Обединетите нации – Kurir.mk

Гутереш повика светот да ја направи Африка „суперсила за обновлива енергија“

Ивана Ефремовски — Tue, 05 Sep 2023 10:04:48 +0000

Генералниот секретар на Обединетите нации (ОН) Антонио Гутереш денеска апелираше до светот да ја направи Африка „суперсила за обновлива енергија“. - Обновливите извори на енергија би можеле да бидат африканското чудо, изјави генералниот секретар на ОН, кој се обрати на африканскиот климатски самит во кенискиот главен град Најроби. Тој нагласи дека „мора да работиме заедно за да ја направиме Африка суперсила на обновливи извори на енергија“. Гутереш апелираше до лидерите на Г-20, кои се состануваат овој викенд во Индија, да преземат одговорност во борбата против климатските промени. (МИА)

Гутереш: Ерата на глобалното затоплување е завршена, започна ерата на глобално вриење

Ивана Ефремовски — Thu, 27 Jul 2023 15:16:07 +0000

Генералниот секретар на Обединетите нации, Антонио Гутереш денеска изјави дека ерата на глобалното затоплување е завршена и дека започнала „ерата на глобално вриење“. „Климатските промени се насекаде. Тоа е страшно. И ова е само почеток“, предупреди Гутереш. Тој рече дека човештвото покренало деструкција, но дека тоа не смее да предизвика очај, туку да доведе до акција. Гутереш смета дека се уште е можно да се ограничи зголемувањето на глобалната температура, но само со „драматични и моментални климатски мерки“. „Можеме да го запреме најлошото, но за да го направиме тоа, годината на голема топлина треба да ја претвориме во година на горливи амбиции“, рече Гутереш. Генералниот секретар на ОН ги повика компаниите за фосилни горива да се префрлат на обновливи извори на енергија. Истовремено, тој повика да се прекине употребата на јаглен во процесот на производство на електрична енергија. (МИА)

ОН: Ќе биде тешко да се обезбеди храна за светското население ако не се продолжи Договорот за жито

Катерина Бојаџиева — Fri, 12 May 2023 08:09:44 +0000

Шефицата на Светската програма за храна (WFP) на Обединетите нации, Синди Мекејн, предупреди дека ќе биде тешко да се обезбеди храна за светското население доколку Русија го напушти договорот за жито. Таа изјави дека договорот кој истекува на 18 мај мора да се обнови. - Договорот мора да се продолжи. Ние никако не можеме да нахраниме одреден регион, а камоли целиот свет, ако тоа не се случи, изјави Мекејн за Би-Би-Си. На прашањето дали мисли дека Русија ќе се согласи да го продолжи договорот, таа рече дека не е сигурна. - Тоа многу ме загрижува. И тоа треба да ги загрижи и сите други, рече Мекејн и го повика „секој светски лидер“ да помогне во обновувањето на договорот и да се стави крај на конфликтот. Таа додаде дека WFP набавува житарки од други земји за да ги дистрибуира во земјите ширум светот, но оти не успеале да нахранат многу луѓе поради зголемените трошоци. - Знам дека има некои фарми кои сè уште работат. Но, мора да запомните дека огромното мнозинство од земјиштето на кое порано имало посеви сега е минирано, со нагазни мини, рече таа. Мекејн истакна дека дури и ако конфликтот заврши денеска, ќе бидат потребни години да се расчисти земјиштето за да биде безбедно. Рускиот заменик-министер за надворешни работи Сергеј Вершинин вчера изјави дека договорот за жито нема да биде продолжен доколку Москва не добие гаранции дека нејзините барања ќе бидат исполнети до 18 мај.

Гутереш ги повика Русија и Украина да го повлечат воениот персонал од нуклеарката Запорожје

Ивана Ефремовски — Thu, 11 Aug 2022 12:42:26 +0000

Генералниот секретар на Обединетите Нации, Антонио Гутереш изјави дека многу е загрижен поради ситуацијата во нуклеарната централа Запорожје во јужниот дел на Украина. Тој ги повика вклучените страни да ги повлечат воениот персонал и опремата од централата и да се воздржат од какво било понатамошно распоредување на силите. -Мораме да бидеме јасни дека секоја потенцијална штета на Запорожје или на кој било друг нуклеарен објект во Украина, или каде било, може да доведе до катастрофални последици не само во непосредна близина, туку и во регионот, па и пошироко, истакна Гутереш. (МИА)

Состанок на Советот за безбедност на ОН за Судан

Катерина Бојаџиева — Tue, 26 Oct 2021 07:13:35 +0000

Советот за безбедност на Обединетите нации (ОН) за денеска закажа итен состанок за државниот удар во Судан. Дипломатски извори доцна синоќа објавија дека консултации побарале САД, Велика Британија, Франција, Ирска, Норвешка и Естонија. Средбата е закажана за 16 часот по локално време. Суданската армија вчера ја презеде власта во земјата, го уапси премиерот и неколку министри и ја распушти преодната влада. Илјадници луѓе излегоа на улиците за да протестираат против државниот удар. Армијата отвори оган врз демонстрантите при што загинаа две лица, а 80 беа повредени.