нов албум – Kurir.mk

Уште нови песни и гостин – изненадување: Некст Тајм со голема промоција на албумот „Мајка“

Дарко Андоновски — Wed, 01 Jun 2022 12:56:06 +0000

По успешната промоција на нивниот најнов проект – „Кога падна на Пирина“, со кој ја воодушевија целата македонска публика, момците од „Некст Тајм“, Стефан и Мартин на 7-ми овој месец ќе го промовираат и својот албум. „Мајка“ е насловот на албумот на кој се наоаѓаат девет композиции, дел познати, дел не, а во него ќе има и една бонус трака за песната „Ја излези Ѓурѓо“, која што е во ново руво и во дует со популарниот пејач Влатко Лозаноски – Лозано. Инаку овој албум е изработуван долг период под палката на композиторот Николче Мицевски, додека пак истиот е снимен и мастеризиран во „XL studio Momiroski“. Како што кажавме, промоцијата е закажана за на 7-ми овој месец во хотелот „Мериот“, со почеток во 20 часот, а на неа се поканети сите оние кои ја сакаат и ја поддржуваат нивната музика. Познатите близнаци ќе одржат и мини концертна изведба на албумот, односно ќе испеат дел од песните кои се наоѓаат на овој албум. Албумот „Мајка“ ќе може да се купи само на промоцијата и ќе биде во лимитиран број.

Новиот албум на Кендрик Ламар стана хит на музичките стрим-платформи

Магдалена Андонова — Tue, 17 May 2022 08:59:44 +0000

Со новиот албум „Mr. Morale & the Big Steppers“, Кендрик Ламар практично ги блокираше музичките стрим-платформи „Спотифај“ и „Епл мјузик“. Албумот е пофален и од многу музичари… „Ова ‘боли’, јас сум без зборови“, напиша Еминем на Твитер. Ламар за овој албум соработуваше со голем број музичари – Би-ел-екст и Аманда Рајфер се појавуваат во песната „Die Hard“, Тејлор Пејџ во „We Cry Together“, а Самер Вокер и Гостфејс Кила во „Purple Hearts“… На албумот има вкупно девет песни. Својот претходен албум „Damn“, Кендрик Ламар го издаде пред пет години, во 2017. и за него ја доби Пулицеровата музичка награда. Потоа, Ламар работеше на музичкиот избор за филмот на Марвел – „Црниот пантер“ изведен и на Коаччлела фестивал, освои 14 „Греми“ награди и номинација за „Оскар“. Учествуваше и на Супербоулот на полувремето со Д-р Дре претходно годинава. (МИА)

„АББА“ денеска го објавува новиот албум

Тале Кристо — Fri, 05 Nov 2021 07:42:42 +0000

Легендарната шведска поп-група „АББА“ денеска се враќа на музичката сцена со објавувањето на новиот албум „Voyage“, по речиси 40 години од првото распуштање на познатиот состав. Бендот го најави новиот албум на почетокот на септември во Лондон, претставувајќи една од новите песни „I Still Have Faith in You“. Пред објавувањето на албумот, на јавноста ѝ беа претставени уште две песни – „Don’t Shut Me Down“ и модернизирана верзија на песната „Just A Notion“, снимена 1978 година, но која не се нашла на ниту еден албум сѐ досега. Составот најави и турнеја, но виртуелна – со холограми на членовите. Шведскиот квартет беше активен од 1972 до 1982 година. Последниот албум на групата „The Visitors“ беше објавен 1982 година. Групата ја сочинуваат Бјорн Улвеус (76), Бени Андерсон (74), Ани-Фрид Лингстад (75) и Агнета Фалцког (71). Со песната „Waterloo“ од 1974 година, „АББА“ победи на Евровизија, а остана запомнета и по хитовите „Dancing Queen“, „Mamma Mia“, „Money, Money, Money“, „Take A Chance On Me“ „The Winner Takes It All“ и други.

Пет години по неговата смрт, излегува нов албум на Принс

Ивона Петрова — Fri, 09 Apr 2021 10:43:24 +0000

Издавачката куќа „Сони“ објави дека следниот албум на Принс – „Welcome 2 America“ ќе излезе на 30 јули, пет години од смртта на познатиот американски музичар. Албумот од 2010 година е пронајден во студиото на поп-пејачот во Минеаполис, Минесота, САД. Во таа просторија се наоѓаат голем број демо-снимки, недовршени песни и снимки во живо. Принс почина на 21 април 2016, на 57 години. Вешто ја одржуваше легендата за неговото скриено музичко богатство додека беше жив. Во 2014 година, музичарот рече дека никогаш не им ги давал своите најдобри песни на издавачите. Американската телевизиска мрежа Си Би Ес имаше пристап до збирка од 12 песни и в недела ќе му посвети емисија за тоа. Во својата најава за новиот албум, „Сони“ ја цитираше изјавата на Принс од 2010 година: „Светот се напнува поради дезинформации. Визијата за иднината на Џорџ Орвел е тука. Ние си должиме на самите себе да останеме цврсти во нашата верба да ги надминеме тешките времиња кои претстојат“. Покрај албумот, ќе биде објавен и неговиот концерт во Лос Анџелес од 2011 година. Принс или „детето од Минеаполис“ беше еден од најголемите музичари во 80-те и 90-те години на минатиот век, со хитови како „Cream“ и „Kiss“ во коишто вметнува рифови со гитари со поетски стихови и ритам на фанк. Многумина сметаат дека неговиот најголем хит е „Purple Rain“. Тој е автор на стотици песни и добитник на шест музички Греми награди и еден Златен глобус, како и престижниот Оскар за оригинална песна „Purple Rain“ за филмот „Пурпурен дожд“ од 1985 година.

Новиот албум на Влатко Стефановски е најпродаван албум во Хрватска

Тале Кристо — Wed, 16 Dec 2020 11:20:06 +0000

Новиот албум на Влатко Стефановски – Taftalidze Shuffle, во издание на Croatia Records, се најде на врвот на официјалната листа на продажба на албуми во Хрватска. На новиот албум Влатко е придружуван од подмладеното трио. Во новата ритам секција членуваат басистот Иван Кукиќ, како и неговиот син Јан Стефановски на тапани. Албумот е сниман во домашното студио на Влатко – „Езотерија“, додека миксот и мастерингот се работеше во студиото „Тра ла ла“ на Мите Димовски. На албумот има и многубројни гости, кои уште повеќе ја оплеменија музиката и стиховите на Стефановски. Најбројни се клавијатуристите: Дамир Имери, Кирил Џајковски, Диран Тавитјан, Тихомир Поп Асановиќ, Матија Дедиќ и Васил Хаџиманов. Придружните вокали ги пееше Андријана Јаневска, додека познатиот кавалџија Теодосиј Спасов во една песна свири труба. Меѓу гостите на албумот е и актерот Никола Ристановски, кој во песната „Дијаспора“ има мал речитатив. Taftalidze Shuffle претставува извонредна колекција на вокални и инструментални теми на Влатко, низ кои бојата на неговата гитара е нешто што вечно останува во меморија на слушателот. Албумот содржи девет теми: Taftalidze Shuffle, Funky junkie, Игранка, Гаража, Global Warming – local freezing, Огледало, Немам песна за тебе, Раскрсница, Дијаспора. Освен на компакт-диск, Taftalidze Shuffle на Влатко Стефановски деновиве Croatia Records ќе го објави и на винил.

„Taftalidze Shuffle“ – нов албум на Влатко Стефановски во издание на „Croatia Records“

Тале Кристо — Thu, 19 Nov 2020 13:47:53 +0000

Новиот албум на гитаристот Влатко Стефановски „Taftalidze Shuffle“, со кој ја продолжува соработката со дискографска куќа „Croatia Records“, ќе биде објавен утре, 20 -ти ноември. На новиот албум Влатко Стефановски е придружуван од подмладеното Трио. Во нова ритам секција членуваат басистот Иван Кукиќ, како и неговиот син Јан Стефановски на тапани. Како што соопшти „Croatia Records Македонија“, и овој албум, како и сите соло-проекти на Стефановски, Влатко му го има посветено на својот град, нашето единствено Скопје, населбата Тафталиџе, која е неговото маало… Затоа песните се интимни и лични, а повторно толку блиски секому, заради сензибилитетот кој го носи музиката на Влатко Стефановски. Албумот „Taftalidze Shuffle“ е создаван во периодот од јануари до октомври 2020-та, а текстовите се пишувани од април до јуни оваа година. – Наместо да гледам ТВ и да паѓам во депресија, се одлучив да правам музика. И многу сум задоволен од резултатот, изјави Влатко Стефановски, зборувајќи за својот креативен процес. Албумот е сниман во домашното студио на Влатко – „Езотерија“, додека миксот и мастерингот се работени во студиото „Тра ла ла“ на Мите Димовски. На албумот има и многубројни гости. Најбројни се клавијатуристите: Дамир Имери, Кирил Џајковски, Диран Тавитјан, Тихомир Поп Асановиќ, Матија Дедиќ и Васил Хаџиманов. Придружните вокали се на Андријана Јаневска, додека познатиот кавалџија Теодосиј Спасов во една песна свири труба. Меѓу гостите на албумот е и актерот Никола Ристановски, кој во песната „Дијаспора“ има мал речитатив. Дизајнот на обвивката е дело на уметникот Ладислав Цветовски. „Taftalidze Shuffle“ претставува извонредна колекција на вокални и инструментални теми на Влатко, низ кои бојата на неговата гитара е нешто што вечно останува во меморија на слушателот. Албумот содржи девет теми: Taftalidze Shuffle, Funky junkie, Игранка, Гаража, Global Warming – local freezing, Огледало, Немам песна за тебе, Раскрсница, Дијаспора. Освен на компакт-диск, „Taftalidze Shuffle“ на Влатко Стефановски кон крајот на декември „Croatia Records“ ќе го објави и на винил.

Нов албум на починатиот Енио Мориконе

Тале Кристо — Fri, 06 Nov 2020 12:03:27 +0000

Посмртен албум на италијанскиот композитор Енио Мориконе, беше претставен на Интернет. Колекцијата го носи насловот „Мориконе сегрето“ (Morricone Segreto). Мориконе почина во јули годинава. Албумот содржи 27 дела напишани од композиторот меѓу 1960-тите и 80-тите. Од нив, седум се досега необјавени, а има и помалку познати, иновативни и експериментални мелодии создадени од маестрото на филмската музика. „Секоја песна е полна со значење, смисла за хумор, интензивно оркестрирање и со немирниот дух на композиторот. Во ’Мориконе сегрето’ авторот се претставува во својата најсјајна и најпрепознатлива форма. Тоа е вечна музика“, се вели во соопштението. Според „Ла Република“, во вторник, на 10 ноември – роденденот на композиторот (кога би наполнил 92 години), колекцијата ќе биде издадена на ЦД и лонг-плеј плоча. Албумот ќе може да се слуша и симнува и на легалните интернет-платформи.

Аријана Гранде го најави својот нов албум

Магдалена Андонова — Fri, 16 Oct 2020 07:30:15 +0000

Аријана Гранде за месецов го најави својот нов албум. „Едвај чекам да Ви го дадам мојот албум овој месец“, напиша таа на Твитер и на Фејсбук.

i can’t wait to give u my album this month
— Ariana Grande (@ArianaGrande) October 14, 2020

Последниот свој, петти студиски албум „Thank U, Next” таа го издаде лани. (МИА)

ВИДЕО: Миле Кузмановски го завршува својот нов албум, а ова е неговата најнова песна

Ивона Петрова — Fri, 09 Aug 2019 10:50:20 +0000

Македонскиот фолк пејач Миле Кузмановски ова лето напорно работи на својот нов албум, за кој најавува дека подготовките се при крај. Пејачот вчера ја објави својата најнова песна насловена „Чадор стар“, со автор на текстот Огнен Неделковски, музика Александар Петковски во аранжман на Рубин Димкоски. Видио записот на „Чадор стар“ е дело на Дарио Јанковиќ и неговата Генерал Продукција. -Ова лето за мене и мојот тим е навистина работно, само пред еден месец со Дарио Јанковиќ ја спакуваме со видео запис и ,,Последен воз“, музиката и аражманот се на Рубин Димкоски, а текстот на Орце Зафировски, вели Кузмановски.

Карлеуша објави фотографија од гробишта: Цела во бело со насмевка на лицето и ружа во раката покажа кого погреба (ФОТО)

Дарко Андоновски — Fri, 01 Mar 2019 14:44:28 +0000

Најновата објава на пејачката Јелена Карлеуша на социјалните мрежи направи вистински хаос и паника. Станува збор за фотографија на која Јелена позира пред гроб на чиј споменик пишува ни повеќе ни помалку „Естрада“. Пејачката е облечена во бело од глава до пети, а покрај гробот таа остава и ружа со насмевка на лицето. Откако целата фотографија ги збуни фановите и нарави вистински хаос, таа напиша дека се работи за нејзиниот нов албум. Иако фотографијата е фотомонтажа многумина коментираат дека таа е морбидна, додека други се воодушевуваа од нејзината храброст.