ојо скопје – Kurir.mk

ОЈО Скопје поведе постапка за насилство кон новинарската екипа на Алсат

Ивона Петрова — Tue, 22 Aug 2023 13:07:45 +0000

Основното јавно обвинителство Скопје поведе постапка против едно лице за кое постои сомнение дека сторило кривично дело – Насилство од член 386 став 3 во врска со став 1 од Кривичниот законик. -Осомничениот 53-годишник, на 21 август, во Старата скопска чаршија, најпрвин упатил закани и навреди, а потоа и физички нападнал новинарска екипа на Телевизија Алсат-М. Со тупаници го удрил снимателот по главата и телото, а кај двете новинарки предизвикал чувство на вознемиреност и страв. Во насока на целосно расчистување и документирање на настанот, по наредба на јавен обвинител, обезбедени се снимки од видео надзор од околните објекти, информираат од Обвинителството. Јавниот обвинител до судијата на претходна постапка ќе достави предлог за определување мерки на претпазливост – привремено одземање на патната исправа на осомниченото лице, како и забрана за остварување контакти со сведоците и со оштетениот.

ДЕТАЛИ ОД ОЈО ЗА ИНЦИДЕНТОТ ВО ЧАИР: Бугарските навивачи се расправале со случајни минувачи, излегле од автомобилите и настанала тепачка

Ивона Петрова — Fri, 28 Jul 2023 07:11:39 +0000

Основното јавно обвинителство Скопје е известено за настанот и ги издава сите потребни наредби и насоки за идентификација на лицата кои учествувале во инцидентот во кој вчера беше повреден еден навивач на фудбалскиот клуб “Левски” од Софија. Како што информираат од ОЈО, според првичните сознанија, до настанот дошло додека навивачи на ФК “Левски” со две возила со бугарски регистарски ознаки се движеле во близина на трговскиот центар “Чаирчанка”, каде влегле во вербална расправија со случајни минувачи и граѓани. -Бугарските навивачи ги запреле возилата и излегле од нив, по што вербалната расправија преминала во физичка пресметка со група граѓани кои излегле од околните објекти. При враќање во автомобилот, 29-годишен бугарски државјанин бил повреден со остар предмет во абдоменот. Кај него е констатирана тешка телесна повреда и е хоспитализиран. По извршена хируршка интервенција, тој е во стабилна состојба. Со цел утврдување на идентитетот на граѓаните кои учествувале во настанот и кои според првичните сознанија не биле дел од локална навивачка група, како и целосно расчистување на настанот, подигнати се траги од лице место кои ќе бидат предмет на вештачење. Освен тоа, обезбедени се видео записи од околните објекти и од камерите на системот “Безбеден град”, а се преземаат и други дејствија, информира МВР. Што се однесува до останатите инциденти поврзани со навивачи на ФК Левски во текот на вчерашниот ден, обвинителството е известено дека се процесуирани прекршoчно.

Истрага против уште едно лице за грабнување во Скопје

Катерина Бојаџиева — Mon, 10 Jul 2023 12:56:23 +0000

Основното јавно обвинителство Скопје донесе Наредба за спроведување истражна постапка против едно лице за кое постои основано сомнение дека било вклучено во дејствија на кривично дело – Грабнување од член 141 став 2 во врска со став 1 од Кривичниот законик. Осомничениот на 3 март, заедно со уште две други лица против кои веќе се води истрага, учествувале во дејствија на грабнување на едно лице во Кисела Вода. Се преземаат дејствија за лишување од слобода на осомничениот.

Поведена постапка за сообраќајна несреќа со смртни последици во Скопје

Катерина Бојаџиева — Wed, 07 Dec 2022 09:46:01 +0000

Основното јавно обвинителство Скопје поведе постапка против едно лице за кривично дело – Тешки дела против безбедноста на луѓето и имотот во сообраќајот од член 300 од Кривичниот законик. Осомничениот 53-годишник, на 5 декември, со возило „Мини купер“, навлегол на крстосницата меѓу улиците „Пијанец“ и „Козле“, без да го пропушти возилото кое веќе се движело по улицата „Козле“ и кое имало првенство на минување. На тој начин тој го попречил движењето на мотоцикл „Хонда“, управуван од дете на возраст од 14 години. Мотоциклот удрил во страничниот дел од автомобилот, оштетениот се превртел и паднал на коловозот, па се излизгал на лентата наменета за сообраќај на возила во спротивна насока, каде удрил во автомобил „Цитроен Ц3“. Во несреќата, оштетениот возач на мотоциклот се здобил со тешки телесни повреди и веднаш починал. По предлог на јавен обвинител, Основниот кривичен суд Скопје определи мерки на претпазливост за осомниченото лице – забрана за напуштање на живеалиште/престојувалиште, обврска да се јавува повремено на определено службено лице, привремено одземање на патна или друга исправа за преминување на државната граница, како и привремено одземање на возачката дозвола односно забрана за нејзино издавање.

Поднесено обвинение за насилство сторено од омраза

Катерина Бојаџиева — Wed, 30 Nov 2022 09:15:01 +0000

Основното јавно обвинителство Скопје, по спроведена претходна постапка, поднесе Обвинителен предлог против 33-годишен скопјанец кој се товари за кривично дело – Насилство согласно член 386 став 5 во врска со став 3 и став 1 од Кривичниот законик. На 29.06.2019 година, обвинетиот во група со повеќе други засега неидентификувани лица, извршиле малтретирање, грубо навредување и грубо насилство врз едно лице. Делото било сторено од омраза заради сексуалната ориентација и припадност на оштетениот кон ЛГБТ заедницата. На наведениот датум, по завршување на „Парада на гордоста“ во Скопје, оштетениот со уште неколку други лица се враќале од ручек на Матка. Кога тргнале да си одат биле забележани од обвинетиот и другите непознати лица, кои ги препознале и започнале да ги навредуваат и да им се закануваат. Исплашени за нивната безбедност, оштетениот и неговите пријателки се качиле во такси возила и се обиделе да побегнат, но обвинетиот и неговата група со автомобили ги следеле. Такси возилото во кое бил оштетениот било попречено од друг автомобил и било принудено да застане, по што обвинетиот насилно ја отворил предната совозачка врата и физички го нападнал оштетениот, го удрил со бокс и започнал да го тегне за да го извлече од возилото. На тој начин обвинетиот му нанел телесни повреди на оштетениот – контузија и раздерно-нагмечна рана, а кај останатите сведоци на настанот предизвикал чувство на несигурност, загрозување и страв.

Претрес во домовите на две лица: Полицијата пронашла пиштоли марки „Астра“ и „Глок 17“ како и куршуми, поведена истражна постапка

Магдалена Андонова — Fri, 11 Nov 2022 10:07:58 +0000

Основното јавно обвинителство Скопје поведе истражни постапки против две лица за кои постои основано сомнение дека сториле кривично дело – Неовластено изработување, држење, посредување и тргување со оружје или распрскувачки материи според член 396 став 1 од Кривичниот законик. Полициски службеници на 10 ноември извршија претреси во домовите на двете лица. Првиот осомничен, во својот дом држел полуавтоматско оружје – пиштол марка “Астра” со калибар 6,35 милиметри и пет куршуми за тој пиштол. Вториот осомничен, пак, неовластено држел полуавтоматско кусо оружје – пиштол марка “Глок 17” и 17 куршуми. Надлежниот јавен обвинител, со цел да го обезбеди присуството на осомничените во текот на постапката, за едниот од нив достави предлог за определување мерка притвор, а за другиот – предлог за определување мерки на претпазливост.

Скопјанец осомничен дека продавал марихуана и овозможувал на други лица да ја користат

Катерина Бојаџиева — Mon, 07 Nov 2022 11:41:07 +0000

Основното јавно обвинителство Скопје поведе постапка против едно лице осомничено за кривичните дела – Неовластено производство и пуштање во промет наркотични дроги, психотропни супстанции и прекурсори од член 215 став 1, како и Овозможување на употреба на наркотични дроги според член 216 став 2 во врска со став 1 од Кривичниот законик. Осомничениот 21-годишен скопјанец, на 4 ноември, во домот во кој привремено престојувал на улицата „Христо Татарчев“, неовластено за продажба држел 46,62 грама марихуана. При претресот во домот биле затекнати уште четири лица на кои тој им ставил на располагање просторија во станот за уживање во наркотичната дрога. Полициските службеници при претресот пронашле и дигитална вага со траги од канабис. Надлежниот јавен обвинител до судијата на претходна постапка од Основниот кривичен суд Скопје достави предлог за определување мерки на претпазливост за да се обезбеди присуството на осомниченото лице во текот на постапката – забрана за напуштање на живеалиште/престојувалиште, обврска да се јавува еднаш неделно во судот, како и привремено одземање на патна или друга исправа за преминување на државната граница и забрана за издавање нова.

Истражниот центар при ОЈО Скопје почнува да функционира, во тек е набавка на опрема

Катерина Бојаџиева — Wed, 05 Oct 2022 16:16:44 +0000

Истражниот центар при ОЈО Скопје полека почнува да функционира – има истражители и во тек е набавка на потребната опрема за форензика и финансиски истраги. Во функција веќе е ставен сериозен дел и до крајот на годината се очекува истражниот центар да биде 80 проценти функционален. Како што информираат на денешниот брифинг во ОЈО Скопје, работата на истражниот центар во најголем дел се однесува на истраги од економски и финансиски криминал, кои се работат самостојно од истражителите и обвинителите кои постапуваат по предметите, а доколку е потребна асистенција се бара помош и од МВР и Управата за финансиска полиција. – Обезбедени се солидни простории. Комуникацијата меѓу истражителите и обвинителите е зголемена и тоа веќе се гледа за одредени предмети, како што е со предметот за болницата Жан Митрев, каде целосно ја работат истражителите од ОЈО Скопје, посочуваат од ОЈО. Во следните месеци, како што најавија на брифингот, во план е да се донесат истражители, односно стручни лица од областа на финансиски и компјутерски криминал и форензика. Платите за овие нови истражители и стручни соработници не се проблем, бидејќи најчесто станува збор за преземање на вработени од МВР и Финансиска полиција. Во нашата земја нема многу вакви истражни центри во рамки на обвинителствата и станува збор за неколку, како што се во ОЈО ГОКК и ОЈО Скопје.

Предложен притвор за дилер на марихуана од Скопје

Катерина Бојаџиева — Wed, 06 Jul 2022 10:12:43 +0000

Основното јавно обвинителство Скопје донесе Наредба за спроведување истражна постапка против 37-годишно лице осомничено дека сторило кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик Осомничениот најпрвин набавил семе и засадил канабис во саксии во неговиот дом. Растенијата ги одгледувал и од нив произведувал наркотична дрога – марихуана, која ја пакувал и неовластено ја продавал на наркозависници од Скопје за сума од 500 до 1.000 денари по грам. При претресот, полициските службеници во неговиот дом на улицата „Христо Батанџиев“ пронашле 399,04 грама марихуана. Јавниот обвинител до судијата на претходна постапка достави предлог за определување мерка притвор, бидејќи во конкретниот случај постои опасност од бегство и можност осомничениот да го повтори делото.

Словенец осомничен за поседување дрога и за кражба на велосипед во Скопје

Катерина Бојаџиева — Wed, 06 Jul 2022 08:27:25 +0000

Јавен обвинител од Основното јавно обвинителство Скопје донесе Наредба за спроведување истражна постапка против 41-годишен словенечки државјанин осомничен за кривичните дела – Неовластено производство и пуштање во промет на наркотични дроги, психотропни супстанции и прекурсори од член 215 став 1, како и Кражба од член 235 став 1 од Кривичниот законик. На 4 јули, пред спортскиот центар „Јане Сандански“, каде учествувал на Европско првенство за хип-хоп како тренер на група деца од Република Словенија, осомничениот забележал велосипед вреден 45.000 денари, кој би потпрен на ѕидот и незаклучен. Осомничениот го одзел велосипедот и го скрил во грмушка во близина на кејот на Вардар. Откако завршил натпреварот, велосипедот го расклопил на три дела и го ставил во багажниот простор на автобусот со кој групата требало да се врати во Словенија. Откако била пријавена кражбата, полициски службеници го легитимирале и го претресле осомничениот, а во неговиот личен багаж пронашле две стаклени тегли и пластично кутивче со вкупно 13,57 грама наркотична дрога – марихуана. Со оглед на тоа што се работи за странски државјанин без постојан престој во земјава, јавниот обвинител оцени дека постои очигледна опасност за бегство, како и можност тој да го повтори делото, па до судијата на претходна постапка од Основниот кривичен суд Скопје достави предлог за определување мерка притвор.