ноќни клубови – Kurir.mk

Aкциска контрола во угостителски објекти во Битола, фатени малолетници после полноќ

Магдалена Андонова — Sat, 26 Nov 2022 12:41:10 +0000

На 25/26.11.2022 година, во времето од 23.00 часот до 03.00 часот,од страна на полициски службеници од криминалистичката полиција и од униформираната полиција при СВР Битола, по претходно изготвен план, спроведена e акциска контрола во шест угостителски објекти во Битола. При контролата, во четири угостителски објекти затекнати се седум малолетници подоцна од 24 часот. Малолетниците се предадени на родителите, а по документирање на случаите ќе бида поднесени соодветни поднесоци.

Дискотеките „на нозе“, бараат реакција од Спасовкси – иницијативата „Сакаме ноќен живот“ најави протест на 27 јули

Магдалена Андонова — Sat, 23 Jul 2022 09:28:49 +0000

Летниот ноќен клуб „Хавана“ попладнево излезе со реакција откако и на средина на летото, клубовите и дискотеките во Скопје се уште се без лиценца за работа. -После 30 години Скопје е без ниту една летна дискотека и ноќен живот! Илјадници млади немаат каде да се забавуваат, додека стотици вработени ги загубија своите работни места, велат од „Хавана“. Дискотеката бара итна реакција од Министерството за внатрешни работи (МВР) и министерот Оливер Спасовски. -Да се реши овој проблем и да ни дозволат да работиме, стои во реакцијата од „Хавана“. Преку пораката „Младите треба да живеат, Скопје треба да живее!“, иницијативата „Сакаме ноќен живот во Скопје“ најави протест пред Владата на 27 јули, со почеток во 20 часот. - Ниту еден летен клуб во Скопје сè уште нема добиено лиценца за работа. За таа цел ги повикуваме надлежните да го решат проблем на метрополата со немањето на понуда за ноќен живот, се вели во најавата. Синоќа, претседателот на Независната угостителска комора, Здравко Јосифовски, во име на летните ноќни клубови истакна дека за разлика од минати години пред пандемијата, кога Скопје сè уште Скопје имал можност да се натпреварува со останати балкански градови во квалитетот на понуда на полноќните настани и програми, ова лето познатите забави веќе не постојат. - После долг период затворени и изолирани од дружење и забава младите повторно немаат каде да се социјализираат и забавуваат. Каде и што е тоа што се променило оваа година за да Mинистерството за економија не може да издаде лиценци, кога три децении летните ноќни клубови истата документација ја добивале? И наместо да се најдат начини и можности да го одржиме барем на минимално ниво ноќниот живот во градот ова лето, скопскиот полноќен живот е во целосен мрак, рече Јосифовски на вчерашната прес-конференција. Министерот за економија Крешник Бектеши денеска потврди дека е запознаен со проблемот со издавање лиценци за угостителите, односно за друштвата кои менаџираат со ноќни клубови и летните дискотеки и истакна дека се чека на добивање позитивно мислење од полицијата. -Да информиран сум. Во моментот кога ќе добиеме позитивно мислење од страна на МВР согласно процедурата на издавање на лиценци, веднаш истиот ден сите тие угостителски објекти кои ги исполнуваат условите, секако дека ќе ги добијат тие лиценци. Додека немаме мислење од страна на МВР кое е предвидена и со Закон, ние немаме законско право да ги издаваме тие лиценци, информира првиот човек на ресорот економија.

Во Прилеп, Куманово и Пробиштип, затекнати 17 малолетници по полноќ, констатирани повеќе прекршоци

Магдалена Андонова — Sun, 12 Jun 2022 13:15:38 +0000

При акциска контрола на полицијата во координација со пазарни и трудови инспектори во угостителски објекти во Прилеп, Куманово и Pробиштип од 22 до 4 часот ноќеска , констатирани се присуства на малелотни лица, лица без документи и непочитување на Законот за работни односи. Од МВР соопштија дека во Прилеп констатирано е присуство на 17 малолетници после полноќ, спротивно на законот, две лица кои не носеле документ за лична идентификација се приведени во полициска станица заради утврдување на идентитетот, а од страна на Државен пазарен инспекторат констатирано е дека во објектот работат непријавени лица, при што бил затекнат при работа и малолетник. За објектот ќе следи соодветна санкција за непочитување на Законот за работни односи. При спроведената акциска контрола на подрачјето во Куманово, исто така, констатирани се две неправилности од страна на Државниот пазарен инспекторат за вршење на нерегистрирана дејност кои ќе бидат соодветно санкционирани, а на подрачјето на Пробиштип едно лице вработено како обезбедување, кое било без документ за идентификација, е приведено во полициска станица заради утврдување на неговиот идентитет, додека од страна на Државниот инспекторат за труд констатирани се три неправилности од Законот за инспекција. Против сите лица кои сториле прекршок, полицијата ќе достави соодветен поднесок.

Пановски апелира: Да се затворат ноќните клубови до Нова година, тие се биолошки бомби за ширење на коронавирусот

Ивана Ефремовски — Fri, 12 Nov 2021 13:24:31 +0000

Во скоро време беше донесена одлуката да им се дозволи на ноќните клубови да работат, но јас апелирам таа одлука да се укине до Нова година и повторно да им се забрани на ноќните клубови да организираат забави, рече микробиологот д-р Никола Пановски во гостувањето на Канал 5.

-Ноќните клубови се практично биолошки бомби за ширење на коронавирусот. Младите луѓе можеби нема да се заразат, но голема е веројатноста болеста да ја донесат дома и да се заразат повозрасни луѓе. Исто така, сметам дека треба сите луѓе во затворен простор да носат заштитни маски. Освен во продавници и во трговски центри, луѓето кои влегуваат во разни други установи одбиваат да стават маска на лицето. Тие сметаат дека членови на една иста фамилија и дека нема потреба да носат заштитни маски, а всушност тие луѓе ја шират болеста. Затоа, апелирам до луѓето да не се групираат, а ако веќе мора да се групираат, тогаш да носат заштитни маски и да држат дистанца, вели д-р Пановски.

Од утре Софија ги затвора ноќните клубови

Магдалена Андонова — Sat, 24 Oct 2020 10:06:19 +0000

Од утре сите ноќни клубови во главниот град на Бугарија ќе бидат затворени. Мерката ќе важи во следните две недели, објави градоначалничката на Софија, Јорданка Фандакова. Одлуката доаѓа по состанокот со општинскиот штаб и врз основа на зголемените случаи на Ковид-19 и хоспитализираните пациенти во Софија, јави агенцијата БГНЕС. Фандакова ги повика компаниите во Софија, доколку има можност, да им дозволат на своите вработени да работат онлајн. (МИА)

Ноќните клубови бараат да им бидат исплатени 30% од бруто приходот поради корона-забраните

Магдалена Андонова — Sat, 24 Oct 2020 08:11:36 +0000

Ноќните клубови по остварениот протест заедно со рестораните за свадби и естрадните уметници беа повикани на разговор со Премиерот, Министерот за здравство и останати претставници на Владата на Република Македонија. „Согласно состанокот на кој се разговараше за помош на Ноќните Клубови и објаснувањето дека како најпогодени од целата ситуација, со тоа што веќе 8 месеци сме присилно затворени со клуч на врата немаме добиено никава финансиска помош од државата , ние дојдовме до договор за доставување на наши барања кои би биле разгледани со цел постигнување на договор со што би се помогнал опстанокот на ноќните клубови во државата. По доставувањето на нашето барање за финансиска помош во висина од 30% од бруто приходот на секој ЛИЦЕНЦИРАН објект за месеците во кои НЕМАМЕ работено и за месеците што нема да ги работиме во иднина со што би можеле да ги сервисираме настанатите долгови за ќирии, паушали за (струја,вода,телефони,интернет), закуп на паркинг простори, обезбедување на објектите и сл. и би продолжиле да ги сервисираме во идните месеци во кои нема да работиме , зошто со новонастанатата ситуација и порастот на бројките на заболени сигурно не би можеле да работиме во наредните 6 месеци, после две недели чекање добивме одговор дека ќе бидеме помогнати со финансиски средства во износ од 3 кирии. Искрено оваа понуда е срамна и навредлива, после 8 месеци без ниту еден работен ден, без никаква надеж и најава за наше отварање, после сите образложени трошоци со кои се соочуваме секојдневно да ни се понуди финансиска помош од само 3 кирии е апсурдно. За воља на вистината Ноќните клубови единствено кај нас од целиот регион се комплетно затворени веќе 8 месеци, сепак од целиот регион кај нас бројките на заболени се највисоки што укажува на тоа дека очигледно ние не сме причинители за ширењето на заразата и на нас ни е предизвикана најголема штета без никаква финансиска поддршка до сега што води до пропаѓање на нашите бизниси. Нашиот праг на толеранција е веќе поминат и оваа понуда од страна на Владата на Република Македонија ќе биде проследена со масовни протести и тужба кон државата за настанатата штета и нарушеното Уставно право да работиш и да заработуваш. Со ова известување би сакале да го поздравиме Премиерот Зоран Заев и неговото ветувачко однесување со разбирање за нашиот проблем и ветување за изнаоѓање на решение и да му дадеме до знаење дека долговите настанати од присилното затворање, со бизнис кој воопшто не работи немаме од каде да ги подмириме. Со тоа максимално е нарушен нашиот углед, како и егзистенцијата на нашите фамилии за кои треба да обезбедиме храна, облека и лекарства во периодот кој следува “– реагираат од здружението на ноќните клубови.

Во Каталонија се затвораат сите дискотеки и ноќни клубови

Дарко Андоновски — Sat, 25 Jul 2020 07:33:08 +0000

Властите во шпанската провинција Каталонија наредија затворање на сите дискотеки и ноќни клубови, во обид да го спречат ширењето на коронавирусот. Мерките, кои стапуваат во сила денеска и ќе важат две недели, се воведени откако во Каталонија во последните 14 дена беа регистрирани околу 8000 нови случаи, додека во истиот период се регистрирани нешто повеќе од 16.000 новозаразени во цела Шпанија. Претходно донесените мерки, кои, меѓу другото, вклучуваа и забрана за собирање на повеќе од 10 лица на јавно место, ќе важат уште една недела, по што локалните власти ќе проценат дали ќе ги продолжат. Епидемијата во Шпанија се забави во јуни, по што беше укината вонредната состојба, но оттогаш вирусот повторно се прошири во 280 жаришта, при што Каталонија бележи најголем број нови случаи.

Србија ги затвора ноќните клубови, сплавовите и кафулињата- државата воведе нови драстични мерки, еве ги деталите

Дарко Андоновски — Thu, 02 Jul 2020 19:01:08 +0000

Ноќните клубови, сплавовите и кафулињата што немаат тераси во Белград ќе бидат затворени на две недели во периодот од 23 часот до 6 часот наутро,како мерка за спречување на ширењето на коронавирусот. Тоа го најави вечерва српскиот претседател Александар Вучиќ. Тој додаде дека парично ќе бидат казнети лицата кои нема да носат заштитни маски во трговските центри и јавниот градски и меѓуградски превоз. Ќе бидат затворени и студентските домови затоа што голем број студенти се заразени. Бројот на луѓе собрани во затворено ќе биде ограничен на 100, на растојание и со маски, а на отворено на 500 лица. – Доколку тие мерки не бидат доволни, ќе има и други, најави Вучиќ. Ситуацијата во Белград е најпроблематична затоа што 82,5 проценти од сите заразени се регистрирани во главниот град на Србија.

Јужна Кореја ги затвора ноќните клубови кои станаа жаришта на Ковид-19

Ивона Петрова — Mon, 11 May 2020 06:06:57 +0000

Градоначалникот на градот Инчон во близина на Сеул нареди привремено затворање на клубовите, дискотеките и другите угостителски објекти, поради загриженост за втор бран на коронавирусот. Парк Намчун, градоначалник на Инчон, изјави дека затворањето на објектите за ноќен живот ќе трае две недели и дека секој што ќе ја наруши наредбата може да биде осуден на затворска казна до две години или парична казна од 16.380 долари. Слични чекори веќе се преземени во Сеул и провинцијата Кјонги, откако во последните денови беа откриени нови случаи на заразени поврзани со ноќни клубови во сеулската област Итевон. Јужна Кореја вчера пријави 34 новозаразени, а за првпат во последниот месец, тој број надмина 30. Властите соопштија дека 24 од 34 случаи биле поврзани со ноќни клубови во Итевон.

Во Јужна Кореја ноќните клубови се нови жаришта на коронавирус

Тале Кристо — Fri, 08 May 2020 12:48:42 +0000

Сеул, 8 мај 2020 (МИА) – Јужнокорејските здравствени власти следат мал, но растечки број на новозаразени со Ковид-19, поврзани со неколку ноќни клубови во Сеул. Најмалку 15 случаи на зараза се поврзани со клубовите во Итаевон, сеулски кварт поуларен помеѓу Корејците и туристите, објави денска корејскиот центар за контрола и превенција од болести (КЦДЦ). Во Јужна Кореја во изминатите денови регистрира мал број на зараза, а поголемиот број пристигнале од странство. Но, се очекува дека ќе порасне бројот на лица кои се заразиле во ноќните клубови. Јужнокорејската Влада поради новите жаришта планира да побара од ноќните клубови и кафулиња доброволно да ја прекинат работата еден месец, а во случај да продолжат да работат мораат да ги почитуваат превентивните мерки. Сите посетители ќе мора да носат маски, да бидат на оддалеченост од најмалку еден метар, а локалите да ги запишуваат имињата на посетителите. Локалната власт во Сеул соопшти дека има листа од 1.500 луѓе кои ги посетиле клубовите и ги повикаа да се тесираат за време на викендот и да се самоизолираат 14 денови. Јужна Кореја која има 51 милион жители во текот на месецот регистрира едноцифрен број на новозаразени лица.