недостиг на лекови – Kurir.mk

ЕУ планира измени на легислативата за да се избегне недостиг на лекови

Ивана Ефремовски — Tue, 17 Jan 2023 14:21:03 +0000

Европската комесарка за здравство, Стела Киријакидес, денеска на седницата на Европскиот парламент изјави дека со измените на фармацевтскиот закон во ЕУ ќе биде предвидена набавка на поголемо количество лекови и порано известување за недостиг. „Нашата цел останува да обезбедиме пристап до лекови за сите пациенти на кои им се потребни, како и да избегнеме какво било нарушување на пазарот на лекови во ЕУ“, рече Киријакидес, алудирајќи на недостигот на антибиотици што е се поголем проблем за многу европски земји. „Раниот пораст на респираторните инфекции во Европа оваа зима и недоволниот капацитет се главните причини за недостигот“, рече Киријакидес, додавајќи дека ЕУ ги применува сите регулаторни опции за да го зголеми производството на лекови и да го ублажи недостигот. Таа додаде дека предлогот за ревизија на законот за фармација е планиран за март. Во 26 европски земји е забележан недостиг на антибиотици, соопшти Европската агенција за лекови. (МИА)

Пленковиќ тврди дека нема да има недостиг на лекови

Дарко Андоновски — Tue, 20 Oct 2020 14:19:38 +0000

Хрватските веледрогерии денеска ја прекинаа испораката на лекови во повеќе од 80 проценти од болниците, а премиерот Андреј Пленковиќ тврди дека нема недостиг и оти лекови ќе има. Испораката на лекови е прекината за 33 болници во Хрватска, а Иван Клобучар од управата на Октал Фарма, една од четирите национални веледрогерии, вели дека биле принудени на ваков потег. – Имаме 500 милиони заостанати долгови само во болниците. Дополнителен проблем е што во последните два месеци, долгот на аптеките достигна нови 700 милиони долгови. Стигнавме до точката кога станува неиздржливо, изјави Клобучар за загрепската телевизија Н1. Веледрогериите бараат да им се бидат уплатени 2,7 милијарди куни до крајот на годината, а преостанатиот долг до пет милијарди куни се бара да се реши до 30 јуни следната година. За време на денешното претставување на дополнителниот пакет мерки за помош на стопанството, Пленковиќ рече дека здравствените устави мора да функционираат, а веледрогериите, како што рече, „се тука со нас цело време“. – Нема недостиг на лекови, тврди тој, додавајќи дека преговара со веледрогериите со цел да се избегнат проблеми во снабдувањето. На прашањето дали ќе има недостиг на лекови, Пленковиќ рече: – Па, ќе има лекови, мислам тие веледрогерии и утре мора да опстанат на хрватска територија. На прашањето дали овој проблем може да се реши, хрватскиот премиер рече дека може да се направи тоа многу едноставно со плаќање на долгот од 54 милијарди куни. На прашањето зошто Владата не го стори тоа, хрватскиот премиер рече: „Па, да речеме затоа што сега дадовме седум милијарди за платите на луѓето во приватниот сектор. Државата има одреден простор за маневар. Сè се сервисира на одржлив начин. А тоа е задачата на министерот за здравство да, покрај ковид, го реформира здравствениот систем кој ќе го направи финансиски одржлив“.

Хрватска може да се соочи со недостиг од лекови поради долг кон веледрогериите

Магдалена Андонова — Mon, 19 Oct 2020 13:17:53 +0000

На Хрватска и се заканува недостиг на екови поради големиот долг на државата кон веледрогериите, кој во моментот е над пет милијарди куни (околу 700 милиони евра). Претставниците на веледрогериите денеска демонстративно заминаа од состанокот со министрите за финансии и за здравство, Здравко Мариќ и Вилијем Берош, тврдејќи оти не им е понудено решение. – Можам да бидам партнерт на системот до две милијарди куни. Ние повеќе од две милијарди куни не можеме да толерираме, тоа е работа на Владата, изјави претставничка на една од веледрогериите. Таа додаде дека долгот на болниците е 4,3 милијарди куни, а аптеките должат уште 700 милиони куни, така што долгот надминува над пет милијарди куни. Министерот за финансии Мариќ истакна дека лековите се важни, но оти треба да се земе во предвид и каква е ситуацијата со буџетот. Тој додаде дека се пред договор и оти ќе продолжат разговорите,а дел од средствата ќе биде обезбеден од ребалансот на буџетот. – Настојуваме преку прераспределба да најдеме дел од средствата за, се надевам, да се избегне застој во дистрибуцијата на лекови, посочи Мариќ. (МИА)