Никос Христодулидис – Kurir.mk

Кипарското прашање во фокусот на разговорите на Христодулидис со грчкиот државен врв

Ивана Ефремовски — Mon, 13 Mar 2023 14:17:21 +0000

Кипарското прашање, билатералните односи, европските и регионалните теми, но и железничката несреќа се нашле на агендата разговори на новиот претседател на Кипар, Никос Христодулидис за време на средбите во Атина со грчката претседателка Катерина Сакеларопулу и премиерот на Грција Кирјакос Мицотакис. За кипарското прашање, Хирстодулидис истакнал дека детално го информирал Мицотакис за „потребата од поактивно вклучување на ЕУ во напорите за излез од ќорсокакот и одново започнување на разговорите“. -Добро знаеме дека ситуацијата не е лесна, ги знаеме тешкотиите, но во исто време цврсто сме убедени дека моменталната состојба не може да биде решение за кипарското прашање. Кипар не може да остане поделен и под окупација, додаде тој. Моменталната состојба не може да биде решение за кипарското прашање. Кипар не може да остане поделен и под окупација, порачал Христодулидис. Грчкиот премиер изразил подготвеност за продолжување на „заедничката голема визија за решавање на кипарското прашање врз основа на одлуките на ОН“. Мицотакис, исто така посочил дека средбата со Христодулидис е во период на болка поради несреќата, осврнувајќи се на фактот дека меѓу загинатите се и двајца студенти од Кипар и истакнал дека Владата е решена да го промени сето она што предизвикало болка во минатото. Новиот претседател на Кипар од денеска е во дводневна официјална посета на Грција, прва во странство откако пред две седмици ја презеде функцијата.

Новоизбраниот претседател на Кипар, Никос Христодулидис, официјално ја презеде должноста

Катерина Бојаџиева — Tue, 28 Feb 2023 12:42:43 +0000

Новоизбраниот претседател на Кипар Никос Христодулидис денеска официјално ја презеде функцијата на церемонија одржана во Претставничкиот дом. Во говорот во Парламентот и во присуство на претходниот претседател Никос Анастасиадис, според кипарските медиуми, Христодулидис се осврнал на неопходноста за решавање на кипарското прашање, на приоритетите во надворешната политика, во економијата и најавил надградба на институционалната соработка. Паралелно, утрово беше соопштен и составот на новата кипарска Влада, а за утре е закажана првата владина седница. Христодулидис (49) во периодот од март 2018 до јануари 2022 беше министер за надворешни работи, а на изборите на 12 февруари беше избран за осми претседател на Кипар.

Решавање на кипарското прашање приоритет за новиот претседател на Кипар

Ивана Ефремовски — Mon, 13 Feb 2023 10:13:09 +0000

Моја најголема грижа е да се стави крај на турската окупација и повторно да се обедини нашата татковина. Ќе направам сѐ за одново да започне дијалогот, за да се создадат услови за решавање на кипарскиот проблем, рекол новиот претседател на Кипар, Никос Христодулидис за време на синоќешната инаугурација.

Поранешниот шеф на кипарската дипломатија победи на вчерашните претседателски избори во земјата, откако во вториот круг доби 51,91 отсто од гласовите, а доцна синоќа на свечена манифестација и официјално беше прогласен за нов, осми по ред, претседател на Република Кипар.

Грчката претседателка Катерина Сакеларопулу и грчкиот премиер Кирјакос Мицотакис синоќа имаа телефонски разговор со Христодулидис, му честитале за победата и го поканиле да ја посети Атина. (МИА)