Наталија Задорожњук – Kurir.mk

Вицепремиерот Груби на проштална средба со амбасадорката Задорожњук

Катерина Бојаџиева — Fri, 05 Aug 2022 10:27:34 +0000

Првиот потпретседател на Владата и министер за политички систем и односи меѓу заедниците Артан Груби денеска оствари проштална средба со амбасадорката на Украина Наталија Задорожњук. На средбата се разговарало за актуелната ситуација во Украина, која амбасадорката Задорожњук ја оценила како тешка. – Северна Македонија се постави на вистинската страна на историјата со тоа што се усогласи со демократските земји во линија на воведување санкции кон Руската Федерација и како членка на НАТО ја осуди руската агресија од самиот почеток бидејќи повеќе нема место во светот, во 21 век за агресија и насилство, се наведува во соопштението од Кабинетот на Груби. Амбасадорката Задорожњук изразила благодарност за континуираната помош што Северна Македонија ја дава во овој период на криза, вклучувајќи го и приемот на украинските граѓани кои побараа засолниште во нашата земја. Вицепремиерот Груби уште еднаш ја потврдил силната поддршка на Владата на Северна Македонија за суверенитетот и територијалниот интегритет на Украина, апелирајќи до страните да седнат и да го решат конфликтот по пат на дијалог и дипломатија. – Груби и Задорожњук разговараа и за важниот чекор што Северна Македонија го направи со почетокот на преговорите за интеграција со Европската Унија и одржувањето на Првата меѓувладина конференција како адекватен одговор на обидите за дестабилизација и идеолошка дезориентација на земјата, исто така статусот на земја кандидат на Украина го опишаа како историски момент и геополитичка смелост предизвикана од руската инвазија, се подвлекува во соопштението. Заеднички оцениле дека соработката меѓу двете земји треба да продолжи уште посилно во многу области, со посебен акцент на обновата на Украина.

Задорожњук: Трет ден Украина ѝ дава отпор на руската воена инвазија, непријателот бомбардира и лансира ракети во сите правци

Дарко Андоновски — Sat, 26 Feb 2022 11:10:20 +0000

Најцинично е што цел на нападите се социјалната сфера, цивилите. Ракети беа лансирани кон градинки и сиропиталишта, стрелат по колите на итна помош, хоспитали. Вчера ракета беше лансирана во висококатница во Киев на улицата Лобановскиј. Во близина има породилиште, училиште. Гранатирањето на куќата на Лобановскиј ќе биде една од епизодите во истрагата за воените злосторства на рускиот режим во Меѓународниот кривичен суд во Хаг. Соодветниот правен процес е веќе започнат, ова денеска преку обраќање до јавноста го истакна амбасадорката на Украина во Македонија, Наталија Задорожњук. -Злото, обично излегува навечер. Оваа ноќ повторно беше силно бомбардиран нашиот прекрасен илјадагодишен Киев. Русите се обидуваат да го опкружат нашиот главен град од сите страни. Ги бомбардираат сите делови на Киев. Тие лансираат диверзантски групи кои се претставувват како украински војници или полицајци облечени во нивната облека. Во Киев се водат борби. Но, и оваа ноќ, благодарение на нашите војници и жители од градот, нашиот сакан град издржа. Луѓето го бранат својот град, им се доделува оружје. Заклучно со 6 часот наутро на 26 февруари, во Кијив беа повредени 35 лица, меѓу кои и две деца. Утрото на 26 февруари, рускиот режим брои загуби во војната на Русија против Украина. Имат човешки загуби - повеќе од 3.500 руски војници, речиси 200 војници беа земени во заложништво, соборени се авиони и погодени се тенкови, вели таа. Амбасадорката додава дека за жал и ние имаме загуби. Сред цивили 198 мегу нив 3 деца. 1115 се ранети, мегу нив 33 деца. -Имаше жестоки битки низ целата територија на Украина. Русите прво бомбардираат, а потоа испраќаат тенкови. Нашите војници водат жестоки битки. Но, во текот на оваа вечер и нок Русите не успеаја да преземат контрола над ниту еден украински град. Имаме загуби. Умираат најдобрите. Но, ние сме на своја земја, нема каде да се повлекуваме. Украинците ќе продолжат да се борат. Благодарни сме му на светот за помошта. Секој нов ден носи нови санкции, оружје и изолација на Русија. Веќе пристигнаа противтенковски оружја, опрема за противвоздушна одбрана, муниција за сите видови оружје и артилерија, автомобили, панцири, гориво. Ќе има уште повеќе. Путин и Лавров лично се вклучени во санкциите на ЕУ. Веќе се работи на нов пакет санкции. Руските банки, компании, стоки буквално се исфрлаат од полиците, финансиските системи, берзите. Русија е лишена од спортски и забавни настани - Лигата на шампиони и Евровизија. Голем број земји веќе го затворија воздушниот простор за руските авиокомпании, а денес тој број само ќе расте. Светските отпадници ќе мора или воопшто да не летаат или да прелетуваат преку пола свет. Неколку земји од ЕУ престанаа да издаваат визи за Русите, истакнува таа. Наталија додава дека во Советот за безбедност на ООН, за време на обидот да се утврди резолуција, Русија очајно се обидуваше да не остане единствената земја која ќе стави вето. Тоа не ѝ успеа. Дури и блиските нејзини пријатели се воздржуваа од отворено застанување на страната на Русија. -Нашата упорност секој час привлекува на наша страна сè повеќе и повеќе партнери од меѓународната коалиција во одбраната на Украина и светот. Нашата количина се зголемува. Вистината ќе победи, заклучува Задорожњук.

Се обрати украинската амбасадорка во Македонија: Ова лудило треба да запре, потребна ни е реална помош (ВИДЕО)

Ивона Петрова — Fri, 25 Feb 2022 11:50:33 +0000

Целиот свет е во шок од руското лудило. Рускиот режим е признат како најголема закана за безбедноста. Русија има една од најголемите армии во светот, а Украина најдобрата. Никој толку жестоко и посветено нема да војува како оние кои ја заштитуваат својата земја, истакна во видео пораката амбасадорката на Украина во Македонија, Наталија Задорожњук. Посочи дека нивните војници не се предаваат, но реална помош им е потребна. -Реална помош, со оружје, економска, финансиска. Ова лудило треба да се запре. Веќе втор ден се бомбардира Киев. Тие ја освоија нуклеарната централа Чернобил. Ние се држиме, но тешко е сами да опстопиме против нив. Секој треба да и помогне на Украина како што може, посочи Задорожњук. Таа истакна денес Украинците во Македонија заедно со македонскиот народ ќе одржат мирен протест со почеток во 14:30 часот на Плоштад Македонија.

Петровска: Кризата во Украина да се реши преку дипломатски пат

Тале Кристо — Mon, 21 Feb 2022 17:57:14 +0000

На денешната средба во Министерството за одбрана меѓу министерката за одбрана Славјанка Петровска и ополномоштената амбасадорка на Украина во Северна Македонија, Наталија Задорожњук, од страна на министерката Петровска беше уште еднаш потенцирано дека нашата земја како и сите останати земји членки на НАТО дава недвосмислена поддршка за територијалниот интегритет и суверенитет на Украина. Петровска на средбата истакна дека како земја-членка на НАТО, Северна Македонија ја поддржува политиката на отворени врати на НАТО и правото на секоја земја да се определи за својата иднина. Амбасадорката Задорожњук изрази благодарност за недвосмислениот став за поддршка на Северна Македонија на територијалниот интегритет и суверенитет на Украина, и поддршката за политиката на отворени врати на НАТО. Министерката го потврди ставот на Северна Македонија дека најдобро решение е дипломатското решение на кризата во Украина, како и поддршката за напорите на НАТО за користење на сите дипломатски и политички алатки за намалување на тензиите и де-ескалација на ситуацијата.