ОИ 2020 – Kurir.mk

Возела такси за да преживее, а денеска стана олимписка шампионка!

Ивана Ефремовски — Sun, 08 Aug 2021 18:36:50 +0000

Неверојатна приказна за боксерката од Велика Британија, Лорен Прајс. Таа денеска во финалето во средно тешка категорија успеа со 5-0 да ја победи Ли Кијан и да го освои олимпиското злато. Имено како девојче се занимавала со кикбокс, потоа се заљубила во фудбалер и поради дечко и почнала да тренира фудбал, била и репрезентативка на Велс. По три години љубовта престанала, и таа го баталила фудбалот.После фудбалот извесно време возела такси, само да преживее, но без спорт не можела. Се вратила во рингот, но сега како боксерка. Спорт кој на почетокот и бил само хоби. Но вредно и напорно тренирала и денеска стана олимписка шампионка, пренесе СпортМедиа. За крај на ОИ во Токио една ваква приказна навистина вреди да се раскаже. Секоја чест и браво за Лорен Прајс.

Норвежанецот Ингебригстен го освои златото во трката на 1500 метри со олимписки рекорд

Ивана Ефремовски — Sat, 07 Aug 2021 12:34:37 +0000

Норвежанецот Јакоб Ингебригстен го освои златниот медал на 1500 метри на Олимпијадата во Токио. Ингебригстен патеката ја помина со време 3 минути 28 секунди и 32 стотинки, што е нов олимписки рекорд. Пласман во трката на 1500 метри мажи: 1. Јаков Ингебригстен (Норвешка) – 3:28.32 минути 2. Тимоти Черујот (Кенија) – 3:29.01 3. Џош Кер (Велика Британија) – 3:29.05. (МИА)

Прв олимписки медал во историјата за грчките ватерполисти

Ивана Ефремовски — Fri, 06 Aug 2021 09:21:10 +0000

Грчката машка ватерполо репрезентација го постигна најголемиот успех на Олимписките игри, откако претпладнево избори пласман во финалето со триумфот од 9-6 (2-1, 1-1, 2-2, 4-2) над актуелниот европски првак Унгарија. Грција до шестата победа во седмиот настап на Игрите во Токио дојде на својот стандарден начин, со одлична игра во одбраната и расположениот Стилијанос Аргиропулос во нападот со четири голови. Со триумфот во полуфиналето, Грција го постигна најголемиот успех во својата историја, обезбедувајќи го првиот олимписки медал во ватерполо. Досега, највисок пласман им беше четвртото место на Игрите во Атина 2004. Грција во финалето, кое е на програмата в недела со почеток од 9:30 часот, ќе игра со победникот од второто полуфинале меѓу Србија и Шпанија. (МИА)

Полјакот Томала е последен олимписки победник во трка на 50 километри брзо одење

Ивана Ефремовски — Fri, 06 Aug 2021 07:15:34 +0000

Полјакот Давид Томала (31) ја освои олимписката титула во брзо одење на 50 километри во трката одржана утрово во Сапоро, на островот Хокаидо. За Томала ова беше само втора негова трка во оваа дусциплина на која неодамна се префрли од 20 километри со образложение дека „бара нов предизвик‘. Полјакот дојде до златниот олимписки медал со 36 секунди побрзо време од второпласираниот Џонатан Хилберт од Германија, додека бронзениот медал го освои Еван Данфи од Канада со 51 секунда заостанување зад Томала. Трката во брзо одење на 50 километри беше на програмата на сите Олимписки игри од Лос Анџелес 1932, со исклучок на Монтреал 1976, но нема да биде на програмата на следните игри што за три години ќе се одржат во Париз. (МИА)

ОИ: Србинките совладани, Американските одбојкарки надмоќни во полуфиналниот дуел

Ивана Ефремовски — Fri, 06 Aug 2021 07:11:18 +0000

Женската одбојкарска репрезентација на САД избори пласман во финалето на Олимписките игри во Токио совладувајќи го актуелниот светски првак Србија со убедливи 3:0 во сетови (25:19, 25:15, 25:23). Полуфиналната пресметка во Токио беше „реприза“ од полуфиналето од Игрите во Рио де Женеиро во 2016 година, кога Србија со 3:2 го совлада Американките. САД овој пат се реваншираа и со триумфот над Србија ја продолжија серијата олимписки медали, по сребрените одличја во Пекинг 2008 и Лондон 2012, како и бронзата во Рио. До златниот медал, в недела од 6.30 часот по средноевропско време, ќе се обидат да дојдат против победникот од второто полуфинале, во кое денеска од 14 часот играат Бразил и Јужна Кореја. (МИА)

Ракометарите на Франција и на Шпанија полуфиналисти на ОИ

Ивана Ефремовски — Tue, 03 Aug 2021 07:57:48 +0000

Франција и Шпанија се пласираа помеѓу четирите најдобри репрезентации на ракометниот турнир на Игрите во Токио. Рано утрово Шпанија ја победи Шведска со 34:33 во второто четвртфинале. Претходно, Франција забележа убедлива победа над Бахреин со 42:28. Другите две четвртфинални двојки се: Данска – Норвешка (почеток 10 часот) Германија – Египет (13:45 часот). (МИА)

Кина е лидер во пласманот во освоени златни медали

Ивана Ефремовски — Sun, 01 Aug 2021 14:52:43 +0000

На Олимписките игри во Токио денес беа доделени 25 сета медали. На седумд дена до крајот на Игрите, Кина е лидер според освоени златни медали, пред САД и Јапонија. Табела: Кина 24 златни медали, САД 20, Јапонија 17. Двоцифрен број најсјајни одличја имаат уште и: Австралија 14, Русија 12 и Велика Британиа 10. Вкупно 53 држави имаат освоено барем еден златен медал. (МИА)

ОИ: Хрватска поуспешна од Србија во балканското ватерполо „класико“

Ивана Ефремовски — Sat, 31 Jul 2021 08:33:22 +0000

Хрватска и го нанесе вториот пораз на Србија во групната фаза на олимпискиот турнир во ватерполо, триумфирајќи претпладнево во соседското дерби со 14:12 (5:3, 1:1, 4:4, 4:4). Хрватска подобро го отвори дуелот меѓу двата последни олимписки шампиони и поведе со 5:1, но Србија возврати и го израмни резултатот на 8:8. Продолжението донесе серија грешки на српските ватерполисти во одбраната што Хрватска го искористи за трета победа во четвртото коло во групата Б. Во преостанатите два натпревари од истата група, лидерот Шпанија го продолжи максималниот ефект со победа над Австралија (16:5), додека Црна Гора триумфираше над Казахстан (19:12). (МИА)

СКАНДАЛ ВО ТОКИО: Германец навредувал спортист од Африка, па беше избркан! (ВИДЕО)

Ивана Ефремовски — Thu, 29 Jul 2021 16:22:24 +0000

Спортскиот директор на Германската велосипедска федерација Патрик Мостер е суспендиран од Игрите во Токио поради расизам, објави Националната олимписка управа (DOSB), цитирана од медиумите. DOSB соопшти дека Мостер повеќе нема да ја игра улогата на спортски директор за велосипедизам за време на Игрите и дека наскоро ќе се врати во Германија. Телевизиската емисија на АРД го фати Мостер како го охрабрува германскиот спортист Никиас Арндт да го претекне алжирскиот противник, но во неговите зборови имаше јасна забелешка за расизам: „Поминете ги камилите, поминете ги камилите, одете!“. "Остануваме убедени дека неговото јавно извинување за расистичките забелешки што ги кажа вчера е искрено. Меѓутоа, со оваа грешка, г -дин Мостер ги повреди олимписките вредности. Фер -играта, почитта и толеранцијата нема да бидат доведени во прашање", рече претседателот на DOSB, Алфонс Херман.

Најмладата македонска олимпијка заврши на 40-то место

Ивана Ефремовски — Wed, 28 Jul 2021 13:40:54 +0000

Најмладата македонска олимпијка Миа Блажевска Еминова победи во својата квалификациска група на 100 метри слободно на Олимписките игри во Токио, но не се пласираше во полуфиналето и во конечниот поредок беше 40 во конкуренција на 52 пливачки. Петнаесетгодишната пливачка на скопскиот клуб Орион исплива време од 57 секунди и 19 стотинки, со што не го подобри својот личен рекорд. Најдоброто време во квалификациите го оствари Ема Меккион од 52 секунди и 13 стотинки.