Никола Тупанчески – Kurir.mk

Тупанчески: Со новиот Кривичен законик во целост ќе се ревидира казнената политика

Ивана Ефремовски — Wed, 01 Feb 2023 10:45:39 +0000

Стручната расправа во Апелациониот суд Штип е прва во серијата расправи за новиот Кривичен законик на ниво на апелациони подрачја. После 27 години се добива нов законски текст со кој ќе се подобри правната сигурност на граѓаните. Министерот за правда, Никола Тупанчески во своето обраќање се осврна на новините во неколку клучни сегменти. Со новиот Кривичен законик се врши редефинирање и хармонизација на пропишаните казни за одредени кривични дела кои отстапуваа од целите на казнената политика. -Од анализата на досегашната примена на Кривичниот законик, можеме да констатираме дека примената на мерката конфискација претставуваше особена слабост. Новините во оваа сфера имаат за цел отстранување на лоцираните слабости со што ќе се зголеми ефикасноста во примената на овој институт. Исто така, одредбите за конфискација се целосно усогласени со Европската конвенција за човекови права и јуриспруденцијата на Судот во Стразбур. Не помалку значајни се и новините кои се однесуваат на кривичните дела „Тортура“ и „Малтретирање во вршењето на службата“ и нивното незастарување како резултат од конкретни злоупотреби што резултираа и со пресуди од Судот во Стразбур против нашата држав, рече Тупанчески. Министерот за правда посочи дека посебно внимание во изготвувањето на новиот Кривичен законик било посветено на негово усогласување со најновите меѓународни стандарди. Во сферата на перењето пари биле рзгледувани документите од Манивал. -Во областите поврзани со недозволеното производство и трговија со оружје, Кривичниот законик беше целосно усогласен со Протоколот на Обединетите нации. Значајно е и усогласувањето со Директивата на Европската унија за борба против измама на финансиските интереси на Унијата со примена на кривичното право. Изминатиов период, во јавноста се посебно актуелни случаите за загадување на животната средина. Во тој контекст се и новините во Кривичниот законик во оваа област и тоа преку целосно усогласување со меѓународните стандарди, воведување ново кривично дело „Екоцид“ и квантифицирање на дејствијата на извршување во кривичните дела против животната средина со пропишување на мерливи параметри кои се однесуваат на загадувањето на животната средина, рече тој. Процесот за донесување на новиот Кривичен законик е поддржан од страна на Мисијата на ОБСЕ во Скопје, за што министерот за правда, Никола Тупанчески изрази голема благодарност. Во текот на месецот, стручни расправи за новиот Кривичен законик ќе се одржат и во апелационите судови во Гостивар, Битола и Скопје.

Тупанчески: Некој функционер го искористил дискреционото право овозможувајќи предвремено полагање на правосудниот испит.

Дарко Андоновски — Wed, 30 Nov 2022 14:17:30 +0000

Министерот за правда Никола Тупанчески , одговарајќи на новинарски прашања за положениот правосуден испит на Барлет Џафери во 2015 година рече дека некој функционер го искористил дискреционото право за предвремено полагање. „Доколку навистина постојат случаи кои се граничат со примената на законот, тогаш би требало да реагираат и другите институции. Целата состојба треба да се провери.Не се работи за еден случај, туку се работи за примена на дискреционо право на именуван функционер. Дефинитивно, некој го искористил тоа дискреционо овластување и токму затоа од тие причини законот е изменет за да не постои никаква можност во иднина.Јас 10 месеци сум министер, не сум ни помислил да дадам некој предвремено да полага правосуден испит”, изјави Тупанчески. Министерот Тупанчески посочи дека станува збор за три законски акти од Законот за правосуден испит донесен во 2013 година. Измените и дополнувањата се направени во 2015 година, а во 2019 година е донесен нов Закон за правосуден испит. Во однос на состојбите во правосудниот систем, Министерот за правда Никола Тупанчески смета дека е неопходно да се направи филтрација во судството и обвинителството. „Ветингот, подолго време се заговара во нашата држава, зрее идејата да се движиме во таа насока како општество. Му треба ресетирање на македонското општество, затоа што еднаш засекогаш мора да се направи таа филтрација во судството. Не сите судии се лоши, не сите се добри. Треба филтрација“,рече Тупанчески одговарајќи на новинарски прашања по пуштањето во функција на најголемата дигитална судница во Идризово.

Тупанчески: Новиот закон за здруженија и фондации мора да се применува

Катерина Бојаџиева — Wed, 30 Nov 2022 13:54:46 +0000

Новиот предлог закон за здруженија и фондации на кој работи работна група во Министерството за правда можеби ќе биде добро пред да стапи на сила да биде пратен до Венецијанската комисија. Каков и да е законот, строг или лош, тој мора да се применува, тој е обврзувачки за сите, нагласи денеска министерот за правда Никола Тупанчески. Тој, при отворањето на новата дигитална судница во Идризово, рече дека инсистира колку што е можно побрзо да биде завршен предлог законот за здруженија и фундации. – Работната група е таа што треба да го каже зборот, се разбира дека ќе бараме и од советодавното тело, од Венецијанска комисија, потврда. Ќе мора да има европски стандард, да не заборавиме дека во моментов е започнат билатералниот скрининг којшто не ни дозволува преголема манифестација на сопствена волја, рече Тупанчески, осврнувајќи се на досегашниот закон, за којшто наведе дека бил донесен како „бај пас“, за „бајпасирање“ на состојбите и оти сите сме сведоци што се случува во моментов.

Тупанчески: Дигиталната судница нуди најсовремени услови за спроведување на судски процес

Ивана Ефремовски — Wed, 30 Nov 2022 10:55:47 +0000

Министерот за правда, Никола Тупанчески, на денешното отворање новоопремената дигитална судница во Казнено-поправната установа Идризово истакна дека оваа судница нуди најсовремени услови за спроведување на судски процес. Меѓу придобивките што ги носи оваа судница, Тупанчески рече дека функционалниот аудиоконференциски систем дава можност за судење без физичко присуство и дека ќе се обезбеди заштита и сигурност на граѓаните во главниот град. (МИА)

Тупанчески: За краток временски период ќе се знае дали е избран вистинскиот човек за шеф на ОЈО ГОКК

Ивана Ефремовски — Fri, 11 Nov 2022 21:27:56 +0000

Министерот за правда Никола Тупанчески во интервју за 360 степени коментирајќи го изборот на Ислам Абази за шеф на ОЈО ГОКК рече дека лично не го познава, а обвинителите се тие кои одлучиле за изборот. -За краток временски интервал ќе се знае дали е избран вистинскиот човек. Гласаа 163 обвинители. Изборот го направија тие. Се работи за сериозна функција каде се постапува по комплексни теми. Какви ќе бидат резултатите и довербата за тој јавен обвинител ќе покаже времето. Во секоја професија има луѓе кои заслужуваат истата да ја извршуваат или не. На секој треба да му дадеме шанса,потенцира Тупанчески. Тој смета дека во иднина би било добро да има измени во однос на построги правила и критериуми за избор на прв човек на ова обвинителство. Главниот проблем, според Тупанчески, не е квалитетот на законите туку капацитетот на институциите, интегритетот и начинот на правораздавање.

Тупанчески и Кан во посета на Воспитно-поправниот дом во Волковија

Ивана Ефремовски — Fri, 11 Nov 2022 15:00:26 +0000

Министерот за правда Никола Тупанчески заедно со регионалната директорка за Европа и Централна Азија на канцеларијата на УНИЦЕФ, Афшан Кан, беа во посета на Воспитно поправниот дом во Волковија. Како што истакнаа на фејсбук-страната на Министерството за правда, целта на посетата е запознавање со активностите во однос на унапредувањето на правдата за децата. -Беше направена обиколка на просториите на ВПД, а малолетниците ги презентираа идеите и механизмите на кои работеле во изминатиов период, наведуваат оттаму. ВПД во Волковија е релативно нов комплекс со површина од 16 000 м2, ограден со жичена ограда, шеталишта, спортско игралиште за кошарка, мал фудбал и ракомет и во него се сместени 18 деца. -Со подобрените услови се очекува значително да се зголеми грижата, ресоцијализацијата и рехабилитацијата на децата штитеници, посочуваат од Министерството. Според нив, установата ги задоволува сите европски стандарди за сместување и работа со деца кои биле во судир со законот. (МИА)

Тупанчески: Законите не можат да бидат алатка на политиката, туку рамки и граници на легитимно политичко дејствување

Катерина Бојаџиева — Thu, 10 Nov 2022 11:46:08 +0000

Законите не можат да бидат алатка на политиката, туку рамки и граници на легитимно политичко дејствување, а Казненото право како највисок степен на заштита треба да биде граница преку која не смее да помине никој, изјави министерот за правда, Никола Тупанчески, на денешна стручна расправа за предлогот на новиот Кривичен законик. На настанот по повод стручна расправа за предлогот на новиот Кривичен законик во организација на Министерството за правда во соработка со Мисијата на ОБСЕ во Скопје, министерот Тупанчески информираше дека од објавувањето на законот на ЕНЕР, уште на почетокот на јули оваа година, биле добиени голем број на мислења, коментари и предлози кои внимателно биле разгледани и сѐ уште се разгледуваат од страна на работната група. – Нашата цел е да добиеме нов модерен кодифициран акт, нов Кривичен законик во кој ќе бидат инкорпорирани сите решенија и стандарди од релевантните меѓународни инструменти, со кои ќе се подигне правната сигурност на граѓаните, а на практичарите ќе им биде олеснета примената на неговите одредби, додаде тој. Во изјава за медиуми министерот рече дека не секогаш измените и дополнувањата на КЗ биле среќно направени, туку, како што рече, имало ситуации каде што биле констатирани одредени неконзистентности во нормативата, односно одредбите кои беа дел од КЗ. – Ова е навистина добра можност комплетно да се ревидира кривичното законодавство, да се направи негова кодификација и во целост да се преиспитаат, ревидираат и истовремено да се донесат одредби кои ќе бидат дел од кривичниот законик и ќе кореспондираат со адекватните европски и светски трендови. Се работи за голем проект, работната група која работеше на подготовка на драфт верзијата, ова се последните подготовки во однос на донесувањето или во однос на дотерувањето, односно дизајнирање на последната фаза од драфт верзијата, рече тој, дополнувајќи дека ова ќе биде одлична алатка за сите судии, обвинители и институции во однос на подобрување на легислативната рамка и подобрување на состојбите. Шефот на Мисијата на ОБСЕ во Скопе, Клеменс Која, говореше за поддршката која ОБСЕ ја дава. – Ја дававме во процесот на изготвување на КЗ. Во последните три години оваа мисија даваше правна експертиза и беше домаќин и модератор на 167 сесии на изготвување на законите и 13 настани за работната група на Министерството за правда, која го изготвуваше новиот КЗ. Овие бројки ја покажуваат посветеноста на Министерството и членовите на работната група да учествуваат во процесот на изготвување на законите, рече тој. Тој посочи дека овој процес барал обемна координација и соработка меѓу претставниците на судовите, обвинителствата, Адвокатската комора, извршителите и организациите, на граѓанското друштво и канцеларијата на ИРЗ и други меѓународни експертски организации кои споделиле свои професионални согледувања за различни аспекти на КЗ. – Би ве поттикнал сите да се залагате за неодложно усвојување на новиот Кривичниот законик. Ви посакувам сите да останете на патеката на праведност, објективност, непристрасност, бранејќи и спроведувајќи ги демократските вредности во кои верувате и создавајќи квалитетно законодавство кое ќе ги штити правата на граѓаните. Квалитетното законодавство и неговото делотворно спроведување се камен темелник за делотворен меѓународен правен систем, порача шефот на Мисијата на ОБСЕ во Скопје, дополнувајќи дека ОБСЕ и натаму ќе го нуди своето партнерство, како сојузник во напорите на земјата да се стреми кон поделотворен законодавен процес. Владо Камбовски, академик, претседател на Комисијата за подготовка на новиот Кривичен законик, рече дека формирањето на одредбите во КЗ не е нормативно техничко прашање, туку е пред сè вредносно прашање. – КЗ одредува што е право а што е неправо во една држава. Одредува како општеството, односно државата, треба да реагира на одредени видови на неправо. Сето тоа, и овој наш нов КЗ треба да ги донесе во услови не многу поволни за овие основни начела, а тоа е владеењето на правото, кое, како што гледаме по започнување на преговорите за членство на Републиката во Европската Унија, станува првото прашање кое се става на преговарачката маса, рече тој. Вниманието, како што рече, било фокусирано на неколку новини. – Пред сè на системот на санкции, потоа посебните казнено-правни мерки како што е конфискацијата и одземањето на предмети, во посебниот дел тоа е низа нови инкриминации, кои се рефлексија на појава на нова форма на криминал, особено еколошката сфера или сферата на био-етиката, потоа заострување на казнено-правната репресија во однос на одредени тешки форми на криминал од корупција до тероризам и злоупотреби на власта, заштита на интересите на ЕУ, истакна тој. Во изјава за медиуми, професорот истакна дека значајна измена во општиот дел е допрецизирање на режимот на конфискацијата на криминалните приноси. – За да се избегнат досегашните празнини, недоречености и лоша практика во примената на оваа значајна мерка во борбата против организираниот криминал и корупцијата, бидејќи истовремено се прават измени на Законот за кривична постапка, измените од општиот дел на КЗ треба да бидат проследени со брзи измени за да се ефектуираат и да ја надминеме практиката во која утврдуваме постоење на тешки кривични дела, рече тој. Како значајни измени ги наведе и системот на инкриминација, појавата на нови инкриминации – во делот на делата квалификувани облици на говор на омраза со кои, како што рече, треба да се реагира на поплава од говор на омраза од социјални мрежи до јавни трибини и слично, родовата еднаквост, заштита на ранливи категории, новинарите, кај делата против службената должност, делата против економијата и финансиите и делата на стечај.

Тупанчески: Европската пракса покажа дека закон може да биде проверен од Венецијанската комисија и по неговото донесување

Ивана Ефремовски — Wed, 09 Nov 2022 12:30:01 +0000

Министерот за правда Никола Тупанчески вели дека испраќањето на Законот за здруженија и фондации на мислење на Венецијанската комисија е од превентивни причини во однос на примената на одредбите кои се изгласани во Собранието за да не дојде до несакани консеквенции кои во формална смисла би довеле до Европскиот суд за човекови права. Европската пракса, како што рече тој, покажа дека закон може да биде проверен и по неговото донесување. -Мислењето на Венецијанската комисија е добредојдено. Исходот не можеме да го прејудицираме. Можеби ќе оди во наш прилог. Факт е дека можеби добро би било оваа пракса да продолжи и во иднина, но тоа да биде пред донесувањето на законите, затоа што на некој начин е подобро да се реагира во таа фаза отколку кога ќе биде донесен законот, па после да добиеме пресуда од Европскиот суд за човекови права, изјави министерот Тупанчески одговарајќи на новинарски прашања по учеството на семинарот посветен на спречување и казнување на корупцијата, како и за перспективите во Франција и Југоисточна Европа. Министерот за надворешни работи, Бујар Османи вчера во Софија на прес-конференција со бугарскиот колега, Николај Милков најави дека ќе и препорача на Владата по неодамна усвоените измени на Закон за здруженија и фондации, тој да биде испратен во Венецијанската комисија, со цел таа да утврди дали навистина во него има нешто спорно, како што тврди Софија. (МИА)

Ако предложените измени на Законот за здруженија и фондации се добри и конструктивни ќе бидат прифатени, најави Тупанчески

Ивона Петрова — Thu, 20 Oct 2022 09:47:06 +0000

Секое добро решение ќе биде прифатено, што отсекогаш тоа било мое животно и професионално мото, без разлика дали доаѓа од власта или опозиција – ако предлогот е добар и конструктивен ќе биде прифатен, изјави министерот за правда Никола Тупанчески коментирајќи го Предлог-законот за изменување и дополнување на Законот за здруженија и фондации поднесен до Собранието од пратеничката група на ВМРО-ДПМНЕ, со кој треба да се спречи имиња на контроверзни личност да бидат вклучени во називите на здруженија на граѓани. – Таа Комисија или ад хок тело, кое што веќе е формирано заседаваше во неколку наврати. Сериозно си ја сфати својата обврска да се произнесува во однос на тоа дали историските ликови кои што имаат контроверзно минато можат да бидат дел од името на здружението, односно на фондацијата. Во таа насока, тоа е советодавно тело – повторувам, меѓутоа еве треба да се каже уште едно нешто, да се потенцира дека во моментов во Собрание се измени и дополни на Законот за здруженија и фондации, што всушност истовремено се движат во насока колку што е можно попронтно итно да бидат решени состојбите коишто не дозволуваат чекање на носење на нов закон, истакна Тупанчески одговарајќи на новинарски прашања на настанот „Преглед на реформите поврзани со правдата на децата”. Тој нагласи дека до донесувањето на новиот закон, целта на овие измени и дополнувања на Законот за здруженија и фондации, за чие усвојување практично има консензус и од опозицијата и од власта, е да може веднаш да се реагира и да се амортизираат, односно неутрализираат состојбите коишто настанаа во оваа сфера. На новинарско прашање дали ќе побара преименување на постојните бугарски здруженија, во однос на чии цели веќе реагираа и граѓани и Комисијата за спречување на дискриминација, Тупанчевски изјави дека легалистички гледано одредбите не треба да се применуваат ретроактивно, меѓутоа доколку се констатира дека има одредена неправилност или активност што не е во согласност со законот, има и други институции кои имаат можност да постапуваат. – По сето она што е во рамките на Министерството за правда ќе биде постапено. Меѓутоа, дефинитивно, за жал, постојниот закон не дозволува големи можности за реакција од страна на Министерството за правда. По донесувањето на новите измени, зависи какви ќе бидат измените, бидејќи има одредени амандмани, ќе треба тие попрецизно да се уредат и она што се нарекува правна празнина да биде пополнета. Во таа насока сигурно и точно ќе се знае кое тело со какви надлежности ќе биде и во кое време треба да постапи, истакна министерот Тупанчески.

На децата во Македонија им треба фер правосуден систем прилагоден на нивните потреби, Тупанчески на настан за реформите

Ивана Ефремовски — Wed, 19 Oct 2022 13:28:11 +0000

Министерот за правда Никола Тупанчески утре (20.10.2022) во 10 часот ќе се обрати на настанот „Преглед на реформите поврзани со правдата на децата“ кој ќе се одржи во „Дабл три-Хилтон”- Скопје. -На децата во Република Македонија им треба фер правосуден систем прилагоден на нивните потреби за да можат да ги остварат своите права и да имаат пристап до правосудниот систем кога нивните права се повредени или им се ускратени. Ова ќе биде можност засегнатите страни да се сретнат со младите лица, да направат преглед на реформите и да ги дефинираат областите за кои е потребно дополнително внимание, посочуваат од министерството за правда.