нуклеарка – Kurir.mk

Украински разузнавачи тврдат дека Русите планираат да ја гранатираат нуклеарката Запорожје

Тале Кристо — Sun, 11 Sep 2022 12:34:23 +0000

Украинското воено разузнавање тврди дека Русите повторно планираат да ја гранатираат нуклеарната централа Запорожје, најголемата нуклеарна централа во Европа, која е под окупација на руските сили. Како што пренесува Киев Индипендент, претставници на разузнавањето тврдат дека руските сили планираат нов напад врз нуклеарната централа Запорожје и блискиот град Енерходар. Работата на нуклеарната електрана Запорожје, која е под руска контрола, во текот на ноќта е целосно прекината како мерка за безбедност на централата, соопшти денеска украинската енергетска компанија Енергоатом. Компанијата прецизираше дека го исклучила шестиот реактор на нуклеарната централа од електричната мрежа во 03:41 часот по локално време. – Во тек се подготовки за да се излади и да се доведе во студена состојба, соопшти Енергоатом. Компанијата додаде дека вчера успеала да ја обнови инфраструктурната врска на централата со електричниот систем, кој, според „Енергоатом“, бил оштетен од руско гранатирање. На овој начин повторно стана возможно централата да се напојува од украинскиот енергетски систем. – Донесена е одлука да се исклучи блокот број 6 и да се доведе во најбезбедна состојба – студена, се вели во соопштението на енергетската компанија. Енергоатом во исто време нагласи дека „останува висок ризикот од предизвикување дополнителни штети на инфраструктурата“, што би создало потреба од „напојување на централата со дизел генератори, а ова решение би било краткорочно, земајќи ги предвид технолошкиот ресурс и количината на достапно дизел гориво“. Киев во средата ги повика сите жители на областите окупирани од Русија околу нуклеарната централа Запорожје, која е најголемата нуклеарна централа во Европа, да се евакуираат заради нивна безбедност.

Гроси: Веднаш да се запре гранатирањето на подрачјето на нуклеарката Запорожје

Тале Кристо — Fri, 09 Sep 2022 15:41:58 +0000

Веднаш да се запре гранатирањето на подрачјето на нуклеарната електрана Запорожје и да се воспостави заштитна безбедносна зона, повика генералниот директор на Меѓународната агенција за атомска енергија (МААЕ), Рафаел Гроси. „Гранатирањето околу нуклеарната електрана Запорожје мора да престане и веднаш да биде договорена зона на нуклеарна сигурност и безбедност“, напиша Гроси на социјалните мрежи. Тој побара итен прекин на гранатирањето на целото подрачје, наведувајќи оти нападите довеле до исклучување на струјата во Енергодар, град близу нуклеарката.

Украина помогнала во обновувањето на интернет врските меѓу МААЕ и заземената нуклеарка во Запорожје

Магдалена Андонова — Sat, 11 Jun 2022 14:48:17 +0000

Украинската државна нуклеарна компанија „Енергоатом“ денеска соопшти дека помогнала да се обноват интернет врските меѓу Меѓународната агенција за атомска енергија (МААЕ) и серверот на украинската нуклеарна централа во Запорожје, што е окупирана од руските сили. Во соопштението на „Енергоатом“ се наведува дека врската со серверите на централата била изгубена на 30 мај, но дека таа била обновена на 10 јуни, што и овозможило на МААЕ да продолжи со следењето на податоците за контролата на нуклеарниот материјал во централата, пренесуваат британските медиуми. Руските сили ја зазедоа нуклеарната централа Запорожје на почетокот на март. (МИА)

СИПРИ: Не се очекува Путин да употреби нуклеарно оружје во Украина

Ристе Здравков — Fri, 25 Feb 2022 10:53:52 +0000

Не се очекува рускиот претседател Владимир Путин да ги релаизира неговите закани за употреба на нуклеарно оружје во операциите во Украина, проценува Меѓународниот институт за политички истражувања во Стокхолм (СИПРИ). Директорот на СИПРИ, Ден Смит, не смета дека крајното решение на кризата ќе резултира со нуклеарен конфликт. -Но, за жал и самото постоење нуклеарно оружје сепак значи дека се остава отворена и таа колку и да е мала можност, вели тој. Рускиот претседател Путин вчера најави дека испраќа трупи во Украина, со што се остварија стравувањата од инвазијата врз соседната земја. Во неговото обраќање го нагласи фактот дека Русија е „една од најголемите нуклеарни сили во светот“. Според последниот годишен извештај на СИПРИ објавен во јуни минатата година, Русија располага со повеќе од 6.255 од вкупно 13.080 нуклеарни боеви глави колку што ги имаат сите девет нуклеарни сили во светот. Во својот арсенал САД располагаат со 5.550 нуклеарни боеви глави. Смит ги отфрла аргументите со кои се тврди дека нуклеарниот арсенал во светски рамки придонесува за меѓународна стабилност. -Луѓето кои со посочуваат тој аргумент треба да ја имаат предвид моменталната нестабилност што ја преживуваме и да разберат дека нуклеарното вооружување не придонесува кон стабилност. Напротив, придонесува кон недоверба, сомнеж, непријателство, нестабилност, оценува директорот на СИПРИ, Ден Смит.