парижаните во сите натпреварувања. Порталот „Трансфермаркт“ ја проценува вредноста на играчот на 180 милиони евра. (МИА)

Француската полиција упадна во домот на претседателот на ПСЖ

Ристе Здравков — Thu, 06 Jul 2023 15:03:30 +0000

Француската полиција упадна и изврши претрес во домот на претседателот на ПСЖ, Насер Ал-Келаифи. Судот издал наредба за претрес поради обвиненија за киднапирање, незаконско приведување и малтретирање на лобист со француско-алжирско потекло. Претресот бил извршен од страна на судската полиција, а целиот случај започнал во јануари 2020 година, кога лобистот Тајеб Бенабдерахман бил наводно киднапиран и испрашуван од катарската полиција за одредени документи кои се компромитирачки за претседателот на ПСЖ. Тој бил приморан да потпише договор со кој се обврзува дека никогаш нема да ги сподели документите со јавноста, а потоа му било дозволено да го напушти Катар. Минатата недела беше извршен претрес и во домот на градоначалникот на седмиот париски квартал, Рашида Дати, а медиумите шпекулираат дека и овој настан е директно поврзан со пријавата што ја поднел Бенабдерахман. Адвокатите на Насер Ал-Келаифи одбија да ја коментираат случката и само изјавија кратко дека „судот направил голема грешка“. Сè уште не е познато колку претседателот на ПСЖ бил директно вмешан во киднапирањето и нелегалното приведување на лобистот, но француските медиуми пишуваат дека истрагата ќе биде спроведена до самиот крај, по што ќе се знае дали против него ќе започне судски процес. Насер Ал-Келаифи и порано беше поврзуван со низа скандали, но тој секогаш успеваше да ги „затвори“ овие случаи без никакви конкретни последици за него.

Газдата на ПСЖ сака да го купи Манчестер јунајтед?

Бошко Тасиќ — Tue, 14 Feb 2023 05:42:45 +0000

Англискиот гигант Манчестер јунајтед во следните месеци треба да добие нов газда, откако актуелните сопственици, семејството Глејзер соопшти дека постои можност да ја продадат екипата ако пристигне добра понуда. Семејството Глејзер ги чека првите понуди до 17 февруари, по што нов рок за понуди ќе биде отворен во март, кога заинтересираните инвеститори ќе можат да испратат свој предлог. „Би-би-си“ пишува дека бизнисменот Сер Џим Ретклиф добил конкуренција во битка за премиерлигашот, а наводно конкурент му е Инвестициски фонд зад кој стои Насер Ал-Келаифи, односно сегашниот претседател на ПСЖ. Моќниот газда на ПСЖ е во добри односи со Европската фудбалска унија (УЕФА) бидејќи е против идејата за создавање Суперлига, па поради тоа не се очекува да се соочи со некакви проблеми ако реши да го преземе англискиот тим.

Ал Келаифи: ПСЖ и Меси ќе преговараат за продолжување на договорот по завршување на СП

Ивана Ефремовски — Fri, 16 Dec 2022 08:04:27 +0000

Сопственикот на ПСЖ, Насер Ал Келаифи, најави дека ќе се обиде да го убеди аргентинскиот фудбалер Лионел Меси да го продолжи договорот со францускиот шампион. Меси има договор со ПСЖ до крајот на сезоната, а Ал Келаифи рече дека сака аргентинскиот капитен да остане во клубот од Париз најмалку до јуни 2024. „Меси е многу среќен, тоа се гледа во дресот на Аргентина. Ако играчот не е задоволен, не игра добро. Оваа сезона игра фантастично со ПСЖ, постигна многу голови и асистенции. Значи, тоа што задно го договоривме е по завршување на Светското првенство да седнеме да разговараме. Меѓутоа, среќен е и ние сме среќни со него“, изјави Ал Келаифи. Тој додаде дека е уверен оти Меси може да игра на врвно ниво, иако наскоро ќе го прослави својот 36. роденден. (МИА)

Медиуми: ПСЖ се сели од „Паркот на принцовите“

Ивона Петрова — Sat, 26 Nov 2022 15:02:56 +0000

Претседателот на ПСЖ, Насер Ал Келаифи, ја разгледува можноста актуелниот француски фудбалски првак да го напушти „Паркот на принцовите“, оценувајќи оти клубот заслужува подобар стадион, објави спортскиот весник Л’Екип. – ПСЖ заслужува подобар стадион. Мојата прва опција беше да не се селиме. Меѓутоа градските власти во Париз нè туркаат да го направиме тоа. За модернизација на „Паркот на принцовите“ потрошивме 85 милиони евра, но тоа не е наш стадион“, рече Ал Келаифи. Првиот човек на ПСЖ изрази желба да го купи „Паркот на принцовите“, но како што самиот наведе, париските власти побарале многу висока цена. Француските медиуми наведуваат дека ПСЖ најверојатно нема да гради, туку ќе купи друг стадион во Париз.

Ал-Келаифи: Мојата цел е да имам само парижани во нашиот клуб

Ивона Петрова — Wed, 22 Jun 2022 06:27:58 +0000

Претседателот на Пари Сен-Жермен, Насер Ал-Келаифи зборуваше за неговите цели. Тој сака во клубот да играат само парижани. – Мојата цел во следните неколку години е само парижани да играат во нашиот клуб. Најдобрите во нашиот регион заслужуваат да играат за ПСЖ. Ова е целта, изјави Ал-Келаифи за „Le Parisien“. Првиот човек на францускиот фудбалски шампион демантира било какви преговори со 49-годишниот тренер Зинедин Зидан. – Воопшто не преговаравме со Зидан. Немаше контакти ниту директно, ниту преку трети лица. Многу клубови се заинтересирани за неговата покана, вклучително и репрезентации, но ние никогаш не сме комуницирале со него, додаде Ал-Келаифи. Претходно се пишуваше дека Зидан би можел да го води ПСЖ, но на крајот парискиот клуб реши да го назначи за тренер Кристоф Галтие од Ница. ПСЖ минатата сезона го освои францускиот шампионат, но не успеа д атриумфира во Лигата на шампионите.

Претседателот на ПСЖ смета дека УЕФА треба да го преиспита финансискиот фер-плеј

Ивона Петрова — Tue, 07 Sep 2021 08:19:38 +0000

Претседателот на ПСЖ, Насер Ал-Келаифи ги сподели своите ставови за финансискиот фер-плеј. – Мора да имаме финансиска стабилност. Ако не реагираме брзо, последиците може да бидат непоправливи. Финансискиот фер-плеј треба да се преиспита. Треба да имаме посилен однос со УЕФА. Ние веруваме дека фудбалот треба да биде еднаков за секого, ги цитира зборовите на Ал-Келаифи, шпански „АС“. Ова лето, Лионел Меси, Серхио Рамос, Џанлуиџи Донарума и Жоржињо Вајналдум се приклучија на ПСЖ како слободен играч. Клубот го купи и Ашраф Хакими од Интер. Беше објавено дека зделката била вредна 70 милиони евра. Претходно се дозна дека УЕФА ќе поднесе проект за замена на правилата за финансиски фер-плеј со воведување ограничување на платата и данок на луксуз. Промените може да стапат на сила од 2022 година. Клубовите кои учествуваат на европските натпревари ќе можат да платат не повеќе од 70 отсто од вкупниот профит за плати. Тимовите што го надминуваат плафонот на плата ќе треба да платат данок на луксуз еквивалентен на пречекорување на трошоците.

Првиот човек на ПСЖ: Го почитуваме Финансискиот фер-плеј во секој поглед

Тале Кристо — Wed, 11 Aug 2021 10:36:52 +0000

ПСЖ на располагање има вистински дрим-тим. Јавноста се прашува како францускиот клуб може да си дозволи еден ваков состав со исклучително скапи ѕвезди и понатаму да биде во рамки на Финансискиот фер-плеј на УЕФА. Староседелците Нејмар и Килијан Мбапе се едни од најплатените фудбалери во светот, а тимот летово ги доведе Лионел Меси, Серхио Рамос, Џанлуиџи Донарума, Ашраф Хакими и Џорџињо Вајналдум. На денешната прес-конференција првиот човек беше запрашан токму за „ФФП“ и изјави дека клубот секогаш ги следи правилата. -Го очекував ова прашање и ви благодарам на тоа. Ние го почитуваме Финансискиот фер-плеј уште од првиот ден. Пред да направиме потег, ние се консултираме со нашиот финансов тим, кој ги проверува сите работи. Имавме капацитет да потпишеме со Меси и сме во рамки на Финансискиот фер-плеј. Ние секогаш ќе ги следиме правилата, рече Насер Ал-Келаифи.