нуклеарна катастрофа – Kurir.mk

Германска агенција за радијација: Ризикот од нуклеарна катастрофа во Украина сè уште е висок

Тале Кристо — Sat, 18 Feb 2023 12:41:38 +0000

Ризикот од катастрофа во нуклеарна централа во Украина поради борби или губење на надворешно напојување останува висок, и покрај тоа што заканата не е во фокусот на вниманието, изјави шефот на германската Федерална канцеларија за заштита од радијација. Инге Паулини рече дека постои значителен ризик да се случи несреќа што ќе има далекусежни последици сè додека војната продолжува. - Речиси една година по почетокот на војната, оваа опасност веќе се чини дека се повлекува во позадината на јавната свест, изјави таа во интервју за ДПА. Освен директен напад врз нуклеарка, Паулини рече дека најмногу е загрижена поради ризикот поврзан со дефектите на напојувањето. Ако надворешното напојување со електрична енергија на нуклеарната централа се прекине, а резервните извори исто така не успеат, тоа може да доведе до нуклеарно топење. - Електричната енергија е апсолутно неопходна за безбедно работење, рече Паулини. Можно е, рече таа, борбените операции повторно да предизвикаат проблеми со снабдувањето со електрична енергија на нуклеарните постројки. Во меѓувреме, продолжува тензијата околу нуклеарната централа Запорожје во југоисточна Украина, која е окупирана од Русија. Минатата година, нуклеарката – која е најголема во Европа – беше постојано гранатирана и имаше проблеми со снабдувањето со електрична енергија. Паулини верува дека притисокот за безбедносна зона околу централата во Запорожје – како што бара Меѓународната агенција за атомска енергија (МААЕ) – е најдобриот начин на дејствување.

Бајден: Светот се поблиску до нуклеарен Армагедон од 1962 година

Ивона Петрова — Fri, 07 Oct 2022 05:13:52 +0000

Американскиот претседател Џо Бајден изјави дека ризикот од нуклеарно уништување на светот е на највисоко ниво од кубанската ракетна криза од 1962 година. Ова доаѓа откако руски официјални лица зборуваат за можната употреба на тактичко нуклеарно оружје, а во моменти кога бележат значајни неуспеси во војната со Украина, пренесува Ројтерс. Бајден рекол дека рускиот претседател Владимир Путин е „момче кое добро го познава“ и дека рускиот лидер „не се шегува кога зборува за употреба на тактичко нуклеарно оружје или биолошко или хемиско оружје“, наведува британската агенција. Додава и дека светот не се соочил со ваква можност уште од времето на Кенеди и кубанската ракетна криза. Бајден сугерира и дека заканата на Путин е реална бидејќи како што вели, неговата војска се покажала многу послабо од очекуваното на терен.

Зеленски предупреди на опасност од нова нуклеарна катастрофа

Ивона Петрова — Thu, 11 Aug 2022 12:07:27 +0000

Украинскиот претседател Володимир Зеленски ја предупреди меѓународната заедница на опасност од нова нуклеарна катастрофа, слична на таа во Чернобил од 1986 година, јави ДПА. – Русија е терористичка држава, што ја држи во заложништво нуклеарната централа Запорожје и ја користи за уцена, истакна тој преку видеообраќање на отворање на донаторска конференција за Украина во Копенхаген. Како што тој додаде, „Русија денес е уште поцинична и поопасна од Советскиот сојуз, кој тогаш се обиде да ја скрие нуклеарната катастрофа во Чернобил“. Според него, Европа треба да се заштити од „оваа закана“. – Нуклеарната централа Запорожје не е само најголемата во Европа, туку и трета по големина во светот. Одговорот на дејствата на Русија треба да биде сеопфатен, смета Зеленски. Тој нагласи дека Украина има потреба од максимално оружје и муниција, со цел да се одбрани. – Никому не му требаат нови катастрофи, подвлече украинскиот претседател.

Aмериканската амбасадорка во ОН: Светот за влакно избегна нуклеарна катастрофа

Магдалена Андонова — Fri, 04 Mar 2022 18:36:19 +0000

Светот за влакно избегна нуклеарна катастрофа, кога избувна пожар за време на рускиот напад врз нуклеарната централа Запорожје во Украина, изјави денеска американската амбасадорка во ОН, Линда Томас-Гринфилд. Таа побара гаранција од Москва дека таков напад нема да се повтори. Обраќајќи се на вонредниот состанок на Советот за безбедност на ОН, Томас-Гринфилд истакна дека нападот укажува на „опасна нова ескалација“ на руската агресија против Украина и предупреди дека „непосредна опасност“ сè уште постои, наведувајќи дека руските војници се оддалечени 32 километри од вториот по големина нуклеарен објект во Украина. Воените операции околу нуклеарните локации се неприфатливи и неодговорни, истакна заменик-генералниот секретар на ОН за политички и мировни прашања Розмари ДиКарло на седницата на Советот за безбедност на ОН. – Нападите врз нуклеарни постројки се спротивни на меѓународното хуманитарно право. Треба да се направат сите напори за да се избегне катастрофален нуклеарен инцидент, порача ДиКарло на вонредниот состанок на Советот за безбедност на ОН, откако руските сили во Украина ја нападнаа и зазедоа нуклеарната централа во Запорожје. (МИА)

35 години од нуклеарната катастрофа во Чернобил

Ивона Петрова — Mon, 26 Apr 2021 06:32:39 +0000

Огромната и празна зона околу нуклеарната централа во Чернобил, местото на најтешката нуклеарна несреќа во светот што се случи на денешен ден пред 35 години, е страшен споменик на човечките грешки, а сепак Украинците бараат инспирација, удобност – и приход од тоа. Реакторот број четири во електраната на 110 километри северно од главниот град Киев експлодираше на 26 април 1986 година, кога радиоактивниот материјал беше исфрлен високо кон небото. Советските власти ја влошија катастрофата не успевајќи да и кажат на јавноста што се случило. Иако блискиот град Припјат беше евакуиран следниот ден, два милиони жители на Киев не беа информирани и покрај опасноста. Остатокот од светот дозна за катастрофата дури откако беше откриено зголемено радиоактивно зрачење во Шведска. На крајот, повеќе од 100.000 луѓе беа евакуирани од областа, а во таа област останаа само работниците кои го чистеа реакторот. Радијација имаше од електраната до 2019 година, кога беше покриено со голем штит. Во таа област, и покрај опасноста, бројот на туристи е зголемен по мини-серијата на ХБО „Чернобил“ од 2019 година, јави Бета. Градот Припјат, кој некогаш имал 50.000 жители, претежно работници, сега е напуштен, а туристите се најмногу заинтересирани за посета на урнатините. Иако нивото на зрачење во зоната е доволно ниско за да можат да го посетат туристите, забранет е постојан престој. Сепак, повеќе од 100 луѓе се уште живеат во пошироката област околу нуклеарната централа, и покрај наредбите да ја напуштат областа. Долгорочните ефекти врз здравјето на луѓето остануваат предмет на интензивна научна дебата. Веднаш по експлозијата, околу 30 работници во погоните и пожарникари починаа од радијација. Подоцна, илјадници луѓе починаа од болести поврзани со зрачење, како што е рак. На изненадување на многумина кои очекуваа областа да биде мртва зона, таму се уште има див свет како мечки, бизони, волци, диви коњи и десетици видови птици. Според научниците, животните биле многу поотпорни на зрачење отколку што се очекувало и можеле брзо да се прилагодат на силното зрачење. Реакторите во Чернобил треба да бидат демонтирани до 2064 година.

ВИДЕО: Дрон влезе во Чернобил, погледнете како изгледа реакторот 5

Ивона Петрова — Sat, 05 Dec 2020 09:27:34 +0000

Едно од најопасните и најнепристапни места, нуклеарната централа во Чернобил, е истражувано од дронот „Елиос 2“. „Елиос 2“ за првпат по нуклеарна несреќа во април 1986 година влезе во 5 реактор за да истражи дали има нуклеарен отпад. Овој реактор бил во завршна фаза на изградба за време на експлозијата, но не беше познато дали во базените имало прачки со гориво од осиромашен ураниум. „Елиос 2“ откри дека базените се празни, односно дека нема реактен нуклеарен отпад во реакторот.

Дали би прифатиле да влезете во оваа вода: Отворена плажата во Фукушима, осум години по нуклеарната катастрофа (ФОТО)

Дарко Андоновски — Sun, 21 Jul 2019 14:50:51 +0000

Голем број деца и сурфери влегоа вчера во морската вода во близина на нуклеарната централа Фукушима 1, првпат по хаваријата која се случи во 2011 година. Плажата Китаиѕуми, која е на околу 25 километри северно од нуклеарната централа, се исполни со луѓе откако властите на градот Минасома ја повлекоа забраната. Таа плажа била многу популарна меѓу сурферите пред катастрофата. Таму се одржувале национални и светски првенства. – Пораснав, гледајќи го тука морето. Куќата ми ја однесе цунамито. Првпат се враќам тука по девет години, изјави еден од посетителите. Во март 2011 година силен земјотрес со интензитет од девет степени, кој предизвика цунами, го опустоши брегот во префектурата Фукушима и доведе до тројно истекување во нуклеарката. Во катастрофата загинаа околу 18.000 луѓе.