недела – Kurir.mk

ЦУК: Поради боево гаѓање, в петок и недела забрането движење кај Виречка полјана, делчевско

Тале Кристо — Thu, 19 Oct 2023 12:47:55 +0000

Регионалниот центар за управување со кризи Делчево го известува населението од селата Стамер, Град, Вирче, Тработивиште и Разловци дека на ден 20.10.2023 година (петок) во периодот од 08.00 часот до завршување на гаѓањето од страна на РЦ – ИСТОК и ПС за граничен надзор – Делчево, ќе се спроведе гаѓање со огнено оружје. Боевото гаѓање како што се вели во соопштението ќе се изврши на временото стрелиште на место наречено Виречка полјана-атар на селото Вирче, поради што посочија дека на споменатата локација времено ќе биде забрането движењето на луѓе како и испаша на домашни животни. -Исто така го известуваме населението дека на ден 22.10.2023 година (недела) ПС од општа надлежност – Делчево, ќе спроведе боево гаѓање со огнено оружје. Во периодот од 09.00 часот до 14.00 часот. Поради тоа се забранува секакво движење на луѓе и вршење на каква било работа и испаша на домашни животни, се вели во информацијата од Регионалната канцеларија на ЦУК Делчево. Целта како што додаваат оттаму е да се спречат евентуални несакани последици по населението кое живее во поширокиот реон на стрелиштето.

В недела традиционалното искачување на Титов врв, ден претходно ќе се одржат и повеќе активности

Тале Кристо — Fri, 26 May 2023 11:44:23 +0000

Од утре сабота почнуваат повеќето активности во организација на планинарскиот клуб Љуботен во пресрет на традиционалното 41-во искачување на Титов Врв што ќе се случува во недела, најавија денес организаторите. Во сабота, активностите ќе се одвиваат на Попова Шапка, од каде исто така во недела ќе се тргнува кон највисокиот врв на Шар Планина. -Програмата предвидува во сабота да има акција за чистење во координација со Национален парк Шар Планина. Потоа околу 15 часот ќе се организира планинарски базар. Од 15:30 до 17:00 има планинарски квиз и забавно едукативни игри, ќе учествуват клубовите. Следува проекција на планинарски филм, додека свечено отворање ќе има во 19 часот. Ќе имаме и координативен состанок со координаторите на клубовите, изјави Јованче Даниловски, член на организацискиот тим. Во недела искачувањето започнува во 06:30 часот со тргнување на колоната од платото пред хотел Попова Шапка кон Титов Врв по Вакуфска патека. Движењето до Титов врв е веќе обележано. -Таа патека е веќе маркирана. Се надеваме дека во 11 ќе биде пристигнувањето на врвот, а од 12 да се упатиме назад за да до 16 часот биде завршена планинарската тура. Ние веќе бевме на терен периодов и имавме маркирање и скрининг на самата патека. Имаме два снежни „јазици“ долж патеката, која инаку е во добра состојба. Ќе има пет пункта долж целата тура, каде ќе има и медицински екипи каде што ќе имаме и водичи во самата колона. Сите учесници да се придржуваат до самата програмата, изјави Јованче Даниловски, член на организацискиот тим. Досега се пријавиле 400 планинари за искачувањето на врвот на 2747 метри надморска височина. -Очекуваме околу 800 планинари вкупно да бидат дел од искачувањето. Во текот на изминатите 40 искачувања бележиме околу 25000 искачени планинари. Оваа традиција е од 1980 година кога првиот пат е почнато како меморијално искачување, информираше Јован Божиноски, претседател на ПК Љуботен. Организаторите потсетуваат дека учесниците самите треба да обезбедат храна за време на планинарењето и да имаат опрема како за зимски услови.

Пиеракакис: В недела во 21 часот резултатите од изборите од 80 отсто од гласовите

Тале Кристо — Wed, 17 May 2023 14:42:24 +0000

Два часа по затворањето на гласачките места, односно во 21 часот в недела ќе бидат соопштени резултатите од изборите во Грција со пребројани 80 отсто од гласовите, според министерот за дигитална политика Кирјакос Пиеракакис, јави дописничката на МИА од Атина. Во интервјуто за грчкото радио „Скај“, Пиеракакис објасни дека оваа година процесот на пребројување на гласовите ќе биде побрз од претходно, во сите избирачки места ќе има таблети и се очекува во 21 часот да бидат познати 80 отсто од резултатите од гласањето. -Збирот што порано се бележеше рачно, сега ќе се врши со автоматско известување на Министерството за внатрешни за да може резултатот да излезе многу порано, објасни Пиеракакис. Во однос на деталните резултати за пратеничките листи, се очекува пред полноќ да се знае бројот на гласови што го добиле кандидатите за пратеници.

Недела ќе биде неработен ден за сите билетарници на ЈСП

Ивона Петрова — Wed, 01 Feb 2023 11:19:54 +0000

ЈСП Скопје информира дека од претстојниов викенд, недела ќе биде неработен ден за сите билетарници, односно нема да има дежурни продажни места на ЈСП Скопје. Во недела, како и досега, корисниците на јавниот превоз ќе можат да вршат надополнување на електронски картички „Скопска“ во некое од речиси 100 продажни места од секундарната дистрибутивна продажна мрежа на ЈСП Скопје (маркети и трафики). Прегледот на локациите од дистрибутивната мрежа е достапен на фејсбук страницата на ЈСП Скопје (www.facebook.com/jspskopjee).

Недела и дефинитивно останува неработен ден

Ристе Здравков — Thu, 01 Dec 2022 14:29:23 +0000

Недела останува неработен ден. Иницијативата на Стопанската комора со која бараше да се укинат одредбите од законоите за раб0тни односи и за трговија падна на Уставен. Шестмина наспроти еден судија бил денешниот исход од гласањето што значи дека нема да се поведе постапка. Иницијативата на Стопанска комора беше поднесена во јануари. Според нив одредбите со кои недела стана неработен ден освен за дејностите со исклучок, се спротивни на слободата и пазарот на претприемништво. Дел од судиите на расправата пред еден месец беа на став дека треба да се отфрли иницијативата, а само еден судија кој најави и издвоено мислење сметаше дека законската измена е спротивна на уставот. „Апсолутно не може да се доведе во прашање дека со оспорениот Закон се повредуваат уставните одредби. Со оваа иницијатива се индивидуализира и конкретизира едно право кое со Уставот се гарантира. Кога станува збор за права што Уставот ги гарантира тие добиваат на значење“,-Осман Кадриу, Уставен судија. „Сметам дека начинот на кој законодавецот сака да ја постигне оваа цел е уставно проблематична. Дел од наводите во иницијативата се основани. Остава простор за различни толкувања. Како се утврдува кои се тие технолошки процеси, кој го цени тоа.“-Дарко Костадиновски, Уставен судија. Судиите денеска гласаа за иницијативата, бидејќи во септември немаа мнозинство за одлука.Уставниот суд сега има седуммина судии со изборот на Фатмир Скендер и Татјана Васиќ Бозаџиева, но за една недела ќе остане со еден помалку со пензионирањето на судијката Вангелина Маркудова. Изборот на Љубомир Јовески останува заглавен во собранието а уште еден судија треба да дојде на предлог на Судскиот Совет.

Недела останува неработен ден, Уставен суд не поведе постапка

Катерина Бојаџиева — Thu, 01 Dec 2022 13:00:12 +0000

Уставниот суд на денешната седница одлучи да не поведе постапка за предметот во кој беше оспорено работењето во недела, информира на прес-конференција портпаролката на Уставниот суд, Христина Беловска. Тоа, како што појасни таа, значи дека во правниот поредок останува Законот кој го уредува правото на работниците да не работат во недела, освен во дејностите кои се исклучоци, а секако се предвидени со сегашното законско решение. – За Уставниот суд неосновани се наводите на Стопанската комора на Северна Македонија која е подносител на оваа иницијатива и која бараше да се запре извршувањето на овој Закон. Оваа одлука е конечна и секој мора да ја почитува, нагласи Беловска. Уставниот суд расправаше за овој случај на седница што се одржа на 14 септември годинава, но одлука не беше донесена поради недоволно мнозинство гласови. На денешната 38-ма седница на дневен ред беа закажани осум иницијативи по кои се разгледуваше и оценуваше уставноста и законитоста.

Министерството за економија предлага трговците на мало во туристичките места да можат да работат во недела

Магдалена Андонова — Thu, 12 May 2022 13:13:06 +0000

Предлог измени и дополнувања на Законот за трговија, со кои се предлага во туристичките места сите трговци на мало да можат да работат во недела и за време на празници, достави Министерството за економија до Собранието на Република Северна Македонија. Измените и дополнувањата на Законот за трговија се доставени до партениците за нивно разгледување и усвојување во Собранието. Со овие измени се дава можност на сите туристички места што се пропишани со Закон за туристичка дејност, продавниците и дуќаните во кои се врши трговија на мало да можат да работат и во деновите кои се третираат за неработен ден и државни празници во текот на целата година. Надоместокот од 100 проценти дневница за работа во недела и празници останува за трговците на мало во туристичките места да ја платат на работниците. (МИА)

Утре посебен сообраќаен режим во Скопје

Тале Кристо — Sat, 07 May 2022 11:04:44 +0000

На 08.05.2022 (недела) во времето од 08.30 до 10.30, во организација на Сојуз на спортови на Скопје, ќе се одржи улична трка насловена како „Халк Еко Скопје трча 10К“, со стартна позиција на бул.„Илинден“-локација Фонтана, а натпреварувачите ќе се движат по бул.„Илинден“ до крстосница со ул.„Никола Парапунов“, лево во продолжение до крстосница со бул.„Партизански Одреди“, десно (во десниот коловоз гледано кон Ѓорче Петров) до Влајков Мост каде што вртат полукружно и назад во истиот коловоз до крстосница со ул.„Љубљанска“ каде што вртат полукружно и по истиот коловоз се враќаат назад на ул.„Никола Парапунов“ и по бул.„Илинден“ до целта на локација Фонтана на бул.„Илинден“, во Скопје. Од тие причини Одделението за безбедност на патниот сообраќај ќе превземе мерки за посебен режим на сообраќајот по горенаведените улици, при што сообраќајот ќе се пренасочува по околните сообраќајници. За таа цел МВР апелира до граѓаните да ги почитуваат наредбите што ги издаваат полициските службеници по сообраќајниците каде што ќе се одвива настанот.

Законската одредба за недела неработен ден пред Уставниот суд

Ивона Петрова — Wed, 20 Apr 2022 05:32:51 +0000

Уставните судии на денешната седница ќе дискутираат по однос на четири иницијативи поднесени од правни и физички лица. Меѓу денешните инцијативи кои треба да бидат разгледани е и иницијативата за законската одредба за недела неработен ден поднесена од Стопанската комора на Северна Македонија. Преку оваа иницијатива се оспоруваат последните измени на Законот за работните односи, во однос на недела неработен ден во државата. – Подносителот смета дека оспорениот закон кој се однесува на уредување на работата во недела е спротивен на слободата и пазарот на претприемништво, темелните вредности и еднаквоста на граѓаните. Во иницијативата се наведува дека Законот за изменување и дополнување на Законот за работните односи го уредува користењето на неделен одмор преку воведување на забрана за работа во недела и притоа таксативно ги набројува исклучоците на одредени дејности кај кои неделниот одмор може да се користи во друг ден во неделата и се укажува дека ова законско решение не е во полза ниту на економските субјекти, ниту на работниците и директно задирало во темелните вредности на уставниот поредок на државата, велат од Уставен суд. Според подносителот, со ова законско решение работодавачите од економските дејности на кои им се забранува работа во недела – неметалните минерални производи, имале еднаква правна положба од аспект да ги намируваат данокот и другите јавни давачки кон државата, кои се утврдени со закон, но биле ставени во нееднаква правна положба со работодавачите од економските дејности на кои им е дозволено да работат во недела, од аспект да остваруваат приходи и добивка. Освен оваа точка, Уставниот суд денеска ќе дискутира и за иницијативата поднесена од Здружението на приватни стоматолошки установи и приватни доктори по дентална медицина од Кавадарци и за Правилниот за облиците на континуирано стручно усовршување. Другите две иницијативи за кои уставните судии денеска треба да се произнесат се за носењето на лична заштита заради спречување на ширењето на КОВИД -19 и за еден обвинителен акт поднесен од Основно јавно обвинителство за гонење организиран криминал и корупција.

СЛЕДУВА ПРОМЕНА НА ВРЕМЕТО: Од недела пообилни врнежи од дожд, засилен ветер и заладување

Тале Кристо — Fri, 15 Apr 2022 10:16:41 +0000

Под влијание на влажна и студена воздушна маса в недела и понеделник времето во земјава ќе биде облачно, ветровито и значително постудено, со врнежи од дожд, а на планините и на некои повисоки места од снег. Пообилни врнежи од над 20 литри на квадратен метар ќе има в недела, особено во јужните и источните делови и ќе дува умерен до засилен северен ветер. Дневните температури ќе се намалат за повеќе од 10 степени, а од вторник на места ќе има утрински температури и под нула.