нина цаца билјановска – Kurir.mk

Докторката која криеше дека е заразена со коронавирус се врати на работа на Кожната клиника

Ивана Ефремовски — Mon, 06 Jul 2020 17:40:07 +0000

Докторката Нина Цаца Билјановска која што беше сменета од директорската позиција на Државната клиника за кожни болести поради тоа што на почетокот од епидемијата криеше дека била во Италија и имала симптоми на коронавирусот се врати на работното место, потврдуваат од клиниката за тв 24. Докторката заработи кривична пријава од полицијата, а Основното јавно обвинителство Скопје предложи да биде казнета со парична казна во висина од 10 илјади евра. Лекарската комора чека правосилна пресуда по што ќе одлучува дали ќе и биде одземена лиценцата за работа, во меѓувреме докторката се врати на клиниката. Цаца Билјановска беше четвритиот пациент позитивен на коронавирусот во Македонија. Откако се утврди дека е позитивна целата клиника беше ставена под клуч, а нејзните колеги беа ставени во изолација. Ваквото однесување на докторката тогаш го осуди министерот за здравство и колегите од фелата.

Бидејќи пренесуваше коронавирус, екс-директорката на Кожна клиника ќе плати 10.000 евра

Ивана Ефремовски — Sun, 14 Jun 2020 20:39:43 +0000

Кривичниот суд го прифати барањето на Основното јавно обвинителство и со 10.000 евра ја казни поранешната директорка на Кожната клиника Нина Цаца Биљановска порaди пренесување на заразна болест. Скопското обвинителство ова го потврди за ТВ Алсат, а докторката казната ја доби бидејќи наместо да оди во самоизолација по враќање од пат од Италија, таа одеше на работа, по што целата кожна клиника беше оневозможена да работи. Ова е првостепена пресуда и Биљановска има право на жалба.

Казна од 10.000 евра за екс-директорката на Кожна клиника поради пренесување на коронавирус

Ивана Ефремовски — Fri, 29 May 2020 11:18:55 +0000

По спроведена претходна постапка, Основното јавно обвинителство Скопје денеска до надлежниот суд поднесе Предлог за издавање казнен налог против поранешната директорка на ЈЗУ Клиника за дерматовенерологија при Универзитетскиот клинички центар „Мајка Тереза“ – Скопје, која е обвинета за кривично дело – Пренесување заразна болест по член 205 став 1 од Кривичниот законик. Надлежниот јавен обвинител на Судот му предложи за обвинетата да изрече парична казна од 40 дневни глоби со вредност на една дневна глоба од 250 евра, односно вкупна парична казна од 10.000 евра во денарска противвредност. Имено, обвинетата на 29 февруари се вратила во државава од регион во Република Италија преку граничниот премин Табановце. Но, притоа таа постапила спротивно на мерките и заклучоците на Владата согласно кои сите граѓани кои се враќаат од ризичните земји со зголемен број заболени од COVID-19, особено од Република Италија, имаа обврска да останат во домашна изолација во траење од 14 дена од денот на влегување во земјава. Исто така, со заклучоците, на сите вработени во државни и локални институции и претпријатија им беше наложено доколку во претходните две недели патувале или живеат со некој што патувал во земјите од среден или висок ризик за ширење на заразната болест, да не доаѓаат на работа и за тоа да ја известат институцијата каде работат. Но, обвинетата, иако како здравствено лице била свесна за ризикот, продолжила со своите работни обврски на Клиниката, а на 7 март била присутна и одржала предавање на симпозиум од об ласта на дерматолошките болести, со што ги довела во опасност сите учесници, предавачи, организатори и вработените на Клиниката. На овој начин таа заразната болест им ја пренела на седум свои колеги пред самата да биде хоспитализирана на Клиниката за инфективни болести со позитивен наод за COVID-19. Во текот на претходната постапка, јавниот обвинител направи детални проверки и ја обезбеди целокупната релеватна медицинска и друга документација која беше неопходна заради утврдување на решавачките факти. Притоа, беа направени проверки и беше побарана и обезбедена документација од Министерството за внатрешни работи, Министерството за здравство, ЈЗУ Центар за јавно здравје – Скопје, Државниот санитарен и здравствен инспекторат, како и од ЈЗУ Универзитетска клиника за инфективни болести и фебрилни состојби – Скопје, а беа преземени и други истражни дејствија.

Обвинителството постапува во предметот за поранешната директорка на Кожна клиника

Ивона Петрова — Thu, 26 Mar 2020 11:26:19 +0000

Основното јавно обвинителство Скопје продолжува активно да постапува во предметот со поранешната директорка на ЈЗУ Универзитетската клиника за дерматологија – Скопје, се вели во соопштението на Јавното обвинителство Од Основното јавно обвинителство Скопје, известуват дека на 19 март од страна на СВР Скопје беше поднесено писмено известување кое се однесува на поранешната директорка на ЈЗУ Универзитетската клиника за дерматологија – Скопје, а во поглед на предавањето кое таа го одржала пред поголема група доктори. Кон тоа известување, како што објаснуваат од скопското обвинителство не беше приложена целата потребна документација, туку само писмена кои се однесуваат на тоа кога лекарката се вратила во земјава од Италија и кога и била констатирана здравствената состојба на Клиниката за инфективни болести. -Заради комплетирање на потребната документација, веднаш следниот ден, на 20 март, надлежниот јавен обвинител достави наредба до СВР Скопје, како подносител на известувањето, како и барање за доставување податоци до Министерството за здравство. Од нив се бара да се приложат сите релевантни писмена во смисла на тоа кој ден поранешната директорка го држела предавањето, список на лица-учесници на тој семинар, дали и кои од тие лица биле заразени со коронавирусот и да се приложи писмена медицинска документација за инфицираноста, како на поранешната директорка, така и на учесниците на семинарот на кои таа им предавала, велат од обвинителство. По поднесената наредба и барање се уште не е постапено. По доставувањето на релевантната писмена документација, доколку има потреба обвинителството ќе преземе и други истражни дејствија, по што ќе донесе јавнообвинителска одлука.

Кривична за екс директорката на Клиниката за кожни болести Цаца Биљановска

Ивона Петрова — Thu, 19 Mar 2020 12:15:59 +0000

Министертвото за внатрешни работи поднело кривична пријава против поранешната директорка на Клиниката за дерматологија Нина Цаца Билјановска која спротивно на препораките од Владата по враќање од Италија не се самоизолирала. Техничкиот министер за внатрешни работи Наќе Чулев денес извести дека ексдиректорката се вратила од Италија на 29 февруари. Коронавирусот и беше потврден на осми март, а во меѓувреме таа одела на работа и присуствувала на симпозиум на кој имало повеќе од 100 здравствени работници. Поради контактот со ексдиректорката блиска до СДСМ, во изолација се околу 200 лица -Против неа, како и против сите оние кои не ги почитуваат одлуките на Владата и решенијата за здравствен надзор, односно извршиле прекршување на членовите 205 и 206 од КЗ, е поднесен соодветен поднесок до ОЈО, истакна на денешната прес-конференција министерот за внатрешни работи Наќе Чулев.

Предлози за гонење 7 лица за непочитување мерки во Кавадарци, но не и за доктор Цаца во Скопје?!

Љупчо Цветаноски — Thu, 19 Mar 2020 09:12:38 +0000

Основното јавно обвинителство Кавадарци денеска поднесе предлози за казнен налог за седум лица, сите од Кавадарци кои во одделни случаи го сториле кривичното дело – Непостапување според здравствени прописи за време на епидемија од член 206 став 1 од Кривичниот законик. Ваков предлог се уште нема за доктор Цаца која се шеташе по симпозиуми, забави и свадби, вратена од Италија. Дали блискоста со партијата нa власт е пресудна во случајот? Како што се наведува во соопштението од ЈОРСМ, за време на пандемија, епидемија од глобални размери определена со одлука на Генералниот секретар на Светската здравствена организација на 11.03.2020 година, обвинетите не постапиле според Писмена наредба на Министерството за здравство со која се определуваат мерки за нејзино сузбивање или спречување. -Со одлуката е определено спроведување на задолжителна самоизолација за секој државјанин на Република Северна Македонија кој влегува во државата на граничните премини, а патува од високо ризични или средно ризични земји утврдени со листата на Светската здравствена организација на денот на кој влегува во државата. Сите обвинети кои во државата дошле од различни држави, при влез во земјава на 16 март 2020 година потпишале изјави за самоизолација. Но при проверка од полициските службеници не биле затекнати во нивните домови во кои требало задолжително да ја спроведуваат мерката, се наведува во соопштението. За сите обвинети, се посочува, јавен обвинител од Основното јавно обвинителство Кавадарци до Основниот суд Кавадарци ги достави предлозите со кои предлага судот за секој од обвинетите да изрече парична казна во висина од 50 дневни глоби.

Дали неодговорноста и несоодветното постапување во случајот со директорката може да создаде ново жариште од коронавирус?

Дарко Андоновски — Sat, 14 Mar 2020 10:41:27 +0000

Состојбата со епидемијата од Корона вирусот создаде страв кај населението и многу прашања и дилеми. Засега официјално се потврдени се 13 случаи на заразени со КОВИД 19 вирусот, но веќе е прогласена кризна состојба на територијата на општините Дебар и Центар Жупа. Во ова жариште веќе се испратени и силите на АРМ. Но дали е ова единственото жариште во државата? Дали после скандалот со директорката Цаца Билјановска има и ново потенцијално жариште на зараза? Јавноста се уште нема информација за здравствената состојба на докторите кои учествуваа на симпозиумот на дермато-венеролози на кој присуствувала директорката на Клиниката за кожни болести, Нина Цаца Биљановска, која се покажа дека била заразена со корона вирусот. До сега нема информации колку од овие доктори се тестирани и колку од нив се заразиле? Директорката на клиниката за кожни болести беше еден од најскандалозните случаи за заразени од корона вирусот. Имено таа била на зимување во загрозените подрачја на Италија и од таму се вратила на 1-ви март без да се тестира и покрај тоа што била потенцијален сомнителен случај. Дополнително таа на 2-ри март се вратила на клиниката и таму била во контакт и со други вработени и пациенти, но и присуствувала и на симпозиум со стотина лекари од земјава и странство. Од ВМРО-ДПМНЕ вчера посочија дека на втори март доктор од кожната клиника се јавил во кол центарот на министерството за здравство за да го пријави нејзиното доаѓање од кризно подрачје и да побара реакција од институцијата. Следниот ден на трети март директорката веќе била известена дека е пријавена во министерството од нејзини колеги и таа утринскиот колегиум го искористила за да се заканува кон докторите од клиниката дека ќе бидат избркани од работа. Истиот ден директно доктори од клиниката го известиле и министерот Филипче, за заканите кои што ги добивале, но и за сомнежот дека директорката може да биде носител на опасниот вирус. Венко Филипче уште од трети март знаел за опасноста од ширење на опасниот вирус во една здравствена установа, во склоп на Клиничкиот Центар „Мајка Тереза“.И ништо не превземал! Првата прес конференција на Филипче за овој случај е дури после 6 дена, на деветти март ден понеделник- рече Наум Стоилковски, портпарол на ВМРО-ДПМНЕ на вчерашната прес конференција. Ниту медиумите, ниту граѓаните не знаат колку од персоналот и пациентите од клиниката за кожни болести се тестирани и дали кај некој од нив е дијагностициран корона вирусот? Според непотврдени информации до самиот ден на избувнување на скандалот со Директорката Цаца Билјановска, на клиниката за кожни болести биле примани пациенти и третирани без посебен режим. Како што информираат нашите извори, кои не ни се потврдени од институциите, дента кога се објави скандалот, на 9 –ти март, до 13 часот се прегледувале пациенти во амбулантите, што можело да се провери и од Мој Термин. Потоа настанал хаос на клиниката и таа веднаш била испразнета , а седум лежечки болни биле испишани и испратени да одат дома во различни градови од Македонија, секој како ќе се снајде. Овде се отвора прашање дали било постапено соодветно на протоколите и дали се направени стручни грешки и пропусти? Очекуваме во интерес на јавноста и здравјето на граѓаните Министерството за здравство да одговори на овие дилеми и прашања и доколку се направени пропусти на самиот ден 9-ти март, дали биле дополнително третирани и информирани и пациентите и персоналот во клиниката?

Филипче 6 дена знаел за случајот со докторката која има коронавирус и не постапил?

Ивана Ефремовски — Fri, 13 Mar 2020 11:01:42 +0000

Епидемијата со Ковид - 19 или коронавирусот во Македонија се шири, а за тоа најголема вина има неспособноста и неодговорноста на министерот за здравство Венко Филипче. Филипче со прикривање на информации и ненавремено реагирање довел до опасност на неконтролирано ширење на вирусот. Зошто го велам сето ова? Според нашите информации, а лесно можат да се потврдат во министерството за здравство, директорката на кожната клиника, Нина Цаца Билјановска, се вратила од својот одмор во загрозеното подрачје на Северот на Италија на први март на ден недела. Веќе следниот ден директорката била присутна на работа, без претходно никаква контрола на граничните премини од каде што влегла, обвинуива портпаролот на ВМРО-ДПМНЕ, Наум Стоилковски. -Истиот ден на втори март доктор од кожната клиника се јавил во кол центарот на министерството за здравство за да го пријави нејзиното доаѓање од кризно подрачје и да побара реакција од институцијата. Следниот ден на трети март директорката веќе била известена дека е пријавена во министерството од нејзини колеги. И таа утринскиот колегиум го искористила за да се заканува кон докторите од клиниката дека ќе бидат избркани од работа. Се поставува прашањето, кој и дојавил на директорката дека е пријавена во кол центарот? Да биде скандалот уште поголем, докторите од кожната клиника после ваквиот испад на директорката Цаца Билјановска, истиот ден директно го известиле и министерот Филипче, за заканите кои што ги добивале, но и за сомнежот дека директорката може да биде носител на опасниот вирус. Тоа значи дека Венко Филипче уште од трети март знаел за опасноста од ширење на опасниот вирус во една здравствена установа, во склоп на Клиничкиот Центар „Мајка Тереза“. И ништо не превземал, обвинува Стоилковски. Тој вели дека првата прес-конференција на Филипче за овој случај е дури после 6 дена, на деветти март ден понеделник. -Тоа значи дека Филипче свесно дозволил директорката 6 дена да биде во контакт со нејзини колеги, вработени во клиниката, пациенти и да се појави и одржи свое обраќање на симпозиум во еден скопски ресторан на кои што присуствувале 100-тина доктори од Македонија но и од странство. Скандалот да биде уште поголем, Клиниката за кожни болести во понеделникот на деветти март примаше дневни пациенти, додека директорката беше на испитување и веќе пренесена на клиниката за инфективни болести. Резултат на оваа негрижа на Венко Филипче е над 160 медицински лица да бидат во самоизолација, цела една затворена клиника, над 20-тина пациенти од кожна клиника кои што биле пуштени на домашно лекување во самоизолација и уште стотици и стотици луѓе со кои директорката била во директна комуникација. Од тука и директна одговорност за ваквата состојба сноси министерот Венко Филипче, порача Стоилковски.

Лекарска комора: Јавна опомена и отворање постапка пред Судот на честа за докторката Нина Цаца Билјановска

Дарко Андоновски — Wed, 11 Mar 2020 13:23:27 +0000

Јавна опомена на доктор Нина Цаца Билјановска и барање да се поведе постапка пред Судот на честа при Лекарската комора, кој е единствен независен и надлежен орган на Комората што може да расправа за одговорноста на лекарите за сторена повреда на Кодексот на медицинската деонтологија и да носи одлуки за евентуално привремено или трајно одземање на лиценцата за работа. Ова е заколучокот од одржаната вонредна седница на Извршниот одбор и Комисијата за етички и правни прашања на Лекарската комора на Република Северна Македонија, на која е расправано за етичкиот аспект на однесувањето на доктор Нина Цаца Билјановска, која откако се вратила од Италија, спротивно на препораките, продолжила со извршување на работните задачи и цела недела одела на работа. – Лекарската комора остро ја осудува постапката и однесувањето на доктор Нина Цаца Билјановска, поради тоа што со непочитување на препораките за домашна самоизолација, кои важат за сите граѓани кои доаѓаат од високо ризични земји за пренесување на коронавирусот, предизвикала морално-етичка и правна одговорност. Етичките принципи на хуманост и почитување на личноста и животот го обврзуваат докторот на медицина со своето однесување да води грижа, а не да им наштетува на своите колеги и пациенти, како и да биде спремен да преземе одговорност за своето постапување, не само спрема пациентите и колегите, туку и спрема заедницата во целина, се вели во соопштението од Лекарската комора на РСМ. Од Лекарската комора уште еднаш апелираат до докторите на медицина и до сите здравствени работници да се однесуваат како што доликува на докторската професија – професионално, одговорно и разумно, како и во целост да ги почитуваат дадените препораки, упатства и насоки од Владата на Република Северна Македонија со цел да се заштити здравјето на граѓаните.

Директорката на кожна клиника ќе биде разрешена денеска!

Дарко Андоновски — Tue, 10 Mar 2020 14:54:16 +0000

Министерот за здравство Венко Филипче соопшти дека е донесена одлука денеска да се разреши директорката на Клиниката за кожни болести. „Претседателката на ДКСК ми укажа дека кога има ваква итност може да се изврши веднаш. Денеска ќе биде направено тоа и ќе се назначи В.Д директор и покрај тоа што нема работен процес на клиниката за дерматовенерологија има работи кои течат тековно и некој треба административно да ги извршува“, рече министерот за здравство на денешната прес-конференција , Венко Филипче. Кај неа вчера беше потврдена зараза со коронавирус, но таа не пријавила кај надлежните дека патувала во Италија, туку тоа го сториле нејзини колеги. Директорката пет дена заразена одела на работа, иако препораките се 14 дена самоизолација.