нобеловец – Kurir.mk

Почина нобеловецот Кензабуро Ое

Ивона Петрова — Mon, 13 Mar 2023 12:33:36 +0000

Јапонскиот писател и нобеловец Кензабуро Ое почина на 88-годишна возраст, соопшти денеска неговата издавачка куќа „Коданша“. Ое беше еден од најзначајните книжевни творци во Јапонија по Втората светска војна. Неговите дела се занимаваат со политички, социјални и филозофски теми, како што е нуклеарното оружје, невклопувањето во општеството и егзистенцијализмот. Тој ја доби Нобеловата награда за литература во 1994 година, а беше познат и како застапник јапонскиот на пацифистички устав и борец против нуклеарната енергија, пренесува јапонската новинска агенција Кјодо. Во романот „Едноставен живот“ од 1990 година Ое се занимава со прашањето за децата со попреченост и семејството. И самиот имал син со попреченост. Меѓу неговите попознати романи е и „Тивко плачење“ од 1967 година - дело што ги преплетува митовите и историјата на јапонските шумски села со совремието.

Белорускиот нобеловец Алеш Бељацки осуден на 10 години затвор

Ивона Петрова — Fri, 03 Mar 2023 11:26:46 +0000

Минатогодишниот добитник на Нобеловата награда за мир и активист за човекови права, Алеш Бељацки, денеска од суд во Белорусија е осуден на 10 години затвор. Нобеловецот и уште двајца активисти од Центарот за човекови права „Весна“, што тој го основаше, беа уапсени за време на протестите во 2020 година против реизборот на белорускиот претседател Александар Лукашенко. Лукашенко, кој е на власт од 1994 година, ја потисна опозицијата во земјата и ги задуши сите независни медиуми. Обвиненијата во судењето на Бељацки, што почна на 5 јануари, се поврзани со тоа што „Весна“ им давала пари на политичките затвореници и помагала да ги платат нивните судски трошоци. Минатата година уапсениот активист беше прогласен за добитник на Нобеловата награда за мир, заедно со руската група „Меморијал“ и украинската организација „Центар за граѓански слободи“. Бељацки не можеше во декември да присуствува на церемонијата на доделување на Нобеловата награда, а во негово име на свеченоста зборуваше сопругата Наталија Пинчук.

Шилегов: Би бил нобеловец кога во јуни ќе знам каков снег ќе имаме во 2021 година!

Тале Кристо — Fri, 24 Jan 2020 19:21:05 +0000

Градоначалникот на Град Скопје, Петре Шилегов денеска одговараше на прашања од пред гимназијата „Никола Карев“. Тој беше запрашан за уништените јавни површини во некои делови од градот и ситуацијата со склучениот договор со фирма за чистење на снег, кој досега не падна во Скопје. -Ние и да сакаме, не можеме да стигнеме насекаде да вршиме контрола. Мора да се направи систем со кој ќе се одржуваат јавните простори. Што се однесува до фонтаната на плоштадот, таа е прескапоплатена, плочките не легнуваат како што треба. Од друга страна, кога зборуваме за снегот, Скопје е должен да има зимска служба за одржување на улиците. Јас би бил нобеловец ако во јуни оваа година знам каков снег ќе имаме во 2021 година. Станува збор за договори кои не се измислици на Петре Шилегов, истакна градоначалникот на Скопје. Инаку Град Скопје случил договор со фирмата „Аполо Инженеринг“ за изнајмување на возила за чистење на снег на улици во Скопје во периодот од 15 ноември до 15 март за оваа и наредната зима чија цена e од 64.900.000,00 денари. Во оваа сума се вклучени само 40 часа работа на механизацијата на месечно ниво, а сè над тоа се плаќа дополнително, со што сумата може да расте и неколкукратно. Иако во првите два месеца од договорот, од 15 ноември 2019 до 15 јануари 2020, не падна снег, кон фирмата добитник на тендерот исплатени се околу 263.000 евра или околу 16.225.000 денари, иако реално фирмата за истиот период нема трошоци. Доколку и следната зима има временски услови како оваа, фирмата „Аполо Инженеринг“ со која Петре Шилегов склучил договор ќе инкасира над 1.000.000 евра (64.900.000 денари) а при тоа имала минимални трошоци.