ојо гостивар – Kurir.mk

Поднесено обвинение за злоупотреба на службена положба во општина Маврово Ростуше

Катерина Бојаџиева — Tue, 05 Jul 2022 12:52:25 +0000

Основното јавно обвинителство Гостивар поднесе Обвинителен акт против едно лице за кривично дело – Злоупотреба на службена положба и овластување од член 353 став 3 во врска со став 1 од Кривичниот законик. Обвинетиот, како службено лице – раководител на одделение за урбанизам во општината Маврово Ростуше, ги пречекорил службените овластувања и на 02.10.2014 година, по свое лично поднесено барање, завел предмет кој не постои во архивата на Општината, па изготвил извод од план за населбата Маврови Анови со невистинита содржина и спротивен на урбанистичкиот план за населбата. Изводот од планот за три катастарски парцели во Никифорово, со вкупна површина од 203 м2, го употребил за приватизација на градежно земјиште без надоместок, по основ на поранешна сопственост. По поднесеното барање, врз основа на лажните документи, парцелите биле впишани на име на обвинетиот, со што била оштетена државата за 1.248.450 денари, а друго оштетено лице на кое парцелите му следувале согласно вистинскиот урбанистички план, било оневозможено да ги приватизира.

Предложен притвор за двајца осомничени за недозволена трговија со дрога во Гостивар

Катерина Бојаџиева — Fri, 24 Jun 2022 11:45:21 +0000

Јавен обвинител од Основното јавно обвинителство Гостивар донесе Наредба за спроведување истражна постапка против две лица, кои се осомничени дека како соизвршители сториле кривично дело – Неовластено производство и пуштање во промет наркотични дроги, психотропни супстанции и прекурсори според член 215 став 1 во врска со член 22 од Кривичниот законик. Осомничените, 29-годишен гостиварец и 23-годишна жителка на гостиварското село Равен, биле запрени на 21 јуни во селото Дебреше, додека заедно се превезувале со автомобил Фолксваген голф. При личен преглед, во раката на осомничениот биле пронајдени 3,42 грама марихуана, додека осомничената скриена во облеката носела полиетиленска ќеса со уште 19,25 грама марихуана. Дополнително помало количество марихуана било пронајдено и во домот на првоосомничениот во Гостивар. Надлежниот јавен обвинител до судијата на претходна постапка од Основниот суд во Гостивар достави предлог за определување мерка притвор за осомничените.

ОЈО Гостивар со обвинение за дилер на хероин

Дарко Андоновски — Fri, 01 Apr 2022 12:58:09 +0000

Гостиварското обвинителство, по спроведената истражна постапка, денеска до надлежниот суд поднесе Обвинителен акт против едно лице за кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик. Обвинетиот 47-годишник, на 14 март, беше затекнат додека кај себе неовластено држел 6,08 грама хероин наменети за препродажба. Дрогата му била пронајдена и одземена при личен преглед во близина на Домот на културата во Гостивар. Јавниот обвинител од Основното јавно обвинителство Гостивар до Судот достави и предлог за продолжување на претходно определената мерка притвор за обвинетото лице.

Драма во гостиварско: Заменик директор со ученик се однесувал понижувачко, му удрил клоца и шлаканица – поднесено обвинение

Магдалена Андонова — Fri, 01 Apr 2022 08:02:11 +0000

Основното јавно обвинителство Гостивар поднесе Oбвинителен предлог против едно лице за кривично дело – Малтретирање во вршење на службата според член 143 став 1 од Кривичниот законик. Обвинетиот, на 26.11.2021 година, при вршење на службата како заменик-директор на основно училиште во селото Чегране, постапувал спрема ученик на начин со кој се понижува човечкото достоинство и личност. Оштетеното дете, ученик во осмо одделение, добил известување дека заедно со уште двајца соученици ќе биде прераспореден во друго одделение. Тој се качил на вториот кат во училиштето за да го земе распоредот за новото одделение, но го затекнал обвинетиот кој најпрвин му се развикал затоа што се качил на спратот, а потоа започнал да го удира со шлаканици и клоца. Оштетеното дете се здобило со телесна повреда – нагмечување во пределот на главата и настанот го пријавило во полициска станица.

Татко и син истепале друго лице поради паркинг место, ОЈО Гостивар поднесе обвинение против нив

Магдалена Андонова — Wed, 02 Feb 2022 10:05:42 +0000

Јавен обвинител од Основното јавно обвинителство Гостивар поднесе Обвинителен предлог против 34-годишен гостиварец и неговиот 64-годишен татко, кои се товарат за кривично дело – Насилство од член 386 став 3 во врска со став 1 и во врска со член 22 од Кривичниот законик. Грубото насилство го извршиле на 01.10.2021 година, кога телесно повредиле едно лице и во јавноста предизвикале чувство на несигурност, загрозување и страв. Оштетениот, на критичниот ден, пристигнал со автомобил пред сопствената куќа и сакал да се паркира, но паркинг местото било зафатено. Тој започнал да свири за да се тргне паркираното возило, но во тој момент излегол првиот обвинет и започнал вербална расправија на висок тон. Веднаш потоа обвинетиот физички го нападнал оштетениот, удирајќи го во пределот на главата и лицето. Пристигнал и вториот обвинет и го фатил оштетениот за двете раце, по што првиот обвинет продолжил да го удира. Оштетениот се здобил со телесни повреди – нагмечување на главата и на левата рака, како и крвни подливи на лицето.

ДРАМА ВО ГОСТИВАР: Две жени претепани со клоци и палка од четворица мажи, полицијата пукала во воздух за да ги оттргне напаѓачите

Магдалена Андонова — Wed, 02 Feb 2022 09:51:11 +0000

Основното јавно обвинителство Гостивар до надлежниот суд поднесе Обвинителен предлог против четири лица за кривично дело насилство согласно член 386 став 3 во врска со став 1 од Кривичниот законик. На 22.06.2021 година, четворицата жители на гостиварската населба Циглана, извршиле грубо насилство и ја загрозиле сигурноста, телесно повредувајќи две жени. Откако една од жените дошла во дворот на еден од обвинетите за да го побара својот сопруг, обвинетиот 45-годишник ја нападнал, ја фатил за коса, ја турнал на земја и почнал да ја удира со клоци. Му се приклучиле и останатите тројца обвинети, на возраст од 20, 31 и 22 години, удирајќи ја оштетената по целото тело. Првиот обвинет зел и палка, па продолжил да ја удира. Во тој момент, кон оштетената тргнала уште една жена која сакала да и помогне, но обвинетите ја турнале и таа паднала во бессознание. Поголем број сведоци на настанот исто така се почувствувале загрозени и повикале полиција. Кога пристигнале, полициските службеници биле принудени да испукаат неколку проектили во воздух за да ги смират и оттргнат обвинетите. Двете жени во инцидентот се здобиле со телесни повреди.

ОЈО Гостивар гони двајца браќа за тешка телесна повреда- го тепале оштетениот додека не изгубил свест

Катерина Бојаџиева — Mon, 10 Jan 2022 14:29:42 +0000

Јавен обвинител од Основното јавно обвинителство Гостивар поднесе Обвинителен предлог против две лица од село Добридол кои како соизвршители сториле кривично дело – Тешка телесна повреда од член 131 став 1 во врска со член 22 од Кривичниот законик. На 02.05.2021 година, пред угостителски објект во селото, тие со умисла тешко телесно повредиле едно лице со кое претходно влегле во вербална расправија. Двајцата обвинети браќа, најпрвин со стапови го удриле оштетениот, а кога тој паднал на земјата, продолжиле да го удираат со клоци и боксови додека не изгубил свест. Со ударите му нанеле тешки телесни повреди – расцепни рани на главата, нагмечување на лактот и скршеница на десната потколеница.

Обвинение за насилство во Гостивар

Катерина Бојаџиева — Tue, 23 Nov 2021 13:50:26 +0000

Јавен обвинител од Основното јавно обвинителство Гостивар поднесе Обвинителен предлог против три лица за кривично дело – Насилство од член 386 став 3 во врска со став 1 од Кривичниот законик. Тројцата обвинети, двајца мажи и една жена, на 3 јуни во група извршиле грубо насилство и ја загрозиле сигурноста на друг. Оштетениот се упатил во канцеларија на нотар во Гостивар за да направи договор за купопродажба на возило. Го забележала обвинетата, која била во соседната адвокатска канцеларија на првообвинетиот и застанала пред вратата на нотарската канцеларија, па го почекала да излезе. Кога излегол, го фатила за рака и му рекла да влезе во канцеларијата а првообвинетиот. Оштетениот одбил, па сите тројца започнале на сила да го влечат и да го удираат, со боксови, шипки и други предмети. Настанот предизвикал чувство на несигурност, загрозување и страв и кај други присутни.

Обвинение за разбојник кој беше во бегство повеќе од две години

Катерина Бојаџиева — Mon, 15 Nov 2021 14:25:28 +0000

Основното јавно обвинителство Гостивар поднесе Обвинителен акт против едно лице за кривичното дело – Разбојништво од член 237 став 4 во врска со став 1 и во врска со член 22 од Кривичниот законик. Обвинетиот, кој до неодмана беше недостапен на органите на прогонот, делото го сторил во соизвршителство со две други лица, кои веќе се осудени. На 18.08.2019 година оштетениот жител на с.Равен повикал една од веќе осудените лица, инаку мајка на сега обвинетиот, во својот дом за да исчисти. По неа за кратко време пристигнале синот и нејзиниот невенчан сопруг. Тројцата обвинети заедно физички го нападнале оштетениот, му се заканиле со нож и му одзеле пари и златен накит во вкупна вреднпост од околу 5.500 евра. Потоа обвинетите го заклучиле оштетениот во домот и избегале. Тој успеал преку балконската врата да излезе во дворот и настанот да го пријави во полициска станица. Јавниот обвинител до Основниот суд Гостивар достави предлог за продолжување на претходно определената мерка притвор за сега обвинетото лице.

ЉУБОВНА ДРАМА: Гостиварец со тупаници ја претепал поранешната вереница- завршила со скршеници и потрес на мозок

Катерина Бојаџиева — Mon, 25 Oct 2021 14:06:25 +0000

Основното јавно обвинителство Гостивар поднесе обвинителен предлог против 28-годишен жител на Форино, кој се товари дека при вршење семејно насилство сторил кривично дело „тешка телесна повреда“ од член 131 став 2 во врска со став 1 од Кривичниот законик. -На 28 септември, во селото Добридол, при вршење семејно насилство, обвинетиот тешко телесно ја повредил поранешната вереница. Тој ја пречекал оштетената која се упатила кон својот дом, ја фатил за десната рака и запонал да ја влече за да ја внесе во неговиот автомобил. Жената паднала, по што обвинетиот започнал да ја удира со тупаници по лицето и по телото, нанесувајќи и тешки телесни повреди – нагмечувања, скршеници и потрес на мозок, се вели во соопштението на ОЈО.