нови мерки – Kurir.mk

КОМИСИЈАТА ЗА ЗАРАЗНИ БОЛЕСТИ УТРЕ ПРЕД НОВА ОДЛУКА – ќе се менува важноста на ковид сертификатите!

Дарко Андоновски — Mon, 07 Feb 2022 19:34:32 +0000

Ќе почне ли Македонија конечно да ги следи искуствата од другите земји? Сертификатот за прележаност кој само кај нас е ограничен на 45 дена, најверојатно ќе претпи измени. Ова прашање е една од точките на утрешниот состанок на Комисијата за заразни болести каде членовите ќе дискутираат за проширување на важноста на документот – колку за споредба во многу држави тој се признава од најмалку 4 месеци па до 270 дена. -Покрај повеќето прашања на утрешниот состанок, да и тоа е една од точките на утрешниот состанок. Ќе дискутираме дали може да има измени во времетраењето на сертификатот за прележаност, изјави д-р Злате Мехмедовиќ, портпарол на КЗБ. Освен за сертификатите, членовите на Комисијата ќе дискутираат и за големата смртност кај лица кои се целосно имунизирани. Како што веќе објави Сител, врз основа на факти кои ќе треба да ги утврди посебна работна група може да има и мерки за задолжителна имунизација кај лица со коморбидитети. -Ќе дискутираме за методологијата за пресметувањ ена морталитетот и секако она што го има во дневните извештаи за смртноста, каква вакцина примиле починатите а аимунизирани, колку се со две дози, колку со бустер, колку време поминало од имунизацијата, вели д-р Мехмедовиќ. На дневен ред е и актуелната епидемиолошка состојба во земјата, а на денешната координација на министерот со надлежние од ковид центрите е констатирано дека слободни места за хоспитализација има.

КОНЕЧНО: Еве како македонските граѓани ќе може да влезат од утре во соседна Грција

Дарко Андоновски — Sun, 06 Feb 2022 07:49:17 +0000

Вакцинираните и оние кои прележале Ковид-19 и имаат валиден европски сертификат, од утре во Грција ќе патуваат слободно, без да биде потребно дополнително да се тестираат, додека пак за останатите, задолжителен е негативен резултат од ПЦР или рапид тест, согласно измените на мерките што утре стапуваат во сила, а важат и за државјаните на Северна Македонија, јави дописничката на МИА од Атина. По нешто помалку од два месеци, Грција ја укина мерката (воведена на 19 декеври 2021 година) за задолжителен ПЦР/рапид тест за сите патници од сите земји независно од тоа дали се вакцинирани или не, нешто што во петокот го соопшти и министерот за здравство Танос Плеврис кој рече дека „влезот во земјата за оние кои имаат активен европски сертификат ќе биде без задолжителен тест”. Со укинувањето на вонредната мерка, всушност условите за патување кај јужниот сосед се истите како што беа и претходно, пред да се воведе задолжителниот тест, но со ограничувања во однос на важноста на сертификатот за вакцинација, на девет месеци по втората доза и потврдата за прележан Ковид-19, 180 дена по првиот позитивен резултат. Во Службен весник на Грција веќе е објавена новата министерската одлука „Предуслови за влез во земјата за ограничување на ширењето на Ковид-19″, што стапува во сила утре и ќе важи до 21 февруари 2022 година во шест часот наутро, а МИА детално ги пренесува правилата за патување кај јужниот сосед. Влез во Грција е дозволен за посетители од државите членки на Европската Унија и Шенген зоната и за 33-те земји кои се вклучени во системот на ЕУ за дигитален сертификат (European Union Digital Covid Certificate, EUDCC), а меѓу нив и Северна Македонија, кои ќе треба да поседуваат европски дигитален сертификат за Ковид-19, поврзан со вакцинација, прележана болест или негативен тест по направен ПЦР или рапид тест.

Од утре нови правила за патување во ЕУ

Дарко Андоновски — Mon, 31 Jan 2022 10:45:10 +0000

Пред една недела, Европскиот Совет усвои препорака за координиран пристап за олеснување на безбедното и слободно движење за време на пандемијата со Ковид-19. Притоа предвид се зема значителното зголемување на стапката на вакцинација и брзото воведување на ковид сертификати, па се заменува досегашната важечка препорака. Препораката ќе стапи на сила на 1 февруари 2022 година, истиот ден како и актот за изменување на регулативата за ковид сертификатите, со која се предвидува рок за прифаќање на потврдата за вакцинација од 270 дена (неограничено во случај на примена бустер доза). Клучна одредница треба да биде статусот на патниците во однос на Ковид-19, односно дали лицето е вакцинирано, тестирано или опоравено од болеста, за што сведочи дигиталниот сертификат на ЕУ, а не регионот од кој доаѓа. Патниците со важечки дигитален сертификат на ЕУ не би требало да подлежат на дополнителни ограничувања на слободното движење. Валиден дигитален ковид сертификат на ЕУ вклучува: – Сертификат за вакцинација со вакцина одобрена на европско ниво, ако од примањето на последната доза поминале најмалку 14, но не повеќе од 270 дена. Земјите-членки може да прифатат и сертификати за вакцинација со вакцини одобрени од националните власти или Светската здравствена организација; – Негативен резултат од ПЦР тест не постар од 72 часа пред патувањето или негативен резултат од брз антигенски тест не постар од 24 часа пред патувањето; – Потврда за прележана болест на која е видливо дека не поминале повеќе од 180 дена од датумот на првиот позитивен тест; – Од лицата кои немаат дигитален сертификат на ЕУ може да се бара да направат тестирање пред пристигнувањето или најдоцна 24 часа по пристигнувањето. Патниците кои патуваат поради нужност, прекуграничните работници и децата под 12-годишна возраст би требало да бидат исклучени од ова барање. Европскиот центар за превенција и контрола на болести (ECDC) треба да продолжи да објавува мапа на регионите на земјите-членки во која преку употреба на боите на семафорот (зелена, портокалова, црвена, темноцрвена) ќе се означува потенцијалното ниво на ризик од инфекција. Картата треба да се заснова на 14-дневната стапка на пријавени случаи, стапката на вакцинација и стапката на тестирање. Новата препорака го зајакнува и т.н. механизам за итно сопирање за да одговори на појавата на нови варијанти на вирусот што предизвикува загриженост. Доколку земја-членка наметне ограничувања како одговор на појавата на нова варијанта, Советот треба да ја разгледа ситуацијата, во тесна соработка со Комисијата и со поддршка на ECDC.

Сали: Нема потреба од дополнителни рестриктивни мерки, има намалување на бројот на новозаболени

Дарко Андоновски — Fri, 28 Jan 2022 13:43:47 +0000

Нема потреба од дополнителни рестриктивни мерки до следниот состанок на Комисијата за заразни болести бидејќи во последните два дена има намалување на бројот на новозаболени, смета министерот за здравство Беким Сали. Во изјава за медиумите, Сали вели дека според податоците на Институтот за јавно здравје што на дневна основа ги добиваат, пандемијата во земјава дава знаци на стивнување и секој ден има намалување на бројот на новоинфицирани и на хоспитализирани. – Се е под контрола. Нема потреба од дополнителни мерки. Во Косово се преземени порестриктивни мерки бидејќи епиделошкоската состојба почнала да се влошува и тоа е локална политика. Ние такви рестриктивни мерки немаме и засега нема потреба, меѓутоа секоја одлука е неделна. До следниот состанок на Комисијата за заразни болести нема да има потреба од нова мерка, но се надевам дека и граѓаните ќе бидат претпазливи и вакцинацијата ќе расте, изјави денеска Сали, одговарајќи на новинарски прашања. Во моментот, како што истакна, нема потреба и од отворање на модуларните болници. Денеска е отворен ковид центарот на Клиниката за неврологија, а од вчера функционира и ковид центарот на Клиниката за кожни болести. – На ниво на држава се трудиме пациентите да бидат згрижени на ниво на болниците. Од минатата недела се преземени мерки да се зголеми бројот на кревети што значи отворање на капацитетите кои претходно беа ковид центри. Од модуларните болници засега нема потреба, рече Сали. Според податоците на Институтот за јавно здравје, во моментот во земјава во 90 проценти е присутен сојот „омикрон“, а во 10 проценти „делта“ сојот. Боледувањето на оние пациенти кои ќе имаат симптоми и по седмиот ден ќе го регулираат матичните лекари, односно доколку имаат симтоматологија на вирусот, ќе им се продолжи боледувањето по автоматизам за уште три дена. – Нашата служба „Мој термин“ ги извести сите матични лекари како да се евидентираат овие случаи. Епидемиолошки тие се водат од матичните лекари и на седмиот ден доколку имаат покачена температура или некоја друга симтоматологија, по автоматизам им се продолжува периодот на самоизолација до три дена. Матичниот лекар го регулира боледувањето, вели Сали. Во однос на тоа дали се размислува за намалување на трошоците за тестирање, министерот посочи дека е арзговарано со сите чинители кои влијаат врз цената и оти очекува позитивен одговор од нив. Прашан за транспаретноста на Комисијата за заразни болести која неколку месеци нема одржано прес-конференција, Сали со став дека Комисијата секогаш била транспарентна и нејзините одлуки и се познати на јавноста.

Нови мерки од денеска во Хрватска: Забранети се јавни собири за над 50 лица, се намалува капацитетот на гледачи на спортските натпревари

Магдалена Андонова — Mon, 10 Jan 2022 11:01:19 +0000

Во Хрватска од денеска стапуваат во сила нови антиепидемиски мерки, поради зголемениот број на заразени со Ковид-19 – воведена е обврската на работодавците да ја организираат работата од дома секогаш кога е можно, дополнително се ограничуваат собирите, а се најавува и поинтензивна контрола на угостителските објекти. Според одлуката на Националниот штаб за цивилна заштита, забранети се јавни собири и настани на отворено за повеќе од 50 лица (досега беа 100), а собирите со потврди за ковид и со согласност на локалниот штаб се ограничени на 200 лица, јави Хина. Јавните собири со повеќе од 25 лица (50 досега) се забранети во затворен простор, а оние со потврда се ограничени на 100 лица. Воведени се нови мерки за приватните собири, така што е можно присуство на 20 лица (досега 30), а исклучени се собири каде секој има потврда и во тој случај на приватниот собир ќе можат да присуствуваат 50 лица. Нема промени во работата на угостителските објекти, но поинтензивно ќе се контролираат ограничувањата на бројот на гости, одржувањето физичко растојание од 1,5 метар и користењето маски при седење на маса, како и проветрувањето и чистењето на просториите. Од денеска бројот на гледачи на спортските натпревари е ограничен, па максимум 20 отсто од трибината ќе може да се пополни во затворен простор, а до 40 отсто на отворено. Граѓаните мора да користат маски на верски церемонии и уметнички програми, во кина и изложби, како и на седници на претставнички тела, без оглед на тоа што поседуваат сертификат. (МИА)

Од 2 јануари заострени мерки за влез во Црна Гора

Дарко Андоновски — Thu, 30 Dec 2021 17:43:11 +0000

Поради влошената епидемиолошка состојба во Црна Гора, од Министерството за надворешни работи информираат дека црногорските власти ги заострија мерките за спречување на ширењето на коронавирусот, кои ќе важат од 2 до 12 јануари 2022 година. – Според оваа одлука, секој кој влегува во Црна Гора, независно од тоа дали е црногорски или странски државјанин, мора да ги исполнува следните услови: Лицето да е вакцинирано со пропишаниот број вакцини против коронавирусот, а од втората доза на вакцина да не се поминати повеќе од 6 месеци и едновремено со потврдата мора да поседува и негативен ПЦР тест кој не е постар од 72 часа или негативен брз антигенски тест кој не е постар од 48 часа; или Доказ дека лицето прележало COVID-19 (да не е поминато помалку од 10 дена и не повеќе од 180 дена од позитивниот ПЦР или брзиот антигенски тест) и едновремено со доказот мора да поседува и негативен ПЦР тест кој не е постар од 72 часа или негативен брз антигенски тест кој не е постар од 48 часа, соопштуваат од МНР. Како што посочуваат, деца под 18 години, се изземаат од мерките и за нив не се потребни ниту потврди за вакцинација или за прележана болест (ковид), ниту тестови. Државјаните на Црна Гора и странците со регулиран престој можат да влезат во земјата без овие докази, но со определување самоизолација во траење од 10 дена, која е можно да биде прекината најрано 3 дена по добивање негативен ПЦР тест, потенцираат од МНР. Повеќе информации можат да се најдат на следниот линк.

НОВИ МЕРКИ ВО ГРЦИЈА: Угостителските објекти и ноќните клубови со работно време до полноќ, дел од јавниот и приватниот сектор ќе работат од дома

Магдалена Андонова — Mon, 27 Dec 2021 16:49:24 +0000

Работно време до полноќ за угостителските објекти и ноќните клубови, работа од дома до 50 отсто за јавниот и приватниот сектор, спортски натпревари со само десет отсто исполнетост на стадионите, се новите мерки што попладнево ги соопшти министерот за здравство на Грција, Танос Плеврис, а ќе стапат во сила следниот понеделник, на 3 јануари 2022 година, јави дописничката на МИА од Атина. Плеврис објасни дека планирано е мерките да важат до 16 јануари, но ја остави отворена можност, доколку е потребно да се продолжат. Поконкретно, од следниот понеделник, угостителските објекти, кафулињата, ноќните клубови и слично ќе затвораат на полноќ, дозволено ќе биде до шест лица на една маса, а забрането е стоење. Министерот за здравство истакна дека ако не се почитуваат конкретните мерки и доколку се регистрираат прекршоци, ќе се воведе дополнителна рестрикција, објектите да работат без музиката. На стадионите, каде што Плеврис рече дека има непочитување на мерките, дозволено е присуство на публика, но само десет отсто од капацитетот или најмногу 1.000 лица и истакна дека и во овој случај ако не се почитува мерката, тогаш ќе има дополнителни рестрикции и натпреварите ќе бидат без публика. Приватниот и државниот сектор, од понеделник ќе воведе работа од дома до 50 отсто од вработените и со флексибилно работно време. Маската со висока заштита КН95, освен за супермаркетите и јавниот превоз, задолжителна ќе биде и за вработените во угостителскиот сектор.

Стапија во сила новите мерки во Грција, маската задолжителна и на отворено

Тале Кристо — Fri, 24 Dec 2021 10:12:19 +0000

Маската од денеска одново се воведува и за надворешните простори во Грција, па така, задолжителна е и на затворено и на отворено, а за прекршување на мерката предвидена е казна од 300 евра, јави дописничката на МИА од Атина. Од шест часот утрово, во Грција стапија во сила новите мерки што вчера го соопшти министерот за здравство Танос Плеврис, а освен задолжителната употреба на маска секаде, се воведува и задолжителна двојна маска (хируршка и платнена) или маска со висока заштита КН95 за супермаркетите и јавниот превоз. Паралелно се откажуваат сите јавни божиќни и новогодишни манифестации, а постои силна препорака за тестирање, како на посетителите кои пристигнуваат во Грција, така и на граѓаните пред празничните собири. -Посетителите што доаѓаат во Грција, освен задолжителниот ПЦР од 72 часа или рапид тест од 24 часа, бидејќи имаме индикации дека кај многумина болеста се појавува по направениот ПЦР или рапид, ќе бидат обврзани со силна препорака да го повторат тестирањето на вториот и на четвртиот ден по нивниот влез во земјата, за да можеме да следиме дали се заболени, рече вчера Плеврис, додека пак на новинарско прашање објасни дека за туристите, постои силна препорака за тестирање со фактот дека е „многу тешко, речиси невозможно да се контролира“. Новите мерки ќе важат до 3 јануари во шест часот наутро, додека пак веројатно е дека по празниците ќе бидат воведени нови мерки. Плеврис, рече дека мерките се во две фази, првата од денеска, а втората од 3 јануари 2022 години. За вториот пакет мерки по Нова година, надлежната комисија на епидемиолози во понеделник, ќе одржи состанок за да ги разгледа новите податоци и да ги прецизира деталите. Во втората фаза, од 3 јануари, мерките ќе се однесуваат на ноќниот живот, во однос на работното време на клубовите и баровите, на работа од дома, на спортските натпревари и евентуалното одржување без публика. Министерот за здравство на Грција истакна дека во секој случај, новите мерки и првиот пакет и вториот по Нова година, нема да упатуваат на евентуален локдаун и целосен карантин, нема да се воведе задолжително праќање смс за излегување, а волјата на Владата е да не се затворат училиштата. Како што е и досега пракса во Грција, мерките во внатрешноста на земјата, освен за Грците, важат и за туристите.

Од утре нови мерки во Грција: Силна препорака посетителите да се тестираат два пати по пристигнувањето

Тале Кристо — Thu, 23 Dec 2021 10:24:12 +0000

Силна препорака туристите да се тестираат на вториот и четвртиот ден по пристигнувањето; задолжителна маска и на отворено и на затворено; задолжителна двојна маска или КН95 во супермаркетите и јавниот превоз; откажување на сите јавни собири за празниците; силна препорака за тестирање пред празничните собири, се новите мерки на грчката Влада што од утре стапуваат во сила во Грција, јави дописничката на МИА од Атина. Министерот за здравство на Грција Танос Плеврис, соопштувајќи ги одлуките на Владата рече дека мерките се во две фази, првата е од утре, а втората од 3 јануари 2022 години, но за кои дополнително ќе одржи состанок надлежната комисија на епидемиолози. Во втората фаза, по Нова година, мерките ќе се однесуваат на ноќниот живот, во однос на работното време на клубовите и баровите, на работа од дома, на спортските натпревари и евентуалното одржување без публика. Плеврис, рече дека во секој случај,новите мерки нема да упатуваат на евентуален локдаун и целосен карантин, нема да се воведе задолжително праќање смс за секое излегување од дома, а волјата на Владата е да не се затворат училиштата. Вчера комисијата на епидемиолози одржа состанок и излезе со конкретни препораки, кои Владата ги прифати, додека пак во понеделник, на 27 декември одново ќе заседава, за да ги разгледа новите податоци и да ги прецизира мерките за после Нова година.

Важна вест за сите Македонци кои сакаат да патуваат во Германија, Грција или Австрија: Земјите воведоа нови мерки за нашите граѓани, еве кои се тие

Магдалена Андонова — Tue, 21 Dec 2021 12:20:29 +0000

Република Северна Македонија не се смета повеќе за Ковид “ризична област” во Сојузна Република Германија. Со најновата одлука на германските власти, им се дозволува неограничен влез во Германија на сите државјани на Македонија. Сепак, сите лица над 12 години, кои пристигнуваат во Германија, без разлика со кој вид транспорт и понатаму ќе треба да приложат потврда за негативен тест или потврда за прележан Ковид-19 или потврда за целосна вакцинација. Инаку со најновата одлука на Република Грција, сите патници над 5 годишна возраст при влез во Грција, покрај сертификатите за извршена вакцинација или прележана болест, мораат да поседуваат потврда за негативен резултат од ПЦР-тест (не постар од 72 часа) или потврда за негативен резултат од рапид-тест (не постар од 24 часа). Додека за влез во Република Австрија, сите лица треба да приложат сертификат за целосна вакцинација, или доказ за примена бустер доза на вакцина или доказ за прележана болест (не постари од 6 месеци), заедно со негативен ПЦР тест (не постар од 72 часа). Во овие случаи не се определува мерка карантин.