Нејц Цехте. – Kurir.mk

Цехте ќе игра во ЛШ со дански ГОГ Гудме

Бошко Тасиќ — Thu, 28 Jul 2022 05:15:46 +0000

Нејц Цехте, кој требаше да биде засилување за десната бековска позиција на Вардар 1961, по исфрлањето од Лигата на шампионите беше ослободен од обврските. Словенечкиот бек веднаш тргна во потрага по нова средина, па така сепак ќе заигра во елитното натпреварување. Нов клуб на Цехте е данскиот првак ГОГ Гудме. 29-годишникот парафира договор на една сезона и по четири сезони во Хановер, ќе заигра во Лигата на шампионите со ГОГ Гудме. „Среќен и горд сум што успеав да се договорам со ГОГ Гудме. Сите знаат дека ова е фантастичен клуб. Едвај чекам да заиграм во Лигата на шампионите. Дојдов тука, сакам прво да ги запознаам сите соиграчи, тренерите и сите во клубот. Го познавам Мортен Олсен, тој ми помогна многу во Германија. Сега чекам старт на подготовките за новата сезона, а најтежок момент ќе биде јазичната бариера“, кажа Цехте.

Словенечкиот репрезентативец Цехте нов ракометар на Вардар 1961

Дарко Андоновски — Fri, 11 Mar 2022 14:40:49 +0000

Словенечкиот репрезентативец Нејц Цехте (29) од следната сезона ќе биде член на актуелниот македонски првак Вардар 1961 и ќе остане најмалку една сезона, со можност за продолжување на соработката доколку клубот е задоволен од неговиот настап. Словенечкиот десен бек ќе дојде во редовите на „црвено-црните“ од бундеслигашот Хановер. Десниот бек во јануари беше дел од репрезентацијата на Словенија, која настапи на Европското првенство (ЕП) во Унгарија, а го носеше дресот на националниот тим и на претходното ЕП 2020 година кога го освои четвртото место. – Среќен сум што доаѓам во Вардар. Го одбрав македонскиот првак бидејќи знам што значи клубот во светот на ракометот, и знам дека може да придонесе и за мои подобри игри и резултати, изјави Цехте за клупскиот сајт на Вардар. Тој сподели дека слуша само убави работи за сè што го очекува во новата средина. – Слушнам само убави работи за сè што ме очекува во новата средина, за тренерот, за нивото на кое е клубот, за тренирањето. Очекувам дека ќе ги оствариме резултатите што ќе бидат поставени пред нас, и, секако, ќе се бориме. Едвај чекам да дојдам во Скопје, со новиот тим, со момците. Се радувам што ќе можам да играм пред таква публика и атмосфера, и да тренирам со стручњак од калибарот на Давид Дејвис, додаде словенечкиот ракометар. Вардар сезонава обезбеди пласман во нокаут фазата во Лигата на шампиони и во осминафиналето ќе игра против унгарски Веспрем.

Вардар договори бек од Бундеслигата

Бошко Тасиќ — Sat, 05 Mar 2022 08:10:42 +0000

Македонскиот ракометен шампион Вардар почна да размислува за наредната сезона и веќе е договорено првото засилување за натпреварувачката 2022/2023, кое доаѓа од Бундеслигата.

Нов член на „црвено-црните“ е соиграчот на Филип Кузмановски од Хановер, десниот бек Нејц Цехте.
Цехте има 29 години и е репрезентативец на Словенија од која беше дел на последното Европско првенство во Унгарија и Словачка. Тој веќе четири години го носи дресот на Хановер, додека претходно беше член на Горење Велење.