Почнува 21. Меѓународен натпревар на млади музичари „Охридски бисери“

Катерина Бојаџиева — Tue, 14 Jun 2022 06:18:49 +0000

Од денеска до 18 јуни во Охрид ќе се одржува 21. Меѓународен натпревар на млади музичари „Охридски бисери“, на кој седумдесетина млади уметници од шеснаесет држави ќе се натпреваруваат во дисциплините виолина, пијано и камерна музика. Младите музичари од Србија, Бугарија, Црна Гора, Словенија, Хрватска, Германија, Полска, Австрија, Чешка, Грузија, Италија, Литванија, Шпанија, Турција и Украина ќе настапуваат во акустичниот амбиент на црквата „Св. Софија“. Поради олеснување на ковид-мерките, годинава натпреварот е отворен за публиката во Охрид. Организаторите информираат дека стручната комисија е составена од десет члена – врвни уметници и педагози по виолина и пијано од повеќе европски престижни музички академии, како и од факултетите за музичка уметност од Скопје и Штип. На лауреатот, носител на наградата Гран-при, Општина Охрид му доделува ракотворба филигрански накит, а организаторот на натпреварот – охридски бисери. Организаторите велат дека посебно значајна е и наградата на Европската асоцојација на музички натпревари (ЕМСИ) која на добитникот му овозможува годишна промоција на веб-страницата, учества на мастеркласи и концерти во повеќе европски градови. „Охридски бисери“ е единствен меѓународен натпревар од нашата земја, член на ЕМСИ од 2005 година, во која членуваат педесетина други натпревари од 30 европски земји. -Ова е првиот организиран меѓународен натпревар во областа на класичната музика во државата, којшто од 2002 година до денес поставува високи стандарди во однос на програмскиот концепт и строгата селекција на наградени учесници, па така привлекува квалитетни млади уметници од целиот свет. Најуспешните натпреварувачи и годинава ќе имаат можност да освојат некоја од вредните награди: парични награди во износ од 3.000, 2.000 и 1.000 евра за највисокорангираните, награди од здруженијата СОКОМ и СМУМ и од Фондацијата „Зографски“, се наведува во соопштението. Натпреварот „Охридски бисери“ се одржува под покровителство на Министерството за култура и градоначалникот на Општина Охрид.

Дваесетто издание на Меѓународниот натпревар на млади музичари „Охридски бисери“

Ивона Петрова — Wed, 16 Jun 2021 05:47:54 +0000

Во Охрид денеска почнува 20. јубилејно издание на Меѓународниот натпревар на млади музичари „Охридски бисери“ 2021. Во наредните четири дена, до 19 јуни, осумдесетина млади уметници од 15 држави ќе се натпреваруваат во дисциплините дувачки инструменти. За разлика од бројни други музички натпревари кои во услови на светската пандемија алтернативно се одржуваат онлајн, организаторот на овој престижен и афирмиран натпревар на учесниците им овозможува настап во живо на концертен подиум. Младите музичари од Србија, Албанија, Грција, Босна и Херцеговина, Бугарија, Црна Гора, Словенија, Хрватска, Германија, Русија, Полска, Кина, Ерменија, Португалија како и од нашата земја ќе се натпреваруваат во дисциплините флејта, обоа, кларинет, труба, саксофон, хорна и камерна музика. Заради почитување на здравствените протоколи и годинава како и на минатогодишното издание настапите ќе се одвиваат без публика, само во присуство на стручните комисии во свечената сала на Општина Охрид. „Охридски бисери“ е првиот организиран меѓународен натпревар во областа на класичната музика во земјава, кој од 2002 година до денес поставува високи стандарди во однос на програмскиот концепт и строгата селекција на наградени учесници. Најуспешните натпреварувачи и годинава ќе имаат можност да освојат некоја од наградите: 3000, 2000 и 1000 евра за највисоко рангираните, награди на здруженијата СОКОМ и СМУМ, Фондацијата „Зографски“, како и наградите на Фондацијата „Двајт и Урсула Мамлок“ и издавачката куќа „Рајс Ерле“ од Германија. Општина Охрид на победникот му доделува ракотворба златна маска, а Михајло Филев вреден накит – охридски бисери. Според организаторите, посебно значајна е и наградата на европската асоцојација на музички натпревари ЕМСИ, која на добитникот му овозможува годишна промоција преку учества на мастеркласи и концерти во повеќе европски градови. „Охридски бисери“ е единствен меѓународен натпревар од нашата земја, член на ЕМСИ од 2005 година, во која членуваат педесетина други натпревари од 30 европски земји и токму членувањето во ова здружение го издвојува натпреварот „Охридски бисери“ во однос на бројни други натпревари кои се одржуваат во нашата земја и во регионот. Натпреварот „Охридски бисери“ се одржува под покровителство на Министерството за култура и градоначалникот на општина Охрид.

„Охридски бисери“ – Kurir.mk

Почнува 21. Меѓународен натпревар на млади музичари „Охридски бисери“

Дваесетто издание на Меѓународниот натпревар на млади музичари „Охридски бисери“