ОАЕ – Kurir.mk

Западот незадоволен од трговијата помеѓу ОАЕ и Русија

Ивана Ефремовски — Tue, 05 Sep 2023 05:35:15 +0000

Официјални лица на САД, Велика Британија и на Европска Унија се обидуваат заеднички да извршат притисок врз Обединети Арапски Емирати (ОАЕ) да ја запрат испораката на стоки во Русија што би можеле да и помогнат на Москва во војната против Украина, објави американскиот весник „Волстрит журнал“, повикувајќи се на американски и европски претставници. Официјални лица од Вашингтон и европските престолнини од синоќа се во посета на ОАЕ, како дел од колективниот глобален напор компјутерските чипови, електронските компоненти и другите така наречени производи со двојна употреба, кои имаат и цивилна и воена примена, да бидат вон дофат на Русија. ОАЕ, членка на ОПЕК плус, во која е вклучена Русија, одржува добри врски со Москва, и покрај притисокот од Западот да помогне во изолацијата на Русија поради инвазијата врз Украина. (МИА)

ОФИЦИЈАЛНО: Брестовац го презеде кормилото на ОАЕ

Бошко Тасиќ — Wed, 03 May 2023 04:29:20 +0000

Maкедонскиот ракометен тренер Данило Брестовац и официјално е претставен за нов селектор на репрезентацијата на Обединетите Арапски Емирати. Поранешниот предводник на нашиот национален тим замина од Тиквеш на неколку кола пред крајот на сезоната и се реши за нов интернационален предизвик. Брестовац во ОАЕ пристигна уште пред неколку дена и се запозна со новите соработници во оваа федерација по што беше промовиран во селектор на оваа селекција.

ОАЕ ќе ја снабдуваат Германија со течен гас и дизел

Ивана Ефремовски — Sun, 25 Sep 2022 15:19:50 +0000

Обединетите Арапски Емирати (ОАЕ) и Германија, за време на посетата на германскиот канцелар Олаф Шолц (Шолц) на Абу Даби, денеска потпишаа договор со кој се предвидува снабдување на Германија во 2022 и 2023 година со течен гас и дизел. Министерот за индустрија на ОАЕ, султан ал Џабер, го поздрави „новиот историски договор“ кој „го зајакнува растечкото енергетско партнерство меѓу ОАЕ и Германија“, за време на потпишувањето на договорот во присуство на Шолц, пренесоа медиумите. Шолц, кој се сретна со претседателот на ОАЕ Мухамед бин Зајед Ал-Нахјан, исто така присутен на потпишувањето, го поздрави договорот за „енергетска безбедност“. Договорот предвидува извоз на течен природен гас во Германија на крајот на 2022 година, по што ќе следи испорака на дополнителни количини во 2023 година. Локалните медиуми јавија дека во септември имало директна испорака на дизел за Берлин и додаваат дека во 2023 година Германија ќе добива околу 250.000 тони дизел месечно, пренесува Бета. Шолц е на кратка турнеја низ земјите од Заливот. Вчера беше во Саудиска Арабија, денеска е во ОАЕ и на крајот на денот ќе го посети Катар.(МИА)

ОАЕ во ноември ќе лансираат ровер на Месечината

Катерина Бојаџиева — Mon, 19 Sep 2022 15:17:14 +0000

Обединети Арапски Емирати (OAE) во ноември ќе го лансираат својот прв лунарен ровер, вселенско летало без екипаж, кое ќе ја проучува површината на Месечината, изјави денеска директорот на мисијата Хамад Ал Марзуд. Роверот, наречен Рашид по владејачкото семејство во Дубаи, ќе биде лансиран на ракетата „Фалкон 9 Спејс Икс“ од вселенскиот центар Кенеди на Флорида во периодот од деветти до 15 ноември. Точната датумот ќе биде објавен следниот месец. Роверот Рашид треба да стигне до Месечината во март следната година со помош на Јапонија. Мисијата на Месечината е дел од стратегијата на ОАЕ да ја преземат водечка улога во истражувањето на Вселената. Доколку мисијата успее, ОАЕ би можеле да станат четвртата земја што испратила вселенско летало на Месечината, приклучувајќи им се на САД, Советскиот Сојуз и Кина. Безуспешни беа мисиите на Индија, Израел и на Јапонија. Еден сателит на ОАЕ е во орбитата на Марс и ја проучува атмосферата на Црвената планета. Овој проект беше спроведен во соработка со Јапонија во 2021 година. ОАЕ планираат да основаат човечка колонија на Марс во 2117 година.

Кој е шеикот Мухамед бин Зајед, ново-стар претседател на ОАЕ?

Ристе Здравков — Sat, 14 May 2022 14:39:56 +0000

Долгогодишниот де факто владетел на Обединетите Арапски Емирати, шеикот Мохамед бин Зајед Ал Нахјан, беше избран за претседател во саботата, објавија официјалните медиуми, еден ден по смртта на поранешниот лидер Шеик Калифа. Шеикот Мохамед беше едногласно избран од Федералниот врховен совет, составен од владетелите на седумте емирати, и го направи трет претседател на земјата богата со нафта, основана од неговиот татко во 1971 година. Многу очекуваното доаѓање на Шеик на власт ја формализира неговата позиција како водач на пустинска држава со 10 милиони жители. МБЗ, како што го нарекуваат колоквијално, (61) е де факто претседател на ОАЕ од 2014 година, кога неговиот полубрат Шеик Калифа доживеа мозочен удар и исчезна од јавноста. Брзината на денешната објава, само еден ден по смртта на шеикот Калифа, изгледа дизајнирана да покаже единство и да го убеди светот во стабилноста на оваа клучна нација која произведува нафта и гас и е домаќин на западните воени сили. Под водство на шеикот Мохамед, Обединетите Арапски Емирати испратија човек во вселената, испратија сонда на Марс и го отворија својот прв нуклеарен реактор, користејќи нафта за да развие порешителна надворешна политика. Тесно обединети со Саудиска Арабија, ОАЕ се позиционираа како лидер на преобликуваниот Блиски Исток по повлекувањето на традиционалните сили и намаленото учество на САД, врските со Израел и приклучувањето кон војната против борците поддржани од Иран во Јемен. „Непречената транзиција на власта во ОАЕ ја одразува трезвеноста на институционалната работа и напредното ниво на механизми за управување и нивната стабилност“, изјави за АП Анвар Гаргаш, висок дипломат во ОАЕ.

View this post on Instagram

A post shared by Mohamed bin Zayed Al Nahyan (@mohamedbinzayed)

Филантроп, војник и љубител на уметноста МБЗ е „тежок“ на околу 30 милијарди долари (богатството на неговото семејство се проценува на над 150 милијарди долари) и има блиски врски со рускиот претседател Владимир Путин и поранешниот американски претседател Доналд Трамп. Инаку, тој е голем пријател на Србија и на претседателот Александар Вучиќ, со кого се сретна неколку пати со цел подобра соработка на полето на билатералните односи меѓу двете земји и промовирање на заеднички проекти од големо значење за двете земји. Познато е и дека тој е близок со претседателот на Франција, Емануел Макрон, кој најави заминување во Емиратите по повод смртта на шеикот калиф Бин Зајед Ал Нахјан со цел да ја даде својата поддршка на владејачкото семејство, со кое Франција има деловни и воени врски. Тој е многу образован и поминал воена обука. Своето образование го започнал на Кралската академија во Рабат, Мароко, каде студирал до 10-годишна возраст. Потоа се вратил во Абу Даби каде го продолжил своето образование. Тој помина едно лето во независното училиште Гордонстон во Шкотска. По завршувањето на училиштето, тој бил испратен во Кралската воена академија Сендхерст во Обединетото Кралство. За време на неговиот престој во Сандхерст, тој завршил курс за вооружување, курс за летање, курс за падобран и се обучил за тактички авиони и хеликоптери.

View this post on Instagram

A post shared by محبين الشيخ محمد بن زايد 🇦🇪 (@shkmbz)

Тој е жесток борец против исламскиот екстремизам, а во борбата против Иран и Муслиманското братство ги сметаше САД и Трамп за негови главни сојузници. Сепак, од пандемијата на коронавирус, ОАЕ се обидуваат да ги рехабилитираат врските со Иран и Турција, кои ги поддржуваат исламистите во регионот. Шеикот Мохамед е во блиски односи и со рускиот претседател Владимир Путин и во минатото посредуваше во разговорите меѓу Путин и Трамп. Тој е и близок пријател на поранешниот американски претседател Џорџ Буш. Кога шеикот Мохамед се оженил со принцезата Салам во 1981 година, тој наредил изградба на стадион кој лесно може да прими 20.000 гости на седумдневна церемонија. Се проценува дека свадбата чинела 100 милиони долари. Поседува два приватни авиони – Боинг 747 (А6-ОАЕ) и Боинг 787 (А6-ПФЦ), а на море ужива во јахта од 60 милиони долари по име Рабдан. Шеикот претходно како канцеларија ја користеше претседателската палата во Абу Даби. Внатре во палатата е елегантна културна знаменитост позната како Каср Ал Ватан, која е отворена за јавноста за прикажување на културното наследство на ОАЕ. Со посредство на МБЗ, во Абу Даби беше отворен Лувр Абу Даби, Музеј на уметност и цивилизација, а се зборуваше и за отворање на Галеријата Гугенхајм. Тој е голем љубител на соколи и е многу ангажиран во нивното зачувување, поради што го основал фондот за заштита на Мохамед бин Зајед, кој обезбедува финансиска поддршка за да се обезбеди заштита на поединечни видови, како и да им оддаде чест на оние поединци кои неуморно работат за да ги заштитат такви видови. Тој е познат и како голем филантроп. Тој донираше 55 милиони долари на Глобалната иницијатива на Обединетите нации за борба против трговијата со луѓе. Во 2011 година, тој и Фондацијата Бил Гејтс ветија по 50 милиони долари за финансирање на купување и испорака на вакцини за деца во Авганистан и Пакистан. Хуманитарниот маратон Zaied, иницијатива што тој ја покрена во 2005 година, собра милиони долари за ширење на свеста за болестите на бубрезите. Поддржал разни други глобални програми.

ОАЕ уништи две ракети насочени кон Абу Даби

Тале Кристо — Mon, 24 Jan 2022 06:52:11 +0000

Министерството за одбрана на Обединетите Арапски Емирати соопшти дека се уништени два проектила истрелани кон Абу Даби, пренесе Бгнес. – Силите за воздушна одбрана на Обединетите Арапски Емирати (ОАЕ) пресретнаа два проектили истрелани од бунтовниците Хуси од јеменското движење Ансар Алах кон главниот град Абу Даби, објави новинската агенција ВАМ, цитирајќи го Министерството за одбрана на ОАЕ. Според Министерството, остатоци од проектилите паднале во неколку области на емиратот Абу Даби без жртви или повредени.

Кери во ОАЕ на потпишување регионален договор за чиста вода и енергија

Тале Кристо — Mon, 22 Nov 2021 20:47:54 +0000

Специјалниот претставник на американскиот претседател за климата, Џон Кери ќе отпатува за Обединетите Арапски Емирати, каде ќе присуствува на церемонија за потпишување Проект Просперитет, регионална соработка во областа на чистата вода и енергијата, соопшти Стејт департментот. Во соопштението се наведува дека договорот ќе ги продлабочи партнерствата на земјите како Јордан, Израел и ОАЕ да ги достигнат целите од Парискиот договор за климата и да ги намалат јаглеродните гасови во регионот, како и да се обезбедат нови извори на свежа вода во регионот.

Бин Зајед: ОАЕ ја надминаа кризата со Ковид-19

Катерина Бојаџиева — Wed, 06 Oct 2021 13:37:34 +0000

Престолонаследникот на Абу Даби, Мохамед бин Зајед денеска изјави дека во Обединетите Арапски Емирати (ОАЕ) месецов се регистрирани најмал број заразени со Ковид-19 од летото минатата година, што значи дека е надмината кризата со коронавирусот. – Сакам сите да Ве уверам дека нашите животи мора да се вратат во нормала, посочи бин Зајед. Помалку од 200 нови случаи на Ковид-19 се пријавени во седумте емирати на ОАЕ овој месец, што најмала бројка од август минатата година. Иако животот во ОАЕ во голема мера се врати во нормала се уште во сила е носење маски и држење на социјална дистанца. Во ОАЕ регистрирани се над 737,000 инфицирани лица со Ковид-19 и 2.104 смртни случаи.

САД продаваат оружје на Обединетите Арапски Емирати за 23 милијарди долари

Тале Кристо — Wed, 14 Apr 2021 13:15:28 +0000

Администрацијата на американскиот претседател Џо Бајден го извести Конгресот дека работи на договор за оружје со Обединетите Арапски Емирати (ОАЕ) вреден повеќе од 23 милијарди долари, што вклучува продажба на борбени авиони Ф-35, беспилотни летала и друго оружје. Информацијата ја пренесоа американски медиуми повикувајќи се на извори во Конгресот. Портпарол на Стејт департментот изјави дека администрацијата ќе продолжи да работи на предлогот за продажба на оружје на ОАЕ. Владата на Бајден привремено ги прекина договорите за кои преговараше поранешниот претседател Доналд Трамп за нивно преразгледување. Договорот со ОАЕ беше финализиран кратко пред Трамп да си замине од функцијата. Пакетот вреден 23,37 милијарди долари вклучува 50 ловци Ф-35, 18 беспилотни летала MQ-9B и ракети земја-земја и воздух-земја. Американскиот Стејт департмент објави дека оружјето ќе биде доставено до ОАЕ по 2025 година, доколку се одобри зделката.

ОАЕ: Турската армија во Катар е елемент на нестабилност во Персискиот Залив

Тале Кристо — Sun, 11 Oct 2020 08:09:07 +0000

Шефот на дипломатијата на Обединетите Арапски Емирати (ОАЕ), Анвар Гаргаш, смета дека присуството на турската армија во Катар претставува елемент на нестабилност во Персискиот Залив и придонесува за продлабочување на негативната поларизација. Покрај поддршката на различните фракции во либискиот конфликт, ОАЕ и Абу Даби од 2017 година го бојкотираат Катар и бараат официјална Доха да ја затвори својата турска воена база. -Освен продлабочување на поларизацијата, военото присуство на Турција во Персискиот Залив е итен проблем, бидејќи не се зема предвид суверенитетот на земјите од Персискиот залив и интересите на нивните граѓани, истакна шефот на дипломатијата на ОАЕ, пренесен од британските медиуми. Доха ги негира обвинувањата на ОАЕ и одговара дека притисокот од земјите од Заливот го нарушува суверенитетот на Катар.