нов тренер – Kurir.mk

Хрватот Петровиќ нов тренер на Пезаро

Дарко Андоновски — Sat, 17 Jul 2021 17:47:07 +0000

Хрватскиот кошаркарски стратег Александар Петровиќ е назначен за нов тренер на италијанскиот прволигаш Викторија Либертас Пезаро, наследувајќи го на клупата својот сонародник Јасмин Репеша. Петровиќ, кој е актуелен селектор на Бразил, не е ново лице во екипата на Пезаро, за која под поранешното име Скаволини настапуваше во сезоната 1987/88. кога клубот ја освои својата прва шампионска титула во италијанското првенство. – Потребни ми беа 15 секунди да ја прифатам понудата. Освен победи, нашата екипа мора да понуди и добри игри и емоции кај публиката, изјави Петровиќ, кој претходно овој месец беше на чекор да обезбеди настап на Олимпијадата во Токио со репрезентацијата на Бразил, но загуби од Германија во финалниот натпревар на квалификациите во Сплит.

Марш ќе го наследи Нагелсман на тренерското место во Лајпциг

Дарко Андоновски — Thu, 29 Apr 2021 08:58:33 +0000

Германскиот бундеслигаш одлучи за новиот тренер кој ќе го наследи Јулијан Нагелсман од следната сезона. Тимот почнувајќи од 2021/2022 сезона ќе го води Џеси Марш од Ред Бул Салцбург. Четириесет и седумгодишниот фудбалски стручњак се обврза на двегодишна соработка. Сегашниот тренер на Лајпциг, Нагелсман ќе ја преземе функцијата главен тренер во Баерн Минхен на 1 јули 2021 година. Од овој трансфер Лајпциг ќе заработи 25 милиони евра. По 31 коло во Бундеслигата, Лајпциг е втор на табелата со 64 бода, седум помалку зад лидерот Баерн Минхен.

Алардајс нов тренер на Вест Бромвич Албион

Магдалена Андонова — Wed, 16 Dec 2020 19:55:40 +0000

Поранешниот англиски селектор Сем Алардајс е наследникот на Хрватот Славен Билиќ на клупата на Вест Бромвич Албион, (ВБА) соопшти вечерва официјално премиерлигашот од Бирмингем. Алардајс (66) потпиша договор на 18 месеци, а ВБА е негов прв клуб што ќе го води од мај 2018 година кога замина од клупата на Евертон. Новиот тренер на ВБА во минатото ги водеше екипите на Болтон, Њукасл, Блекбурн, Вест Хем, Сандерленд и Кристал Палас. Алардајс во 2016 година беше назначен за селектор на Англија, но остана на должноста само 67 денови и беше принуден да поднесе оставка, поради вмешаност во скандал околу продажба на фудбалери. (МИА)

ОФИЦИЈАЛНО: Ова е новиот тренер на Јувентус, фановите паднаа во транс од среќа!

Дарко Андоновски — Sat, 08 Aug 2020 18:25:56 +0000

Андреа Пирло и официјално стана нов тренер на Јувентус. Италијанскиот фудбалски шампион вечерва потврди дека 41-годишниот Пирло потпиша договор со важност до 2022 година. За Пирло, ова ќе биде прво искуство во тренерската кариера. На крајот на јули, тој беше назначен за главен тренер на младинскиот тим (до 23 години) на Јувентус. Пирло е светски првак во 2006 година со италијанската репрезентација. Играше за Јувентус од 2011 до 2015 година. Како дел од тимот, тој стана четирикратен шампион на Италија, го освои Суперкупот двапати и националниот Куп еднаш.

Еузебио Ди Франческо нов тренер на Каљари

Магдалена Андонова — Mon, 03 Aug 2020 10:14:53 +0000

Еузебио Ди Франческо е назначен за нов тренер на Каљари, објавено е на официјалната веб-страница на „црвено-сините“. Педесетгодишниот фудбалски стручњак потпиша договор на две сезони – до летото 2022 година. Претходниот клуб на Ди Франческо беше Сампдорија. Според пишувањата во италијанските медиуми, тренерот ќе заработува 1,8 милиони евра по сезона. Во сезоната 2019/20, Каљари го освои 13. место во Серија А со 45 бода. (MИА)

Наполи повторно бара нов тренер

Тале Кристо — Tue, 11 Feb 2020 19:41:21 +0000

Газдите на Наполи размислуваат за отпуштање на тренерот Џенаро Гатузо поради лошите резултати неодамна, пренесува „Калчомеркато“. Гатузо го замени Карло Анчелоти во декември, но немаше голема промена во резултатите на тимот и неговиот стол започна да се тресе. Наполи веќе бара иден ментор и фаворити се тренерите на Верона, Иван Јуриќ, Аталанта Џан Пјеро Гасперини, како и поранешниот тренер на Интер и Рома – Лучијано Спалети. Гатузо има договор со клубот само до летото, а најверојатно Наполи ќе чека до тогаш, за да не му плати оштета.

Елиф Елмас доби нов тренер: Гатузо застана на кормилото на Наполи

Тале Кристо — Wed, 11 Dec 2019 17:53:27 +0000

Џенаро Гатузо од вечерва е нов тренер на Наполи, објави на својот Твитер клубот од Неапол. Гатузо на тренерската функција го наследува Карло Анчелоти кој вчеравечер доби отказ. Вчера Наполи го совлада Генк (4-0) во Лигата на шампионите и избори осминафинале во елитното натпреварување. Претходно, 41-годишниот Гатузо беше преводник на Сион, Палермо, ОФИ, Пиза и Милан со кого минатата сезона го освои петтото место во Серија А и не се пласира во Лигата на шампионите.

Наџи Шенсој е нов тренер на Македонија Ѓорче Петров

Дарко Андоновски — Fri, 22 Nov 2019 19:25:22 +0000

Фудбалскиот прволигаш Македонија Ѓорче Петров го наименуваше Наџи Шенсој за нов тренер. По паузата за репрезентации, викендов се игра 15-тото коло од Првата македонска фудбалска лига, а деби на клупата на „лавовите“ од Ѓорче ќе има косовскиот Турчин Шенсој. Македонија ЃП за противник го има Работнички. Клубот од западниот дел на Скопје вечерва ја официјалираше информацијата и на Шенсој му посака добредојде и многу среќа. Шенсој е стручњак кој има водено и други македонски клубови, а на клупата на Македонија доаѓа на местото на Александар Таневски.

Официјално: Милан има нов тренер

Дарко Андоновски — Wed, 19 Jun 2019 18:45:48 +0000

Италијанскиот клуб Милан вечерва официјално потврди кој ќе биде наследник на Џенаро Гатузо. Нов тренер на „росонерите“ е Марко Џампаоло, кој претходната сезона ја водеше Сампдорија. Тој потпиша договор со клубот од Милано за две години, со можност за продолжување на соработката за уште една година. Џампаоло, кој ќе биде 60-тиот тренер во историјата на Милан, а осмиот откако Макс Алегри го напушти клубот во јануари 2014 година, ќе заработува два милиони евра годишно на „Сан Сиро“, објавија медиумите во Италија. 51-годишниот стратег, пред Милан и Сампдорија, предводеше голем број италијански клубови, меѓу кои и Каљари, Сиена, Емполи, Катанија …

Фонсека нов тренер на Рома

Дарко Андоновски — Tue, 11 Jun 2019 10:48:19 +0000

Паоло Фонсека од денес и официјално е назначен за нов тренер на Рома. Ова го соопшти италијанксиот фудбалски прволигаш кој има амбиции следната сезона да се бори за висок пласман во Серија А. -Сакам да му се заблагодарам на раководството на клубот за дадената можност да ја предводам Рома. Јас сум ентузијаст и сум мотивиран од предизвиците што нè очекуваат. Со нетрпение чекам да се преселам во Рим, да се сретнам со нашите навивачи и да започнеме со работа. Верувам дека заедно можеме да создадеме нешто посебно, изјави Фонсека. Тој се обврза на двегодишна работа со „римската волчица“. Четириесет и шест годишниот Фонсека како тренер работи од 2005 година, а од познатите екипи ги предводеше Порто, Брага и Шахтјор.