ојо тетово – Kurir.mk

ОЈО Тетово со истрага за недозволена трговија со дрога

Магдалена Андонова — Tue, 12 Apr 2022 13:22:00 +0000

Јавен обвинител од Основното јавно обвинителство Тетово донесе Наредба за спроведување истражна постапка против 27-годишен тетовец, осомничен за кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик. На 8 април, при претрес во семејната куќа на осомничениот, на улицата „29 Ноември“ во Тетово, полицијата пронашла вкупно 114,68 грама марихуана во повеќе помали пакувања. Дрогата била скриена на различни локации во домот, во автомобилот, како и во исушен канал за наводнување во дворот на куќата. Кај осомничениот била пронајдена и дигитална вага наменета за мерење при препакување на дрогата. До судијата на претходна постапка од Основниот суд во Тетово јавниот обвинител поднесе предлог за определување мерка притвор за осомниченото лице, оценувајќи дека постои опасност тој да се даде во бегство, да го повтори делото или да влијае врз сведоците и да се обиде да ги прикрие трагите. Судијата го прифати предлогот и на осомничениот му определи притвор во траење од 30 дена.

Покрената постапка против 31-годишен жител на Порој кај кого биле пронајдени кокаин и марихуана

Магдалена Андонова — Wed, 14 Apr 2021 11:15:41 +0000

Постапувајќи по поднесена кривична пријава, Основното јавно обвинителство Тетово донесе Наредба за спроведување истражна постапка против 31-годишен жител на Порој за кого постои основано сомнение дека сторил кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик. Осомничениот, на 12 април, во преградата меѓу двете предни седишта на автомобил „Хамер“ со тетовски регистарски ознаки, неовластено држел 99,91 грама наркотична дрога кокаин, како и наркотична дрога марихуана со засега неутврдена маса, спакувани во повеќе помали пакувања. При претрес на автомобилот биле пронајдени и две мали дигитални ваги. Јавниот обвинител до судијата на претходна постапка од Основниот суд во Тетово достави предлог за определување притвор за осомниченото лице. Судијата го прифати предлогот и на осомничениот му определи притвор во траење од 30 дена.

Покрената истрага против жител на с.Слатино – пуштал во промет наркотични средства

Магдалена Андонова — Mon, 08 Feb 2021 10:49:57 +0000

Основното јавно обвинителство Тетово донесе Наредба за спроведување истражна постапка против едно лице за кое постои основано сомневање дека сторило кривично дело – Неовластено производство и пуштање во промет на наркотични дроги, психотропни супстанции и прекурсори од член 215 став 1 од Кривичниот законик. На 6 февруари, во семејниот дом во тетовското село Слатино, осомничениот држел 74,37 грама наркотична дрога марихуана, спакувана во повеќе помали пакувања, скриени на различни локации во неговата соба. За 31-годишниот осомничен, за кого постои опасност да се даде во бегство, да влијае врз сведоци или да го повтори делото, надлежниот јавен обвинител предложи да биде определена мерка притвор. Судијата на претходна постапка од Основниот суд Тетово го прифати предлогот и на осомничениот му определи притвор во траење од 30 дена.

ОЈО Тетово поднесе казни против два лица за почитување на полицискиот час

Дарко Андоновски — Wed, 13 May 2020 13:45:04 +0000

Две лица од Тетово во изминатото деноноќие не ја почитувале забраната за движење во време на полициски час, соопштија од ОЈО Тетово. – По доставените кривични пријави против две лица, надлежен јавен обвинител од Основното јавно обвинителство-Тетово до Основниот суд-Тетово достави предлог за издавање казнени налози за двете лица. Лицата се обвинети дека сториле кривично дело Непостапување според здравствените прописи за време на епидемија, предвидено и казниво во член 206 став 1 од Кривичниот законик, информираат од Обвинителство. Обвинителството му предложи на судот на обвинетите да им изрече парична казна во висина од 100 дневни глоби.

ОЈО Тетово поднесе парични казни за шест лица заради прекршување на полицискиот час

Дарко Андоновски — Wed, 06 May 2020 13:07:34 +0000

Основното јавно обвинителство Тетово, постапувајќи по поднесени кривични пријави, поднесе предлози за издавање казнени налози за шест лица за кривично дело „непостапување според здравствените прописи за време на епидемија“, соопштија од ОЈО Тетово. – Обвинетите не ја почитувале Одлуката за забрана и посебен режим за движење на територијата на Република Северна Македонија и за време на полицискиот час на 5 мај се движеле на различни локации во градот, информираат од Обвинителство. Надлежниот обвинител на Основниот суд Тетово му предложи да изрече парични казни од по 100 дневни глоби за секој од обвинетите.

Истрага против две лица кои извршија разбојништво во Тетово

Ивона Петрова — Tue, 22 Oct 2019 11:05:02 +0000

Основното јавно обвинителство Тетово донесе Наредба за спроведување истражна постапка против две лица поради основано сомнение дека го извршиле кривичното дело – Разбојништво од член 237 став 1 во врска со став 22 од Кривичниот законик. -Двајцата тетовци на возраст од 22 и 21 година, на 14 октомври, како соизвршители, со сила и закана употребена врз оштетениот, 17-годишен нивен сограѓанин, одзеле подвижни предмети со намера противправно да ги присвојат. Откако сторителите го пресретнале оштетениот на улица, го сопреле и го удирале со тупаници, по што со закана од него одзеле 1000 денари кои ги имал со себе и мобилен телефон марка Ајфон 5, се вели во соопштението од ЈО. Ценејќи дека се исполнети законските основи, надлежниот обвинител му предложи на судијата на претходна постапка од Основниот суд Тетово да определи мерка притвор за осомничените лица.

ОЈО Тетово го истражува убиството во Мала Речица, мотивот се уште непознат

Катерина Бојаџиева — Mon, 15 Oct 2018 09:05:48 +0000

Јавното обвинителство на Република Македонија соопшти дека дежурен јавен обвинител од Основното јавно обвинителство Тетово извршил увид во тетовска Мала Речица, на местото каде што според првичните информации 53-годишен тетовец ја лишил од живот својата сопруга. Според ЈОРМ, мотивот за настанот што се случил во семејната куќа на родителите на починатата се уште се истражува. Напуштајќи ја куќата, осомничениот пукал и кон такси-возило во близина. Таксистот не е повреден, но пронајдени се проектили во автомобилот. По настанот осомничениот избегал и по него се трага. Надлежен јавен обвинител издаде наредба за обдукција на починатата, како и наредби за прибирање и за вештачење траги и материјални докази пронајдени на самото место.

ОЈО Тетово гони три лица за изнуда и противправно лишување од слобода

Ивана Ефремовски — Mon, 20 Aug 2018 13:33:11 +0000

Надлежен јавен обвинител од Основното јавно обвинителство – Тетово нареди да се спроведе истражна постапка против две лица за сторено кривично дело „изнуда“, а судија на претходна постапка им одреди мерка притвор во траење од 30 дена. Како што информираат од Јавното обвинителство на Република Македонија (ЈОРМ), вечерта на 16 август годинава во период од 21:23 до 00:01 часот по полноќ во стан на осми кат од зграда во Тетово оштетениот бил повикан од третото осомничено лице кое живеело во станот и откако влегол внатре, лицето излегло од станот и ја заклучило вратата. Тогаш од друга просторија излегле првоосомничените лица и се заканиле по животот на оштетениот барајќи му сума од 20.000 евра. - Исплашен за својот живот, оштетениот се јавил на својот син и му кажал дека противправно е затворен. Вечерта во неколку наврати прво и второосомничениот се јавувале на синот на жртвата барајќи ја наведената сума. Откако синот рекол дека ги обезбедил парите, се договорил со осомничените да се најдат пред бензинска пумпа, но не отишол на наведеното место туку настанот го пријавил во полиција, соопшти ЈОРМ. За третото лице кое со преземените дејствија сторило кривично дело „противправно лишување од слобода“ Обвинителството ќе донесе мериторна јавнообвинителска одлука по спроведување на истражната постапка во фаза на покренување на обвинение.

Притвор за четворица обвинети за крвавиот инцидент во Мала Речица

Ивона Петрова — Mon, 28 May 2018 10:43:37 +0000

Основното јавно обвинителство Тетово преку соопштение информира дека при подготовка на Посебниот предлог за Обвинителниот акт и Обвинителниот предлог за лицата инволвирани во вооружениот настан во Мала Речица е направен ненамерен технички пропуст. Имено, како што наведуваат, во предлогот испратен до надлежниот суд стои дека јавниот обвинител кој работи на предметот предложил мерка притвор „до изрекување на пресудата“ за дел од лицата опфатени со обвиненијата. - Нагласуваме дека се работи за превид и грешка од чисто техничка природа која веднаш е исправена и коригираните Обвинителен акт и Обвинителен предлог се испратени до надлежниот суд. Согласно ова направена е и исправка на информацијата за подигнатите обвиненија доставена до медиумите, наведуваат од ОЈО Тетово. Во корегираната информација објавена на веб страницата на Јавно обвинителство на РМ, стои „Надлежен јавен обвинител до Основниот суд Тетово предложи на тројцата обвинети кои се лишени од слобода, како и на еден обвинет кој и натаму е во бегство да им биде продолжен притворот“. (линк до објавата http://jorm.gov.mk/?p=5235) Воедно, од Тетовското ОЈО потенцираат дека направениот технички пропуст не го загрозува текот на натамошната постапка. МИА

ОЈО со детали за случајот со повредените војници

Ивона Петрова — Thu, 22 Mar 2018 14:40:25 +0000

Надлежен јавен обвинител од Основното јавно обвинителство Тетово изврши увид во хангарот на АРМ каде при чистење на оружје од воена вежба беа повредени двајца припадници на армијата. -Според првичните сознанија, настанот се случил кога двајца војници од тимот, по враќањето од воена вежба во Штип, го симнале митралезот тежок 35 килограми кој бил монтиран на хермелин. Во моментот на пренесување на митралезот во хангарот, тој испукал еден куршум кој повредил други двајца војници кои го чистеле оружјето. Надлежниот јавен обвинител разговарал со неколкумина војници кои биле очевидци на целиот настан и кои објасниле дека митралезот неколку пати заглавил и за време на воената вежба во Штип, се наведува во соопштението. За целосно расветлување на случајот, по наредба на надлежен јавен обвинител ќе биде извршено вештачење на митралезот и на чаурата пронајдена на лице место, а ќе биде прегледан и целокупниот протокол на изведената воена вежба во Штип. Дополнително, ќе биде прибавена и целосната медицинска документација за двајцата повредени војници, кои во моментов се во стабилна состојба и надвор од животна опасност. Настанот го испитува и Одделението за криминалистика при Воената полиција, кое исто така својот извештај ќе го достави до надлежниот јавен обвинител.