никола ѓурѓај – Kurir.mk

Проблемите на македонско национално малцинство во Албанија тема на средбата Николоски-Ѓурѓај

Ивона Петрова — Sat, 21 Jan 2023 11:55:46 +0000

Претседателот на Македонско друштво “Илинден”-Тирана, Никола Ѓурѓај, вчера оствари средба со Претседателот на Националниот совет за евроинтеграции и потпретседател на ВМРО-ДПМНЕ, Александар Николоски, објави електронското издание на весникот “Илинден”. Се додава дека Ѓурѓај го информирал Николоски за најновите настани поврзани со актуелната положба на Македонците во Република Албанија, при што биле актуелизирани прашања кои се однесуваат на проблемите на македонско национално малцинство во Република Албанија и за одредени иницијативи кои што може да се покренат во Собранието. – Пред се разговаравме околу целосна функционалност на граничниот премин Требиште – Џепиште во областа Голо Брдо кој што е потребен за да можат полесно да комуницираат луѓето од двете страни на границата. Потребно е македонската влада да даде поголема поддршка на активностите кои ги имаат Македонците во Република Албанија преку програмите кои ги има МНР пред се за Македонците кои живеат во соседните држави, изјавил Ѓурѓај. Николоски, велат од здужението, покажал исклучителен интерес за положбата на Македонците во Република Албанија. -Секако, во опсегот на надлежностите, искажа подготвеност да помогне за подобрување и унапредување на малцинските права на Македонците во Република Албанија. Од своја страна Ѓурѓај топло му се заблагодарува за срдечна средба, наведува весникот “Илинден”.

Градоначалникот Ѓорѓиевски на средба со Македонци од Албанија

Ивана Ефремовски — Wed, 18 Jan 2023 14:19:28 +0000

Градоначалникот на општина Кисела Вода, Орце Ѓорѓиевски денес отвари средба со Претседателот на македонско друштво “Илинден” од Тирана, Никола Ѓурѓај. На состанокот се отворија повеќе теми, пред се за делувањето на ова здружение коe повеќе од една декада работи на унапредување на правата и можностите на Македонците во Албанија, но и за перспективите за заедничка соработка со Општина Кисела Вода. Беа договорени повеќе активности за промоција на културните вредности, можности за едукација и работни посети. Градоначалникот Ѓорѓиевски ја истакна својата подготвеност да помогне во подобрувањето на малцинските права на Македонците во Република Албанија и истакна дека силно верува дека соработката со македонско друштво “Илинден” од Тирана е успешен чекор кон оваа голема цел.

Честитка од МД „Илинден“-Тирана до ВМРО-ДПМНЕ за изборниот успех на локалните избори

Ивана Ефремовски — Mon, 01 Nov 2021 14:41:46 +0000

Претседателот на македонското друштво „Илинден“- Тирана Никола Ѓурѓај упати честитка до претседателот на ВМРО-ДПМНЕ Христијан Мицкоски за, како што вели, изборниот успех на локалните избори. -Дозволете ми во мое лично име и во име на македонското друштво „Илинден“-Тирана и во името на Македонците во Албанија, да Ви ја честитаме големата победа на ВМРО-ДПМНЕ на Локалните избори 2021 година. Татковината Македонија уште еднаш ја покажа својата зрелост со одржувањето на мирни и демократски избори. Македонските граѓани одбраа кој ќе ги води македонските општини во наредните четири години, стои во честитката. Македонското друштво „Илинден“-Тирана и синоќа во објава на Фејсбук се заблагодари на Македонците од Албанија, кои поседуваат македонски пасош и кои вчера го оствариле ова право. -Историска победа, почитувани, браќа и сестри, Македонци од Република Албанија голема благодарност до сите што гласавте на локалните избори во татковината Македонија. Со среќа и успешна работа до сите кандидати на ВМРО-ДПМНЕ. Голема победа за сите за една нова и поубава иднина за татковината Македонија, пишува во објавата. И пред изборите МД „Илинден“ ги повика Македонците од Република Албанија што поседуваат македонско државјанство да дојдат и да го дадат својот глас за кандидатите на ВМРО- ДПМНЕ. (МИА)

Ѓурѓај ги повика Македонците од Албанија да гласаат за кандидатите на ВМРО-ДПМНЕ

Дарко Андоновски — Thu, 28 Oct 2021 15:41:47 +0000

Претседателот на Македонското друштво „Илинден“ – Тирана, Никола Ѓурѓај, пред неделниот втор круг од локалните избори во Македонија, ги повика Македонците од Албанија да ги поддржат кандидатите на ВМРО-ДПМНЕ. -Почитувани, браќа и сестри, Македонци од Република Албанија со право на глас во татковината Македонија, на 31-ви октомври ве повикувам масовно да излезете и да ги поддржите кандидатите на ВМРО-ДПМНЕ. Барам од Вас масовно да ја дадеме поддршката на кандидатите на ВМРО-ДПМНЕ за една нова и поубава иднина за татковината Македонија. Со почит, Никола Ѓурѓај, стои во повикот. Тој потсетува дека во знак на поддршка деновиве остварил средба со доктор Кирил Пецаков, кандидат за градоначалник на Охрид, на која го информирал за положбата на Македонците во Република Албанија и проблемите со кои се соочуваат, како и за активностите на друштвото. -Пецаков, како иден градоначалник на Охрид, искажа подготвеност за продлабочување на соработката, зголемување на помошта и поддршка за друштвото, за весникот „Илнден“ и за Македонците во Албанија, во рамки на можностите, се наведува во објавата. Според него, тој исто така ветил дека посебно внимание и грижа ќе посвети за македонските ученици и студенти од Албанија, а кои средно и високо образование следат во училишта и високо образовни установи во Охрид.