никола груевски – Kurir.mk

Потпретседателот на СДСМ, Битиќи: Потребно е помирување со Груевски и да се обезбеди бројка на пратеници

Ивона Петрова — Tue, 10 Oct 2023 05:50:34 +0000

Потпретседателот на СДСМ Фатмир Битиќи говори за помирување и ублажување на казни и вели дека уставните измени нема да се гласаат додека не се обезбедат бројките. На ова Битиќи се осврна во вчерашното гостување во емисијата Клик плус што се емитува на телевизија 21. На прашањето може ли тоа да биде еден од начините власта да се пазари со гласови во замена за враќање на Никола Груевски, Битиќи вели дека е подготвен за доброто на државата да се согласи со условите што му се поставени. Битиќи вели дека е „првиот што седнува и зборува за помирување“. Истакна дека е за помирување со Груевски. -Ако резултатот од тоа помирување може да донесе појасна иднина за државата и идните генерации кои треба да живеат овде тогаш треба да се зборува за тоа, вели Битиќи кој на прашањето пак дали тука мисли и на враќањето на Груевски Битиќи додава: „Да, да. Помирувањето може донекаде да ја ублажи казната“.

Трајковски до Груевски: Дали можеш да негираш дека од мене бараше да зборувам со претставници на власта за измени на Кривичен законик?

Ивана Ефремовски — Mon, 25 Sep 2023 20:39:11 +0000

Го гледам вклучувањето на мојот пријател, поранешниот претседател на ВМРО-ДПМНЕ, Никола Груевски во Инфомакс. Многу жалам што она што го напишав во отвореното писмо пред некој ден ми се потврди, дури сега сум повеќе загрижен и од тогаш, пишува Александар Трајковски од ВМРО-ДПМНЕ. Неговото обраќање го пренесуваме во продолжение: Почитуван Никола, Дали тоа што го кажуваш во емисијата можеш да ми го кажеш и на мене, гледајќи ме во очи? Дали Никола можеш да негираш дека од мене бараше да направам средби со преставници од власта на кој ќе зборуваме за измени на кривичниот законик? Жално Никола, жално. Ти верував толку години, сопствената слобода многупати ја ризикував верувајќи дека помагам на човек кој се мачи за Македонија, ама од ден за ден моето разочарување е се поголемо. Што ли уште ќе слушнам од тебе Никола? Што ли уште ќе ме изненади? Очигледно длабоко си влезен во играта и не можеш да излезеш. До кое дереџе падна пријателе мој. Од голем водач на македонскиот народ, стана инструмент во рацете на власта..

Мицкоски: Чудно е проклетството Груевски кој збореше за нож во грб, и разни ножиња да стане токму тоа за сопствената партија

Ристе Здравков — Sun, 24 Sep 2023 14:01:29 +0000

Морам да кажам дека како човек оваа јавна преписка со поранешниот претседател на ВМРО-ДПМНЕ не ме прави среќен, ниту ова е битка која ја одбрав јас, но недвојбено никој не треба да ја тестира мојата определба да се опстои на нашите ставови дека прифаќање на диктати не доаѓаат во предвид по ниту една цена. Ниту пак дека тоа може да помине низ мала врата или било каква комбинација. Морам да кажам дека сум длабоко разочаран од неговото однесување. Долго време јавно одбегнував да се произнесам за тоа, и за многу, многу други работи кои ми се случуваа мене и на моите најблиски соработници во битката ВМРО-ДПМНЕ да ја ставиме на здрави нозе и она што е денес силна структура на прагот на најголемата победа. Се до извесен период, иако немав и немам никакви контакти, мислев дека делиме иста цел. Патот до оваа цел ВМРО-ДПМНЕ силно и обединето беше трновит, со многу удари, и мене како човек ми е предизвик да се борам против оваа власт и да бидам рамо до рамо со мојот народ во битката да ги смениме, но морам да кажам дека воопшто не ми беше лесно, ниту сеедно да ги примам ударите внатре, од луѓето со кои сум мислел дека делиме иста кауза, рече лидерот на ВМРО-ДПМНЕ, Христијан Мицкоски говорејќи за поранешниот претседател на партијата. Не можам никако да разберам, додаде Мицкоски, „како воопшто е возможно да се уортачи било кој со истите кои ја предизвикаа и се причина за сите неволји, па дури и неговите лични, прогони и предавства кои се случија на Македонија, да дели УСБ-а и писма по кабинетите на ДУИ, да има непринципиелни разговори“. „За многу работи од внатрешните работи со поранешниот претседател нема да говорам и ќе оставам историјата да суди, за многу работи ќе се послужам со онаа народната „ти кон мене со клетви, јас со благослови“, но немојте никогаш и никој да ја тестира нашата одлучност да ги браниме нашите ставови, ниту пак намерата да не отстапиме во работите кои веруваме или пак било како да го разочарам народот“, рече Мицкоски. Според него чудно е проклетството на историјата. „Чудно е тоа проклетство на историјата, човекот кој збореше за нож во грб, и разни ножиња да стане токму тоа за сопствената партија. Мене не ми беше цел да влезам во конфликт и јавна преписка со него, но овој валкан план мораше да го знае јавноста. И ова е вистински последниот пат кога се осврнувам на оваа тема и нема повеќе да говорам за ова зошто имаме работа, а тоа е пад на оваа криминална Влада. Јас му посакувам добро здравје, добра среќа и да не го прави на другите тоа што нему не сака да му го прават. Имаме работа, нашиот противник е оваа криминална Влада на чело со СДСМ и ДУИ“, заклучи Мицкоски.

Трајковски со отворено писмо до Груевски: Последните неколку месеци, јас неможам во тебе да го препознаам мојот претседател и пријател

Тале Кристо — Fri, 22 Sep 2023 14:15:57 +0000

Почитуван пријателе, Поранешен претседателе на ВМРО-ДПМНЕ, Во ВМРО-ДПМНЕ сум од мали нозе. Човековата меморија дозволува сеќавања од детството па јас во ова отворено писмо ќе го споделам со тебе сеќавањето од 2005 година, кога лидерот на македонската здружена опозиција Никола Груевски беше во посета на населеното место во кое живеам и јас на моите 13 години ја имав првата фотографија со тогашниот опозиционер, а потоа и една деценија водач на македонскиот народ. Како минуваа годините така се зголемуваше и мојата активност во партијата со учество на сите активности, повторувам на сите активности вклучувајќи помалку позитивни настани, а повеќе негативни (бидејќи имаше во партијата коњи за трка и коњи за парада). Дојде 2015 година, како многу други луѓе од партијата така и мене ме опфати политичкиот прогон кој го спроведуваше СДСМ преку СЈО и Катица Јанева. Тоа подразбира обвинение, а потоа и осуден, опфатен во истраги и слично.. Тоа беше многу тешко и темно време и за ВМРО и за Македонија. Многумина луѓе кои ги направи милионери им даде можност 10тина години да бидат на моќни позиции, да одлучуваат за човечки судбини те оставија, трчаа да се пријавуваат за сведоци во СЈО, даваа “книжни плика” на една тогашна министерка во Владата на една планина во Скопје за да бидат “испуштени” од истрагите на СЈО, односно бегаа од тебе како “ѓавол од темјан”. Дојде 2017 година се случи 27 Април како емотивна реакција на македонскиот народ за да се брани нашата Македонија, а потоа дојде и политичкиот прогон на недолжни граѓани кој ги обвинија и осудија за тероризам. Дојде 2018 година власта на СДСМ се повеќе се иживуваше со луѓе, пресудата против тебе беше правосилна и требаше да се јавиш на издржување на казната затвор. Те побарав да се видиме и ти кажав: “иако обвинет со актуелно судење од СЈО, одлучив да организирам протест пред судот со цел да побарам да ти се даде одложување на казната затвор, што е дозволено согласно Законот”. И тоа се случи. Без воопшто да се плашам од последиците кои може да ми ги направи власта на СДСМ застанав заедно со стотици други луѓе пред судот и се обратив да побарам правда за тебе. Дојде и веста дека си заминал од Македонија и тогаш кога многумина напаѓаа, плукаа и осудуваа, јас застанав, дадов поддршка на заминувањето и бев првиот кој дојде во Будимпешта за да ти ја даде својата поддршка. Не можам, а да не го споменам во ова писмо и делот со промената на уставот со цел промена на името на Македонија, кога луѓе вршеа притисоци врз тогашни пратеници да гласаат за промена на Уставот и те побарав да ти кажам дека се врши притисок врз наши пратеници но од наши луѓе. Почитуван Никола, Последните неколку месеци, јас неможам во тебе да го препознаам мојот претседател и пријател Никола Груевски. После се што се случи во 2015 година ти сега повторно им поклонуваш верба на луѓето кои не доведоа до таа состојба до без надеж и истите тие денес советуваат дека “треба да направиш партија, да го делиш ВМРО, да му покажеш на ВМРО”, а следејќи го ова што се случува последите денови очигледно е дека навистина има некое сценарио. Мојата поддршка ја имаше во најтешките денови за тебе и во сите битки бев со и до тебе. Кога оние кои денес те советуваат, телефон не ти отвараа, а не пак средба со тебе да имаат. Но сега морам искрено да ти кажам дека во оваа битка мојата поддршка ја немаш. ВМРО-ДПМНЕ денес е на вистинскиот пат. Тоа може да се утврди од секојдневните анкети, резултатите од локалните избори и многу други показатели. Македонскиот народ ја гледа својата иднина во промените во Македонија, давајќи поддршка на раководството на партијата предводено од претседателот Христијан Мицкоски. И токму сега кога сме на чекор до последната скала на неколку месеци до изборите кога СДСМ ќе падне најниско од своето постоење, нашите пријатели (со кои сум имал средби), говорат како Никола преку делењето на ВМРО-ДПМНЕ ќе им помогне да останат на власт и повторно да го сменат Уставот. Почитуван Никола, Се одлучив на ваков чекор да се обратам преку отворено писмо бидејќи изминатите денови многу луѓе, членови кои со срце и душа години поминале во ВМРО-ДПМНЕ со сериозна загриженост велат дека ова што се случува не е добро. Ќе те потсетам на еден наш разговор кога една група на членови на партијата формираше фракција и бараше од мене да се приклучам во фракцијата со цел да бараме промена на раководството на партијата. Откако не се приклучив те барав, разговаравме на оваа тема и ти ми рече: “Александар историјата докажала дека секој што излегол од ВМРО и наштетил на партијата, години подоцна се враќа назад, а ти многу голем влог имаш дадено во партијата за да излезеш од јатото, бидејќи онаа птица која излегува од јатото, прва паѓа”. Овој пријателски совет јас го послушав и стана моја животна лекција дека од јатото никогаш не се излегува. Многу ме загрижува фактот и ме мачи прашањето што е она што тебе те отргна од оваа мисла? Сосема на крајот сакам да го искажам моето верување дека играта е на почеток и од истата сеуште може да се излезе. ВМРО-ДПМНЕ денес е силно, обединето и во сојуз со македонскиот народ и се чека денот на избори кога повторно по примерот на локалните избори Македонија ќе победи! Од срце те поздравувам и ти посакувам се најдобро. Знаеш и самиот дека секој збор во ова писмо е напишано од срце и со емоција, исто онака како што со емоции го следев твојот говор на конгресот во Валандово. Се е менливо и минливо, само ВМРО и Македонија се вечни! Отворено писмо на Александар Трајковски до Никола Груевски

Мицкоски до Груевски: Не би сакал никогаш да им правам на луѓето тоа што не сакам луѓето мене да ми прават

Катерина Бојаџиева — Wed, 20 Sep 2023 18:22:20 +0000

Денеска претседателот на ВМРО-ДПМНЕ, Христијан Мицкоски беше во Ѓорче Петров на отворање на нова општинска зграда. Таму тој беше запрашан од медиумите за коментар во однос со последната ФБ објава на Никола Груевски. Мицкоски само порача дека никогаш не сака да прави на луѓето нешто, што не сака нему луѓето да му прават. „Нека е жив и здрав, мојата порака до Никола Груевски е не би сакал никогаш да им правам на луѓето тоа што не сакам луѓето мене да ми прават“, рече Мицкоски.

Милошоски: Ковачевски и Ахмети преговараа амнестија со Груевски, со цел поделби во ВМРО-ДПМНЕ и уставни измени

Ивана Ефремовски — Wed, 20 Sep 2023 10:46:31 +0000

Власта на чело со Ковачевски и Ахмети преговара амнестија за Груевски со цел тој да влијае на поделби во ВМРО-ДПМНЕ и евентуално да им помогне да се изгласаат уставните измени. Измените во кривичниот законик, не се случајни, имаат двојна цел, првата е да се амнестираат функционери од актуелната власт, кои во изминативе години за жал ја ограбуваа државата, и второ да се влијае на процесите кои се однесуваат на Груевски, истакна Антонијо Милошоски, член на ИК на ВМРО-ДПМНЕ и пратеник. -Измените во Кривичниот законик ги договарале СДСМ, ДУИ и лица од помали политички партии кои сакаат поделби во опозицијата. Оваа констатација, намерно или случајно, јавно ја кажа и Али Ахмети во едно интервју. Во изјавата Ахмети беше потенцирано дека ВМРО-ДПМНЕ на чело со Мицкоски, ниту преговарало за измените во кривичниот законик, ниту се согласило дека е против измените во кривичниот законик и исто така е против менувањето на уставот под бугарски диктат. Сакајќи или несакајќи со ова најистакнатиот експонент на власта направи јасна разлика помеѓу оние кои тргуваат со амнестија за да стигнат до уставни измени и своја правна заштита и ВМРО-ДПМНЕ кој ја слушаат волјата на народот и се против уставни измени и трговија со правосудниот систем за политички материјални цели, рече тој. Милошоски посочи дека со оваа акција на СДСМ и ДУИ целта им е да се амнестиираат двајца поранешни премиери, а од друга страна менуваат правосудни закони кои би создале лична корист и заштита на актуелните функционери на СДСМ и ДУИ. „Споменатите преговарачи на амнестијата нема да застанат тука. Во моментов разговараат за нов закон за амнестија со кој би се спасиле од затвор лица блиски до власта, но имаат несогласувања кои дела да ги опфаќа тој закон за замнетсија во минситерството за правда и владата има различни позиции. Агендата на СДСМ и ДУИ во периодот кој следи е со две примарни политички цели. Едната цел е да се спасат функционерите и да има амнестии за тие кои краделе и ја залоупотребиле функцијата, а втората е да го искористат Груевски за фрагментација во ВМРО-ДПМНЕ и со тоа да си олеснат евентуално олеснување на уставните измени. Ние им порачуваме и на СДСМ и на ДУИ и на нивните клиенти да не го потценуваат ВМРО-ДПМНЕ, да не го потценуваат народот. Партијата е обиденета, пратеничката група е сплотена и ВМРО-ДПМНЕ под ниеден услов нема да гласа за уставни измени под бугарски диктат, а овие политички пазарења со амнестии во Кривичниот законик нема да ги спасат од одговорност актуелните функционери доколку сметале дека ова им е некаков политички аванс“ - порача тој.

Јаревски за Груевски: Обидите за поделба на ВМРО-ДПМНЕ се залудни, ВМРО-ДПМНЕ е цврство и непоколебливо

Ристе Здравков — Wed, 20 Sep 2023 08:52:56 +0000

„Имаме ситуација каде ВМРО-ДПМНЕ 6 години е под континуиран атак, не само од надвор, не само од власта, него и од сегменти на платена опозиција и патриоти на батерии кои се многу силни зад тастатура, серија на мали партии, како да ние сме проблемот на сите прашања“, истакна пратеникот од редовите на ВМРО-ДПМНЕ, Тони Јаревски, во гостување на Радио Лидер. Тој кажа дека се говори за ситуација во која ВМРО-ДПМНЕ е јасна и концизна и секогаш е на страна на граѓаните. Јаревски додаде дека ВМРО-ДПМНЕ има цврста поддршка од граѓаните да опстои на патот и позициите по кои оди и кои ги застапува. Тој рече дека раководство и претседателот на ВМРО-ДПМНЕ излегле пред граѓаните и јасно кажале дека можат да веруваат на ВМРО-ДПМНЕ и сите чекори досега што беа направени се во насока дека нивната доверба ќе биде оправдана. „Имаме фактичка ситуација каде ВМРО-ДПМНЕ има најмалку двојно предност на сите релевантни анкети кои сега се во оптек и се разбира дека во таква ситуација нашите политички ривали или непријатели ќе ги искористат и ќе посегнат по сите средства и инструменти со цел таа фактичка состојба да ја променат и да стигнат до нивните лукративни цели. Во тој процес да се обидат да имаат намера или да направат дејанија со кои ќе се обидат да му наштетат на ВМРО-ДПМНЕ или во крајна цел да успеат да го поделат. Тие обиди ќе им бидат залудни, ВМРО-ДПМНЕ е цврство и нашата пратеничка група е непоколеблива, ќе опстоиме на ставот и нема да се случи нешто на што ние сме се обврзале дека ќе го направиме“, вели Јаревски.

Се огласи Груевски по денешните претреси: Не постои никаков скриен имот, стан или земјиште

Катерина Бојаџиева — Tue, 23 Mar 2021 19:14:54 +0000

Во врска со денешните натписи во медиумите за претрес во моето живеалиште во Скопје и пронајдени наводни нови станови сакам да информирам што всушност реално се случува, напиша поранешниот премиер на Македонија Никола Груевски на Фејсбук. Во продолжение интегрален текс од ФБ статусот на Груевски. -Денес, репресивните органи на власта, речиси две и пол години по моето заминување од Македонија и добивање азил во Унгарија, во 06 часот изутрина упаднаа во станот каде живеат моите две деца и сопругата со цел да извршат претрес. Немале потреба да прават такви вознемирувања на моето семејство и особено на децата, бидејќи што и да побарале ќе им било дадено. Освен ако тоа вознемирување не било една од целите. Како што на јавноста одамна и е познато јас низ годините наназад користев два стана во сопственост на мојата мајка купени на кредит пред дваесетина години. Покрај тоа, во одреден период имав извршено и закуп на два други стана на истиот кат каде живеев а од кои имав потреба, и кои се со помала квадратура, за што поседувам договор за закуп од сопственик со кој немам никаква поврзаност. Непостои ништо друго надвор од тоа. Не постои никаков скриен имот, стан или земјиште. Ниту сум купил, ниту платил, ниту продал било какво земјиште, стан или друг движен и недвижен имот, што впрочем може да се провери и во катастерот. Надвор од ова, мојата мајка не поседува никаков стан во Арродром. Поседува стан во Капиштец купен на кредит во 1984 година. Непостои некаков мој стан на име на моја секретарка како што денес напишаа дел од медиумите. Напамет не ми паднало да земам пари од партијата или чланарини од членството за да купувам имот. Впрочем ако целта ми била да живеам во голема удобност имав можност како премиер заедно со семејството да се преселам и десетина години да живеам во многу поголема, побезбедна и поудобна државна вила, што не го направив. Подолг период власта врши притисок, уцени и закани врз лица да ги натераат да бидат лажни сведоци дека нешто што е нивно или нечие, било мое. Употребуваат најбрутални методи од најниски лични уцени и тешки закани по нивната слобода, семејство и имот, па до одредување притвори и други нечовечки методи. Целта им е да ме обвинат за некаков скриен имот а со тоа и за перење пари, за “да докажат” некакви перење пари кое непостои. Освен што е потребно да докажат дека нешто наводно поседувам а кое не е пријавено, за да ме обвинат со квалификација “перење пари”, согласно Законот, потребно е да докажат и од каде се парите за истото да се купи. Оттука немајќи што друго да кажат или смислат, одат на тоа дека сум користел партиски пари, што е безочна лага и невистина. Тоа го прават затоа што не знаат што друго да смислат за да ја затворат лажната конструкцијата за која имаат исклучително политички мотиви и која е дел од политичкиот прогон против мене и обид за мое оцрнување и преставување во очите на јавноста тоа што не сум. И веројатно тука нема да запрат. Покрај ова, во услови на секојдневни криминални афери на власта, неработење, национални предавства и неуспеси, тотално потфрлање со справувањео со пандемијата и (не)набавката на вакцини, пописот кој го започнаа со закон од кој е јасно дека се остава простор за големи манипулации, прогонот го користат и како алатка за дефокусирање на јавноста од реалните проблеми и неуспеси на власта.

Hикoлa и Бopкицa Гpyeвcки екcклyзивнo зa „Инфoмaкc”: Heкои пoлитичapи се yштe ни се плaшaт oд ceнкaтa

Катерина Бојаџиева — Wed, 20 Jan 2021 17:02:41 +0000

Одгласите по последната аудио снимка од разговор за време на ручек во струмички хотелски ресторан помеѓу Зоран Заев и Александар Верушевски, се уште не стивнуваат, пренесува „Инфомакс“. Од овој кафански разговор, произлегоа многу шпекулации, озборувања и дискусии. Инфомакс ја пронајде снимката на Jутјуб која уште во 2016 година, после разговорот на Заев со Верушевски излезе во медиумите и сега ја реобјавија. Од снимката во првиот дел се гледа локална етно музичка група која има свој перфоманс пред поголема група гости во хотел на море, вообичаена работа која ја организираат повеќето хотели кои привлекуваат гости на годишен одмор и на истата се слушаат гласовите на екс-премиерот и неговата сопруга Боркица со шеговити коментари на самиот Груевски. Во вториот дел има снимка од плажа каде што може да се види и самиот Груевски и се слуша гласот на неговата сопруга која го снима видеото. Се слуша како тој го прашува обезбедувањето за нешто дали има некој проблем а потоа и се обраќа на сопругата и и вели “ајде Бока одиме”(како што ја ословуваат пријателите). Од разговорите на Заев и А. Верушевски се слуша и дека Сашо Мијалков бил во комуникација со нив и договарал излегување на Зоран Верушевски од притвор, но главниот разговор е барање на А.Верушевски до Заев да престане користењето на “бомбите” и да дојде до помирување, па кому народот ќе му даде поголема доверба да ја води државата. Инфомакс се потруди телефонски да го исконтактира Груевски и по повеќе неуспешни обиди стапиле во контакт со него. Кажал дека е во движење и не бил расположен за подолг разговор, но сепак успеале да добијат одговор на неколку прашања. -На нашите прашања ни одговори дека никогаш во животот не се сретнал и запознал со Александар Верушевски ниту со неговиот татко Зоран. Дека не знае за она што се говори во снимката, а упатува на тоа дека Сашо Мијалков уште од 2011 година бил во комуникација со Александар Верушевски и додаде дека не знае дали тоа е точно, а истиот одговор го даде и на прашањето дали знае за наводната активност на Мијалков во ослободување од притвор на Зоран Верушевски. Груевски за изјавата дека бил “мртов Германец”, шеговито прокоментира дека според кажаното произлегува дека СДСМ во декември 2016 година ги загубиле изборите од партија предводена од “мртов Германец”. Го прашавме и за делот на разговорот каде се говори дека Заев имал снимки од кои се гледало за луѓе од неговиот тим, а делумно и за него дека биле хомосексуалци или бисекцуалци, дека се дрогирале и дека биле педофили слични квалификации. Груевски одговори дека не знае нешто такво за неговите тогашни соработници и не верува во тоа, а што се однесува за него лично кажа дека ништо од тоа не е вистина и дека такво нешто не постои, а доколку било кој тврди дека поседува таква снимка слободно може да ја објави веднаш. Додаде и дека во минатото се обидувале да го дискредитираат на личен план со пуштање разни вакви и слични гласини меѓу народот вклучувајќи и тоа дека ја тепал неговата сопруга, а повремено и со обиди да му креираат афери со жени со кои го фотографирале на улица или на некој настан. Очигледно колку повеќе имате подршка од народот толку повеќе треба да очекувате удари под појасот кога сте во висока политика ни рече тој, додавајќи дека иако подолго време е излезен од политиката и е речиси целосно политички не активен, некои политичари во Македонија се уште се плашат од него и на дневна основа тие и ним блиските медиуми се занимаваат со смислување лаги и афери за него, тргнувајки од разни лажни и монтирани обвиненија на обвинителството во судот до ваков вид муабети на кои заедничка цел е негова дискредитација во очите на граѓаните. Ни кажа и дека веќе му е здосадено постојано да демантира, дека секој ден некој го обвинува со некаква лага и дека веќе не ги ни демантира или мошне ретко го прави тоа, сметајки на тоа дека граѓаните низ неговата работа и делување имале доволно време да го запознаат и да изградат мислење за него и неговите активности и резултати во политиката и како премиер и претходно како министер и член на парламентот. На крајот само слушнавме дека се поздравува со некои луѓе говорејќи англиски но и неколку збора на унгарски по што не замоли да го завршиме разговорот бидејќи веќе влегол на состанок, пренесува порталот. Од Инфомакс се обратиле на неговата сопруга Боркица Груевска од која побарале краток коментар за ова што се зборува за Никола Груевски во снимките. -Ја прашавме дали тоа е точно и дали се точни и гласините од минатото дека ја тепал и слично. Таа кратко ни одговори дека ништо од тоа не е точно, дека се е лага и црна кампања против Никола и дека е згрозена од она што и сега и порано го слушала во црната кампања против нејзиниот сопруг, а особено во приватниот дел. Кажа дека политиката и политичката борба во Македонија ги надмина сите можни граници. “Никола не е таков човек, ни рече таа. Ништо од ова не е точно, се е лага”, ни рече таа. Ова е прва изјава на Боркица Груевска одкако јавноста прв пат ја виде со него во јавноста во 2006 тата година на музички концерт, пишува Инфомакс. Таа во целост ги демантираше наводите на Александар Верушевски и Зоран Заев за тоа што се случувало на фамозниот одмор на Сејшелите во 2012 година. – Особено сум непријатно изненадена од новинари интелектуалци кои што наместо да ја истражат целата ситуација тие бесрамно се насладуваат и дополнително без никакви докази се надоврзуваат на истата таа приказна. Инаку снимката која излезе во јавност ја потврдувам веродостојноста бидејќи јас и Никола бевме заедно таму во придружба на службено обезбедување кое тој дотогаш го имаше. Така што сите оние кои внимателно го погледнале видеото ќе забележат дека во позадина се слуша женски глас кој снима. Кој што е поточно мојот глас. Никаде не излегов на снимката, но можам да потврдам дека јас сум таа. На прашањето дали екс премиерот бил насилен кон неа, таа одговори дека такво нешто не се случило. -Тоа се само лаги и шпекулации, потенцираше Груевска.

Мицкоски до Заев: Не може да зборувате за иднината, а не го вадите од уста Никола Груевски

Ивана Ефремовски — Mon, 06 Jul 2020 19:26:07 +0000

СДСМ живее во паралелен свет каде што единствено нешто што ги интересира е Никола Груевски, а не реалноста во која што пливаат во лаги, невистини и очај, рече лидерот на ВМРО-ДПМНЕ, Христијан Мицкоски кој вечерва гостуваше на тв дуел со лидерот на СДСМ.

Во недостиг на аргументи Зоран Заев го користи неоснованиот напад дека ВМРО-ДПМНЕ е се уште под капата на Никола Груевски, односно дека Христијан Мицкоски е продолжена рака на Груевски. Мицкоски истакна дека претседател на ВМРО-ДПМНЕ е тој, а партијата се раководи по одлуки донесени на Извршниот и Централниот комитет, што според статутот е сосема легитимно. Наместо тоа, Мицкоски вели дека СДСМ треба да излезе од минатото и да се соочи со реалноста дека само за неколку денови оди во опозиција. -Господине Заев, не може да одите кон иднината, а да не го вадите од уста Никола Груевски. Секогаш кога сте во недостиг на аргументи, го спомнувате Никола Груевски, иако самите дозволивте да си замине од земјата, вели Мицкоски. -СДСМ е во очај и во пресрет на најголемиот пораз во историјата на партијата, пробуваат да манипулираат со народот кој одамна знае кого треба да одбере на претстојните избори. СДСМ заминува во историјата и тоа е неминовно, заврши Мицкоски. -Вие не можете да нудите иднина господине Зоран Заев. Се уште сте заглавени во минатото и ви тежи господинот Груевски, три години потоа еве последните 30 тина месеци претседател на ВМРО -ДПМНЕ сум јас и разговарате со мене и може да зборувате сега за тоа како можете да бидете конструктивна опозиција после 15 јули за заеднички да ја предводиме Македонија да биде дел од Европската Унија-заклучи Мицкоски.