нов парк – Kurir.mk

Муцунски: Почна изградбата на новиот парк во Стар Аеродром

Тале Кристо — Wed, 01 Mar 2023 10:52:23 +0000

Аеродром добива нов парк, носиме нова енергија во урбаното живеење и ја унапредуваме животната средина во Аеродром, објави на својата Фејсбук страница градоначалникот на општина Аеродром Тимчо Муцунски. Го остваруваме ветувањето дека ќе инвестираме во зелени проекти, нови места за релаксација и рекреација за граѓаните. Денеска почна изградбата на новиот парк во Стар Аеродром, проект кој е целосно финансиран од општествено одговорна компанија. Аеродром добива нова парк на површина од 2300 метри квадратни, а граѓаните од овој дел на општината добиваат ново зеленило, место за одмор и рекреација кое ќе биде уредено со модерна опрема и согласно најсовремените стандарди за уредување на простори од ваков тип. Се радувам за реализацијата на зелени инвестиции, затоа што ова е уште еден чекор напред кон зелен Аеродром, и чекор преку кој уште еднаш ја потенцираме важноста на инвестициите во животната средина, но и важноста на инфраструктурни проекти кои го унапредуваат урбаното живеење. Изградбата на паркот вклучува поставување на урбана опрема, хортикултурно уредување, поплочување на патеките, современ систем за наводнување и модерно лед осветлување. Благодарам на одговорните компании кои се грижат за нашата општина и животната средина. Во следниот период најавуваме повеќе капитални инвестиции во општината: нови паркови, плоштади и енергетско ефикасни проекти кои ја создаваат новата реалност и поубавата слика за општина Аеродром, пишува Муцунски во својата објава.

ФОТО+ВИДЕО: Општина Бутел доби нов парк посветен на историскиот сребрен медал на Дејан Георгиевски

Дарко Андоновски — Tue, 25 Oct 2022 12:55:36 +0000

Градоначалникот на општина Бутел, Дарко Костовски заедно со Дејан Георгиевски кој доби сребрен медал на олимписките игри во Токио лани го отворија новиот парк во општината посветен токму на спортистот. „ОПШТИНА БУТЕЛ ДОБИ ”ОЛИМПИСКИ СОН” ПАРК ПОСВЕТЕН НА ИСТОРИСКИОТ СРЕБРЕН МЕДАЛ НА ДЕЈАН ГЕОРГИЕВСКИ“, стои во постот на градоначалникот. Во изјава за медиумите Костовски вели дека паркот се вика „Олимписки сон“. „Со ова паркче сакаме да ги мотивираме сите идни спортисти и да им порачаме дека се е возможно, па дури и еден ваков олимписки успех“. вели Костовски. Георгиевски вели дека е горд што има ваков парк во неговата општина.

Нов парк во општина Бутел на 3.000 м2

Дарко Андоновски — Mon, 14 Feb 2022 12:32:57 +0000

Градоначалникот на општина Бутел, Дарко Костовски преку статус на Фејсбук пишува дека заедно со градот Скопје започнале со изградба на нов парк во населеното место Расадник. -Денес заедно со Град Скопје започнуваме со изградба на нов парк кој ќе се протега на 3000 m2 во населеното место Расадник! Она што до пред некое време беше депонија наскоро го претвараме во модерен урбан парк и ново прекрасно катче за граѓаните на Општина Бутел! Паркот ќе содржи нови патеки за пешачење, посебен систем за наводнување, зимзелени и листопадни дрвца, нови летниковци како и содржини за најмладите. Наскоро и фудбалското игралиште кое што се наоѓа во овој потег ќе биде комплетно реконструирано! Го менуваме ликот на Општина Бутел! Ветеното го реализираме !, стои во неговиот пост на Фејсбук.