независна угостителска комора – Kurir.mk

НУК со барање: Угостителите да издаваат и да тргуваат со крипто валути

Магдалена Андонова — Wed, 01 Dec 2021 09:41:45 +0000

Независната угостителска комора (НУК) почна иницијатива за креирање иницијална понуда за издавање глобален алтернативен крипто коин – крипто средства наменети за користење исклучиво во угостителската индустрија. Со тоа, според НУК, се обезбедува алтернативен извор и начин на прибирање средства за инвестирање и финансирање на македонски и регионални угостители и угостителски објекти. Како што наведува Комората, приходите остварени од инвестициите во крипто средството, авансно ќе се исплатуваат и инвестираат во угостителите кои ќе имаат за обврска добиените средства да ги враќаат и исплаќаат со реализација и испорака на сопствени угостителски услуги. -За побрзо да ја прекинеме агонијата на преживување од ден во ден и да изнајдеме алтернативни начини за финансирање, инвестирање и помош и поддршка на угостителската индустрија не само локално туку и регионално, ја почнуваме оваа иницијатива со колеги од Балканот за издавање на глобално крипто средство базирано на паметни договори како една нова модерна можност за прибирање на финансиски средства и промоција на македонскиот и балканскиот туристичко-угостителски сектор кој ги следи и имплементира модерните технологии во угостителскиот сектор, истакнуваат од НУК. НУК објаснува дека на овој начин, со промоција на т.н. македонска и балканска крипто дестинација, индивидуалци од целиот свет кои сакаат да ги планираат и да инвестираат во своите годишни патувања и одмори – летувања и зимувања во земјава и во регионот, бизнисмени, тур-оператори и туристички агенции кои имаат потреба да закупат и резервираат повеќе различни угостителски капацитети, номади, инвестициски фондови и инвеститори, ќе можат да инвестираат и да го купат ова крипто средство по загарантирани повластени цени кои важеле на денот на купување со што ќе стекнат право да ги користат услугите на угостителите кога сакаат или да тргуваат со крипто средствата по актуелни цени во кој било момент од наредниот период. Независната угостителска комора потсетува дека на четврти октомври достави барање до Народната банка, Министерството за финансии, Министерството за економија, Управата за јавни приходи и Централниот регистар за информации за можности за законска трговија и издавање крипто валути согласно постојната регулатива. -Со оглед дека изминатите денови поради сите случувања со рударењето на крипто средства во медиумите се потврдија информациите достапни на официјалната страна на Народна банка дека кај нас, како и во други земји, прашањето на издавање, вложување и тргување со крипто-средствата не е регулирано ниту во Законот за девизно работење што го регулира и работењето со странство и ова значи дека работењето со крипто-средствата не е недозволено, туку во моментов тоа е нерегулирано.. Целокупната иницијатива со целосно иновативен пристап и решение за примена на крипто средства во угостителската индустрија може да се реализира запазувајќи ја постојната и усогласена со ново најавената законска регулатива за работа со крипто-виртуелни средства која се имплементира преку нацрт-закон за спречување перење пари и финансирање тероризам што е во собраниска процедура, напоменува Комората. НУК најавува дека за реализација и евиденција каде можат да ги користат или тргуваат со крипто средства со кои располагаат, сопствениците и инвеститорите целосен увид во понудата на угостителските услуги кои ќе можат да ги користат од листата на членки – угостителски објекти ќе имаат преку специјализираната платформа за резервации и реализации за која веќе е во развој. Вредноста на услугите што ќе може да се користат преку платформата, ќе бидат изразени единствено во крипто средство. Преку платформата ќе се вршат и сите порамнувања за користените услуги и трансакции направени во и кај угостителските објекти.

НУК: Владата вчера доби граѓански „шамар“, да се укине спорната одлука со која на било кој начин се забранува слободата на движење

Ивона Петрова — Mon, 16 Aug 2021 06:13:49 +0000

Независната угостителска комора реагира на донесените нови рестриктивни мерки и посочува дека Владата треба итно да ја укине спорната одлука. После вчерашните масовни протести ширум Македонија не само угостителите туку илјадници млади и возрасни жители го искажаа незадоволството од донесувањето на забраната преку условна и неспроведлива одлука на владата со која им наложи на угостителите да воведат т.н. редарски служби со кои ќе вршат контрола и селекција на гостите и ќе им забранува на “невакцираните” односно сите граѓаните кои не се вакцинирани и немаат соодветна потврда за имунизација да влезат - посетуваат секаков вид на објект вклучително и угостителските објекти и било каков настан (прослава, концерт, семинар, обука, работилница, конференција, културни или спортски настани) на отворено. На претседателот на владата не му останува избор доколку и понатаму сака да ја води оваа влада веднаш денес да свика седница на влада и да ја укине спорната одлука со која на било кој начин се забранува слободата на движење и влез во одредени јавни објекти на лицата што не се вакцинирани, велат од НУК. Од Комората посочуваат дека на 10-ти август доставиле барање до Владата за укинување на одлуката за задолжителна редарска служба заради контрола на приложување доказ за вакцинација при влез во секаков вид објект на отворено, вклучително и во угостителски објекти со цел да се спречи деградација и селекција на вакцинирани и невакцинирани гости и да се овозможи на сите јавни објекти - угостителски објекти да бидат достапни подеднакво на сите граѓани, домашни и странски гости. -По синоќешниот врисок на македонските граѓани искажан преку паралелни протести низ цела Македонија на Владата не и останува ништо друго туку веднаш по кратка постапка да ја укине одлуката со која сакаше да се спроведе експериментален филтер на проверка дали и како системот на селекција на граѓаните може да функционира во време на пандемија на т.н. вакцинирани и невакцинирани предвиден да се одвива со редарски служби преку угостителите и угостителските објекти од 16-ти август. Синоќа бевме сведоци како нашата Влада за прв пат доби граѓански “шамар”. После години дремење и спиење во повеќе градови преку ноќ македонскиот граѓанин со некоја причина преку ноќ се разбуди од својот долг сон, се вели во соопштението на НУК. Последната одлука со која Владата од 16ти Август забранува на граѓани кои се “невакцинирани” и не поседуваат соодветен Сертификат односно парче хартија наречено “потврда за извршена имунизација – најмалку прва доза вакцина” да посетуваат угостителски објекти и секаков вид на настан на отворено резултираше со масовни протести и изрази на незадоволство, не само на угостителите туку и на граѓаните во повеќе градови паралелно низ Македонија. -Ја потсетуваме Владата денес согласно изјавата на министерот Бектеши наместо да разгледуваат било какви други можности, разводенувања и дополнувања кон одлуката и мерката со која СЕ ЗАБРАНУВА ВЛЕЗ НА НЕВАКЦИНИРАНИ ВО УГОСТИТЕЛСКИ ОБЈЕКТИ со која одлука и понатаму би била забранета посета и влез за одредени граѓани и гости и на било кој начин би се вршела било каква селекција и деградација на гости во угостителски објекти да го разгледа нашето доставено барање од 10-ти Август за укинување на спорната одлука и мерка и веднаш да го усвои истото со што оваа одлука и мерка ќе биде укината целосно и безусловно во кратка постапка. Ги потсетуваме Претседателот на Влада и Министрите за здравство и економија да не ја забораваат и потценуваат моќта и големината на угостителите и угостителската индустрија и да не забораваат дека од спорната нвредлива и неспроведлива одлука директно се засегнати безмалку 6.500 угостителски објекти со повеќе од 35.000 угостителски работници кои заедно со своите фамилии ја надминуваат бројката од 100.000 гласачи кои на претстојните локални избори ќе треба да го дадат својот глас и доверба од чиј глас оваа Влада моментално го ужива раководењето и бенефитот на своето работење и владеење, нагласуваат од НУК.

НУК бара Владата да ја укине одлуката со која се забранува влез на невакцинирани лица во угостителските објекти

Дарко Андоновски — Tue, 10 Aug 2021 13:18:05 +0000

Независната угостителска комора (НУК) бара од Владата веднаш да ја укине одлуката со која се забранува посета и влез на невакцинирани лица во угостителските објекти. Според НУК, одлуката е неприменлива и не може да биде испочитувана без да се нарушат повеќе човекови права и да се прекршат неколку закони, посебно Законот за заштита на личните податоци. Целта на Барањето, како што наведува Комората, е да се спречи деградација и селекција на вакцинирани и невакцинирани гости и да се овозможи сите угостителски објекти да бидат достапни еднакво за сите граѓани. -Донесената мерка е неприменлива и неспроведлива од страна на угостителите без соодветна законска регулатива и продолжени и пренесени овластувања кои во моментов ги нема. Ниту т.н. нови редари, ниту кој било инспектор, ниту угостителите и вработените во угостителските објекти имаат законска можност, овластување и право да вршат проверка на лицата за нивната состојба на вакцинација со приложување потврда за извршена имунизација, соопшти НУК. Во Барањето адресирано лично до премиерот Зоран Заев, НУК наведува дека медицинската состојба на граѓанинот и гостинот е сензитивна информација и согласно Законот за заштита на лични податоци со исклучок на службено лице и/или овластено лице – лекар, никој друг нема право да врши проверка или прибирање на оваа информација, ниту да врши селекција, односно дозвола за влез во јавен објект на граѓаните по основ на оваа состојба. -Во моментов се уште согласно постојната важечка законска регулатива вакцинацијата е изборно право на секој граѓанин и не е задолжителна и како такво истата не смее да биде услов за нормално движење, работење и слобода на уживање на човековите права ниту услов за влегување во јавен објект и користењето на услугите на јавниот објект како што се угостителските објекти. Со оваа одлука неприфатливо е угостителските објекти да се ставаат во улога на експериментален филтер за да се провери дали и како системот на селекција на граѓаните може да функционира на вакцинирани и невакцинирани. Поради сето ова, бараме и очекуваме од Вас, веднаш да се укине одлуката со која забранувате посета и влез на невакцинирани во угостителските објекти, посочува претседателот на Комората, Здравко Јосифовски. Ако Владата не ја укинете одлуката, Јосифовски, како што нагласува, ќе биде првиот сопственик што ќе го затвори угостителскиот објект. -Угостителите досега ги почитувале и спроведувале сите реални и неопходни препораки и протоколи за работа на угостителските објекти без разлика дали тие кореспондирале со тековните состојби, но оваа одлука не може да биде испочитувана и спроведена без да се нарушат повеќе човекови права и да се прекршат повеќе закони, посебно Законот за заштита на личлните податоци, потенцира претседателот на НУК во Барањето до Заев. На 97-та седница Владата донесе одлука со која од 16 август 2021 година се воведува задолжителна потврда за извршена имунизација, најмалку прва доза, со задолжителна редарска служба заради контрола на приложување доказ за вакцинација при во секаков вид објект на отворено, вклучително и во угостителски објекти, каде има повеќе од 30 присутни лица, за било каков настан (прослава, концерт, семинар, обука, работилница, конференција, културни или спортски настани) на отворено.

НУК: Со новите протоколи е направена неправда и кон музичката индустрија

Магдалена Андонова — Thu, 03 Jun 2021 06:53:57 +0000

Независната угостителска комора (НУК) смета дека новите протоколи за организирање на свадби се контрадикторни и нелогични и со нив се прави ограничување во вршењето на угостителската дејност односно им се дозволува работење само на определени угостителски објекти. – Јасно и јавно кажавме и повторно напоменуваме дека свадби/прослави и веселби имало и ќе има во сите угостителски објекти кои се регистрирани за вршење на угостителска дејност и кои работат согласно шифрите на дејност 56 – Дејности за подготовка на оброци и служење на храна регистрирани согласно Законот за угостителска дејност во Централниот регистар на РСМ. Во ниеден закон, уредба или правилник не постои ново создадениот термин – Ресторани за свадби со кои се ограничувало или се ограничува организирање на свадби/прослави и веселби исклучиво под определени услови во одредени угостителски објекти. Свадби/прослави и веселби меѓу кои спаѓаат и крштевки, родендени, веридби, матурски, дипломски, разни годишнини не се организирале ниту ќе се организираат само во овие т.н. Ресторани за свадби, туку се организирале и ќе се организираат во сите угостителски објекти, велат од НУК. Според НУК, со новите протоколи е направена неправда и кон музичката индустрија.

НУК: Новите препораки за организирање прослави ќе предизвикаат хаос

Ивона Петрова — Tue, 01 Jun 2021 08:07:10 +0000

Независната угостителска комора (НУК) смета дека новите протоколи од Комисијата за заразни болести поврзани со организирањето на прослави, веселби и свадби наместо позитивно да влијаат, ќе предизвикаат хаос во работењето на угостителските објекти. Оттаму реагираат што не се консултирани претставници од оваа фела при носењето на овие протоколи. – Доколку се точни медиумските најави за нови препораки, и се восхитуваме на умешноста на Комисијата за заразни болести кои од една страна со предлог-мерките дозволи организирање на свадби, прослави, веселби на отворен простор додека од друга страна постави нови правила и ограничувања за музичарите чие присуство со истата мерка е ограничено само при организирање на свадби, се вели во денешното соопштение. Бараат од Владата при усвојување на протоколите да го врати членот 13 со кој ќе со дозволи организирање на музички настани со настап на музички уметници во отворен и затворен дел од објектот во сите угостителски објекти согласно протоколите за работа, а постојната препорака за јачина на музиката со која се ограничува максималното ниво на бучава во угостителските објекти за исхрана на 55 децибели, да ја укине во целост. Се бара да се дозволи и на иста маса да седат повеќе од шест лица доколку се од иста фамилија.

НУК: За жал најголемиот дел од мерките за финансиска помош и поддршка на Владата за угостителите ќе завршат или завршиле за плаќање на камати

Магдалена Андонова — Tue, 25 May 2021 07:07:57 +0000

- Во време и услови на пандемија Ковид-19 банките без отстапки целосно ги пресметаа, наплатијa и репорограмираа каматите и трошоците за провизии и надоместоци од угостителите и угостителската индустрија. И покрај тоа што угостителите не работеа или работеа и работат со ограничувања на работното време по строги протоколи и со половина од своите капацитети ниту една банка не изврши самоиницијативно намалување на каматите или провизиите и трошоците од водење на сметки туку истите во целост и континуитет ги пресметува и наплатува во услови кога на угостителите секој денар им е броен и битен, се вели во соопштението на Независната угостителска комора. - Годишните приходи во угостителската индустрија до периодот пред пандемијата надминаа осумстотини милиони евра. Половина од овие приходи беа остварени како извоз односно приходи од странски гости и туристи. Безмалку сто милиони евра се комерцијални краткорочни и долгорочни кредити од македонските комерцијални банки вклучувајќи ги и кредитите од Развојната банка на РСМ кои ги користат угостителите и вработените во угостителската индустрија. И во периодот кога не работеа или работат под посебни ограничувања и протоколи во услови на пандемија најголемиот број на угостители истовремено корисници на повеќе економски сет мерки за финансиска помош и поддршка од Владата навреме и во целост ги подмириле своите обврски кон банките. За жал ниту една банка во изминатиот период во време на пандемија Ковид-19 не излегла во пресрет на угостителите и направила самоиницијативно намалување на камати, провизии, трошоци или останати надоместоци. Затоа пак банките не ги пропуштиле сите законски можности да прокнижат и наплатат повеќе од десет милиони евра на име камати, провизии, разни надоместоци за платен промет, провизии од наплата на картички и трошоци за водење на сметки и да ги зголемат енормно своите приходи и профити од угостителите и во услови на пандемија, велат угостителите. Тие посочуваат дека банките и покрај тоа што континуирно се декларираат како општествено одговорни друштва со ништо не допринесоле или направиле во изминатиот период да дадат свој допринос во помош или поддршка на загрозените сектори од угостителската индустрија и наместо активно да земат учество за поддршка во заедничко надминување на кризата со пандемијата Ковид-19, безмилосно наплатуваат и понатаму во целост сите законски приходи од камати, провизии и трошоци за водење на сметки. - Затоа јавно ги покануваме и повикуваме сите банки кои се сметаат за општествено одговорни друштва во наредниот период да најдат начини и донесат одлуки за да ИЗДВОЈАТ ДЕЛ ОД СВОИТЕ ПРОФИТИ КОИ ГИ ОСТВАРИЛЕ ОД УГОСТИТЕЛИТЕ И УТОСТИТЕЛСКАТА ИНДУСТРИЈА ВО УСЛОВИ НА ПАНДЕМИЈА за директна помош и поддршка на угостителите и/или кампањи на угостителската индустрија. Воедно очекуваме банките да организираат заедничка средба со претставници на угостителската индустрија со цел на формирање на фонд за финансиска поддршка во опоравување и ревитализација на угостителите наменет за помош и поддршка во организација на разни настани или за унапредување на работењето на угостителските објекти во интерес и зачувување на јавното здравје, појаснуваат од НУК.

НУК со барања: Да се укине работното време на угостителските објекти како и да има прослави, веселби, музички настапи…

Магдалена Андонова — Fri, 14 May 2021 07:31:28 +0000

Согласно најавата на прес конференцијата која ја имаше НУК во среда 12ти Мај 2021 година утринава на официјалните мејлови на Комисија за заразни болести и Министерството за здравство доставени се предлозите и барањата на НУК за промена, усогласување и унапредување на новите протоколи кои очекуваме да ги ртазгледаат новите експерти кои ќе работат на нивната изработка и Комисијата за заразни болести. - Со оглед на праксата која Комисија за заразни болести во континуитет ја спроведува самостојно да одлучува без можност угостителите да учествуваат на седниците кога се носат круцијални одлуки за нивната работа и егзистенција НУК повторно за најавениот денешен состанок на Комисијата за заразни болести како потсетување ги достави предлозите и барањата за кои очекува во најмала рака комисијата да биде доблесна и да ги прочита, а најавените експерти од Министерот за економија да ги земат во предвид при креирањето на новите протоколи, се вели во соопштението на НУК. Со последните барања и предлози угостителите очекуваат промени за: - Укинување на ограничување на работно време Укинувањето на одлука со која се забранува работа во внатрешните делови на угостителските објекти или во најмала рака да се дозволи работана внатрешните делови од угостителските објекти кои се здобиле со златен сертификат од националната кампања на НУК чисто и безбедно и кои во своите објекти располагаат со сертифицирани пречистувачи на воздухот кои во целост го елиминираат живиот SARS-COV-2 Вирус од возухот. - Укинување на точка 13 со која се забранува организирање на музички настани со настап на музички уметници во отворен и затворен дел од објектот(Пејачи/музички групи/Диџеи) и да се одобри организирање на музички настани со настап на естрадни музички уметници согласно последните важечки протоколи. - Укинување на точка 14 со која се ограничува максималното ниво на бучава во угостителските објекти за исхрана на 55 децибели бидејќи истата и во сегашни услови е неприменлива, нефункционална и непотребно создава конфикти во угостителството. - Барање да се дозволи одржување на настани, прослави, веселби во сите угостителски објекти согласно доставени предлог протоколи односно согласно протоколи што новите експерти по најавата на министерот за економија ќе ги подготват. - Да се промени и усогласи точка 6 - ресторани односно точка 14 - кафетерии наместо забраната не може да седат повеќе од 4 лица на маса да се дозволи да седат 6 и повеќе лица на соодветна маса или споени маси. - Во случај кога се работи за една цела фамилија со повеќе од 4 лица да се дозволи да можат како во фамилија да седат сите на една маса а не да ги навредуваме фамилијарните вредности и да ја навредуваме и делиме фамилијата која живее под еден исти кров на две или повеќе маси затоа што истата е поголема од 4 лица! - Да се дозволи работа на ноќни клубови, кабереа и затворени и летни дискотети согласно доставени предлог протоколи.

Јосифовски смета дека е неправедно финансиска помош да добијат само угостителските објекти кои служат храна и пијалоци

Магдалена Андонова — Wed, 12 May 2021 13:17:16 +0000

Претседателот на Независната угостителска комора Здравко Јосифовски смета дека е неправедно доколку финансиска поддршка добијат само угостителските објекти чија примарна дејност е служење храна и пијалоци. Во одговор на новинарско прашање, Јосифовски нагласи дека сите угостителски објекти, без разлика дали нивната примарна дејност е угостителството или не, биле затворени со владината одлука од 5 април. – Кога ја носеа одлуката од 5 април не беа затворени само угостителски објекти со приоритетни шифри. Беа затворени сите угостителски објекти. Како што знаете, било кој објект што работеше и вршеше угостителска дејност на лице место беше затворен казнет со поднесена кривична пријава. Сметам дека е голема неправда доколку Владата или било кој министер мисли дека со одлука ќе се додели финансиска помош само на едни, а другите ќе бидеме набљудувачи и ќе гледаме како тие пари ги насочуваат за друга употреба, а ни кажат дека сме ги искористиле максимално и ни дале се она што ни следува, изјави Јосифовски. Неговиот одговор следува по ставот на министерот за економија Крешник Бектеши изнесен на денешната прес-конференција дека финансиска поддршка ќе добијат угостителите согласно критериумите во јавниот повик. Бектеши на прес-конференцијата во Владата потврди дека во Министерството за економија се стигнати барањата на НУК да бидат опфатени сите угостители со финансиската помош и оти тие ќе бидат разгледани.

Угостителите револтирани од власта ,најавата за отворање на терасите не ги спречи и денеска да протестираат

Дарко Андоновски — Mon, 26 Apr 2021 13:38:43 +0000

Угостителите, туристичките агенции и сметководителите денеска протестираа пред Владата барајќи средба со економскиот тим на Владата. Очекуваат да бидат повикани на средба во Владата и при имплементацијата на шестиот пакет мерки да бидат земени предвид и нивните барања. Во следните денови ќе им остават простор на надлежните институции да постапат по нивните барања, а по празниците, ќе излезат со нов план на активности доколку не наидат на разбирање. – Без вистинска и континуирана поддршка, нема спас за овој сектор. Веруваме дека средствата кои се предвидени во шестиот пакет мерки можат да помогнат да се ублажат штетите со кои се соочува туристичко-угостителскиот сектор, доколку се имплементираат на соодветен начин. Имајќи предвид дека постапките и процедурите за нивна имплементација сеуште не се познати и објавени, бараме во имплементацијата да се земат предвид и нашите барања бидејќи тие произлегуваат од реалните потреби на најпогодените сектори, изјави денеска Мартин Ангеловски од Туристичко-угостителската комора. Барањата, како што истакна Ангеловски, веќе се доставени до Владата. Угостителите и туристичките агенции, кои минатата недела протестираа пред Министерството за финансии, бараат финансиска помош за регистрираните угостителски објекти на кои повеќе од една година им е забранета примарната дејност, како и финансиска неповратна помош за лиценцираните туристички агенции. Се бара и еднократна финансиска помош во вид на грант за сите регистрирани угостителски објекти поделени во три категории според бројот на вработени, како и утврдување на мораторум или репрограмирање со грејс период на кредитите од комерцијалните банки или од Развојната банка се додека траат рестриктивните мерки. Туристичките агенции бараат и ваучерите од проектот „Дома си е дома“ да одат преку нив и да биде преименувана одлуката на Владата за нереализираните ваучери за патување, односно наместо до 31 декември годинава, рокот да биде продолжен до 31 декември 2022 година. Сметководителите, кои се приклучија на протестот, бараат директна неповратна финансиска помош, транспарентно донесување закон за сметководствени работи, пролонгирање на роковите за годишните сметки и даночните пријави, како и задолжителна консултација со експерти од дејноста за секоја дополнителна обврска со рок.

НУК со Иницијатива до Народната банка: Очекуваме делумно отпишување на обврските со кои угостителите ќе ја вратат својата финансиска кондиција

Магдалена Андонова — Mon, 26 Apr 2021 08:10:02 +0000

Независната угостителска комора (НУК) достави Иницијатива до Народната банка за промена на законските акти и прописи со што ќе им се дозволи на комерцијалните банки да извршат делумно отпишување на обврските за угостителската индустрија, намалување на каматите на кредитите и репрограмирање на сите доспеани обврски (кредити, рати и камати) заклучно со 30 април 2021 година, заедно со обврските кои ќе настанат во периодот до 30 април 2022 година. Според НУК, банките во моментов поради постојната законска регулатива не се во можност самостојно да излезат во пресрет на потребите на угостителската индустрија и да направат дополнителни одлагања на обврските односно репрограмирање на доспеаните долгови по основ на користени кредити. -Очекуваме во најбрз рок да предложите и изработите системски решенија и правни акти со кои ќе им дозволите и ќе им препорачате на сите банки да извршат делумно отпишување на обврските, намалување на каматите на кредитите за угостителската индустрија и репрограмирање на сите доспеани обврски (кредити, рати и камати) заклучно со 30 април 2021 година заедно со обврските кои ќе настанат во периодот до 30 април 2022 година за една година со што ќе се овозможи на угостителите кои тонат во обврски да можат да се реструктуираат и да ја вратат својата финансиска кондиција како би се створиле услови да ги подмируваат редовно обврските кон добавувачите, вработените и банките, се наведува во Иницијативата испратена електронски до гувернерката Ангеловска-Бежовска. НУК очекува Ангеловска-Бежовска да ги покани на работна средба на која детално би биле образложени потребите на угостителската индустрија. -Веќе подолго од година дена соочени со пандемијата Ковид-19 угостителите, угостителските работници и целокупната угостителска индустрија трпи енормни загуби и штети. Поради забраните и ограничувањата на работното време, како и посебните препораки и протоколи за работа поголемиот дел на угостители не се во можност да остварат доволно приходи со кои можат навремено и целосно да ги подмират своите обврски вклучувајќи ги и инвестициските обврски за кои угостителите се корисници на краткорочни и долгорочни кредити во повеќе македонски банки во износ на скоро 100 милиони евра. Покрај угостителите и угостителските работници имаат преполовени или се останати целосно без своите редовни приходи, пишува претседателот на НУК, Здравко Јосифовски. Јосифовски додава дека во изминатиот период дел од банките излегоа со парцијални решенија за репрограмирање на обврските на угостителите и угостителските работници. -За жал, никој од нас не очекуваше дека КОВИД-пандемијата ќе трае толку долго за што понудените периоди на одлагање на доспеаните обврски и нивното репрограмирање истекоа. Голем дел од нас се во ситуација од ликвидни и солидни да станат неликвидни фирми, со зголемени обврски по разни основи, вклучувајќи ги и обврските по основа на користени краткорочни и долгорочни кредити, наведува Јосифовски. (МИА)