офм – Kurir.mk

Балканско првенство во одбојка на песок викендов во Штип

Ивона Петрова — Wed, 12 Jul 2023 12:57:38 +0000

Околу 40 учесници од пет балкански држави се пријавени за Балканското првенство во одбојка на песок кое ќе се одржи претстојниот викенд во Штип. - Подоготовките за теренот во спортско рекреативниот центар „Џексон“ веќе се во тек, а одбојкари ќе има од Србија, Романија, Косово, Македонија и Турција. Балканското првенство во одбојка на песок се одржува четврта година. Традиоционално ова е манифестација која се одржува секоја година, Балканската федерација оваа година ја додели на Македонија и Штип се јавува како домаќин на истата. Турнирот ќе се одржи од 14 до 16 јули, од петок до недела. До сега имаме пријавено околу 40 учесници од пет балкански држави, информира Никола Мицевски меѓународен одбојкарски судија. Организаторот очекува добри одбојкарски натпревари. Мицевски ги покани сите граѓани, љубители на спортот, пред се на одбојката на песок викендов да бидат дел од овој турнир. - Она што очекувам да се случи во нареднит период е добри одбојкарски натпревари. Свеченото отворање е во петок во вечерните часови, а финалните натпревари се очекува да бидат во недела на 16 јули. Ги поканувам сите љубители на одбојката на песок да дојдат, рече Мицевски. Балканското првенство во одбојка на песок е во организација на Одбојкарската федерација на Македонија заедно со Општина Штип.

ОФМ во Белград: Детализирани активности за проектот „Финансиска и бизнис писменост на спортисти и на тренери“

Ивона Петрова — Wed, 05 Apr 2023 13:27:22 +0000

По минатогодишниот состанок во Љубљана, Одбојкарската федерација на Македонија ги продолжи активностите за реализација на проектот „Финансиска и бизнис писменост на спортистите и на тренерите“ чијшто носител е Олимпискиот комитет на Словенија со поддршка на Европската комисија. Претставници на македонската куќа на одбојката беа во Белград каде што беше детализиран планот за одржување на работилниците на коишто учесниците ќе имаат можност подетално да се запознаат со проблемите што настануваат во текот и по завршувањето на кариерата на спортистите, а во врска со финасиите. -Во кариерата со траење од една до две децении, спортистите имаат можност да заработат повеќе од вработените во реален сектор, но праксата покажува дека не така мал број спортисти прават лоши финанскиски трансакции или вложуваат погрешно губејќи значителен дел од средствата, или, пак, доведувајќи се дури и до банкрот. Затоа целта на проектот е да се насочат спортистите од секоја генерација на вистински пат, а со самото тоа да се влијае и на интегритетот на спортот, затоа што ќе се намалат обидите за брзо и за нечесно збогатување преку неморални дејствија, прецизираше портпаролот на ОФМ Тони Стојановски. На состанокот во Белград ОФМ договори предавач на работилниците во Македонија да биде господинот Миха Урек, финансиски советник за спортисти, автор на книгата „Победнички менталитет“ во којшто се разработуваат токму темите за управување со паричните ресурси на професионалните спортисти. Датумот за работилниците ќе биде дополнително одреден, а на нив ќе можат да присуствуваат сите заинтересирани, не само одбојкари, туку сите спортисти воопшто.

Скопје на мапата на спортскиот туризам: Македонија кодомаќин на Европско првенство, доаѓаат голем број навивачи

Ивона Петрова — Tue, 28 Feb 2023 08:58:28 +0000

Во период од 30-ти август до 6-ти септември, Македонија ќе биде кодомаќин на Европското првенство во одбојка за мажи, а во Скопје ќе пристигнат големи одбојкарски имиња. Се очекува бројот на странски туристи да се зголеми, кои во земјава ќе пристигнат да ги проследат натпреварите во група „Цe“ кои ќе се играат во Скопје. Во насока на што поголема промоција на земјава и спортскиот туризам, Одбојкарската федерација на Македонија и Агенцијата за промоција и поддршка на туризмот вчера потпишаа Меморандум за соработка со кој спортски туризам во Македонија ќе се промовира преку Европското првенство во одбојка 2023 година. Промоцијата на Македонија како дестинација за спортски туризам, започнува на претстојниот саем во Берлин. -Главните активности во периодот што следи ќе бидат насочени кон организирана промоција и поголема регионална и европска видливост на претстојното Европско првенство во одбојка 2023 (мажи). Ќе мотивираме што поголем број на гости кои освен што ќе ги следат натпреварите, ќе имаат и можност да ги истражат и убавините на градот Скопје. Очекуваме голем број на Холанѓани, Данци, Црногорци, Полјаци и Чеси да го посетат главниот град, да доживеат незаборавни моменти пред, за време и по натпреварите. Во периодот што следи ќе имаме состаноци со тур оператори и хотелијери за да пружиме максимална организираност за сите љубители на овој спорт, изјави директорот на Агенцијата Љупчо Јаневски. Целта е на домашните и странските гледачи да им се овозможи целокупно уживање во елитна одбојка, а во тие рамки да им ја претстави земјава како атрактивна спортско-туристичка дестинација. -Добро е што тргнавме од буквата “А” и се надевам дека и останатите институции ќе се вклучат за да од најдобра можна позиција го прeтставиме нашиот град, државата и овој спортски настан што не чека ова лето, вели Зоран Карановиќ, генерален секретар на ОФМ. Од ОФМ истакнуваат дека со оваа соработка тие ги креваат стандардите за организација на меѓународни спортски манифестација во нашата држава. Билетите за натпреварите кои ќе се одиграат во Скопје се веќе пуштени во продажба, а повеќе за тоа може да прочитате во продолжение. https://kurir.mk/sport/ostanati-sportovi/foto-bodrete-ja-makedonija-pochna-prodazhbata-na-bileti-odbojkarski-velikani-doagaat-vo-skopje/

ФОТО: Бодрете ја Македонија, почна продажбата на билети – одбојкарски великани доаѓаат во Скопје

Ивона Петрова — Mon, 27 Feb 2023 13:23:44 +0000

Почна продажбата на билети за Европското првенство во одбојка во машка конкуренција на кое Македонија ќе биде коорганизатор. Првенството ќе се одржи во периодот од 30-ти август до 6-ти септември, а во арената „Борис Трајковски“ ќе гостуваат великанот на светската одбојка Полска, поранешниот олимписки првак Холандија, Чешка, Данска и Црна Гора. -Сегашната генерација во македонската репрезентација ќе има чест и привилегија третпат по ред да игра на континентален собир, но посебноста е во тоа што овој пат ќе настапува пред своја публика, иако очекувањата се дека ќе има и значителен број странски навивачи. Покрај ОФМ, денеска билетите во продажба ги пушти и Бугарија, а Италија и Израел тоа ќе го направат подоцна, велат од ОФМ. На следните линкови може да ги обезбедите билетите за натпреварите во Скопје:

https://tickets.cev.eu/cev-eurovolley-2023-men

https://tinyurl.com/CEV-MKD-EN

https://tinyurl.com/CEV-MKD-Daytickets-EN

https://tinyurl.com/CEV-MKD-Packages-EN

ОФМ во Љубљана на првата постојка на новиот европски проект

Ивона Петрова — Thu, 19 May 2022 11:15:33 +0000

Како да се вложат заработените пари во активната кариера на спортистите и на тренерите? Како да се сочува интегритетот на спортот? Тоа се двете главни прашања во европскиот проект „Финансиска и бизнис писменост на спортисти и на тренери“ во којшто учествува Одбојкарската федерација на Македонија. На покана на Олимпискиот комитет на Словенија, претставници на ОФМ во изминатите три дена беа во Љубљана и учествуваа на инаугуралниот состанок за проектот којшто е поддржан од Европската комисија. -Ова беа првичните разговори на сите партнери на Олимпискиот комитет на Словенија како носител на проектот. Насловот зборува сам за себе, но важен сегмент на целата приказна е и интегритетот на спортот. Всушност, секогаш кога настануваат финансиски проблеми, постои можност да се подлегне на искушенијата да се заработи на нечесен начин преку местење резултати. Тој сегмент, како и финансиите на спортистите беа главна тема на разговорите во Љубљана. Се надевам дека успешно ќе ја завршиме и оваа задача како што беше тоа со претходниот проект за двојна кариера на спортистите, вели Зоран Карановиќ – генерален секретар на ОФМ. Откако ќе биде утврдена динамиката на активностите, македонската куќа на одбојката ќе организира работилници на овие теми на коишто гости ќе бидат експерти од областа на финансиска и бизнис писменост на спортистите, како и лица коишто се занимаваат со интегритетот на спортот. Покрај ОФМ и Олимпискиот комитет на Словенија, во проектот учествуваат олимписките комитети на Австрија, на Србија и на Литванија, Универзитетот во Љубљана и Европската Олимписка Академија.

ОФМ договори нов проект за едукација со Олимпискиот комитет на Словенија

Ивона Петрова — Fri, 22 Apr 2022 12:13:26 +0000

Одбојкарската федерација на Македонија ја продолжи соработката со Олимпискиот комитет на Словенија за проекти поврзани со едукација на спортистите и тренерите. Откако успешно беше завршена задачата за двојна кариера на спортистите, македонската куќа на одбојката потпиша договор за соработка со словенечките колеги за нов проект со наслов „Финансиска и бизнис писменост на спортисти и на тренери“, поддржан од Европската комисија. -Идејата е познати предавачи од оваа област да дојдат кај нас и на младите спортисти, на тренерите и на сите заинтересирани да им ги пренесат сознанијата од оваа област, односно да ги едуцираат за тоа какви се можностите, но и опасностите кога се во прашање спортските кариери. Ќе имаме неколку состаноци за да ги утврдиме нашите обврски кон партнерите, а потоа ќе ги реализираме нашите активности, објасни генералниот секртетар на Одбојкарската федерација на Македонија Зоран Карановиќ. Првиот состанок ОФМ ќе го има во Љубљана кон средината на мај годинава, а потоа ќе биде утврдена динамиката за периодот од 18 месеци во којшто треба да бидат реализирани задачите од проектот.