оброци – Kurir.mk

Пиете вода во текот на оброците? Експертите објаснуваат зошто тоа не е добра идеја

Ристе Здравков — Fri, 22 Sep 2023 06:31:40 +0000

Распространета е навиката меѓу луѓето да пијат вода за време на оброците, меѓутоа, експертите истакнуваат дека таа може да биде бескорисна, па дури и штетна за дигестивниот процес. Водата има многу придобивки за нашето здравје – го поддржува варењето, ја одржува кожата хидрирана, помага при слабеење и обезбедува енергија. Се препорачува да се консумираат најмалку два литра вода дневно за да се одржи оптимално хидрирано телото. Сепак, важно е да се одвои внесот на вода од оброците. Експертите предупредуваат дека комбинирањето на вода со храна за време на оброкот може да ги разреди дигестивните ензими кои се клучни за варење на храната. Ова може да резултира со дигестивни проблеми, вклучително и запек. Покрај тоа, пиењето вода за време на оброците може да предизвика зголемување на нивото на инсулин, што го зголемува ризикот од складирање на маснотии во телото и може да доведе до дебелеење. Експертите препорачуваат да не се консумира вода половина час пред оброк и најмалку час по оброкот за да се избегнат потенцијални дигестивни проблеми. Доколку се чувствувате непријатно додека јадете и сакате да испиете голтка вода, подобро е тоа да го правите постепено, во мали количини, наместо да пиете големи количини вода за време на оброкот. Овој пристап може да помогне во одржување на ефикасно варење и одржување на добро здравје.

Барселона штеди: Нема да им дава оброци на играчите од резервниот тим

Ивана Ефремовски — Tue, 22 Aug 2023 15:26:07 +0000

Барселона ги откажа услугите на трета компанија која подготвуваше оброци за играчите на резервниот тим, објави „ Relevo“. Претходно, фудбалерите на Барселона Атлетик можеа да останат на појадок или ручек во „Ла Масија“ по тренингот. Тоа беше по избор на играчите, но клубот обезбеди таква услуга. Сега тоа ќе биде невозможно да се направи, бидејќи поради тешката економска ситуација, каталонскиот клуб реши да се откаже од оваа практика. Во Барселона сметаат дека тоа биле неоправдани трошоци, бидејќи сите играчи не ги користеле оброците. Барселона повторно е во тешки финансиски проблеми. Тренерот Чави сака засилувања, но нема пари за нив По две кола во новата сезона во Ла Лига, Барселона е на шестото место со четири бода. Во следното коло тимот ќе се сретне со Виљареал на 27 август. (МИА)

Што се случува во вашето тело кога прескокнувате оброци?

Ристе Здравков — Tue, 18 Jul 2023 13:05:12 +0000

Доколку сакате да изгубите некој килограм пред летувањето тогаш треба да знаете колку е важно да не ги прескокнувате оброците бидејќи тоа колку што е штетно за линијата, толку е и штетно за здравјето на целокупниот организам. Прескокнувањето на оброци стана тренд на денешницата. Некогаш не јадете бидејќи сте на диета, некогаш немате време за оброк, а некогаш едноставно не сте гладни. Доколку често ги прескокнувате оброците од било која причина, морате да бидете запознаени со нештата што се случуваат во вашиот организам поради тоа. Дисбаланс на хормоните Доколку прескокнувате оброци доаѓа до дисбаланс меѓу хормоните, се зголемува кортизолот и ве прави нервозни. Инсулинот исто така расте, а потоа опаѓа што доведува до пореметување на шеќерот во крвта, а со тоа и до зголемување килажата. Проблеми со варењето Вашето тело е навикнато да работи преку целиот ден, па кога ќе прескокнете еден оброк, организамот нема што да преработува па и самиот систем на варење престанува да работи кога имате оддалечени оброци. За добар метаболизам најдобро е да имате три оброци дневно, плус две ужинки. Задржување на мастите Со прескокнување на оброците го збунувате вашето тело. Тоа мисли дека го изгледнувате па започнува да ги складира мастите за да си обезбеди енергија за наредниот период. Го исцрпувате организмот Со прескокнувањето на оброци го успорувате вашиот метаболизам, а вас тоа ве прави уморни. Кога не јадете вашиот метаболизам се успорува, но кога имате редовни оброци вашиот метаболизам постојано работи и се забрзува. Редовните оброци ќе ви обезбедат побрз метаболизам и согорување на калориите. Станувате депресивни Најверојатно сте слушнале досега дека кога луѓето се гладни се речиси исти како и луѓето кои многу силно му се налутени на некого. Тоа се случува поради дисбалансот на хормони кои предизвикуваат да се чувствувате депресивно и вознемирено. Спасете се себе си и сите околу вас така што нема да прескокнувате оброк. Се менува системот на размислување Ќе се изненадите, но прескокнувањето на оброци го менува вашиот систем на размислување за храната. Во вашиот ум се создава лажна слика дека храната не е приоритет – а ова не е добро за вашето здравје. Доаѓа до прејадување Последното, но не и најмалку важно е тоа што како последица од прескокнувањето на оброкот подоцна доаѓа до прејадување. Тоа е нешто што обично оди по прескокнат ручек на пример. Вашето тело за време на вечерата е толку исцрпено и навистина извикува за калории. Тогаш доаѓа до прејадување, што обично резултира со болки во стомакот и натрупување на вишок масти и килограми. Следниот пат размислете колку се исплати прескокнувањето на оброкот…

Си правите голема штета ако прескокнувате оброци, ова се бројните замки

Ивана Ефремовски — Tue, 17 Jan 2023 19:41:13 +0000

Поради забрзаниот начин на живот повеќето луѓе ги прескокнуваат оброците и не стасуваат да изедат дури ни еден цел оброк во текот на денот. Ваквиот начин на исхрана,односно, прескокнувањето на оброците, крие бројни замки. Ако сте на диета, на овој начин само ќе го забавите слабеењето, а ако се грижите за своето здравје, со прескокнувањето на оброците само ќе го нарушите. Еве што му се случува на организмот кога прескокнувате оброци: Страдаат кожата и косата Ако е ова ваш начин на исхрана, кожата и косата нема да добијат доволно нутриенти, а резултатот е сува кожа и коса без сјај. Променете ги навиките и во исхраната внесете доволно намирници како домати, брусници, риба, а за пиење одберете го зелениот чај. Мозокот исто така страда Кога паѓа нивото на шеќер во крвта заради недостатокот од нутриенти, истото се случува и со метаболизмот, а тоа ги вклучува и метаболичките процеси во мозокот. Недостатокот од енергија во форма на глукоза влијае на расположението и на нивото на енергија. Значи, ако сте денеска посебно лошо расположени и уморни, јадете нешто! Се ослободува хормон на стресот Ако редовно ги скокате оброците, се забавува работата на метаболизмот, но се ослободуваат хормони на стресот. Резултат на ова е честопати прејадувањето па на тој начин ќе внесете многу повеќе калории отколку што сте планирале. Станувате погладни Хормоните на стрес и оние кои се поврзуваат со зголемен апетит се ослободуваат ако поминат неколку часа без да изедете ништо. Гладта станува сѐ посилна и се јавува силна желба за слатки и непотребни калории. Се јавува надуеност Ако ги прескокнувате оброците има големи шанси да не внесувате во организмот доволно влакна и вода. Резултатот е запек затоа што храната која ќе ја изедете воедно ја „турка“ веќе консумираната храна низ системот за варење.

МИТ ИЛИ ВИСТИНА: Еве дали навистина е штетно да пиете вода со оброците!

Ристе Здравков — Wed, 20 Apr 2022 13:17:00 +0000

Кога станува збор за исхраната, постојат многу докажани работи за тоа што е здраво, а што не, но сепак постојат одредени митови за кои повеќето луѓе не се сигурни дали се вистинити. Еден од нив е дефинитивно оној за пиење вода со храна. Сигурно сте слушнале дека не треба да пиете вода со оброк, но дали е тоа така? Нутриционистот Јована Вучелиќ одговара на ова прашање: ТВРДЕЊЕ: Водата со оброк создава вишок килограми. ВИСТИНА: Пиењето вода додека јадете всушност може да ви помогне да изгубите тежина. Со пиење голтки вода помеѓу каснувања, правите кратка пауза за да спречите прејадување. Благодарение на тоа побрзо ќе се чувствувате сити во стомакот. ТВРДЕЊЕ: Пиењето вода за време на оброк го успорува варењето на храната. ВИСТИНА: Нема студии кои ја докажале оваа претпоставка. Освен тоа, докажано е дека течноста помага во разградување на големи парчиња храна. Ова го олеснува движењето низ вашето тело, што спречува надуеност, запек и тврда столица. ТВРДЕЊЕ: Водата ја разредува стомачната киселина. ВИСТИНА: Иако многумина мислат дека стомачните киселини се разредуваат со вода, па затоа храната подолго се задржува во организмот, вистината е малку поинаква. Телото е способно да произведе точно онолку киселина колку што му е потребно за да ја вари храната. Од друга страна, водата брзо поминува низ телото и се задржува во стомакот само околу 20 минути, поради што не влијае на другите процеси кои се случуваат. Но, нутриционистот истакнува дека не се препорачува секој да пие вода за време на оброците: – За повеќето луѓе, внесувањето течности за време на оброкот нема да има негативни последици. Меѓутоа, ако имате проблем со ГЕРБ (проблеми со желудочната киселина), треба да се избегнува пиење вода за време на оброците во широк лак. Водата го зголемува волуменот и врши притисок врз стомакот. Ова може да предизвика горушица, надуеност и проблеми со болка кои се јавуваат исто како после тешките оброци.

Град Скопје продолжува со акцијата за обезбедување оброци на граѓани од социјално ранливи категории

Ивона Петрова — Sat, 29 Jan 2022 14:02:54 +0000

Овој викенд продолжува акцијата со која се обезбедуваат оброци на граѓаните од социјално ранливите категории, од страна на Град Скопје во соработка со здружението Љубезност и Ретвитни оброк. Денес на акцијата присуствуваше Филип Јаневски, советник во Совет на Град Скопје, кој заедно со волонтерите на РеТвитни оброк и здружението Љубезност поделија оброци на бездомните лица. Средствата во висина од 32 илјади евра кои што поранешниот градоначалник ги предвидел за угостителски услуги, сега градоначалничката Арсовска ги пренамени за помош на граѓаните од социјално ранливи категории.

Временскиот распоред на оброците е важен за здравјето

Ивона Петрова — Thu, 02 Sep 2021 12:22:48 +0000

Иако има голем број препораки и мислења за тоа – во кое време, што треба да се јаде, сепак не постои универзално правило за секого. Како и да е, препораките како завршување со оброците порано и ограничување на времето за оброк може да послужат како совет за кого било. Прехранбената индустрија и различните диети можат да Ве натераат да верувате дека постои точно време од денот коешто е „најдобро“ или „најздраво“ за одредено јадење. Но, за повеќето од нас, времето од денот кога јадеме зависи од бројни други фактори, како што се работата, гладот, лековите што ги земаме, па дури и слободното време со нашето семејство, пријателите и соработниците. Да се придржувате до одредено време за оброк секој ден, е предизвик, а понекогаш едноставно, тоа и не е можно. Сепак, ова не значи дека времето на оброк не е важно. Всушност, истражувањата покажуваат дека времето од денот кога јадеме и времето меѓу оброците може да има длабоки последици за нашето здравје. Одржувањето приближно конзистентен распоред на оброци на дневно ниво е поврзано со губењето телесна тежина, зголемена енергија и намалена опасност за хронични заболувања. Сепак, јадењето секој ден во истовреме можеби не е секогаш изводливо, па затоа е најдобро да не се применува монотон пристап кон оброците. Следат неколку упатства за распоред на оброците. Појадок Ова е првиот оброк во денот. За некои, важно е да појадуваат во првите неколку часа од станувањето, додека други претпочитаат да појадуваат кога нивниот апетит. И тоа, и тоа има свои предности. Неколку истражувања покажаа дека прескокнувањето појадок може да влијае на квалитетот на исхрана, поточно, да доведе до внесување повеќе калории при ручекот и општо – помалку хранливи оброци – преку цел ден. Покрај тоа, консумирањето повеќе калории за време на појадокот отколку подоцна во вечерните часови, може да има поголема корист во напорите за слабеење. Ручек Испитувањата покажуваат дека ручек порано дента може да им помогне на луѓето да изгубат тежина – иако е важно тоа што индивидуалните генетски фактори, исто така, играат голема улога. Некои неодамнешни истражувања дури посочуваат дека раниот ручек може да придонесе и за поздрав микробиом – составот бактерии во човечкото црево и тело кои имаат благотворно влијание врз целокупното здравје. Општо земено, одржувањето на поголемиот дел од вносот на калории во раните часови од денот со јадењето појадок и ручек порано, може да има придобивки за губење на тежината и посилно метаболичко здравје. Вечера И јадењето рано навечер, без калорични оброци непосредно пред спиење или во текот на ноќта, исто така – може да го подобри Вашето здравје. Мелатонинот којшто се лачи ноќе, е еден од основните хормонални регулатори на спиењето, будењето, а со тоа и на метаболизмот. Како што телото ослободува мелатонин, така се лачи и помалку инсулин, што ја инхибира неговата способност да ги преработува шеќерите како гликоза. Затоа, доцниот оброк е фактор на опасност од хронични заболувања. Според стручњаците, кога се планираат оброците, треба да се имаат на ум три основни правила: Јадете порано, кога тоа е можно. Ограничете го Вашето дневно време за внесување оброк. – Одржувањето на целиот дневен внос на калории во рамка од 12 часа ја намалува опасноста – дигестијата да го наруши деноноќниот ритам на Вашето тело. Утврдете време на јадење според будењето и спиењето. – Вашето тело може да не ги обработува оброците толку ефикасно доцна навечер или многу рано наутро. Сепак, треба да ги имате предвид и некои индивидуални фактори, како што се здравствени состојби, дневна рутина, обврски и тоа каква исхрана Ви годи.

ПРЕДУПРЕДУВАЊЕ: Следи голем пораст на цените на храна, милиони луѓе може да останат без оброци со хранливи материи

Магдалена Андонова — Thu, 08 Jul 2021 14:32:47 +0000

Светската програма за храна на ОН (WFP) предупреди дека милиони луѓе годинава би можеле да останат без оброци богати со хранливи материи, поради зголемувањето на цените на храната. – Веќе имаме конфликт, климата и Ковид-19 кои работат заедно за да турнеме повеќе луѓе во глад и сиромаштија. Сега цените на храната се приклучија на смртоносното трио, изјави денеска главниот економист на WFP Ариф Хусеин. – Ако сте семејство што веќе троши две третини од вашиот приход на храна, зголемувањето на цената на храната ќе биде голем проблем. Замислете што ќе значи тоа ако веќе сте изгубиле дел или целиот приход поради Ковид-19, додаде тој. Покрај пандемијата, агенцијата со седиште во Рим соопшти дека климатските феномени, како што е Ла Нина, временските услови на Тихиот океан со далекусежни ефекти, исто така придонесуваат за покачување на цените. Во однос на регионите ширум светот, експертите на WFP регистрираа најголемо зголемување на цените на храната на Блискиот исток. Во Сирија, според WFP Market Monitor, просечната цена на маслото за јадење се зголеми за 58 проценти во периодот од март до мај во споредба со претходните три месеци. Во Либан, каде што владее сериозна економска криза, просечната цена на пченичното брашно порасна за 50 проценти за истиот споредлив период. Земјите во Африка, како Зимбабве и Мозамбик и во Јужна Америка, како Венецуела, исто така регистрираат пораст на цените на храната. WFP предвидува дека 270 милиони луѓе ќе бидат гладни или ќе бидат изложени на висок ризик од глад во 2021 година. Тоа би претставувало зголемување за 40 проценти во однос на претходната година. Агенцијата, која ја доби Нобеловата награда за мир во 2020 година, истакнува дека нејзините напори за помош оваа година се најголеми во историјата на организацијата, а хуманитарните работници имаат за цел да стигнат до 139 милиони луѓе ширум светот.

Финер започна со продажба на оброци од бизнис класа во супермаркет

Тале Кристо — Mon, 26 Oct 2020 14:03:31 +0000

Финската национална авиокомпанија „Финер“ започна со продажба на оброци од бизнис класа во супермаркет за да спречи отпуштања во нејзината угостителска единица поради Ковид-19. „Оброците брзо станаа хит, продавајќи 1.600 парчиња за неколку дена во супермаркет во близина на аеродромот Хелсинки-Ванта, соопшти „Финер“. Компанијата планира да започне со продажба на оброци од бизнис класа и во други супермаркети. – Има вишоци во Финер и веќе има отпуштања, затоа се обидуваме да најдеме нови иновативни начини, изјави Марика Ниминен, шеф на кујната на „Финер“. Компанијата минатиот вторник соопшти дека ќе укине 700 работни места до март 2021 година. Главните јадења во кујната на „Финер“, кои се продаваат за 12,90 евра за парче, се состојат од говедско месо со сос од ротквица, сервирана со кромид печен на скара и ориз.

Паметно слабеење: Како да си ги организирате оброците во денот?

Ристе Здравков — Tue, 18 Aug 2020 07:31:15 +0000

Експертите од Gravity Transformation - Fat Loss Experts споделуваат осум трикови како најдобро да ја организирате содржината на вашите оброци за да слабеете побрзо и поефикасно. Подготовката на оброците однапред може значително да ви помогне во процесот на слабеење бидејќи ќе знаете точно кога и што ќе јадете. Така нема да бидете во искушение да јадете нешто што не е добро за вашата диета бидејќи не сте го подготвиле ручекот или вечерата навреме.