никола саркози – Kurir.mk

Саркози под истрага за наводна измама за време на изборната кампања во 2007 година

Дарко Андоновски — Fri, 06 Oct 2023 13:46:18 +0000

Поранешниот француски претседател Никола Саркози е под официјална истрага поради наводна измама во врска со финансирањето на неговата изборна кампања во 2007 година. Саркози е обвинет за „влијание врз сведоци“ и „злосторничко здружување со цел да се направи измама“, јавуваат локалните медиуми. Поранешниот претседател од вторникот беше испрашуван од судија во рамки на истрагата покрената во мај 2021 година.

Потврдена пресудата за Саркози

Ивона Петрова — Wed, 17 May 2023 10:08:49 +0000

Поранешниот француски претседател Никола Саркози денеска во жалбена постапка беше осуден на три години затвор, од кои две се условни а една година да носи електронска алка на ногата наместо престој во затвор. Во март 2021 година, тој беше осуден на три години затвор, од кои две условни, а една во домашен притвор со електронска нараквица, поради корупција и трговија со влијание преку тајна телефонска линија што беше откриена со прислушување. Францускиот апелациски суд ја потврди пресудата донесена во првостепената постапка на 1 март 2021 година против поранешниот лидер на француската десница, кој ја слушна одлуката на обвинителна клупа. Неговата адвокатка Жаклин Лафонт веднаш изјави дека ќе поднесе жалба до Касациониот суд, дека Саркози е невин и ќе оди до крај на судската постапка, нарекувајќи ја одлуката на судот „запрепастувачка“. Саркози го напушти судот без да даде изјава. Саркози (68) е првиот поранешен француски претседател осуден на затворска казна. Неговиот поранешен „ментор“ Жак Ширак во 2011 година беше осуден на двегодишна условна затворска казна во случајот со фиктивни вработувања во градот Париз. Долгогодишниот адвокат на Саркози, Тиери Ерзог (67) и поранешниот висок обвинител Жилберт Азиберт (76), исто така беа прогласени за виновни за склучување на „корупциски пакт“ со Саркози во 2014 година и осудени на истите казни. Апелацискиот суд, исто така, изрече тригодишна забрана за граѓански права на Саркози, што значи дека тој не може да се кандидира за некаква функција. Обвинителството на 13 декември побара три години условни затворски казни за тројцата обвинети кои од почетокот негираа дека имало корупција. Поранешниот француски претседател (2007-2012) најостро ги негираше наводите за време на жалбената расправа. Одлуката на судот беше очекувана, а Саркози го чека новото судење во жалбена постапка наесен во случајот со нелегално финансирање на неговата претседателска кампања во 2012 година и му се заканува трето судење поради сомневање дека имал либиско финансирање за неговата претседателска кампања во 2007 година.

Макрон и Саркози ќе го убедуваат Мбапе да остане во ПСЖ!

Тале Кристо — Thu, 17 Feb 2022 19:24:32 +0000

Емануел Макрон и поранешниот француски претседател, Никола Саркози ќе го убедуваат Килијан Мбапе да остане во ПСЖ. Макрон и Саркози ќе се обидат да го убедат младиот напаѓач преку свои “врски“ да му објаснат на Мбапе дека тој е национално богатство и дека без него Лига 1, односно фудбалска Франција ќе загуби многу. Да се потсетиме дека фудбалерот сака да оди во Реал Мадрид, а ПСЖ со нова, басносливна понуда вредна 250 милиони евра за пет години, и тоа нето, сака да го “натера“ Мбапе да потпише нов договор и да остане на “Паркот на принцовите“.

Продолжува судењето на Саркози за нелегално финансирање на кампања

Ивана Ефремовски — Thu, 20 May 2021 07:41:56 +0000

Денеска продолжува судењето на поранешниот француски претседател Никола Саркози за незаконско финансирање на неуспешна изборна кампања во 2012 година, откако беше одложено во март затоа што еден од адвокатите се зарази со коронавирус. Судењето фрла нова сенка на кариерата на Саркози, кој беше претседател од 2007 до 2012 година, коментираат локалните медиуми. Поранешниот француски претседател веќе е осуден за корупција во друг случај. Тој ја обжали пресудата на 1 март. Обвинителите тврдат дека Конзервативната партија на Саркози потрошила скоро двојно повеќе од 22,5 милиони евра дозволени според изборниот закон за раскошни изборни митинзи и потоа ангажирале пријателска агенција за односи со јавноста за да ги прикрие тие трошоци. Обвинителите во обвинението признаа дека нивната истрага не успеала да докаже дали Саркози организирал сè или бил вмешан во интригите, но велат дека тој сигурно бил свесен за тоа. Саркози (66) постојано се изјаснуваше за невин и рече дека не знаел за постапката за лажна наплата. Ако се докаже неговата вина, му се заканува казна затвор од една година и парична казна до 3.750 евра. (МИА)

Саркози обвинува дека пресудата е „длабока неправда“

Дарко Андоновски — Wed, 03 Mar 2021 14:59:04 +0000

Поранешниот шеф на француската држава, Никола Саркози, кој вчера беше осуден во таканаречениот случај „прислушување“, денеска изјави дека е подготвен да поднесе жалба до Европскиот суд за човекови права и остро ги критикуваше судиите кои го казнија, јави дописникот на МИА.. Првиот претседател осуден на затворска казна во Петтата француска република, Никола Саркози, за првпат зборуваше за неговата осуда, во интервју за „Фигаро“. Осуден на три години затвор, од кои две условни, во таканаречениот случај „прислушување“, Никола Саркози се осврна на својата желба да се жали, остро критикувајќи ги судиите кои го санкционираа. За потсетување, Никола Саркози и Тиери Херцог беа прогласени за виновни за кривични дела „активна корупција“ и „трговија со влијание“, на што на адвокатот му се додава и „повреда на професионалната тајна“. Поранешниот советник на Касациониот суд, Гилберт Азиберт, е прогласен за виновен за „пасивна корупција“ и „прикривање на повреда на професионалната тајна“. -Ја обжалив одлуката, можеби оваа борба ќе мора да заврши пред Европскиот суд за човекови права (ЕСЧП). За мене би било болно да ја осудам својата земја, но јас сум подготвен затоа што тоа ќе биде цена на демократијата, предупреди поранешниот шеф на државата. Тој упати на судската практика на ЕСЧП, каде е доволно жалителот да се сомнева дека неговиот судија не е непристрасен за да може да бара да се изземе. Со оглед на оваа судска пракса, може да се појави прашањето за пристрасноста на одредени судии. -Отсекогаш сум велел, и се уште велам, дека мешањето меѓу крвни сродници е лошо, во сите сфери на животот, изјави Саркози. Преку своите забелешки, поранешниот претседател ја одржува својата одбранбена линија против пристрасноста на судството кон него, уште еднаш подгревајќи го хистеричниот однос со судиите. Критиката беше отфрлена од Синдикатот на судиите, од кладе повторија дека „правдата е за секого“. Кога беше претседател, неговите односи со судиите често беа затегнати, понекогаш ужасни, особено кога ги нарекуваше „грашок“. Зборувајќи за „длабока неправда“ и велејќи дека е „осуден за она што не го сторил, поранешниот претседател, во интервјуто подетално се осврна и на предметот. Судот смета дека Никола Саркози и Тиери Херцог навистина се обиделе да влијаат на претстојната одлука на Касациониот суд во врска со одземањето на претседателските агенди во контекст на аферата Бетанкур, благодарение на помошта од судијата Гилберт Азиберт и врските кај неговите колеги, во замена за ветувањето дека ќе добие за него почесна функција во Монако. За Никола Саркози, пресудата „е преполна со недоследности“. -Јас велам дека за едно лице да се осуди, во владеењето на правото требаат докази. И нема докази во ова досие, инсистира тој. Според нивната пресуда, судиите се повикуваат на транскрипција на 17 телефонски разговори пресретнати од јануари до февруари 2014 година помеѓу поранешниот претседател на републиката и неговиот адвокат на нивната окултна линија „Бизмут“. Од овој документ, тие сметаа дека „пактот за корупција“ може да се воспостави, со што се потврдуваат кривичните дела „активна корупција“ и „трговија со влијание“, иако одлуката на Касациониот суд беше неповолна за Никола Саркози – таа ја потврди законитоста за внесување на неговите агенди – и функцијата во Монако, платена 5.000 евра годишно, не му беше доделена на Гилберт Азиберт. Никола Саркози вечерва во 20 часот треба да зборува на ТФ1, најгледаните француски телевизиски вести.

Саркози подготвен да поднесе жалба во Стразбур

Ивана Ефремовски — Tue, 02 Mar 2021 19:52:18 +0000

Поранешниот француски претседател Никола Саркози, кој беше прогласен за виновен поради корупција и трговија со влијание, не ја исклучи можноста да поднесе жалба до Европскиот суд за човекови права во Стразбур. Судот во Париз вчера донесе одлука за таканаречениот „случај на прислушување“, кој датира од 2014 година. Судот го прогласи Саркози за виновен поради корупција и трговија со влијание и го осуди на три години затвор, од кои две условно. Адвокатот на Саркози, Тиери Херзог и поранешниот судија Жилберт Азиберт, исто така, беа прогласени за виновни за корупција. -Поднесов жалба на судската одлука и оваа борба можеби ќе треба да заврши во Европскиот суд за човекови права. Ќе биде болно за мене ако биде осудена мојата земја, но јас сум подготвен за тоа, бидејќи тоа е дел од цената на демократијата, истакна Саркози во интервју за весникот „Фигаро“. (МИА)

Саркози доби 1 година затвор – казната ќе ја издржува дома

Дарко Андоновски — Mon, 01 Mar 2021 15:07:31 +0000

Поранешниот француски претседател, Никола Саркози (66), денеска е првостепено осуден на три години затвор, од кои две условено поради корупција и злоупотреба на службената положба. Одлуката ја донесе парискиот Кривичен суд, а заедно со Саркози беа осудени и Тиери Херцог и Жилберт Азибер, пренесува француски „Фигаро“. Шеесет и шестгодишниот политичар, кој беше претседател од 2007 до 2012 година, е осуден затоа што се обидел незаконски да открие информации за правни постапки преземени против него од страна на висок судија во 2014 година, пренесува АП. На суд беше наведено дека тој ќе има право да бара издржување на казната од дома со електрична белезица. Саркози ќе се соочи со уште еден судски процес подоцна овој месец заедно со 13 лица под обвинение за незаконско финансирање на неговата претседателска кампања во 2012 година.

Поранешниот француски претседател Никола Саркози осуден на три години затвор

Тале Кристо — Mon, 01 Mar 2021 13:44:58 +0000

Парискиот Кривичен суд денеска ги прогласи за виновни за корупција и трговија со влијанија Никола Саркози, како и адвокатот Тиери Херцог и поранешниот судија Жилбет Азиберт, во таканаречената афера „прислушување на Пол Бизмут“. Поранешниот претседател е осуден на три години затвор, од кои две условно за корупција. Во декември 2020 година, Националното финансиско обвинителство (ПНФ) побара многу тешки казни: четири години затвор, од кои две години условно против поранешниот судија Жилберт Азиберт; четири години затвор, од кои две условно, со пет години професионална забрана за работа против адвокатот Тиери Херцог; четири години затвор, од кои две условни казни против Никола Саркози. Тројцата беа одговорни за корупција и влијание врз продажба. Ова е историска одлука на судот, повеќе од девет години откако Жак Ширак беше осуден на две години затвор во случајот на измислените работни места во градот Париз. Оваа одлука ќе биде клучна и за Никола Саркози, кому му претстои второ судење на 17 март, во аферата „Бигмалион“, во врска со трошоците за неговата претседателска кампања во 2012 година. Тој се повлече од политиката од 2016 година, но сепак е многу популарен кај десницата, една година пред следните претседателски избори, Никола Саркози пред читањето на пресудата побара да биде „измиен од оваа навреда “. Оваа одлука ќе стане конечна доколку не биде обжалена.т

Истрага во Франција против Саркози за злоупотреба на функцијата

Ивана Ефремовски — Fri, 15 Jan 2021 14:28:21 +0000

Француското финансиско обвинителство (ПНФ) почна истрага за злоупотреба на функцијата во рамки на консултантски активности во Русија на поранешниот француски претседател Никола Саркози, јавија француски медиуми кои се повикуваат на извори блиски до истрагата. Од ПНФ потврдиле дека почнала истрага за злоупотреба на положбата, но и поради криминал и други прекршоци. Антикорупцискиот суд се занимава со овој предмет од летото 2020 година, по извештајот на финансиските разузнавачки служби дека Саркози бил платен од руската осигурителна компанија Reso Garantia контролирана од двајца руски милијардери Сергеј и Николај Саркисов. „Судот се обидува да провери дали поранешниот шеф на државата се однесувал како советник, што би било совршено легално или се занимавал со потенцијално криминално лобирање во име на руските олигарси“, јавија париски медиуми. Договорот склучен во 2019 година се однесува за неколку години и изнесува три милиони евра. Никола Саркози веќе на почетокот на 2020 година добил исплата од 500.000 според тој договор. Reso Garantia, основана во 1991 година, е една од главните осигурителни компании во Русија, специјализирана за автомобилско осигурување со повеќе од 34.000 агенти и 11 милиони клиенти. Во 2007 година, француската осигурителна компанија АХА склучи договор со акционерите на таа руска компанија за купување на удел од 36,7 проценти за околу 810 милиони евра. Медиумите јавија дека AXA е важен клиент на адвокатската канцеларија Realyze, што е основана во 1987 година од Никола Саркози со партнери. (МИА)

Саркози денеска ќе се појави на судење за корупција

Ивона Петрова — Mon, 23 Nov 2020 06:20:39 +0000

Поранешниот француски претседател Никола Саркози денеска ќе се појави пред суд под обвинение за корупција и злоупотреба на влијание. „Гардијан“ пренесува дека ова е првиот судски случај од неколкуте истраги што се водат против овој десничарски политичар, кој беше на челот на Франција во периодот од 2007 до 2012 година, и сега за првпат ќе се појави пред судија по неколкугодишните обиди да се отфрлат или поништат обвиненијата. Во случајот познат како „скандал со прислушувањето“, обвинителството тврди дека Саркози и неговиот адвокат Тиери Херцог се обиделе да го поткупат судијата Жилбер Азибер да им предаде тајни информации од посебната истрага против овој поранешен француски лидер. Саркози е обвинет дека на судијата Азибер му понудил да му обезбеди пријатно работно место на Азурниот брег. Саркози се наоѓа пред серија обвинувањата, од тоа дека примал нелегално средства од убиениот либиски лидер Моамер ел-Гадафи за финанасирање на својата кампања, до примање наводен потпуп од продажбата на оружје во Пакистан.